呢間megabox嘅Salted pig都嚟食過幾次㗎啦，平時同事生日、last day等聚會都係喺呢度食午餐，貪佢地方大唔使等位，午餐個set又幾抵食咁囉。 是日舊同事過嚟話食嘢傾下計，於是我哋又嚟咗Salted pig，店員示意我哋坐第一張卡位，之後好快就送上水同埋餐牌。 晚餐餐牌更多選擇，不過就係因為太多選擇，所以唔知揀咩好，最後都係決定要dinner set算了，選擇困難症😂 ⭐Seafood soup 海鮮蕃茄湯 頭盤要咗海鮮湯，湯料有魚、蝦、蜆、青口，熱辣辣很鮮味，唔知係咪即叫即煮嘅呢，因為等上枱都等咗幾耐下，個湯好好飲，附送嘅多士都好香口，塗咗牛油又多nuts，仲有兩塊添呀，正🤤 ⭐Beijing style duck breast pizza 京式鴨胸片薄餅 主菜之一揀咗薄餅，諗住呢個易share吖嘛，北京片皮鴨風味嘅薄餅，醬汁用上海鮮醬，上面放咗煙鴨胸、青瓜同大蔥等，雖然叫薄餅但其實唔薄身，拎上手都幾墜手㗎，烘得香脆，好好味🤤 ⭐Pork lasagne 豬肉意大利千層麵 另一個就叫咗千層麵，上枱時勁香，一切開有芝士拉絲，千層麵本身千層麵旁邊嘅醬汁都充滿芝士，除咗豬肉碎，個千層麵仲夾住意大利青瓜同茄子等，雖然好多芝士，但食落唔漏，加上個茄汁底酸酸地，食落幾開胃喎😆 ⭐Tango 甜蜜探戈柚子茶 & ⭐Oreo madness 曲奇朱古力忌廉奶昔 個餐唔送餐飲，見汽水或者奶茶咖啡都要加25蚊，咁好似加特飲抵啲喎，朋友叫咗杯Tango，自己就叫咗杯Oreo奶昔，賣相幾吸引呀。Tango係紅茶底再加各款果汁調成，酸酸甜甜幾香口，Oreo奶昔就係由朱古力打成，綿綿滑滑唔算太甜，都好好飲🤤 淨係叫兩個晚餐都食唔曬，個千層麵包走咗一半留返聽日食啦，唔好浪費🤣

想搵粥食自然就想起海皇粥店，話哂呢個品牌都有左十幾廿年😆 是晚就來到樂道的海皇分店，雖然唔爆場，但意外地多遊客😳外國人、國内人，甚至連日本人都有，原來海皇係國際知名😳 睇下餐牌，有唔少粥品、小食，連飯同公仔麵餐都有，好肚餓，叫多幾樣野食先。 ⭐生滾芥菜雙併肉丸粥配半份油炸鬼 朋友話佢好鍾意食芥菜，所以就試下呢個芥菜生滾粥，配料就配咗雙拼肉丸，雙拼肉丸包括豬肉丸同埋鯪魚球，個粥底都幾好味，芥菜好新鮮爽口，少少苦澀唔算好重口，唔錯呀。呢個粥仲有半份油炸鬼送，抵喎😋 ⭐鮮豬肉丸粥配炒麵 自己就點咗個單拼生滾粥，揀咗要豬肉丸，唉呀～早知同朋友一樣我就揀另一款啦。望落去白茫茫一片，但入面其實豬肉丸都落咗幾多嘅，粥底綿綿地都幾好味😋呢個餐可以配好多選擇，揀咗要炒麵，我覺得粥配炒麵係絕配嚟喎😆炒麵都幾好，冇過油亦都唔乾身，加啲辣醬同芝麻，正呀😋 ⭐煎蘿白糕 朋友仲加多咗份煎蘿蔔糕，個樣望落都唔錯，不過煎燶少少會更好😆鍾意食香口嘢嘛。 ⭐炸兩 另外仲加多咗一份炸兩，炸兩都係粥舖必點嘅小食之一，腸粉夠滑又煙韌，入面嘅油炸鬼新鮮仲係脆口嘅，最正係醬料擺喺枱面任落，食炸兩腸粉梗係要多醬啦，仲要多芝麻添呀😍 ⭐熱檸茶 & 熱豆漿 食到一半店員話有飲品送，我見佢對枱枱客都係咁講，係咪做緊有咩promo優惠呢？朋友叫咗杯熱檸茶，自己就叫咗杯熱豆漿，豆漿係冇糖㗎喎，仲好有豆味添，有驚喜😆 全部都係澱粉質，好飽呀😆

