呢間嘢開時已經想試，但長期都多人排。今日打風之日放半晝就黎試吓，直入真好！ 入面都真係細，但勝在都幾乾淨。 甜不辣貢丸水蓮菜杏飽菇王子麵：個湯汁好好味，唔太咸又帶少少甜。好多舊甜不辣，食極都仲有，好在唔會煮得好太淋，甜度度亦剛好。貢丸高質，有肉絲質感得黎又彈牙，丸仲已切半方便食。水蓮菜勁好味，好嫩，響香港未食過咁幼嘅水蓮菜。杏飽菇都屬於係嫩，王子麵正常。不過由於王子麵比較細份，男人叫王子麵應該唔夠飽，應該要加底。 半糖黑糖珍奶：好鬼大杯，完全飲唔曬，半糖都幾甜(自己飲開少甜). 珍珠彈牙，有天仁feel. 台灣蒜香腸：好味。香得黎唔會太咸，但比較細碟同齋睇已知好油，搭埋蒜食感覺好啲，辟咗個油膩感。   總結：碗麵一流。會encore，但唔會叫珍奶，叫清清地嘅茶仲好襯同唔會太飽。

打風下去附近買嘢, 黎個快晚餐. 睇個門面好似好細, 原來裏面都幾大. 今晚打風真係少人, 啲檯嘅距離茶餐廳黎講真係屬於闊落. 啲嘢仲好乾淨. 叫咗個粟米帶子龍脷柳白飯少飯(可揀咸蛋蔥油飯) + $10 轉圓肉杞子蜜. 黎到見佢分開上已經加咗分, 仲有兩條綠色嘅菜直情感動。個人其實真係唔鐘意食玻璃獻, 成日覺得好似食緊鼻涕咁, 所以個粟米汁我就其實麻麻哋. 我都係鐘意濃粟米汁. 不過佢個炸魚真係炸得好, 炸漿薄, 仲炸得剛剛好, 完全唔會覺得油. 個魚仲好滑. 嗰兩條菜新鮮唔老. 帶子就細粒嘅, 但勝在都有唔少同埋完全唔韌/鞋. 叫前諗咗陣好唔好叫支圓肉杞子蜜，因為好驚呢啲會好甜，點知唔會太甜，仲真係好多料. 如果唔係攞住袋重嘢，真係會叫多幾支攞走聽日飲. 總結：估唔到好味. 會encore.

假期前一晚同幾個男人黎吹水，成兩個禮拜前book. 黎到都要等一陣, 好在等位處都有得坐. 原來入面其實都細, 感覺都算逼, 好在檯面積都正常. 亦乾淨. 因為只可坐到十點，所以不敢怠慢即叫嘢。估唔到仲有三小碟靚嘅前菜送. 個人好鐘意食嗰幾粒醃蒜頭. 之後叫啲嘢出得有點慢，但全部都算幾好味. 當中極推芝士年糕, 個芝士餡嘅雖然對我黎講唔夠臭, 但佢有啲薯蓉嘅質感，好正. 亦推蔥豚肉卷, 明太子雞翼, 粟米同飯團. 佢啲燒嘢全部都燒得剛好，半啡半金黃色咁。最重要係佢冇其他啲串燒地方嘅咁咸. 食到勁飽, 大部分人都有飲酒, 每人平均三百, 十分不錯。可再encore.

