Kaum @ Potato Head Hong Kong (西環)

幾年前黎過兩次食平日晚餐, 當年西營盤冇咁多好野食, 就貪佢算好坐, 裝修幾靚, 算容易book 位, 同野食都ok. 呢排啲餐廳間間都book 爆, 就一個禮拜前book 咗呢度做backup.


最終星期五晚真係度度都冇位, 都要黎食. 打算送個生日蛋糕黎切, 諗住切餅費都一係一二百。感謝佢同我講, 切餅費要三舊水. 呢度都要三舊水？！我飛的返屋企食算.


黎到先知原來一定要安心出行先入得去. Main dinning room基本爆咗. 好嘈. 嘈到基本上唔係點傾到計.


嘢食黎講，首先利申好少食印尼嘢，所以唔太知應該期望啲乜。唔想諗下叫曬佢7個signature dish + 個印尼炒飯. 仲叫咗渣印尼Sangaria.


Sangaria 隻杯好靚, 仲有支鮮花響杯邊點輟. 飲唔出印尼Sangaria 同普通sangaria 點印尼法. Sangaria 黎講算不過不失.


嘢食當中Gado Gado , 雞沙嗲串, 印尼炒飯係真好食嘅。沙嗲個調味醬花生味好香, 甜度適中。最唔鐘意係small plates 嘅牛, 雖然牛好淋, 但個醬真係好多兼重口味, 似食緊醬多啲. 主菜豬腩肉真係好肥吓，個皮燒得太燶。我攞嗰舊基本八成皮都係黑色. 其他冇咩特別好唔好食，正常嘢冇乜驚喜咁。大蝦就係普通燒大蝦咁，好在肉唔霉。長豆都幾油, 正常嘢, 冇特色... 朋友話食食吓覺得所有嘢都差唔多味😂


結果食唔曬. 攞食剩嘅走. 俾咗兩個有格嘅紙盒, 但冇袋. 夠環保.


總結：是晚真係太嘈. 講嘢嗌交咁. 決定搵吓香港有咩其他地方有好嘅印尼嘢食又坐得ok.

CHI Tachinomi (屯門)

Weekday 三點幾黎食。本身諗住食壽司朗，但叫緊528, 攞張飛係903號！真係好痴線！呢度就一個人都冇。入到去第一個感覺係好乾淨。讚。


Set lunch 係主食飯+小食+飲品。小食+飲品其實唔加錢得好少嘢揀，例如汽水要加五蚊咁。好在主食選擇都幾多。


特選鰻魚飯(少飯)+玉子燒：鰻魚唔錯，夠多兼夠彈牙。飯係日本米，好味。玉子燒幾甜吓，不過煎得都幾好，有少少燶咁。

特選串燒飯(少飯)+ 雞肉丸串燒：雞肉丸串最好味。牛就始於唔係貴嘢，韌。炸雞皮都夠脆，咸度剛好。雞翼ok, 不過不失。估唔到豬肉片包青提都幾夾。


總結：呢個商場長期都爆多人，度度都要等，雖然佢個位有啲怪，但個人覺得值得去食。高質lunch.

鈺膳潮州菜 & Bluemount (銅鑼灣)

好多年冇食過潮洲嘢。朋友黎過呢到食lunch 覺得好味，所以就搵晚黎咗試。裏面都幾大，啲檯嘅距離好闊，呢個時勢黎食都好安心.


滷水鵝片：鵝片Ok, 夠味, 但鵝肉唔算滑. 墊底嘅豆腐好好味, 滑兼入味.
蠔烙：好味. 雖然唔算好多蠔, 但勝在煎得剛好, 唔油, 唔會太厚太大舊.
胡椒豬肚湯：唔算好辣. 菜新鮮.
韮菜粿：好多韮菜, 韮菜味夠香, 個皮厚薄剛好, 但都油.
水瓜煮魚鏢：水瓜煮得剛好, 唔會太淋, 個湯清清哋好啱襯其他重口味餸.
糖醋麵：超好味. 鐘意佢夠薄但又唔油. 炸得剛好.
芋泥：超正. 夠熱, 唔油. 最鐘意個芋泥唔係滑嗰隻, 係仲有啲芋頭小粒響裏面。


服務好好. 啲阿姐都好親切.


總結：基本上全部都幾好味. 全部人讚好. 絕對會返黎食個糖醋麵同芋泥.

麗姐廚房 (灣仔)

N 個月前睇空肚講宵夜見梁祖堯介紹呢間餐廳嘅芝蔴糕。專登外賣咗一次食，覺得好正，勁足料。近日叫咗個朋友去試食，佢返黎竟然話佢兩個大人一個細路食咗7個餸，因為好好味，連個細路都話覺得超好味。即刻走去試。


星期四晚黎都竟然都好多人，到差唔多八點幾乎冇位。


咕嚕肉：好癲。一咬落去個質感勁似肥豬肉，但食落佢又有一絲絲嘅質感，個汁偏稀但甜酸度剛好。


雙拼餃：皮薄餡靚！皮似雲吞加餃子皮。梅菜餃感覺較齋，但勝在夠曬多餡。流沙餃係蕃茄薯仔餃，都幾有趣，但未去到想encore.


金菇百合浸菜心：本人一向麻麻哋菜心，但朋友話呢度個菜心好神奇，可以炒到好似芥蘭咁爽。唔太信之下叫個浸嘅。點知真係好好味，完全唔明點解平時出面啲菜心唔係咁嘅！！連埋啲金菇百合杞子好好味，啲杞子勁甜，百合完全唔苦，金菇完全唔韌。由於最後食唔曬，呢碟嘢我第日微波爐叮黎食都係咁好味！完全唔明點做到！好神奇！


台灣炒米粉：超好味。唔油，乾爽，咸度剛好。假叉燒同火腿個質素都似真肉。


另外外賣咗三盒芝蔴糕。


總結：絕對會返黎。下次要搵多啲人黎食，再試多啲嘢。

古琴雅苑 (灣仔)

有人話想響灣仔叫鴨，就黎咗呢度試星期六嘅晚飯。一早book 咗。去到發覺勁多人。好彩早到半粒鐘嘅我哋都安排到位。裏面唔係坐卡位嘅都真係好逼吓。Serve 我哋個姐姐擺餸響我哋檯都成日要企直俾其他職員過...睇過四人餐，覺得唔係特別抵食，尤其是鴨得半隻，唔夠喉。散叫。


松子魚：其實炸得幾好，但個汁屬於甜，有朋友嫌甜得滯直情放棄。
黑醋骨：骨冇事。汁杰，都係偏甜。重口味。
北京填鴨：隻鴨有個特別點，就係佢切咗幾粒肥皮俾你點砂糖食，正如佢介紹，真係入口即溶兼香嘅。至於隻鴨都Ok. 半肥瘦咁。片得都夠薄。不過唔鐘意佢個皮，佢個皮好似加咗木薯粉咁，煙煙韌韌咁，連埋啲鴨同餸食好滯。
醉雞：正常。雞滑。但酒唔夠香。
紅油抄手：皮薄餡多，唔算辣。幾好味。


環境黎講雖然佢裝修唔錯，但成個氣氛都非常趕。唔係啲職員趕你，係啲職員本身好似做緊茶餐廳咁，跑黎跑去，啲碗碟聲好勁。個餐廳叫古琴雅苑，但裏面完全唔係嗰回事。


總結：嘢食唔差但啲汁好重口味，環境太趕，應該冇下次。