自問是個雪糕痴，所以一聽見Haagendaz就會眼睛發亮，不過呢度堂食實在太貴，而且最低消費每人要$45，分分鐘貴過食正餐，今次都係因為換左張$50 COUPON先來吧。
叫左兩樣野：
1)香橙比利時朱古力雪糕飲品(是熱飲，有香橙味，本來以為有一球雪糕咁，但原來只係講緊個味道，但尚算香滑）
2)火焰雪山(等左一陣先上既火焰雪山賣相精美，吸引了全場食客既目光，睇見已經好興奮。侍應先在雪山上加酒，只見一陣藍色的火焰把山頂輕輕燒燶，隨之而來是一陣濃烈的酒味，此時大家已急不及待要食了！蛋白製既雪山質感奇特，有少許像棉花糖，可能落左魚膠，裡面包住蛋糕同三款唔同味道既雪糕，分別係曲奇，草莓同果仁，配合旁邊色彩繽紛既水果，同時間享受了雪糕既甜，水果既酸，酒既苦，那種感覺實在非筆墨能夠形容哩！呢個雪山份量幾大，因為之前食左晚飯，再食佢到中途就開始漏了，下次有機會都係留肚先食好Ｄ)
呢度座位唔算多，而且有少少迫，除非有得坐窗口位，否則可能會破壞享受雪糕既情趣喇！

冇去過日本既人可能覺得呢度唔好食，但其實佢既咖喱飯味道十分正宗，而且眼見有好多日本人幫襯，就更加放心了！
講返食物，主要係日式咖喱飯，亦有拉麵小食。我地叫左一個咖喱牛肉薯餅飯同一個咖喱豬肉飯套餐配炸蝦餅烏冬。
我係汁怪，最怕Ｄ飯乾爭爭，呢度咖喱汁多過飯就岩晒我喇！顧名思義，牛肉薯餅係混入牛肉碎的薯餅，配上咖喱飯，味道一流，亦唔會覺得漏，加上麵鼓湯，女仔份量岩岩好！
而咖喱豬肉飯亦唔錯，主角係微辣既咖喱汁，所以豬肉唔係好多，不過撈飯就一定卓卓有餘，配埋一碗迷你烏冬，就係美味既一餐了！
佢地既侍應都係菲律賓人，多數講英文，有少少格格不入，或者就係呢度既特色吧！

建興阿婆豆腐花坐落榕樹灣至索罟灣必經之地，是不少遊人的歇腳點，儘管地方不算乾淨，但為了見識當地特色，都會不惜成為蚊蠅的點心來一碗山水豆花。
凍豆花是必吃之選，或許是因為沒有雪櫃存放吧，雖說是凍，但其實只是常溫，所以未能解渴。不過它的質感滑溜，甜甜的，有獨特的豆香，和外面吃的很不同，可說一試難忘！
補充完體力過後，又要啟程了，滑滑的豆腐花，後會有期喔！

入南丫島搵地方食TEA唔知食乜好，經過呢度俾焗爐內的香腸吸引，見裡面都有一枱客，就放心入去喇！
呢間cafe好細，得兩張枱，水吧佔左舖面既大半，由一對夫婦經營，俾人一種溫馨既感覺。
我地叫左一個法式潛艇包同木瓜鮮奶，潛艇包原來要係雪櫃儲存，食時先烘熱，夾住蕃茄，青瓜同火腿，初時以為會好硬，但食落軟熟，味道亦唔錯。木瓜奶就偏淡，證明係真材實料冇加糖水。
呢度有好多外國人幫襯，佢地都會叫鮮榨果汁，睇黎幾好味咁，下次要試下先！除左三文治同果汁，呢度仲有焗薯同低脂曲奇餅，買返盒做手信就最好喇！

黎呢度食預左要排隊，行完CITY SUPER返黎就岩岩好有位喇！
係海港城既食肆呢間算係好味抵食，可惜係冇卡位坐，Ｄ位有Ｄ迫，同隔離枱唔夠三吋，所以坐得唔多舒服，不過食物搭救啦！
今次叫左：
1)小籠包(充滿鮮味肉汁既小籠包非常美味，趁佢熱騰騰一口食左佢就最好，但小心燙口。)
2)鱔糊炒拉麵(碟頭幾大，唔算好油，亦很足料，唔錯！)
3)白菜獅子頭(原本以為獅子頭兩舊肉會好滯，但食落又唔覺，而且味道適中，配上清淡既津白菜就係健康既選擇喇。)
4)荳沙鍋餅(炸得香脆既餅皮包住唔太甜既荳沙，不過皮略厚，如果加埋香蕉會更好哩！)
食過咁多間翡翠都係覺得呢度最好食，可能因為係遊客區唔可以做衰個名卦，下次再黎排過先得！

