中上環荷李活道一帶西餐廳林立，今次去到上環Bacchus品嚐法國菜Fine Dining ，Bacchus係古希臘酒神嘅意思，顧名思義，餐廳提供多達800種嚟自世界各地靚酒，仲聘請咗法藉大廚Mickael Messina同埋侍酒師Hervé Pennequin坐鎮，大廚利用法國同埋日本嘅優質食材，更按季節推出唔同嘅Menu，炮製出fusion法國菜，每道菜色精緻又有創意，配上Hervé精選嘅美酒，係真正美酒佳餚享受。餐廳內裏燈光柔和，格調浪漫，環境舒適，更設有包廂同埋露天戶外座位，係情侶約會嘅不二之選。 8 Course Opera Tasting Menu ($1,280/ person) Parker House /Whipped Brown Butter 自家製黑蒜麵包，烘至微熱，口感鬆軟，搭配用黑蒜同埋日本白醬油調製而成嘅牛油，令牛油味更豐富突出。 Kanpanchi / Ponzu / Caviar 魚子醬金箔鰤魚，用上金色盒盛載，打開嘅時候充滿儀式感，西班牙魚子醬配上日本鰤魚刺身，口感細膩，用上正宗貝殼匙羹，黑魚子帶有鹹鹹嘅鮮味，鱘魚卵豐腴嘅魚油喺口中爆開； 鰤魚刺身肥美香滑，配上金箔同埋紫蘇花穗作點綴，盡顯奢華，充滿視覺享受。 Polmard Beef Tartare / Smoled Pike Roe 牛肉他他配煙燻梭子魚子，賣相好似一個小盆栽，好可愛。脆皮包住軟腍順滑嘅牛肉他他，牛肉嚟自法國Polmard，表面放入煙燻梭子魚子，牛肉嘅鮮味加上梭子魚子嘅鹹鮮令到牛肉味道層次更豐富。 Ceps Mushroom / Soup 牛肝菌忌廉湯，牛肝菌嘅香氣搭配經典法式蘑菇泥，入口順滑，忌廉湯味道鮮香，帶有香濃菇味。 Red Snapper / Tomato / Chorizo / Basil 紅鯛魚配蕃茄羅勒，紅鯛魚煎得香脆，肉質鮮嫩，搭配清新嘅羅勒同埋味道微酸蕃茄醬汁去調味，好開胃。 UnI / Linguine / Red Prawn / Green Mango / Wasabi 海膽紅蝦青芒果芥末意粉，意粉煮至Al dente，口感彈牙，相當掛汁，青芒果嘅酸味配上Wasabi芥末嘅香味，再加入北海道海膽，大大提升咗鮮味，仲有爽彈嘅紅蝦粒，味道層次感豐富，好特別。 65 Degree Iberic Pork Belly / Hawthorn / Hibiscus 主菜西班牙伊比利亞黑毛豬配山楂洛神花醬，伊比利亞黑毛豬係最矜貴嘅級別，用上65低溫慢煮方式去處理，黑毛豬五花肉非常厚肉，肥瘦均勻，肉質軟腍，脂肪部位入口即溶，紫薯嘅香甜配上山渣洛神花醬嘅酸味令到肉味更突出。 A4 Miyazaki Wagyu/ Yuzu Kosho / Black Olive 主菜A4宮崎和牛配黑橄欖柚子醬，宮崎和牛脂肪比例均勻，口感嫩滑，脂香濃郁，入口即溶，配合黑橄欖油同埋柚子嘅酸味，非常適合帶有濃厚油脂香嘅和牛，令肉味更加提升。 Petit Fours 瑪德蓮蛋糕/伯爵茶蛋糕/朱古力/法式軟糖，食到最後有四種唔同味道嘅甜品為今次Fine Dining晚宴畫上完美句號。