是晚到左泰初夏打邊爐，七點多來到，剛好有幾枱人入座，等左一陣就到我地了😊揀左雞煲+牛板腱90分鐘放題，$238一位，如果怕唔夠時間食，佢有$120分鐘揀，都係$278，價位貼地👍 揀完湯底店員就帶位入座，坐左牆邊一張卡位，濶落好坐喎，出去睇下自助區有咩食先，炸物、泰式沙律同糕點等，差不多拎光了😂見店員入緊廚房拎新嘅出黎，咁等陣再出黎啦。 先上雞煲，一次性無得添食的。雞件係泰式口味，酸酸辣辣帶香料香味，好味噃😋而且同火鍋爐分開上，唔使食完雞煲先打邊爐，咁幾好🤭 呢度只提供鴛鴦鍋，揀左冬蔭功湯同芫茜皮蛋湯底。冬蔭功酸酸辣辣有椰奶香，芫茜鍋的芫茜味夠濃，兩個湯底都好味。 呢個餐嘅肉有牛板腱、牛胸爽、西班牙豬肉、醉雞件，仲左次一級的卡樂beef，兩款牛肉都有食，但我就覺得牛板腱好食啲，無咁肥同牛味濃啲😋 最重要嘅賣點係呢度嘅泰式小食😘牛、豬、雞肉串嘅串燒都好好味，燒得香口唔乾身，香茅味入晒味勁正。另外燒豬頸肉又係正，香口肥美。泰式豬手必叫😍軟腍入味，好食過唔少食泰小菜嘅舖頭。 一路食小食又一邊打邊爐，正😆食左咁多肉去食下菜先，是晚有西洋菜喎，仲有油麥菜、唐生菜同娃娃菜等，其他火鍋料有冬瓜、南瓜、雜菌、丸、水魷、午餐肉等，refill得快👍 特飲都係任飲㗎，檸檬蘆薈、乳酸梳打等，款式甚多，又有得揀小冰走甜等，唔怕飲太甜啦😋 食飽飽又係時候食埋甜品，泰式糕點、蛋糕仔同雪條等，食泰式野梗係要整返支榴蓮雪條啦😆 飽到上心口😆真係好好食，打邊爐係好味但驚喜不大，最正係泰小食同個雞煲，plan下幾時再黎先🤤

連續幾日暴雨，悶悶地約朋友出商場行下先，揀左去古今二食日本野，貪佢坐得耐，加上地點近車站，落車都唔使淋雨😆店員話店內或店外都可以隨便坐，我地就揀左第二張窗口位，貪佢濶落啲🤭⭐清酒煮蜆
呢樣係必點🤤一上枱已聞到淡淡的酒香，食落好鮮味，啲蜆大大隻無砂㗎，正到汁都飲哂。⭐龍卷風沙律
再來一份沙律，有蟹柳、蟹籽、中華沙律等，沙律菜主要是西生菜同紅生菜，伴著輕量紅椰菜，清爽中帶點苦澀，仲淋上了微辣的沙律醬同甜味的日式醬油，提升口感同味道，好食👍⭐金龍卷
卷物選擇十分多，而且起名好特别😆朋友揀左金龍卷，即係炸蝦卷黎，上面仲有三文魚，中間又夾了芝士，香口又鮮味👍⭐蜘蛛
另外仲叫左蜘蛛，呢款就係軟殼蟹卷，中間夾左牛油果，香軟又脆口😋一邊食一邊傾偈，仲有壺茶慢慢嘆😋

落大雨最好去商場hea，是日就黎左葵廣掃街。 呢間蕉積妹想食好耐啦，但平時經過無乜心機等，是日個fd都想食就可以一齊排😆 ⭐花生醬香蕉煎餅 幾款口味都想食，先試花生醬吧🥜煎餅塗左勁厚花生醬，extra加Oreo碎，仲有煉奶係面，熱量真係唔講得笑😆入口好香脆，連邊邊都沾滿醬料㗎🤤入面係煎熱左嘅香蕉，甜得黎帶少少酸，花生醬又鹹鹹地，成個煎餅好食到無得彈🤤好好食兼邪惡感滿滿，哈哈，間中淺嚐無問題嘅😘 ⭐炸饅頭 朋友話要食埋個炸饅頭，叫左四個，即炸起的拎上手超熱，好香脆，最正係勁多煉奶😍 ⭐泰式奶綠 食左咁多煎炸野，食返個凍奶綠先，泰式的膠袋包裝好啱打卡，夠得意呀🤭茶香又冰凍，正👍 食完都飽左，仲點去掃下一間😂