呢度既韓式午餐味道唔錯，之前試過一次，今次食過返尋味。大約一點來到唔算人多，仲可以自己揀位坐，我地叫左兩個午餐：

1)燒牛肉炒粉絲(韓式粉絲比中國果Ｄ粗，口感滑溜，加上香濃既燒牛肉同紅蘿蔔絲，美味非常！)
2)雞肉拌飯(可以加錢轉做石頭鍋，冇既就會用大碗盛載。拌飯用料十足，有雞柳，泡菜，菠菜，芽菜，仲有隻靚靚既太陽蛋，伴以甜醬。韓國既拌飯係唔熱既，只係暖暖地，呢個拌飯味道唔錯，只係醬汁太少有Ｄ乾，所以叫佢多拿一碟醬，咁就岩岩好喇！p.s.我係"醬怪")

餐飲可以叫柚子茶，都係平時買到開水果Ｄ，冇乜特別。

總括黎講呢度食味唔錯，服務都幾好，價錢又唔貴，值得一試！

去樂富食飯，見呢度有兩小時任食火鍋，覺得幾抵就試下啦！四人卡位尚算寬敞，不過多野食時張枱就唔多夠位擺喇。
以人頭計既火鍋餐有好多野食，先來一盤壽司同天婦羅，每人仲有一個主食揀，可以係飯麵或小食，四個人叫左一個帶子炒飯，一個拉麵，一個冷麵同串燒。
壽司冇乜特別，同超市食果Ｄ平野差唔多，帶子炒飯就幾香，味道都唔錯，豬骨湯拉麵都係咁，至於個冷麵既質感就好怪，硬硬的，一咬就斷，可以話係超難食，千祈唔好叫！而個串燒係腎同豬肉串，幾好味！
今次個鍋叫左豬骨湯底，唔算濃，但又未至於似白開水，佢地會先上一大盤配菜，到食晒先再加，都幾大堆頭，乜料都有，但當然唔係咩名貴食材啦，細佬瘋狂地叫肥牛，咁就抵返晒喇！不過火鍋既配料款式唔多，我地想叫金菇都冇。
呢個餐包野飲，加少少錢可以叫台式特飲添，我叫左個麥草蘆薈，清清地幾好飲！
因為係任食，所以食左好多，真要節制一下了！

喉嚨痛但又唔想出街，細佬提議試下叫呢間既Pizza，貪佢加$20送多一個，我諗唔食個邊都應該唔會太熱氣卦，又或者以毒攻毒可以快Ｄ好返，便不惜兩個人叫左兩個大批，真係好誇！
細佬鐘意食肉，所以叫左一個啖啖肉同一個日式咖喱雞柳拼吞拿魚，為免太滯個啖啖肉係薄批黎。落Order後大約一個鐘就來了，賣相唔錯，個薄批切開左細細件，好快就食晒喇，係個厚批比較滯，所以食左半個就食唔落喇，結果成為細佬第日既晚餐。
基本上兩個批既料都幾足，不過相對黎講真係Pizza hut既好味Ｄ，應該係因為呢間既味淡Ｄ冇咁濃，但貪平就確係唔錯既選擇哩！

幾個月冇來食，菜式都變埋，以前果Ｄ焗叉燒飯冇左，頓時少左好多選擇添！
唯有叫其他啦，例牌叫燒味八寶飯同冰鎮奶茶，加多個咕嚕肉餐同咖喱牛腩飯。
燒味八寶飯顧名思義，有八種餸，包括叉燒，燒肉，燒鵝，紅腸，鹹蛋，燻蹄，切雞，魷魚，個碟係扇型既，好靚，不過咁樣Ｄ飯就少左好多喇。呢個飯Ｄ餸唔係話好特別，但就收五六十蚊，實在係好貴，同埋最差係燒鵝冇酸梅醬！而且以前Ｄ餸都幾多肉，但宜家就得Ｄ骨！
至於個咕嚕肉飯，味道還不錯，應該係新鮮整既。
咖喱牛腩飯冇食到，不能評價。
因為唔夠飽，最後叫多左個燒味飯，不過不失！
其實黎呢度都係志在杯冰鎮奶茶，阿媽至鍾意，貪佢有兜冰好似好得意咁，口感亦算香滑，可惜我唔多受到，試過飲完去搭巴士差Ｄ暈左！
茶餐廳黎講呢度真係幾貴，反觀對面沙嗲王排長龍，呢邊就大把位，真係高下立見喇！

同朋友食完晚飯意猶未盡，再戰甜品，呢度甜品款式多，坐得舒服，傾計最岩，係Ｄ侍應比較生手差少少。
每次見到唔同款式既雪糕都令人興奮非常，今次我叫左個黑芝麻蜜豆沙，朋友果個就係綠茶紅荳甜點。
所謂蜜豆沙，即係紅荳沙加透明啫喱，啫喱係冇味既，所以唔會話甜到漏，配上黑芝麻雪糕，大大既雪糕球芝麻味香濃，亦有芝麻既質感，加上色彩繽紛既果脯，睇見都想食喇！只係果舊杏脯偏酸，個人覺得唔太討好。
至於朋友果個就係綠茶雪糕，有紅荳同日本丸子年糕墊底，丸子有咬口，是傳統日式甜品既典範。
經過多年食雪糕既經驗，發現大部分雪糕，無論係咪名牌都有一個缺點，就係好快會溶，令美味度大減，如果有人發明Ｄ方法令到雪糕冇咁快溶就好喇！