ROBOTEA (尖沙咀)

原本打算去試下喫麵嘅泰式珍珠奶茶。點知已經冇左。咪走去SIP.ART 想試佢珍奶，點知又冇！唯有落黎！


睇個款就知係賣gimmick. 機械人沖嘢飲又識跳舞咁. 即係老細覺得有人會因為杯嘢唔係人沖而想試？？實在係個好奇怪嘅諗法！！


篤左佢個mon 一輪，發覺其大部分嘢都係人手沖... 仲有雪糕賣，都係人手𢳂...叫左杯珍珠奶茶少甜.


欣賞佢俾紙飲管。兩個職員都好禮貌同服務。


睇杯珍珠奶茶個色都知濃，有啲似飲港式奶茶。我之後個小朋友唔知今晚瞓唔瞓得著？好可惜啲珍珠真係唔合格。雖然唔係淋坺坺，但亦唔彈牙，質感似食芋圓。


總結：雖然佢用紙飲管同服務好，但我飲珍珠奶茶啲珍珠唔得，仲要佢都係算貴嗰隻，真係好難俾OK...

Cucina (尖沙咀)

屋企人有集團嘅coupon 就過期，就揀左黎呢度試吓。平日晏晝點半先到，竟然都幾滿喎。原來裏面好大，仲估唔到啲檯嘅距離咁遠！印象中係其中一間最闊落嘅餐廳。可能因為私隱度高，俾我藐到有娛樂公司高層同個後生仔黎食。呢度仲望維景，夜晚應該幾靚。


麵包不過不失。唔熱但有三款。個黑醋真係甜黑醋黎，我比較鐘意酸醋。


蠶豆粟米湯：粟米湯好香，打溶左啲粟米嘅粟米湯真係特別正。蠶豆其實我唔太鐘意食，佢放得幾粒啱曬我，亦好在唔係煮到好淋。湯面仲有幾滴黑松露點綴吓～黑松露味就冇乜。


露筍海蝦意大利飯：好熱。好耐無食過意大利飯出曬煙的。海蝦有啲半生熟，但唔鮮甜。露筍唔多。個人麻麻地個汁，唔夠creamy，玻璃獻咁。我估鐘意食中餐嘅人會鐘意？！


士多啤梨沙巴翁：沙巴翁印象中香港嘅意大利餐廳幾少做，有得食實在高興。屋企人好鐘意食。我覺得整體甜左啲，個lady finger 再厚返啲就正，個士多啤梨果肉雪糕好正好滑好味。


Cappuccino: Illy黎。Good.


服務都唔錯。好多員工。都有禮貌。


總結：唔會話超好食，但個環境真係好。呢個價錢lunch 都幾好。黎傾嘢都係個好選擇。

金子半之助 (灣仔)

想試呢間好耐。星期五晚黎左，慶幸有朋友幫我一早霸左位。出面都幾多人等。


第一次食梗係食迷你版+烏冬。烏冬有盒木魚，海帶同蔥。加左落去食，頭幾啖以為係自己加啲料好咸。食食下先發覺原來本身啲湯堅咸，食到一半冇食。同檯朋友都頂唔順。


佢嘅天婦羅真係好食。以前響日本食過貴價天婦羅，個炸醬好少好薄，我反而唔鐘意。呢度嘅剛剛好！就算佢一早落左醬，都唔會過咸。最有驚喜係炸紫菜，厚度剛好，可唔可以出呢個做零食呀請問？！飯當然係日本米，呢個飯真係好食。


另外想講，當晚其實天氣都唔係熱，但裏面真係好焗。小朋友就除淨件底衫咋...


總結：食飯！

膳心小館 (牛頭角)

食過呢間嘢嘅原味蛋卷，佢唔係鬆嗰隻蛋卷，係屬於較脆身嘅蛋卷，好味，夠香，唔太甜。咖啡味都好味，香，值得買。


黑糖馬仔好味。唔會太多糖膠或太甜。建議買。


鳳凰卷麻麻地。椰絲太多。


杏仁餅真心好難食。完全冇杏仁味，但又有浸好怪嘅味。仲要硬。同事表示似食緊牆灰(但佢亦表示自己未食過牆灰)。一舊都食唔落，掉左半舊落垃圾筒。仲有成大包，唔知點處置好。


總結：買蛋卷，同馬仔。

Got Beef (中環)

突然想食burger，但又唔想食牛。見呢間舖有蟹堡就專登行過黎試吓。


基本上得四個吧位，同另一張檯。是日攞住袋嘢。叫左就坐低。唔明點解得幾個位個檯下面都冇勾，要我攬住袋嘢曬食。是晚都算大風，碼頭更加，環境認真麻麻。


個包係細個。男人實唔飽。隨時食兩個都得...但就真係好食。食得出啲菜好新鮮，蟹炸得剛剛好，醬嘅份量都剛好。


總結：個包係好食，但呢個位置呢個價錢呢個環境暫時諗唔到點解要返黎食，畢竟中環真係好多漢堡包店。