Taqueria Super Macho (中環)

冇得預約。星期五晚黎，要全部人到齊先可以入座，去附近飲完嘢等齊人再黎過。裏面啲侍應好nice 好high 咁話等等。然後話"下張檯係你哋架喇！你睇下嗰張檯，佢哋就走架喇！你哋坐出面膠櫈仔飲杯嘢等陣啦！"


雖然今晚天氣好熱，我哋都坐街叫杯嘢飲。飲咗杯margarita, 都幾甜吓。要溶曬啲冰先叫好啲。


飲飲吓覺得有啲唔對路。響出面望真啲，佢講嗰檯客仲有半杯嘢飲喎！等呀等，等足一粒鐘都未入得！


已經八點半，已經好肚餓。唯有決定唔再等。朋友專登行去叫埋單時聽到個侍應同其他人講一定要用安心出行！單都未黎個侍應就走黎話"其實嗰張檯真係就黎埋單"! 跟住我朋友問係咪一定要用安心出行佢先話係一定要用！係一定！


俾你呃咗仲繼續響度食咩？！仲要懶到唔肯間位俾唔用安心嘅客用！既然間餐廳唔care 生意，咁永遠唔洗幫襯了。

Kinship (中環)

平日夜晚黎。黎前先見到之前個食評話冇安心唔入得，嚇得我即刻打去問。好彩佢話填字仔都得，只係可以食到10點。


裏面都幾有氣氛，黃黃黑黑咁，幾啱飲嘢。坐得都舒服。位嘅距離都可以。是晚好肚餓。


頭盤：
八爪魚：八爪魚量算少，但有薯仔幾塊，好多醬，所以好咸。
大份意大利飯：signature 黎。真大份，但好咸。唔係食唔落嗰隻，但真係偏咸。
青木瓜沙律：正常。唔係清新嗰隻，但食緊其他兩碟嘅呢碟用黎啷口都唔錯。


主菜：
豬扒：signature 黎。皮都係咸。好彩肉唔係。個醬都ok
Seared Bass: 最正常。有堆片薄咗嘅荀響面。夾埋食幾好。魚味普通，皮唔脆，未至於好好味。
炸Brussels: 其實炸得幾好，個菜面燶燶地，但又係嗰個問題，個皮好咸，食食吓真係頂唔順要撇咗個皮先可以繼續食。


甜品：
珍珠奶茶雪糕：部分珍珠個芯未煮熟，冇乜奶茶味，係vanilla 雪糕。但個雪糕個質感唔錯，有啲哈根大師feel, 幾好味。
Pavlova: 算大份。個脆皮夠脆，但醬較多，偏甜但可接受。
朱古力蛋糕：個人最鐘意呢個。但真係估你唔到，連呢個都有啲位突然好咸(因為有海鹽). 個蛋糕好濃朱古力味，hazelnut 味亦強，質感有啲似brownies. 但會太甜。其實幾好味。


總結：咸唔係淨係我講的，全檯都覺得呢間嘢太咸。雖然甜品全部都不錯，但主菜咁咸真係好難會再返黎食. 各位今晚食完聽朝可能會對眼腫曬.

Cluck Cluck (柴灣)

我記得間嘢啱啱開時，識人食過話海南雞飯麻麻麻哋，所以就冇打算去食。近日竟然有人同我講呢間嘢嘅蜜糖雞扒飯好好味。係好好味喎！咁誇？！家上呢幾排去隔離日常小館食時，成日都見到佢門口好多人等，就去買黎試吓。


間嘢淨係得外賣，都真係好多人叫。佢仲做埋熊貓外賣，見佢已經4個男人密密做都好似做唔切，所以都等咗差唔多十分鐘。(上個禮拜等譚仔等咗足足20分鐘，啲阿姐仲懶懶閒，集埋先推出黎，嬲到家下).


開個盒覺得個樣正喎。啲雞好似好黑咁，但其實係因為啲汁係黑色的。雞完全唔鞋唔乾，個汁個人好鐘意，因為佢以街外食嘢黎講比較清，唔會太咸或甜，剛剛好。估唔到係佢個飯都好味，連埋佢堆微酸嘅紅蘿蔔絲食真係一流。


總結：好快會再食。

魚屋 (荃灣)

一田大減價，見到宣傳單張呢間嘢有燒魚餐減價，去掃貨順手買埋做home office午餐。


估唔到搭左半粒鐘車啲嘢仲暖。但最估唔到係咁多嘢！仲要大份！西京海爐魚 + 檸檬胡椒燒鯛魚 + 芝士龍蝦一大隻 + 兩個飯 + 兩個湯都只係$238!!!!


一打開已經覺得啲嘢應該好ok. 爐魚最好食。肉質滑同充滿油香。有得比較下燒鯛魚變左唔好味，不過其實齋食都唔差，係啲肉鞋啲。個飯係日本米真係特別好味。芝士龍蝦返到黎仲暖暖哋，但芝士硬左，放左落焗爐一輪個身啲肉鞋左少少，但鉗啲肉仲好滑. 隻龍蝦身肉唔多但蝦籽好多。湯都好大碗，好足料，蘿蔔昆布同魚都齊曬。


總結：好飽！十分抵食！以佢質素，西京海爐魚就算正價都抵！

洪師父牛肉麵 (東涌)

見到呢度咁多個笑，仲講到係台灣黎，諗住應該點都會幾好食。有日夜晚響東涌就黎試下。入去有幾個譚仔阿姐式招呼。


牛肉麵：幾舊肉，有一舊連筋嘅係唔鞋的。牛味唔濃。麵原來係全方位粗麵，全條粗唔係闊，感覺似食厚烏冬。湯冇咩特別，唔濃唔稀咁。菜OK，食得出都新鮮。


另外飲左杯冬瓜茶。ok。唔會太甜。


總結：可能去過台灣食過台灣嘅牛肉麵係返唔到轉頭的. 但呢間嘢係以牛肉麵做招來，講到攞曬獎咁，可能我期望太大，呢個質素我唔會返黎。