最近蘭桂坊因為七人欖球賽所以氣氛再度熾熱起嚟，今次去位於中環蘭桂坊加州大廈食日本菜，加州大廈各國美食佳餚應有盡有，當然唔少得呢間高質日本菜FUMI 。FUMI 以木系為主嘅裝潢，外面仲有露天嘅位置，環境寬敞舒適，亦都可以坐喺壽司吧前面，睇住師傅做壽司。 餐廳食材以高品質同埋新鮮為主，今次餐廳特製cocktails 配上omakase，好特別嘅體驗。 今次揀咗Fumi Delixe Tastng Menu 嚐味盛宴（$1180） 先付：帆立貝大葉天婦羅、茄子明太子、鰻魚玉子燒 大葉天婦羅炸漿輕薄香脆，帆立貝肉嫩滑，裙邊口感好爽；茄子明太子，茄子皮薄細嫩，配上明太子味道鮮美濃郁；鰻魚玉子燒，蒲燒鰻魚醬汁惹味，肥美豐富，玉子帶有豐厚紮實嘅口感，加上甜滋滋味道，好吸引。 造身：海膽、鮮吞拿魚腩、深海池魚、油甘魚 每種刺身新鮮肥美厚身，海膽帶有啖啖海水鮮味，入口軟滑鮮甜；個人最鍾意鮮吞拿魚腩拖羅，粉嫩肥美，帶有滿滿嘅油脂感，口感豐富，入口即溶；深海池魚口感嫩滑，肉質爽口；油甘魚帶有魚油香氣，味道甘甜鮮美。 御椀：海鮮土瓶湯 海鮮湯味道清甜，裏面材料豐富，有蔬菜、菇類，仲有蟹肉可以食到，食完刺身可以飲海鮮湯暖暖胃。 燒物：香蔥宮崎雞肉脆脆卷 宮崎雞肉外層煎得香脆，肉質彈性多汁，雞肉鮮美，配上香蔥去燒帶有淡淡蔥香。 揚物：鯛魚九條蔥天婦羅 鯛魚天婦羅炸至金黃酥脆，細嘴慢嚼去用心品嚐，天婦羅酥脆之餘仲可以食到鯛魚鮮味；配搭時令蔬菜九條蔥天婦羅，同樣酥脆，沾上濃郁鰹魚醬汁，味道更豐富。 強餚：A5鹿兒島和牛鐵板燒（三角、西冷） A5鹿兒島和牛三角肉同西冷帶有細緻嘅油花，經過鐵板燒去燒香，和牛香氣濃郁，口感軟嫩滑順，肉汁豐富，入口即溶。 壽司：廚師發辦壽司4點 Omakase有牡丹蝦、魷魚、深海池魚、左口魚壽司。牡丹蝦肉細緻飽滿，味道清爽甘甜；魷魚肉質鮮甜爽彈；深海池魚口感嫩滑，肉質爽口，魚味甘甜；左口魚肉質滑溜，鮮味十足。 時令果物 食到最後有日本蜜瓜、士多啤梨同埋梨，大滿足。蜜瓜味道清甜多汁，味道濃郁；士多啤梨清甜之餘帶有微酸；梨子味道清爽帶有回甘。

今次去咗位於西營盤水街Verde MAR食墨西哥菜，餐廳由墨西哥籍廚師Eligio主理，餐廳主打墨西哥特色菜同埋牛油果為主題嘅菜式，好健康，牛油果控必定鍾意。餐廳裝潢自然光線充足，綠野園林壁畫同埋店內嘅樹懶Piñata裝飾品都係由廚師Eligio製作，充滿異國風情。後面設有清新別緻嘅花園，種滿可食用墨西哥仙人掌同埋香草，令人好似置身喺綠野小森林之中，好舒服清新。

Steak Arrachera Carne Asada
墨西哥特色菜式，牛扒用上美國特級安格斯牛扒，牛扒煎至Medium，內裏色質紅潤，牛肉味濃，配搭墨西哥薄餅，口感柔軟煙韌，帶有香濃小麥香，將薄餅夾上牛扒，沾上牛油果醬同埋特製莎莎醬，更增添墨西哥風味。

