成年都冇黎食喇，原來餐牌都改埋，以前最鍾意食既白雪雪軟綿綿既魚蛋竟然冇左，有Ｄ失望哩！
要纖體，所以揀左Ｄ好清既野食：
1)海之幸沙津(生菜墊底既蝦沙津，配油醋汁，味道清淡，是健康之選)
2)醬汁串燒帶子(可以揀鹽燒，但唔想咁乾就揀佢，細細粒既帶子岩晒怕肥一族)
3)雜錦魚生飯(魚生料足，份量唔少，兩個人分剛好)
今次我地精左六點幾就入坐，唔使排隊就入得，不過就要坐除鞋位，好在冇著穿窿袜唧！
呢度有個特色，隔冇耐就會有宣佈話有特價食品，不過通常都係限量得十客之內，想食就要快喇！
整體黎講呢度食物唔錯，係貴左Ｄ囉，所以都係隔一排先會再黎喇！

原本訂左七點，六點幾去到諗住睇下有冇得入，點知個知客話未得住，叫我揀海鮮先，等等下就有個員工黎叫我地不如去一個街口外既總店，話即刻有位，點知去到要從新登記，仲鬼死咁多人，我見唔對路咪叫細佬返訂左果間店睇下情況，點知個知客話我地走左，過左號碼唔會再俾位我地，我地咪同佢理論囉，宜家係佢Ｄ人叫我地去第二間舖架麻，結果要勞動家姐鬧佢一餐先肯俾位我地！
講返食物，我地叫左一個餐牌冇既六人餐，包六款海鮮，有以下食物：
1)芝士焗龍蝦伊麵底(因為係套餐，所以唔好奢望好肥美既龍蝦，都只係龍蝦仔開邊，汁亦唔夠香濃，一般啦)
2)薑葱焗蟹(一向唔係好識食蟹，感覺都係中規中矩咁)
3)豉汁蒸鮑魚仔(每人有兩隻，味道靠豉油帶出，普普通通)
4)粉絲蒸扇貝(都係每人有兩隻，粉絲好多，可惜粒貝太細粒)
5)蒸倉魚(無乜特別)
6)椒鹽瀨尿蝦(呢個好好味，椒鹽同瀨尿蝦好夾，味道鮮美)
7)炒通菜(一般炒菜，都幾好食)
8)沙薑雞腳(全個餐最好食既竟然唔係海鮮係呢個，雞腳炆得好焾，沙薑味香濃，必食之選)
另外我地叫左個沙津海鮮卷同全記炒飯，都唔錯。餐送既甜品係綠荳爽，清清地都幾好。
呢度餸菜既份量唔少，點菜時侍應會提醒你唔好叫太多，我地今次叫左六人餐都食剩兩大盒打包。
雖然最後之前得罪我地既知客過來了道歉，但難免對呢間舖既印象扣分。所以一間酒樓既成功，除左要著重食物質素之外，服務亦唔可以忽視，仲有洗手間的管理都好緊要，呢度水浸既洗手間真係好嚇人哩>O<！

生煎包，細細個，食多個都唔覺漏！
小籠包，皮薄汁多，十蚊四個邊度搵？
煎餃子，大小適中好味道！
荳槳是餃子和包包的良伴，不容錯過！

留意事項：
呢度主攻外賣，堂食既位好少，只有三張枱！
呢度賣既包同餃子都係白菜豬肉饀，冇韮菜你揀！
食小籠包時小心肉汁彈出，整污漕件靚衫就唔好啦！

聽講呢度食車仔麵好出名，就黎試下啦，裝修過既舖面尚算坐得舒適。
呢度車仔麵既餸款式唔多，但基本既豬皮，魚蛋，蘿蔔，牛腩都有，我叫左個牛腩冬菇咖喱魚蛋油麵，麵底唔多，好肚餓既話應該唔夠飽，牛腩ok，其他都冇乜特別，係個湯底幾夠甜囉，之但係會唔會係因為落左味精就不得而知喇！
我地另外叫左個油菜，係白菜仔，但好似唔多夠熟，有少少硬。
係度食車仔麵加$5有涼粉一碗，唔好錯過！
雖然點菜時要自己出去排隊叫，但叫完後會有侍應幫你拎埋位，免卻倒瀉既危機，呢點值得一讚！
總括而言呢度既食物唔算好突出，況且也不便宜，試過就算了！

