七月十五日 今日同朋友又黎到葵廣，今次唔係自己去，所以可以食多啲嘢由於我大力推薦呢到既章魚燒，所以燒到朋友都想黎試下XD星期六既葵廣十分多人又擠逼，店前面已經有幾個排隊預備俾錢，店舖細細人手又不足，要等得比較耐都無辦法。我地今次叫左八粒雙拼，四粒明太子四粒大阪風，大阪風即係最普通平時食開個款章魚燒，明太子當然係我至愛啦～ 都等左8-10分鐘左右，終於輪到我地啦，熱辣辣的章魚燒永遠都係咁吸引既！ 啲醬多到好似唔洗錢咁，就黎浸住啲小丸子，大量既木魚絲其實絕對令盒章魚燒加分，普通既大阪風就真係無咩特別，醬汁足夠，口感軟糯，章魚都大粒，質素係有，但因為呢間店始終價錢比較貴，如果係既話我會試其他比較特別既口味，上次話想試芝士味，但朋友唔食芝士所以最後都試唔到。唯有希望下次試到，同埋希望店家會增加多啲唔同既口味啦

10.7.2017 今日誤打誤撞，難得黎到葵廣，平時住新界東的我好難搭八九字車黎，所以每次黎到都會係咁食今次都唔例外，有一大堆一大堆美食等緊黎我！ 由於早上都食左少少嘢，所以都未係好肚餓，一到埗就上左三樓買芒椰奶西，然後就黎到呢到買有名的章魚燒～ 價錢唔算太平，平均30蚊起跳，有6粒同8粒揀，我今次黎得一個人，所以就揀左6粒明太子章魚燒，30元～店員哥哥都好有禮同我講要等幾分鐘先有得食。 等左一陣就有得食喇，雖然未算熱辣辣，但都係暖笠笠，章魚燒的size好似一粒乒乓球咁大，表面係滿滿的醬汁，還有一層粉紅色的明太子醬，當然唔少得大量的木魚絲啦！ 咬下去非常軟熟，加上木魚絲，令口感十分豐富，而章魚十分大粒！明太子醬微微辣的味道，令整份章魚燒更加惹味~ (不好意思..我吃了一半才記起要拍章魚的艷照) 和一般坊間的章魚粒不一樣，這裡的是小章魚一隻，而且鮮味十足，這才是真正的章魚燒啊！ 唯一有小小挑剔是醬汁太多..有點鹹和膩，而且都唔夠熱。 不過這是我第一次幫襯，下次要嗌少醬。 總括來說，30元的章魚燒有這樣的質素，很不錯呢！難怪中午時間有咁多人有飯唔食食章魚燒大家可以叫8粒同朋友開心share，有雙拼選擇(+$2)，咁可以試多d味。下次再試下芝士味(不過可能會更漏XD)

之前約咗朋友去科學館睇木乃伊展覽，因為平時唔係成日會出尖沙咀，所以都想搵啲有興趣嘅餐廳順便試埋~我好鍾意食喇沙既，吐司工房嘅喇沙都唔錯，但係有啲貴，加上係連鎖店黎，周圍都有得食；好時沙嗲就食過一次，所以想試吓唔同嘅餐廳，無意中發現吉利尼，原來喇沙都好出名，所以決定趁今次嘅機會試埋啦。其實位置唔難搵，餐廳都幾靚幾舒服，採取自然光都夠光猛。其實餐牌可以選擇嘅食物唔多，都係喇沙、海南雞飯、咖央多士之類。最後我決定要一碗肥牛喇沙，我朋友就叫咗海南雞飯。佢啲海南雞飯到先，不過見肉唔係好多，雞皮多過雞肉，好似麻麻哋..不過佢話都幾好味既，我食左一舊雞都幾嫩既。 等左一陣我碗喇沙終於到啦！其實份量都偏小，不過牛肉都幾多，而牛肉就係平時打邊爐嗰啲肥牛，冇乜特別，配料有蛋同豆卜，其實大家都知食喇沙個靈魂就係湯底，湯底有啲辣味，椰香味重，湯唔會好「確」喉，而且味道濃郁得來又夠香，所以以呢個價錢來講都可以接受。$62一碗連凍飲，可以一戰～

3 FEB / TST

難得今日放假，又係星期三，所以自己獨遊下尖沙咀，本身想試下慢煮工業既三文治黎做lunch，點知食完呢個芝士撻已經有啲滯，哈哈。

芝士撻熱潮已經蔓延到香港好一段日子，曾三次平日到訪銅鑼灣bake，都被佢地既人龍嚇壞了，實在長得太驚人，所以我都係等到熱潮減退先去買，半熟工房也是，熱湖剛迭起時也是排了一條長長的人龍，二月初到訪時，人龍已經減了不少，所以是日去到，立即就有得買了。