Avocado Tostada
墨西哥經典小食牛油果粟米片，將牛油果切片，擺盤係玫瑰花嘅形狀，好精緻。粟米薄片口感特別，脆度十足，味道微辣，食到中段辣味係慢慢滲出嚟，好過癮。

Fried Chicken
墨西哥風味嘅炸雞鎚醃得入味，醃至深啡色，炸雞外脆內軟，內裏有肉汁，沾上蕃茄醬，味道酸酸甜甜好惹味。

Avocado smoothie
餐廳signature飲品牛油果沙冰，用上仙人掌杯好可愛，沙冰以新鮮原隻牛油果加奶調製，口感綿密順滑，充滿濃郁嘅牛油果味道，搭配冰沙嘅清涼感，好清新健康。

位於中環嘅意大利餐廳BACI，由意大利總廚主理，充滿正宗地道意式風味，餐廳最近喺亞太區50大薄餅大賽（50 Top Pizza Asia Pacific 2022）中奪得亞太地區第12名及全港第2名。星期日去咗BACI度歎weekend Brunch同埋Semi Buffet，有3小時任食即叫即烤嘅得獎pizza，海鮮、沙律、意式凍肉，芝士同埋甜品等，種類豐富，更可加錢選擇一款主菜同埋2小時嘅飲品free flow，包括有雞尾酒同埋紅白酒。值得一讚嘅係餐廳每個店員都殷勤有禮，服務周到，喺呢度可以過一個好Chill嘅下午。

新鮮烘焙薄餅
得獎薄餅有五款口味，Margherita、Italian Sausages、Tuna, Onions & Mozzarella、4 Formaggi 、Pepperoni ，直接同店員order就可以，廚師利用傳統石窯烤爐炮製正宗意大利薄餅，廚師中途會用工具將薄餅keep住轉邊，令到薄餅烤得均勻，新鮮即整熱辣辣。四重芝士薄餅會有拉絲，充滿濃郁芝士味；意式辣肉腸薄餅辣肉腸辣味突出，配搭mozzarella芝士好香口。每款薄餅餅底充滿濃郁麵粉香，邊位微脆帶有焦香，口感軟熟煙靭，店員亦會提供自家製辣椒油比客人點薄餅食，增添辣味。

Tagliata di Manzo
主菜烤澳洲和牛西冷，牛扒煎至Medium，內裏色質紅潤，和牛油脂豐盈，juicy有肉汁，牛肉味濃，肉質軟腍，表面烤至焦香，加上紅酒汁烹調，令到味道提升，帶有微微酒香。配以香脆炸薯條，薯條已經有調味，鹹香惹味。

Fettuccine Bolognese
和牛肉醬自家製寬條麵，寬條麵充滿香濃蛋香，麵條煙韌彈牙，麵條掛汁，每條寬條麵都掛上大量和牛鹹香，牛肉味濃郁，加上用帕爾馬芝士烹調，肉醬融合咗芝士嘅鹹味同埋奶油味，每一啖都好惹味滿足。

海鮮櫃枱
海鮮自助區冷盤有爆膏開邊波士頓龍蝦、龍蝦鉗、紐西蘭青口、海蝦同埋翡翠螺，每款都好新鮮，龍蝦肥美，爽口彈牙，肉質鮮嫩，龍蝦有爆滿紅色膏，帶有甜味同埋濃郁海鮮香氣，而龍蝦鉗味道帶有海水鹹香。旁邊仲有唔同嘅醬汁可供自行調配，另外廚師refill海鮮嘅速度好快。

甜品及水果拼盤
甜點種類繁多，有tiramisu、朱古力蛋糕、雜莓芝士蛋糕、檸檬撻、芝士蛋糕、焦糖布甸同埋雪糕等，蛋糕切件size 大件，味道唔會太甜。咖啡、士多啤梨雪糕味高質，旁邊仲有雪糕筒提供。旁邊仲有水果區，有大量嘅新鮮蔬果，包括火龍果、蜜瓜、提子、西柚、西瓜、橙同埋菠蘿等，可以作為餐後水果。

