N+ Burger (灣仔)

見openrice 一個喊都冇。尋晚黎食咗個Original。原來間嘢有成兩層，賣漢堡包黎講都幾有信心喎！尤其是灣仔已經有超多漢堡包店！收銀姐姐態度十分好，有笑容又唔會好假嗰隻，賣漢堡包黎講真係非常好。


包個樣唔錯，肉邊燶曬，可能有人會鐘意食有啲燒燶味，塊芝士係濃嘅，但肉又冇乜肉汁，又鞋口...啲菜冇咩得別，當然冇麥記咁衰，但MOS 記食落仲新鮮過佢... 75蚊一個包，又唔係坐得好...


唔係個阿姐嘅服務我應該俾咗喊。灣仔絕對有梗好嘅選擇，我就唔會返黎喇...

拾味山西刀削麵館 (灣仔)

首先利申，刀削麵好少食。


平日夜晚自己一個黎。填完表發覺冇人理，我就直去對牆位，途中個阿姐見到我，叫我都係去嗰度坐。張檯有啲濕。


冇人俾餐牌我，見到後面有就攞咗，原來都唔平，最基本揀一餸嘅刀削麵都要$60，加多個餸就加10蚊，食碗麵黎講嘅基本收費真係貴，因為基本只係得個醬(譚仔都有堆菜)。不過豆漿反而6蚊杯。


啲阿姐又響遠處行黎行去，見到牆上有QR code 點餐就用電話點。發覺個點餐系統個價錢同餐牌唔同，終於捉咗個阿姐問，佢話唔洗理照撳得...ok...


點咗個雲吞豬頸肉熱拌刀削麵 + 熱豆漿，驚辣所以醬分開上。


之後有兩班人黎坐我左右。等咗輪，豆漿黎...係俾佢兩檯的...嘢食都係佢哋黎先...最後到我碗麵黎我都未有嘢飲...問個阿姐..."你點咗熱定凍呀？"...食咗輪...個豆漿黎"你係咪點咗熱豆漿呀？"... 其實如果啲阿姐係唔睇系統嘅，不如唔好要個點餐系統啦...


Anyway, 雖然我希望會細條啲，但麵係好食嘅, 同埋好大份, 男人都夠曬飽。個醬只係小辣，少過十小辣。分醬係好事，如果佢落曬落去，成碗嘢應該好heavy. 豬頸肉餐牌佢有寫推介，果然係好味，唔係燒到燶燶地嗰隻，係醃得好味隻香, 仲好多舊。雲吞冇推介但都唔錯，菜多同切得夠細，仲好大舊。


總結：好味。如果服務好返啲會俾笑。

壽司郎 (上環)

一路想試，但實在頂唔順條隊。數個月前曾經平日五點幾攞飛，等到成八點都未入得。結果放棄咗。之後發現有朋友響附近返工，今次有得食因為佢5 點鼠落去攞飛，睇住個app，估唔到5點9後突然發癲叫得勁快，6點鬆啲就有叫我哋飛。好彩佢半粒鐘內可以補飛，結果7點半就有得食。


Wasabi 係普通料，但好高興見到檯上除咗有日本豉油，仲有醋，食白魚點醋先係正。


原來一次只可以響個pad 度最多叫4碟，連天婦羅啲汁，另外鹽都算一碟。好在啲嘢黎得超快。


選擇比千兩多好多，有啲魚都未試過。魚生黎講份量有啲時大時細，拖羅好肥大但我鐘意食嘅秋刀魚就比較細，好在佢個飯偏細舊，食落都ok. 飯都唔錯，微暖，但有人可能會覺得唔夠醋味。大部分刺身都中等質素，都睇得出夠新鮮。有人介紹食鰈魚鰭邊，雖然幾特別但個紫蘇葉個味太勁，遮咗個魚味，我實在麻麻～


估唔到佢啲炸嘢都算唔錯，係即叫即炸，不過天婦羅蝦隻蝦真係好細，但南瓜就大舊，仲有冬菇。我寧願佢俾我齋叫天婦羅蝦，我叫多幾碟唔洗俾逼食南瓜。炸章魚都幾好味。日本炸蕃薯係凍同淋嘅，唔好味。


食咗N次嘅朋友表示食過幾個甜品都ok.


每食一次每人會有個印，但每個印會只會吸響一張卡度，大概6個印就可以換公仔。啲公仔仲要都幾靚。


總結：呢個價錢咁多選擇兼都有質素真係贏曬。佢再開多十間唔洗排咁耐就真係超正喇。

Honbo (中環)

話說有日同事話灣仔好神奇，唔知點解可一個區有咁多漢堡包店。打開openrice 又真係非常多間，就問究竟邊間係最好食。佢話佢有個大食朋友覺得呢間最好食。今晚黎到basehall 見到有呢間嘢，就叫咗個基本嘅burger.


Size 中等。肉都厚，睇落係散粒嘅牛肉扒。其他料就真係冇乜，幾乎食唔到有其他料嘅存在。牛肉味重，汁唔會漏出黎咁多，但都覺得算juicy 因為似啲肉汁鎖曬舊肉度。漢堡包黎講，佢嘅芝士都算重味。包就冇乜特別。


Basehall 原來有水斟，仲要係有氣水！正呀～


總結：雖然幾好味，但料唔多，又成$98 個，唔值，一次就夠。香港大把其他選擇。

E Burger Cafe (粉嶺)

人生第一次黎粉嶺。平日黎食lunch。直入唔洗等。座位都算闊落，檯cafe 黎講都大。


大磨菇漢堡包：包算細，但啲料砌到個包好高。高到唔知點食，嘗試撳低佢食，但都冇咁大個口，同埋啲肉汁爆曬出黎。唯有切開黎食。食得雖然捩棄，但好味。啲菜新鮮，雖然牛味一般，但個菇同漢堡扒都好多汁，但個包夠鬆。最可惜係薯條，無味，懷疑唔記得落鹽，半淋唔脆咁，啲油亦食曬落啲薯條度。


熱咖啡都竟然唔錯。香濃唔酸。


同行嘅人食咗潛艇，話好味，十分多料。佢叫沙律，我試咗少少，啲菜新鮮，千島醬份量剛好。
 

總結：如果唔係啲薯條，會比笑。