芝士撻索價22元，其實都頗貴，畢竟好評如潮的bake也只是20元，美心的cake lab也好像只是14元，旺角candy shake也推出買奶昔就優惠半價9元食到芝士撻，唯獨這間定價22元，似乎對撻的質素頗有信心。

去到時，盤子裡只剩下兩個撻，所以已一拎上手只會是微暖，果真如是，員工分工合作，一個收錢，一個小心翼翼拎個撻出黎，說時遲那時快，芝士撻眨眼已到我手。

快速拍了一張照，一放進嘴裡，先嚐到脆口的餅皮，有牛油的香味，而豐沛的芝士餡好像山泥傾瀉般瀉出來，不會太酸，是適中的酸味和濃郁的芝士香互相配合，加上撻本身也有溫度，令我對它很有好感，而且質感也很軟滑，老實說，我覺得比bake還好吃呢。

2016 FEB

呢個雪糕已經食左好耐，近排新年的時候有親戚買左sweet monster既爆谷同大家一齊分享，所以又令我諗返起呢個爆谷雪糕。呢間店位於朗豪坊，地點算係非常方便就腳，因為朗豪坊咁大個商場，但甜品店嘅選擇比較少; 價錢＄39，份量同價錢都算係合理，因為呢杯雪糕嘅份量都幾大，適合兩個女仔一齊分享。

我哋去到嗰日都有唔少人排隊，大部份都係為咗呢杯雪糕，而店內的都有一盒盒嘅爆谷同埋一啲特飲可以選擇。爆谷有五款味道，包括焦糖，牛奶，芝士焦糖Mix，士多啤梨同埋朱古力。我就貪心啲揀咗芝士焦糖Mix。由於嗰日都幾多人買雪糕，所以平均都要等五至八分鐘，由於店內位置係open area，無咩位企，但都睇得出幾乾淨企理，啲雪糕機都幾乾淨。而員工都好熟手，好快就可以整到一杯好靚嘅雪糕

店嘅隔離有一啲紙牌，可以比客人一路都揸住杯雪糕一邊影相，最啱相機食先嘅朋友^^

一拎上手，立即影左幾張相，佢都冇咩點溶，食雪糕最擔心就係驚啲雪糕好快溶，質地唔夠實，另外雪糕痴住啲爆谷，都會怕啲爆谷會唔夠脆，但食咗之後發現完全冇呢個問題， 首先值得一讚嘅係雪糕嘅質感好實，牛奶味好重，又好夠凍，同爆谷一齊食係估唔到咁好味。芝士味爆谷好香又夠鹹，中和左焦糖味嘅甜，兩個味道可以相得益彰，唔會得個甜字。食落口有層次，真係唔錯。原本以為杯雪糕會好大杯，不過我覺得其實一個人都食得晒，哈哈。

28 DEC 2015/ MK

旺角登打士街有好多美食就係人都知，但好多本地小店壽命都不長，舊店轉眼又變成新店。每次經過candy shake門口，都被佢地的裝潢吸引，實在太夢幻啦~~~（對於我呢啲細個想住糖果屋既傻妹黎講xd） 入面有好多唔同類型的糖果，好多都係日本糖，有果味，奶味重啲的都有，太多款式選擇，真係好難揀。

話雖如此，我都係很快揀左佢地重點推介既金莎奶昔，加9蚊要多一件芝士撻。total 36蚊。服務員做事都相當被動，都唔會講多謝的，不過我都無所謂的，但我俾錢時都同佢講係拎走，佢地係唔會幫你將個撻入袋的，要自己入袋，奶昔就好像沒有膠袋，一定要手拎住杯飲品，其實都幾狼狽，係店內食會方便點。店內環境很漂亮也很舒適，但沒有座位，是典型的外賣店，只有數個企位，我去到公園坐下慢慢食，芝士撻不暖，撻皮受熱不均，樣子不太好，而芝士餡不是多到流心的，帶點酸味的芝士餡較濃稠，不太幼滑，整體沒有驚喜，不差，但9蚊一個性價比頗高，如果以原價購買就不值得了，相信店家也頗懂得做生意呢。金莎奶昔可以算是signature drink嗎？很濃郁的榛子味，完全沒有用多餘的水溝淡的味，是真材實料的感覺，咀嚼奶昔的小顆粒，是有些果仁的味道，層次豐富，飲完十分飽肚，而且不太甜也不太膩，不錯。