廚師精選沙律
好多特色意大利沙律以供選擇，擺放得整齊企理，多達二十款沙律，每款新鮮健康，膳食纖維豐富，包括有紅石榴藜麥沙律、黑松露蘑菇、蕃茄水牛芝士、卡布里沙律、煙燻三文魚等。

精選特級意式凍肉及芝士拼盤
芝士同埋凍肉都有五款，包括有黑松露芝士、羊奶芝士等，芝士已切好細細件，方便客人去拎。Parma Ham味道鹹香，質感油潤，火腿味濃郁，配搭蜜瓜嚟食一流。

El Grape
餐廳最新嘅 signature cocktail ，今次以茶為主題，特調出好飲同特別嘅雞尾酒，鳥籠狀嘅雞尾酒杯懸喺半空加上色彩斑斕嘅花瓣，造型好夢幻。EI Grape用上自家制伯爵茶氈酒同埋巨峰提子汁作為主調，香甜嘅提子味中滲出伯爵茶嘅茶香，再加上接骨木花糖漿同埋檸檬汁，味道甜美芬芳。

主打日式一人火鍋嘅放題店大將最近推出和風羊腩煲，啱哂最近寒冷嘅天氣。食完羊腩之後更可以加入牛肉、豬肉、海鮮同埋其他配料變成shabushabu，暖胃又暖身。餐廳主打日式木系風格，燈光柔和，座位舒適闊落，環境整潔衛生，店員上菜快捷，服務態度都唔錯。 澳洲和牛牛小排．嚴選和牛胸腹眼 選擇咗呢個套餐嘅120分鐘放題，一坐低店員送上嚐味頭盤一碟，裏面分別有牛舌，嚴選和牛胸腹眼、鮑魚兩隻，廣島蠔兩隻。和牛牛小排脂肪多，肉質甘甜，牛味濃郁；和牛胸腹眼油花豐富均勻，質感軟腍。 和風羊腩煲 羊肉份量非常足料，充滿羶香，肉質鮮嫩，羊腩燜得惹味，羊腩近肋骨位嘅脂肪部位好香，好有咬口。除咗羊肉口感豐富外，亦具有暖胃驅寒、溫補氣血、開胃健脾之功效，非常健康。煲內嘅枝竹吸收咗醬汁同埋羊肉精華，食起嚟特別香濃。 牛豬雞羊海鮮及其他配料 店內另有多達28多款牛豬雞羊海鮮同埋其他配料可以向店員落單，牛肉有嚴選Prime牛肩肉、美國牛肩肉、美國牛板腱、滑牛肉、麻辣滑牛肉、一口牛肉粒、牛胸爽、牛百葉；豬肉有熊本豬梅花肉、伊比利亞五花肉；雞肉有昆布漬雞肉；羊肉有特選羊卷肉。 海鮮有日本帶子、海蝦、青口杭州黑魚片、花膠、水魷魚、蝦滑、沙白同埋大蟹棒；其他配料有即炸午餐肉、即炸響鈴、雲吞及魚皮餃。 嚴選Prime牛肩肉筋比較少，油脂比例多，牛肉味濃郁；伊比利亞五花肉肉味濃，肉質鮮嫩多汁；海鮮方面，杭州黑魚片好滑嫩，入口即溶，沙白好新鮮大隻，味道帶有鹹味。海蝦新鮮，口感彈牙。其他配料方面，即炸午餐肉上枱時熱辣辣，厚切香口，唔使落火鍋都可以即食。即炸響鈴非常薄脆，放入火鍋輕輕一淥就可以食，響鈴掛滿了濃郁嘅湯汁，好惹味。 自助區 自助區有各式蔬菜、丸類、炸物、前菜、即食麵、烏冬、醬料區、雪糕機、刨冰機、甜品同埋飲品，種類非常豐富。蔬菜有娃娃菜、生菜、冬菇、金針菇等；前菜有泡菜、中華沙律、涼拌青瓜；炸物有炸雞同埋炸餃子；甜品有泡芙、杯裝布甸、蛋糕等。 飲品方面有大將自家製茶；韓國樂天忌廉溝鮮、蘆薈汁；屈臣氏白檸味汽水；凱米諾椰汁等。 最特別係可以自製日式刨冰，係波子汽水嘅味道，好清爽；同埋有窩夫機，可以自製窩夫，整完可以加雪糕同其他配料；另外有一個關東煮自助區，有雞蛋、蘿蔔、蒟蒻、海帶結、竹輪等提供。