幾年前黎過兩次食平日晚餐, 當年西營盤冇咁多好野食, 就貪佢算好坐, 裝修幾靚, 算容易book 位, 同野食都ok. 呢排啲餐廳間間都book 爆, 就一個禮拜前book 咗呢度做backup. 最終星期五晚真係度度都冇位, 都要黎食. 打算送個生日蛋糕黎切, 諗住切餅費都一係一二百。感謝佢同我講, 切餅費要三舊水. 呢度都要三舊水？！我飛的返屋企食算. 黎到先知原來一定要安心出行先入得去. Main dinning room基本爆咗. 好嘈. 嘈到基本上唔係點傾到計. 嘢食黎講，首先利申好少食印尼嘢，所以唔太知應該期望啲乜。唔想諗下叫曬佢7個signature dish + 個印尼炒飯. 仲叫咗渣印尼Sangaria. Sangaria 隻杯好靚, 仲有支鮮花響杯邊點輟. 飲唔出印尼Sangaria 同普通sangaria 點印尼法. Sangaria 黎講算不過不失. 嘢食當中Gado Gado , 雞沙嗲串, 印尼炒飯係真好食嘅。沙嗲個調味醬花生味好香, 甜度適中。最唔鐘意係small plates 嘅牛, 雖然牛好淋, 但個醬真係好多兼重口味, 似食緊醬多啲. 主菜豬腩肉真係好肥吓，個皮燒得太燶。我攞嗰舊基本八成皮都係黑色. 其他冇咩特別好唔好食，正常嘢冇乜驚喜咁。大蝦就係普通燒大蝦咁，好在肉唔霉。長豆都幾油, 正常嘢, 冇特色... 朋友話食食吓覺得所有嘢都差唔多味😂 結果食唔曬. 攞食剩嘅走. 俾咗兩個有格嘅紙盒, 但冇袋. 夠環保. 總結：是晚真係太嘈. 講嘢嗌交咁. 決定搵吓香港有咩其他地方有好嘅印尼嘢食又坐得ok.

要去尖咀做啲嘢。醒起呢間嘢就響D 出口隔離，又想試啲人講嘅叉燒拉麵三文治，就黎個快食。估唔到星期五晚都仲有幾多位剩。 原來已經無叉燒拉麵三文治，同埋都貴咗幾多，五月時28蚊個湯，家下已經30幾。 叫咗個監獄三文治。好快已經有得攞。雖然個包望落幾細，但啲料真係多到爆，同埋幾飽。估唔到肉丸+ Marconi & cheese + 薯餅+ 酸菜又幾夾😂🤣 個肉丸都幾滑，調味醬都多，成個好juicy 但個薯餅有啲位又會脆架喎！不過齋食係咸咗啲，要飲嘢。 總結：貴又真係貴，但係好食嘅

星期三屋企人有嘢響呢頭做，就叫佢去前去壽司朗攞飛，5點50分攞飛，結果搞曬所有嘢，8點都未有位... 突然醒起附近有一直好想試嘅Jacomax，就走黎睇。雖然裏面都好多人吓，但唔洗等就有位了。 裏面嘅裝修好鬼似啲cheap cheap 酒吧，整埋曬啲紫燈咁想點呀😂 火箭菜沙律：唔知係咪就黎收工，咁鬼大兜嘅！😂 好開心！勁多菜！唔算超新鮮但不過不失啦！兩個人食咗兩大碟之後仲可以pack 一盒走！ 意亂情迷：嗌呢個因為呢個好多料。估唔到咁好味！個餅底完全係響意大利啲平民餐廳嘅餅底！料多，salami 嘅咸香特別正。 肉丸：有芝士焗面，所以仲耐過個pizza 到。十分熱。估唔到超級好味！個肉丸軟得黎又唔會覺得好肥膩，最正係個茄醬！完全係意大利食到嗰隻味！ 總結：估唔到真係食到意大利浸味！一定會再返黎食。

Weekday 三點幾黎食。本身諗住食壽司朗，但叫緊528, 攞張飛係903號！真係好痴線！呢度就一個人都冇。入到去第一個感覺係好乾淨。讚。 Set lunch 係主食飯+小食+飲品。小食+飲品其實唔加錢得好少嘢揀，例如汽水要加五蚊咁。好在主食選擇都幾多。 特選鰻魚飯(少飯)+玉子燒：鰻魚唔錯，夠多兼夠彈牙。飯係日本米，好味。玉子燒幾甜吓，不過煎得都幾好，有少少燶咁。 特選串燒飯(少飯)+ 雞肉丸串燒：雞肉丸串最好味。牛就始於唔係貴嘢，韌。炸雞皮都夠脆，咸度剛好。雞翼ok, 不過不失。估唔到豬肉片包青提都幾夾。 總結：呢個商場長期都爆多人，度度都要等，雖然佢個位有啲怪，但個人覺得值得去食。高質lunch.