同朋友傾下偈，要搵個可坐耐少少嘅食店，朋友介紹左佢公司附近的新齋橋，主打燒肉，但都有日式料理可選。上到餐廳，發覺勁大舖位，大部份食客都係點燒肉，我地都係揀食燒肉😋⭐極上牛小排
自己點咗呢個牛小扒套餐，等咗一陣個套餐就上枱了，賣相唔錯好吸引喎，啲肉望落去就覺得係靚嘢黎。⭐牛板腱肉
朋友就揀咗牛板腱套餐，望落一樣係靚肉黎，急不及待想燒一燒了😋過爐火力都幾猛，啲肉放上去一陣就熟了，店員提醒可以喺側邊按鈕到控制火力的。個爐抽風都唔錯，店內雖然都多人燒肉，但係唔覺有油煙味，同埋個網冇黐底，抵讚👍講返兩種肉，個人覺得牛小排可能脂肪位多啲，入口滑啲噃，牛板腱嘅牛肉味就濃啲，兩款肉都好好食，同朋友share就可以試晒啦😋⭐味噌湯 & 沙律 & 白飯
個餐仲有湯、沙律同白飯，雖然唔係任食，但份量都好足，個味噌湯熱辣辣好好飲👍⭐餐飲
另外個餐仲包括汽水一罐，可自行去雪櫃度揀，朋友揀咗要忌廉，自己就試下呢款菠蘿蘆薈飲，出面街好似唔覺有得賣喎。⭐甜品
食完後店員隨即送上雪米糍，仲幫你抹乾淨個位，比空間你食甜品。我見好多枱食客都係食完喺度飲嘢吹水，店員完全唔會趕客，食得輕輕鬆鬆幾舒服。價錢係餐牌上寫幾多就幾多，冇其他雜費亦冇加一，都幾抵食喎。

見有谷友介紹天水圍站下多左間茶餐廳，咪黎試下囉，記憶所級，呢個位得間糖水舖同咖啡店，唔知呢間茶記幾時開嘅呢。 沿住輕鐵站行落黎就見到222餐廳了，唔難搵，門口仲有位可泊車添。 五點鐘黎到，仲有下午茶喎😆晚市嘅客飯、西式都可以叫了，睇下食咩好先。 ⭐例湯 店家好快送上例湯，熱辣辣正喎，無味精又足料，飲落鮮甜味濃，好飲過唔少湯店😆想叫店家添飲呀！ ⭐鮮茄焗豬扒飯 叫左個焗豬扒飯試試，即叫即焗大約十五分鐘左右上枱，好香啊😋 豬扒軟腍入味，好大塊，已切一件件都舖平整個兜㗎。醬汁甜甜酸酸幾好味，仲有唔少蕃茄塊同菠蘿粒，飯炒底，粒粒金黃又香口，高水準之作喎。 不過食到尾覺得啲飯略鹹，可能咁啱果個位啲鹽無炒均，扣分～🤣 ⭐凍檸茶 個餐送熱餐飲，凍飲加$2，叫左杯凍檸茶走甜，意外地居然有青檸加黃檸檬，夠冰凍，正好解解膩👍 可能仲係新店又加上落雨，堂食得兩、三枱，但外賣單就響個不停，小店加油💪