韓式餐廳Banchan & Cook經常更換菜式Menu，適逢踏入農曆新年，餐廳亦推出龍年限定menu ，以龍蝦蛋包飯及火龍果飲品作為龍年套餐，非常應節。 龍氣逼人龍蝦蛋包飯 原隻拆咗肉嘅龍蝦，龍蝦鮮味濃郁，肉質爽口彈牙，啖啖肉好過癮，加上秘製嘅玫瑰辣醬汁，用嚟撈蛋包飯一流，蛋包飯賣相脹卜卜，用餐刀將蛋包飯輕輕一𠝹就流心，雞蛋口感嫩滑，蛋香味十足，裏面蕃茄汁炒飯粒粒分明，味道層次豐富。旁邊嘅沙律菜新鮮爽脆，加上日式胡麻汁嚟食清新開胃，有解膩作用。 三重芝士炸千層豬扒番茄意粉 豬扒外層麵衣炸得香脆，包住香濃溶化芝士同埋豬扒，口感外脆內軟，三重芝士好邪惡。意粉嘅軟硬度適中，麵條掛汁，用上新鮮蕃茄，加上濃郁蕃茄醬汁，味道酸酸甜甜，好開胃。 炸雞拼盤 自選三款口味嘅炸雞，今次揀咗蜜糖、初雪芝士同原味三種口味。炸雞係無骨，食起嚟好方便，香脆外皮嘅炸雞沾滿唔同味道嘅調味料，三款口味都好好食，蜜糖炸雞味道甜甜地，肉質嫩滑Juicy；初雪芝士炸雞，炸雞上面灑上大量芝士粉，芝士味香濃；原味炸雞一樣外脆內軟有肉汁。每款口味嘅炸雞嘅旁邊都配有口感煙韌嘅年糕，好有韓式風味。 伯爵茶布丁牛角包窩夫 甜品點咗伯爵茶布丁牛角包窩夫，牛角包窩夫雙層夾心，層次感豐富，每層窩夫香脆鬆軟，中間夾有軟忌廉好香滑，另外伯爵茶布丁口感軟滑，帶有伯爵茶濃郁香味，伯爵茶控可以嚐試呢款布丁。 紅肉火龍果沙冰 顏色粉紫同埋嫩紅鮮艷嘅火龍果沙冰，紅肉火龍果肉加上牛奶一齊攪拌，賣相漸變色好精緻，紅肉火龍果汁味道清甜，好清新同埋透心涼，配上紅色火龍果肉點綴，好足料。 Matcha Latte 抹茶Latte入口順滑，抹茶味道香醇，帶有濃郁抹茶回甘香氣，奶味亦好濃郁。

踏入龍年，PHI 推出火龍果主題menu ，充滿農曆新年氣氛。今次去咗位於旺角雅蘭中心嘅分店，方便就腳，餐廳以暖木系色調裝潢，環境舒適。餐廳主打梳乎厘、意粉、法式吐司、咖啡同埋各類輕食，種類繁多，今次一於試吓龍年限定嘅Pancake。

火龍報喜梳乎厘
梳乎厘淋上火龍果醬，紅噹噹色澤充滿新年氣氛，綠色小龍糖果賣相吸睛可愛，仲有龍年朱古力片同埋花瓣點綴，擺盤好有創意同埋心思。梳乎厘口感鬆軟，空氣感強，裏面有微微濕潤，帶有香濃蛋香，配上火龍果醬嘅忌廉嚟食，口感細膩幼滑。旁邊配有火龍果、士多啤梨同埋提子，健康又美味。