呢間小食館我好細個食到宜家，係慈雲山讀書既應該冇人唔識，因為佢係區內唯一呢類型既食店，好多人畢業後都會返黎回憶下，可以明白點解佢會屹立不倒，除左係佢可能已經買左間舖唔使捱租之外，食物亦係主要原因！
呢度既食物雖然普通，但都有獨特既名字，係咪熟客一叫就知。同埋佢既食品配搭彈性好高，可以話點叫都得。今次同家姐黎呢度食lunch，叫左以下食物：
1)翅油(即係碗仔翅加麵底，我通常會揀油麵。至於碗仔翅料唔算好多，但味道唔錯，食慣左總係覺得出面果d麻麻地)
2)三溝(魚肉+碗仔翅+生菜，是為三溝，減去生菜就係兩溝喇)
3)豬皮(偏爽口，如果焾d會更好，配特製沙嗲汁就唔會覺得淡了)
4)炸超老蛋(小食店既招牌菜炸魚蛋，係必食之選，可以揀炸既程度，初食既可以揀中年蛋，家姐最鍾意食超老蛋，貪佢夠燶，基本上已經冇乜魚蛋味，但係非常脆，好似食一包包果d零食咁，不過係熱既，幾過癮)
6)炸墨丸(炸墨丸同燒野食時既感覺差唔多，其實係屋企都可以試下整，唔知效果會點呢？)
5)什果冰(忌廉汽水加鮮雜果，清涼解渴，唔鍾意可以揀其他味既汽水都得)
基本上呢度已經係我既飯堂之一，所以食黎食去都係果d野，但都唔會厭，皆因裡面滿載大家既成長回憶哩！
有d人可能覺得老闆好惡，但識佢耐左就會改觀架喇！

好多美食廣場都見到呢間舖，sell既係印度薄餅，今次我地淨係叫左個咖喱素菜，角仔大大，配乳酪醬汁，味道幾好，內餡係咖喱薯蓉同雜豆，唔算辣，不過食晒成隻都幾滯！套餐包一杯汽水，可以做一餐了！

王將的標誌係一隻巨型餃子，賣既當然係餃子啦！見有個師傅密密咁係度包，好似好新鮮咁，就忍唔住買了。除左招牌貨餃子之外，呢度仲有麵飯賣，亦有唔少套餐。我地揀左個套餐，包三隻餃子，一個蛋包飯同汽水。餃子雖然係人手造，但食落竟然似機製，唔知係好事定壞事？不過係幾好食既。至於個蛋包飯，個皮好薄，但蛋味欠缺，裡面的飯都係一般，而且唔多夠熱，我諗下次都係淨食餃子好了！

鍾意食日本咖喱，貪佢甜甜地唔太辣，配上日本珍珠米白飯簡直一流。自從某次黎食過之後就愛上了，係美食廣場度有兩間食咖喱既，呢間有套餐，包麵鼓湯同飲品，感覺較抵。
日本咖喱飯通常都係配勁熱氣既炸物，今次我地叫左兩個餐share，一個吉列豬扒炸蝦，一個海鮮，海鮮果個仲送一個大薯餅，口味任擇，我地揀左蟹柳粟米味，不過就凍左Ｄ。
個人覺得日本咖喱飯同吉列豬扒炸蝦最夾，可能食慣左，呢度既炸物都係即炸既(除左薯餅)，新鮮香脆，同埋D汁一定夠撈飯，唔會乾爭爭。至於海鮮餐，有魚，蝦，蠔，都幾足料，細佬都話好食！
其實呢個city super既美食廣場有好多選擇，下次黎可以試埋其他，見到有人食炒麵份量多到成座山咁，真係要多幾個人分先得喇！唯一美中不足係坐得麻麻舒服，同埋要預左人多時要等位/被等！

晚餐唔知食乜好，通常都會去左食連鎖店，呢次係我第三次黎呢間和民，野食都係一咁細細碟，味道就中規中矩啦！
星期日等左大半個鐘就有位都算係咁喇，今次叫左以下食物：
1)星饅魚天婦羅卷(待應話因為已落特別醬汁，所以唔使再點鼓油，但食落總係覺得淡，而且饅魚係炸過的，應該唔係新鮮整，所以比較硬)
2)海鮮麻醬冷麵(麻醬味道清香，唔會話乾，海鮮方面都叫有兩隻蝦，兩個人分岩岩好，整體黎講幾好食)
3)豚平燒(煎蛋包住豬肉芝士椰菜，味道幾好，不過偏油，同埋醬汁稍鹹)
4)豬扒鍋(跟爐上既豬扒自己加蛋，但好快燒乾汁，要趕快熄火，可惜味道又係鹹)
5)抺茶雪糕紅豆丸子(雖然上菜時綠茶雪糕已溶左一半，但亦無損美味，丸子又煙靭，是我全晚的至愛)
呢度燈光太柔和，食食下竟然覺得好眼瞓！

見翔天廊岩岩開幕，就特登黎看個究竟，果然好大，仲幾多食肆，而且有COUPON派，可是人流實在慘不忍睹，店舖幾乎全部拍烏蠅，我諗板前係數一數二叫做有啲生意了！
咁難得唔使排隊就有得食，當然要慢慢歎，我地叫既都係平日食開果啲，唔算特別，其中值得一提既係海鹽帶子壽司同饅魚杯壽司飯，其實啲海鹽好似冇咩作用，有冇都冇咩分別咁，不過粒帶子都幾大粒都新鮮。而個饅魚飯即係將啲壽司變成一碗飯，賣相幾特別，份量等於四件壽司咁多，所以夠晒飽！
平心而論板前既壽司係水準之上，甚至可比美日本那邊的迴轉壽司哩！如果唔使排隊就好喇！
平時入機場食野冇咩選擇，宜家開左呢邊真係好好多，下次要去埋果度既4D影院睇戲先得！