酒店餐廳黎講，佢嘅份量同價錢絕對抵食，前菜嘅份量可以稱得上性價比高果隻。 無花果帕馬火腿沙律 沙律菜好新鮮 而prama ham都好香 唔會死咸 份量好夠 啱哂鍾意食菜嘅我 吞拿魚牛油果泡沫他他 吞拿魚他他酸酸甜甜非常開胃，配上牛油果泡沫，令食落多咗一份Creamy嘅口感 和風醬油大蝦煙肉扁意粉 意粉口感非常Al dente 軟硬適中 意粉用咗蒜蓉同醬油去炒十分香口 而大蝦都好新鮮爽彈 香煎牛封門柳 生熟程度控制得啱啱好 肉質軟滑 肉汁亦非常豐富 佢onside嘅果個sauce好特別 同個牛肉非常之夾 Wandering Voyage🍸 呢杯cocktail飲落有少許椰子味 個面又有一浸奶蓋 飲落軟綿綿又香 呢度仲有outside可以坐夜晚涼涼哋 都幾舒服㗎

今日同同事聚餐 所以就嚟咗鯉魚門食飯 我哋喺出面買完啲海鮮然後入嚟加工 都整得幾好食嘅 不過我就覺得可以再濃味少少 但可能廚師覺得海鮮新鮮原汁原味都可以啦 我地間房要上多層 地方就比較舊同埋雖然畀咗間房我哋 但係有其他人要經過我哋間房先入到入邊間房 所以有少少古怪😅 加工費最後再加多兩碟菜埋單＄3200左右啦 個人認為最特別係呢尾芝士龍蝦 因為第一次食芝士飯底而唔係伊麵😆 黃金蝦都整得唔錯 因為炒得比較乾身唔會好似平時嗰啲咁油膩

今晚食呢間深水埗發跡 開到嚟大商場嘅馬來小店 同朋友一人叫左一杯馬來餐廳必點美祿 朋友叫左杯美祿暴龍 即係美祿加雪糕 我就叫左杯 美祿恐龍 即係美祿加大量美祿粉同美祿波波 唔溝埋面頭果啲美祿粉都已經超濃郁 而面頭嘅美祿粉仲要一啲都唔菇寒 正 椰香咖哩叻沙 湯底濃郁，餸有豆卜魷魚魚蛋，參參麵底，新竹米粉索埋啲湯一齊食 絕配 細雜錦配油炸鬼 本身想叫肉骨茶 不過貪心想食埋其他餸 呢個細雜錦啱哂乜都想食嘅人 因為佢一煲入邊除左招牌一字骨之外 仲有埋冬菇 豬手 排骨 豬肚 佢仲配左一碟脆卜卜嘅油炸鬼 索埋個湯 又係一絕 佢個湯仲要清而不膩👍🏼

等咗好耐終於旺角開旺記冰室喇!!! 我之前想食都要特登去尖沙咀先有得食 而家旺角開咗就梗係要嚟幫襯啦😁 位置係Aeon對面 OK便利店一轉入去就見到 非常方便 特濃蕃茄湯午餐肉粒通粉 其實唔可以話呢個係蕃茄湯通粉 我覺得其實佢係蕃茄蓉撈通粉 因為佢個湯真係好濃㗎 啲午餐肉煎過 外皮脆身 而通粉係有坑通粉 可以鎖住啲蕃茄醬 鮮薑汁豬潤鮮雞湯通粉 平時呢個餐 唔係成日都食到㗎 好快就會賣曬 難得今日有就梗係要點啦 不過製作需時 大概十分鐘之後就上餐 豬潤厚切大大塊有口感 又唔會太熟好鞋口 湯汁香濃 凍薑汁奶茶 奶茶比例剛好 加上少少薑汁有淡淡嘅香味 牆上仲有好可愛嘅貓貓壁畫🐱 平時星期六日我都鍾意幫襯茶仔 嚟緊要食返佢嘅signature 叉燒滑蛋飯先✌🏻