新春龍蝦扁意粉
龍蝦肉好足料，肉質鮮嫩彈牙，鮮香四溢，扁意粉軟硬度適中，口感煙韌富有彈性，意粉亦好掛汁，每條意粉都充滿濃厚龍蝦汁，好惹味。

龍之魅影法式吐司
金黃色嘅法式吐司有烘過，口感外脆內軟，充滿牛油香，加上雲呢拿雪糕，有冰火交融嘅感覺，吐司配搭咗火龍果、士多啤梨、火龍果、脆片等多重味道口感，好豐富。

炫彩火龍果沙冰
顏色嫩紅鮮艷嘅火龍果沙冰，火龍果肉加上牛奶一齊攪拌，賣相層次感十足，火龍果汁味道清甜，清新之餘仲好透心涼，配上大大片火龍果肉點綴，好足料。

Matcha Latte
抹茶鮮奶有吸睛嘅玫瑰拉花，Latte入口順滑，抹茶味道香醇，帶有濃郁抹茶回甘香氣，奶味亦好濃郁。

位於上環嘅 Nissa la Bella，典型南法酒館風格，浪漫優雅氛圍，無論情侶約會抑或聚會都好適合。室內裝潢以木系同埋深紅色調座位，牆上掛有復古法國海報裝飾。
餐廳主打精緻法國菜式，外籍廚師主理，吸引唔少外國人同埋鍾意品酒嘅客人光顧，令到大家可以品嘗到正宗法國飲食文化。值得一讚嘅係外籍店員殷勤有禮，熱情主動。

Pissaladière
尼斯洋蔥塔嚟自南法嘅口味，烘至口感酥脆嘅佛卡夏，配上煮到甜中帶鹹嘅焦糖洋蔥醬，味道濃郁，加上橄欖油同埋鯷魚去提鮮，增加鹹香層次。

Haricots verts sautes
開胃前菜，法邊豆沙律，以法邊豆為主角，翠綠爽口，搭配生蘑菇、洋蔥碎，果仁等，配上紅葱頭醋汁，味道微酸，越食越開胃，好有清新嘅田園感。

Ceviche de la peche du jour
菜式賣相精緻，是日Ceviche係八爪魚他他，用料新鮮，配以花瓣及Popcorn作為點綴，八爪魚切成粒粒形狀，用檸汁醃製過，再以多種辣椒調味，味道酸酸辣辣，八爪魚帶有濃郁嘅海水味，可再加入檸檬汁去提鮮。

Souris d'Agneau et legumes rotis
慢煮羊腿，一上枱已經聞到好大陣煙熏味，香氣撲鼻而來。羊腿經過慢煮烹調，羊腿燉煮到拎起就脫骨，肉質軟腍，入口即溶，膠原蛋白豐富，調味鹹中帶有濃厚煙燻味，由於慢煮嘅關係，所以羊騷味唔重。另外配搭蔬菜同埋香料慢煮，提鮮同埋增加口感。