駱駝漆大廈出名多野食，但通常都係去三座個邊，是晚朋友帶我黎左一座，佢話搵到間好正嘅泰國菜叫Add some thai😋店內很大空間感十足👍坐低後，店員便送上qr code同餐牌，熱情地介紹有套餐同散叫等，但店員的廣東話有啲難聽懂，不知是否泰國人😆最後我地叫左二人餐，再散叫多一個主菜。⭐海蝦雜錦海鮮冬蔭功湯
先來個冬蔭功湯，用銅窩盛載仲有火烘住，可確保熱辣辣，湯還是熱好飲嘛😆湯料有蝦、蜆、魷魚、菇片、同各式香料等，味道豐富，酸酸辣辣有椰奶香，仲有濃濃的海鮮味。⭐紐西蘭牛柳粒串
小食之一揀左燒牛柳粒，呢個有啲失望，牛柳粒有點韌，切太大塊了，亦欠點肉香。⭐泰式素春卷
另一個小食揀左炸春卷，一份竟然有六條😆餡料包著紅蘿蔔絲、芹菜絲、白蘿蔔絲等，春卷香脆餡料爽口，即炸新鮮，好食喎😆⭐脆皮豬手泰皇炒飯
豬手皮脆肉嫩勁正，啖啖肉好滿足😋炒飯用上辣椒去炒的，入口微辣好惹味。⭐泰式炭燒豬頸肉炒金邊粉
額外加的炒金邊粉，酸酸甜甜入口充滿香氣，豬頸肉肥美且燒得甘香，真有炭香呢😋⭐馬拉盞炒椰菜苗
個人愛吃椰菜苗，但呢種菜只出現係泰餐館，每次黎都愛叫上一盤，調味鹹鹹辣辣加上菜有嚼勁，正👍⭐冰鎮卡通泰奶茶
朋友正疑惑咩係卡通奶茶，變叫一杯嚐嚐，原來黎到有一條龍造型的冰塊，是甜茶味的，奶茶底香甜，呢杯卡通奶茶真係得意，啱曬打卡又好飲😋⭐泥漿浴沙冰
自己嗌咗呢杯泥漿浴沙冰，味道係朱古力咖啡，甜得嚟大少少苦味，味道好平衡，好好飲啊😍⭐招牌椰汁千層糕
個餐仲有甜品送，是日係千層糕，深綠色的班蘭口味，咬落煙韌香甜，好好味～一個人霸咗三件添🤣Add some thai啲食物有水準價錢又唔貴，加上地方大，好適合多人聚會食餐好嘢😘

稻香又搞一蚊雞優惠，見自己上次食已經係幾年前嘅事，朋友就幾乎次次做promo都嚟食嘅，佢話今年隻雞細隻咗，不過細隻咗都係一蚊啫，試下無妨呀。 ⭐一蚊雞 基本上全場都係叫一蚊雞，兩位可以叫一隻，四位就叫兩隻，如此類推，我見有枱六個人真係叫咗三隻雞，哈哈，成枱都係雞。 我自己又唔覺得隻雞好細隻喎，上枱嗰陣時仲非常熱，啱啱燒起，剪開隻雞果陣仲漏曬油，真係幾吸引😋皮香肉嫩，呢個價錢抵到爆啦😆 ⭐黑蒜鮑魚雞氣鍋湯 & 無花果貢梨鮑魚雞氣鍋湯 食完隻雞都飽咗九成，朋友話使唔使加餸食下飯，但係真係好飽食唔落，最後叫咗一人一個氣鍋湯。 黑蒜味濃，有啲飲中藥嘅感覺，意外地原來黑蒜煲湯都幾好飲㗎喎。 無花果貢梨就同一般中湯嘅味道分別不大，甜甜地清清地咁囉，入面有一隻鮑魚仔，數件雞件、瘦肉、梨片同半粒無花果，我覺得湯料仲多個湯，我寧願飲多啲湯㗎。 埋單呢個價，稻香會唔會蝕㗎？

行過幾次呢間BE，都係坐滿人要等位，成日都想試佢㗎啦，是晚又經過見門口仲有枱，即刻衝入去試試先。 得返門口玻璃前兩張四人枱，店員示意隨意坐一張都可以，我哋揀咗牆邊嗰，張睇下餐牌食咩好先。 ⭐雙層芫茜不可能芝士漢堡 有幾款餐都想試，最後作為一個芫茜控，都係先試下呢個芫茜漢堡啦，賣相相當吸引，大量芫茜加上半溶芝士，睇見都已經想食😋麵包鬆軟芫茜香口，再加上一塊厚厚的未來肉，咬落肉汁溢出齒頰留香，食起上嚟真係同真漢堡冇乜分別🤣正所謂口齋心不齋🤣 ⭐日式咖喱吉列豬扒定食 朋友叫呢款吉列豬扒定食，個樣仲似真係肉，唔講都唔知佢唔係真正嘅吉列豬扒啦。日式咖哩香甜不辣，跟珍珠米配撘啱啱好，未來肉豬扒香脆可口，少咗一份油膩感更好食。另外定食仲有前菜同甜品，有誠意呀😋 ⭐斯里蘭卡伯爵茶 朋友就要咗跟餐送嘅伯爵茶，冰凍又有茶香。 ⭐焙茶燕麥奶 自己就轉咗要杯焙茶燕麥奶，焙茶茶香，燕麥奶帶有淡淡的香氣，飲落輕盈舒服，好正😍 進餐期間都不斷有食客進進出出，小店明顯相當受歡迎，意外地食客嘅年齡層係男女老少都有，犀利喎👍