之前有朋友介紹過呢間omakase 幾好 所以今日就黎左呢間喇 先嚟食咗個前菜 有鰈魚昆布漬 銀杏 岩手芝海老 甘露煮栗子 青森平目魚刺身配酸汁 縞鰺魚刺身 脂肪結實 肉質肥嫩 口感順滑鮮甜 師傅同我哋分享佢手上呢條魷魚觸鬚有大概一公斤重 八爪魚吸管 +八爪魚腳🐙 師傅建議食用時配少許山葵漬 吸管非常脆口 第一次食覺得感覺好新鮮 八爪魚腳則肉質鮮味彈牙 炸白蝦 蝦身晶瑩剔透 脆口小物 送酒一流 北海道白見貝+赤貝 個人比較喜歡白見貝 佢味道鮮甜濃厚 口感爽脆利落 筋子蘿蔔溶 師傅話呢個筋子係新鮮筋子 因為呢個月份先有 平時個啲都係漬/雪藏嘅 所以特別香甜 金澤香箱蟹係11月至12月 先至有得食 佢叫香箱蟹嘅原因 係因為打開嘅時候入邊啲蟹膏就好似寶箱一樣咁靚 師傅話佢五分鐘就可以將一隻蟹起膏拆肉 白子昆布醬油燒 鱈魚白子又稱為雲子 白子綿密滑嫩 醬油燒可以辟去腥味更提鮮 炸蝦丸 同平時食開嘅蝦丸口感完全相反 呢款蝦丸係軟綿綿 外脆內軟 師傅話係先用蛋白打佢企身然後再撈埋 蛋黃煆蓉再一齊炸嘅 終於嚟到壽司嘅部分喇 伊豆熱海金目鯛 青森帆立貝 福岡槍魷魚 師傅特意喺魷魚身上𠝹花 令到佢入口嘅時候 有軟綿綿嘅口感 北海道根室市馬糞海膽手卷 北北海道甘蝦 北海道秋刀魚 呢個月份係食秋刀魚嘅季節 秋刀肥美甘香 中吞拿魚腩 大拖羅 醬油漬拖羅 成餐飯都食得好開心又好資訊性📝 因為師傅對自己嘅工作同埋食材都瞭如指掌 除咗可以講得出食物嘅來源之外 亦都會講出食物名字背後嘅意思 非常有趣 眼見在座每個食客都好開心 呢餐可以當選為年度我最喜愛 omakase😂

今日朋友約咗我黎呢間食omakase 早左少少到 可以睇住師傅準備食材 喺每上一度菜之前師傅都會講解下食材係來自邊度 點解佢會用咁嘅配搭啦 令到食客都可以好了解自己食緊啲乜嘢亦都食得出師傅嘅心思 有我最鍾意嘅酒盜芝士 仲有水雲同醋物 作為醒胃嘅前菜非常合適 石垣鯛魚刺身 師傅介紹呢種鯛魚係食海膽嘅 食落又真係有少少海膽嘅甘香味 口感就較黏口 鮟鱇魚肝配西瓜bb醬油漬 師傅建議夾埋一齊食 西瓜bb嘅鹹味夾埋魚肝 食起上黎無咁油膩同埋寡 鰤魚配蛋黃醬油漬 比較少食魚刺身配蛋黃 鰤魚彈牙清爽又肉質鮮甜👍🏻 喺開始食壽司之前 師傅畀咗個熱食我哋間一間場 係一個燒賣形狀嘅點心 香箱蟹肉配俄魚子 之後再整多個青瓜手捲畀我哋清一清個味蕾 伊佐木壽司 肉質白裏透紅 口感爽口而唔油膩 赤貝壽司 喺放上碟之前師傅特登拍咗佢一下 肉質即時收縮 令到咬落去嘅時候更加爽口鮮甜😋 沖繩車海佬 北海道秋刀魚 秋天係食秋刀魚嘅好時候 因為呢個時候係最肥美嘅 yum😊 鯖魚壽司 拖羅壽司 粉嫩肥美 入口即溶 油香滿滿 海膽壽司 個面加咗淡雪鹽同埋少少Wasabi 味道鮮甜 最後已栗子紅豆溶甜品作結

之前喺牛頭角見到呢間已經想食 但係未有機會而家開咗喺旺角就梗係要去食下啦 我哋早咗少少到所以唔使排隊 但一到七點開始人龍就冇停過 蔥油肉餅配蘭王蛋飯 見到個燶蘭王蛋真係好吸引😍 個肉餅係好出色 咬落去好有口感 唔會話淋pat pat 啲材料好豐富 香菇味濃又juicy👍🏻必點推薦 芝士焗肉醬配蘭王蛋飯 最怕食焗飯啲飯會濕立立 佢個飯底炒到粒粒金黃色 乾身好味 再配埋啲肉醬同蘭王蛋汁味道倍增 瑞士汁雞翼 雞翼好入味 皮滑肉嫩 香甜惹味 另外佢仲有個醬香肉餅 餐牌寫住話店員會淋啲茅台上去再點火 不過當晚未見到 應該會好精彩 有機會再嚟食先