唔係住旺角既我，耐唔耐先會黎一次，係幾個星期前睇到呢間開左都ok耐既雪糕店，
其實都想試好耐，所以就停下腳步，去試下係咩味道。
因為係第一次，所以就先叫一杯原味試試。
其實個噱頭一定係黎至個舊蜂巢，
因為就算係咁細舊，貪新鮮既大家都會因好奇而買，試下蜂巢係咩味XD嘻嘻
而我都係想試下佢咩味先買...
咁普通既雪糕要賣32蚊，唔通真係話嫌錢多，想試下M記既雪糕同呢到有咩分別，先買咩...
間店都好細，俾完錢後就要等，等，寂寞到夜深~~~~~
終於等到呢杯除左蜂巢外平平無奇既雪糕。
雪糕真係勁快融，影左兩張相已經開始融＝＝
食第一啖雪糕，都係同32蚊呢個價錢完全扯唔上關係既平凡，
有奶味既，但唔重。
重頭戲係蜂巢！一咬落去啲蜂蜜咇哂出黎，好清甜，口感好特別
再加上本身個雪糕有蜂蜜，所以更甜～
如果個雪糕係豆乳／豆腐味，唔好咁甜，會更岩我口味：）
舊蜂巢食到尾勁似食緊香口膠，好膠既味道－。－
總括而言，都可以試下舊蜂巢既，雪糕就無咩特別囉～

16/5

其實呢間係咪真既允升分店？？
允升今日好多人，逼爆哂，無緣一試lu
突然諗起呢間，聽人講係分店，咁就試下啦
得一兩枱人，都完全唔洗等位，大把位
門面都唔大，小店一間，有一個女仔侍應
燈光好夠呀，唔太猛又唔弱，正
太猛就好'殘'眼 (￣∇￣)
都幾有禮貌既，不過做嘢好似唔係好熟手咁
唔緊要啦哈哈，都唔急住食既~~涼下先
坐正係個風口位，好涼好舒服~~~＼(^o^)／
叫左個紫米豆腐花 (凍，$14)紫米露係多過豆腐花既，同埋圖片唔係只供參考既！！！
係一模一樣既！！
紫米露上面個啲我諗係奶黎既，因為無咩甜味~
食左一啖豆腐花，好滑喎！又有好香既原豆味，
姐係最原本既豆味
而紫米露既紫米就好有咬口，又唔會一味死甜，
因為咁熱既天氣，唔想食太甜膩既味道，
想食啲清爽既自然既甜味，呢碗岩哂呀！！

去到後尾，我都加反少少黃糖，都好好味，清甜到呢~
我覺得好好味喎，不過芒果糯米滋就無試到，
下一次一定要試下！

16/5

上一次去長洲大概是半年前的事，個次都有黎食甜品，長洲既出名既甜品店有天然，允升同師妹，師妹就從未試過，因為聽講服務不太好，雖然我唔係好著緊服務呢個criteria ，但係有啲食評都講到好似好差咁，所以就無去。天然就每次都會幫襯，岩岩都見到有幾篇話天然既服務都麻麻，但我覺得都可以接受，起碼唔會話連多謝都無句；

我記得個日中午去到，因為個天黑哂，就落雨咁，所以就諗住搵一間甜品入去坐下，點知天然門口痴住張紙，話1:30先再營業，姐係1:30先俾你入去坐，即刻呆哂，於是決定買兩粒芒果糯米滋係外面啲長凳坐就算。6蚊一粒，算係幾平。因為以佢咁既Size，真係食得夠哂happy！
個皮好煙韌，好香又夠薄！真係好正！兩樣嘢係好match ~
入面既芒果好甜，而且有小小芒果汁係入面，
好好既一樣嘢就係佢唔酸，
不過我諗未必每次都咁好彩食咁甜既芒果＼(^o^)／
如果凍啲就好啦！
走個時淋住大雨都買左少少芒果糯米滋反屋企俾屋企人嘆！

16/5

又黎到長洲啦，呢幾日又不停落大雨，落到好煩躁，因為考完試既關係所以唔洗反學，諗住去下街但又日日落咁大雨，黎到星期五，終於叫做好啲天氣啦，所以都按原定計劃去長洲。

一落船就落毛毛細雨，唉真係咩心情都無哂。之前都去過幾次長洲，雖然沿路有一兩檔都係賣大魚蛋，不過首先一定係去甘永泰啦！10蚊一串，話貴唔貴，話平唔平，難得黎到都要捧下場既！一去到都有唔少人等緊，都唔少人買芝士丸拼三文魚丸，同埋普通細粒既魚蛋。咁我地就要左兩串大魚蛋啦，個到既姐姐好熟手，即刻拎起兩串落油鍋炸，確保食落去係熱辣辣。仲有張廚房紙可以印走多餘既油，呢層係好既，因為我諗好多人同我一樣好憎啲油溢味 ………其實大又唔係真係好大，相比其他店呢個都唔算大
但炸完就夠熱，
一咬落去，內面都夠嫩，同埋好彈牙，呢點好緊要
魚蛋唔彈牙就唔叫魚蛋啦
不過鮮味唔太明顯，但係係好食既，keep到水準 : )