Profiteroles
法式傳統甜點泡芙，外表酥脆，表面淋上朱古力醬，邪惡又滋味，內有甜美奶油軟餡，同埋雲呢拿味雪糕，成個泡芙都充滿香滑軟膩嘅口感。

French bread
一坐低店員會送上一籃法式麵包，麵包外脆內軟，搭配黑松露牛油，松露香味濃郁，好吸引。

尖沙咀柯士甸路旺中帶靜，有一間樓高兩層嘅法國菜餐廳Scarlett Cafe & Wine Bar，地面係酒館，以高檯為主，採用咗半露天開放格局，空間感十足，酒區有大量法國唔同年份嘅紅酒白酒，適合喜歡品酒嘅人士，晚上酒館燈光柔和昏暗，好有浪漫格調，呢度嘅法國籍經理同埋侍應殷勤有禮，吸引咗唔少外國人光顧。二樓係法國菜用餐區，同樣有落地玻璃，餐廳適合情侶、家人或朋友晚餐，上層有半開放式廚房，可以見到外籍廚師們準備佳餚。Scarlett 美酒佳餚一應俱全，值得去體驗一下。 Wagyu Rib Eye 主食揀咗和牛，肉眼牛扒煎至medium ，牛扒內裏色質紅潤，和牛油脂感平衡，牛肉味濃郁，肉質軟腍，牛扒沾上少少海鹽經已能夠帶出最佳風味，旁邊另配兩款唔同嘅醬汁，一款係燒烤汁，另一款係芥末醬，味道酸酸甜甜。另外配上幼身薯條，上枱時夠熱，外脆內軟，味道鹹鹹地，即使放耐咗亦非常香脆。 Carbonara 意粉軟硬度適中，口感煙靭彈牙，加入咗大量煙肉、芝士碎，香蔥、蘑菇等，非常足料。意粉掛汁，芝士同埋忌廉味濃郁，口感creamy豐富，煙肉煎香過帶有鹹香味，口感香脆，意粉上嘅溫泉蛋非常吸引，將流心蛋液撈勻之後，令意粉多一陣蛋香，口感更加滑溜。 Le Citron 傳統嘅法式甜點Lemon Tart ，Meringue輕盈滑口，檸檬味道酸酸甜甜，中和了晚餐濃厚嘅味道，曲奇撻底酥脆，配上法式檸檬雪葩，味道好清爽。 餐前麵包 主食之前先會送上法式酸種麵包，麵包邊烘至脆身，溫度微暖，包身鬆軟帶有煙韌嘅拉扯感，麵包麥香味濃郁，搽上少少牛油嚟食唔錯。

韓國過江龍Terrace in seaside最近有新搞作，今次去咗Terrace in seaside x Care Bears 主題聯乘餐飲「Care Bears in Terraceland」，一共推出咗五款聯乘菜式，每款都好可愛同埋有驚喜，加上到處都係色彩繽紛嘅Care Bears 公仔擺設，充滿少女心，好適合打卡。 熊仔頭獅蚶拌飯 以Care Bears 熊仔頭造型好可愛，飯粒沾上韓式辣油，色澤均勻，飯粒粒分明，味道微辣，好惹味。螄蚶份量十足，螄蚶嘅鮮味同韓式辣醬嘅香辣味完美結合，另外配有幾隻大蝦，大蝦爽口彈牙。旁邊仲有爽脆沙律菜同埋香甜嘅濟州柑橘。 愛心傳播飯卷 聯乘餐飲用上韓國經典菜式飯卷，砧板上有熊仔頭圖案，可愛有心思。飯卷色彩繽紛，好似彩虹咁，漸變色彩好特別，材料有韓國米、紫菜、紅蘿蔔、青瓜絲同埋蛋絲，味道鹹鹹地，食落好脆口。 Care Bears彩雲窩夫 窩夫外脆內軟，蛋香味十足，配上幻彩忌廉同埋彩針糖作為點綴，好有夢幻嘅感覺，忌廉充滿奶油香，另外夾住香甜回甘嘅柑橘果肉，口感豐富。 Care-a-lot彩虹樂園蛋糕 以七色彩虹為主題，重現Care Bears繽紛活力嘅感覺，七彩蛋糕每層都夾有奶油，入口細緻，味道甜甜地，配上酸酸哋嘅砂彩虹軟糖條，造型營造出歡樂樂園嘅氣氛。 Starbuddies 紫薯南瓜冰 紫薯南瓜冰有藍、紫同埋黃色，層次感分明，飲品充滿香濃紫薯同埋南瓜味道，頂部嘅忌廉鋪滿咗蜜糖星星同埋彩針糖，口感豐富，飲到底部仲有珍多條，質感爽滑，味道清甜。 濟州柑橘乳酪 柑橘乳酪係招牌飲品，用上濟州特產柑橘，新鮮柑橘果肉配上乳酪打製而成，味道微甜清新，清暑開胃，上面仲有成個柑橘裝飾好吸睛。