由深水埗開始已經係佢嘅忠實粉絲 新舖起碼大幾倍，坐得舒服左，排隊又可以係室內，不過人龍依然誇張🤦🏽‍♀️ 必食招牌蟹膏蕃茄湯檬 湯底係濃濃嘅蕃茄加蟹膏嘅鮮味，配菜有蕃茄豬紅扎肉仲有兩塊靈魂重點蟹餅!!! 佢嘅豬紅係咬落有煙韌口感嘅 一啲都唔散，扎肉仲有兩款，本人鍾意有豬耳果款多啲，因為食落有啲爽口 仲唔係度度有得食 而佢個蟹餅我覺得係獨家添，食落似豆腐，每一啖都有濃濃嘅蟹味，而佢個質地仲令佢吸滿哂湯汁，味道超濃郁! 扎肉法包 平時食法包最怕咬開果時好似咬毛巾咁，啲餡跌到周圍係，但係個包都仲未咬得開，但係呢度嘅法包外脆內軟，完全無呢個問題，入邊塞滿左紅白蘿蔔漬，配上札肉餡，非常開胃。 牛油果沙冰 呢杯又係必飲名物，雖然佢叫沙冰，但係質地滑到奶昔一樣，飲落好似將個牛油果一大匙一大匙筆落口一樣!

好耐冇食過辣嘢就同朋友揀咗呢間 原來佢係重慶火鍋店 喺香港嘅第一間分店 佢有港式辣 微中大辣揀 咁黎得食重慶火鍋就梗係揀川渝重口味啦 原來同港式嘅分別呢就係冇咗嗰幾嚿牛油 佢仲可以揀鴛鴦鍋 另外嗰邊我哋就揀咗黃金板栗雞湯 喺等緊嗰幾嚿牛油溶嘅時候就可以飲啖養生湯先 個雞湯真係好鮮味 忍唔住飲左幾碗😆 因為店員話佢之後就會加豬骨湯 所以如果要飲嘅話就要飲多幾碗 鮮切吊龍牛肉 肉汁鮮甜又嫩滑 一根土豆絲 第一次見 佢就好似薯絲麵咁樣 大概淥10秒左右就ok 清脆爽口 萵筍片 食萵筍嘅時候就更加感覺到辣湯入邊呢幾嚿牛油嘅重點 令佢辣得嚟仲帶點油香 鮮腐竹 平時啲腐竹都係一片片 好快就會散同溶 卷住就唔會喇 仲可以吸到湯嘅精華 甜品除咗平時嘅紅糖糍粑之外 仲有之前冇見過嘅涼糕 下邊係冰底然後係涼糕面淋上紅糖 口感綿軟滑膩 可以一試 職員都好殷勤友善 喺拎醬料嘅時候會建議我哋點樣配搭啦 然後又會時刻留意住我哋夠唔夠湯啦 因為麻辣湯需要逐少逐少咁添 佢每次經過都會觀察住 呢度無論食物質素同埋職員嘅服務態度都係性價比高 一定會再黎👍🏻

難得同另一半一齊放假 就去食好嘢啦 今日就揀咗去食鐵板燒 好耐冇食過啦 呢度有幾個午市set揀 我地今日揀左呢個 先黎左個季節沙律醒醒胃先 師傅準備好食材就放喺枱面上 鮑魚好新鮮生猛 第一道菜就係南非鮑魚喇 見到師傅刀功純熟咁樣係面前烹調 真係令人非常期待呀 鮑魚質地柔軟 鮮美清甜 第二道就係龍蝦喇 師父煮得啱啱好 龍蝦肉質彈牙 再加些少檸檬汁 更加帶出佢嘅鮮香味😋 美國安格斯牛肉薄燒 牛肉入邊包住蒜香脆片 中和返牛肉嘅油膩感 最後仲有炒飯同埋味噌湯添 無論視覺同味覺上都係好滿足嘅一餐呀😄