好多年冇食過潮洲嘢。朋友黎過呢到食lunch 覺得好味，所以就搵晚黎咗試。裏面都幾大，啲檯嘅距離好闊，呢個時勢黎食都好安心. 滷水鵝片：鵝片Ok, 夠味, 但鵝肉唔算滑. 墊底嘅豆腐好好味, 滑兼入味. 蠔烙：好味. 雖然唔算好多蠔, 但勝在煎得剛好, 唔油, 唔會太厚太大舊. 胡椒豬肚湯：唔算好辣. 菜新鮮. 韮菜粿：好多韮菜, 韮菜味夠香, 個皮厚薄剛好, 但都油. 水瓜煮魚鏢：水瓜煮得剛好, 唔會太淋, 個湯清清哋好啱襯其他重口味餸. 糖醋麵：超好味. 鐘意佢夠薄但又唔油. 炸得剛好. 芋泥：超正. 夠熱, 唔油. 最鐘意個芋泥唔係滑嗰隻, 係仲有啲芋頭小粒響裏面。 服務好好. 啲阿姐都好親切. 總結：基本上全部都幾好味. 全部人讚好. 絕對會返黎食個糖醋麵同芋泥.

N 個月前睇空肚講宵夜見梁祖堯介紹呢間餐廳嘅芝蔴糕。專登外賣咗一次食，覺得好正，勁足料。近日叫咗個朋友去試食，佢返黎竟然話佢兩個大人一個細路食咗7個餸，因為好好味，連個細路都話覺得超好味。即刻走去試。 星期四晚黎都竟然都好多人，到差唔多八點幾乎冇位。 咕嚕肉：好癲。一咬落去個質感勁似肥豬肉，但食落佢又有一絲絲嘅質感，個汁偏稀但甜酸度剛好。 雙拼餃：皮薄餡靚！皮似雲吞加餃子皮。梅菜餃感覺較齋，但勝在夠曬多餡。流沙餃係蕃茄薯仔餃，都幾有趣，但未去到想encore. 金菇百合浸菜心：本人一向麻麻哋菜心，但朋友話呢度個菜心好神奇，可以炒到好似芥蘭咁爽。唔太信之下叫個浸嘅。點知真係好好味，完全唔明點解平時出面啲菜心唔係咁嘅！！連埋啲金菇百合杞子好好味，啲杞子勁甜，百合完全唔苦，金菇完全唔韌。由於最後食唔曬，呢碟嘢我第日微波爐叮黎食都係咁好味！完全唔明點做到！好神奇！ 台灣炒米粉：超好味。唔油，乾爽，咸度剛好。假叉燒同火腿個質素都似真肉。 另外外賣咗三盒芝蔴糕。 總結：絕對會返黎。下次要搵多啲人黎食，再試多啲嘢。

weekend 黎飲茶， 要一個月之前book. 仲要分兩個時段, 一點三黎到要響lobby 等到一點半先可以入去坐... 是日空氣質素奇差。望出去一篇白濛濛。冇景。座位一如預料闊落兼舒服，有櫈仔專擺嘢。 叉燒：要24小時前預訂。幾大碟。切得好大舊。肉質淋而不爛(之前卅二公館嘅叉燒肉太爛). 唔肥唔會太油. 不過個人唔係特別鐘意咁淋嘅叉燒，加上偏甜，可能有個飯會好味啲。 蝦多士：幾好。炸得好靚，真金黃色。蝦膠多得黎唔會死實。唔會太油。酸甜汁杰度同甜度都剛好。 蟹蓋：非常好味。蟹肉多唔在講，蟹味濃。醬剛好，唔會太杰。一睇以為旁邊嘅係炸蟹腳肉，原來係天婦羅酸薑！估唔到炸酸薑又幾得意。 金壕煎糯米：唔明食緊乜。糯米量好少，感覺似食隻炸腐皮蠔多啲。 龍鳳燒賣：食完發覺豬肉燒賣襯蝦係有佢嘅原因的，襯帶子真係冇鮮味。佢豬肉唔香呢個失望。 斑球魚肉燒賣：呢個好正。斑球做真係好味好多🤣 彈牙魚味夠。呢個如果點埋参拾士多個芫茜豉油應該會勁好味。 送嘅曲奇及糯米糍：曲奇得個甜字，唔算鬆唔算脆咁。糯米糍OK, 餡嘅醬香唔太甜，煙韌度剛好，細細粒啱食。 總結：埋單每人五百蚊。唔係樣樣好味。唔值。但要食嘅可試：叉燒，蟹蓋，班球魚肉燒賣。