金泰泰式美食 (大埔)

呢間街市泰式熟食檔，由大埔新街市一入伙已經開舖，全店都係由泰國人士主理，姐姐們操流利廣東話，人有Nice，所以我都長期有幫趁。
今日走咗去食個午餐，一碗豬扒撈檬加凍檸茶都係$49。
不嬲都知道呢間野大件夾抵食，但今日實在太誇張，本身已經用一個大碗，蝦片、豬扒、蔬菜，已經鋪滿晒成個碗，真係唔見檬粉嘅存在，我要撥開啲豬扒先見到檬粉，之後我就開始喪落檬粉汁，浸住D檬粉，差唔多同湯檬一樣
平時食開雞翼今日轉食豬扒，豬扒大件夾厚，雖然唔及隔離東記咁出色，但都可以！
唔想食太油膩的話，凍檬不失為一個好選擇

銀龍粉麵茶餐廳 (中環)

由山頂徒步落中環，已經到咗下午茶時間，想去茶餐廳，啱啱經過銀龍，入去食個下午茶。
兩個人叫咗乾炒牛河同星洲炒咪大家share食，乾炒牛河用嘅河粉係由生是貴叼，唔係一般嘅粗河粉，我自己比較鍾意用幼身河粉，味道雖然係偏淡，但好夠鑊氣，係一個唔錯嘅選擇。另外一個星洲炒米，米粉都係用上銀絲米粉，咖喱醬雖然有啲唔均勻，但炒得都頗為乾身，如果可以再加辣少少，咁就更加好。朋友話佢嘅奶茶係唔錯，但我嘅咖啡略嫌酸咗少少。
雖然呢個係下午茶但係加埋凍飲兩個餐都要$110 ，都同午餐冇咩分別。

富士山媽媽 (山頂)

無可口非，當望住一個咁靚環境下食飯，可能特別好味！
但事實，呢個黑咖喱吉列豬扒飯完全比唔到呢個感覺
黑咖喱 • 完全唔辣唔香，純粹一個黑色醬汁而已；吉列豬扒 • 吉列層完全硬到不得了；最奇就係咖喱里的薯仔原來係白烚，食開咖喱都認為薯仔一定跟咖喱汁一齊炆，原來可以咁特別
反而炸牛蒡有點驚喜，薄薄片左黎炸，好脆口，帶點甘香，唔錯！在依家冇得去旅行情況下，要左支富士山柚子梳打，解下渴....望旅行之苦！
以山頂價呢間算係Ok，可以為環境黎一試

Cova Ristorante & Caffe (東涌)

依家嘅假期，除左留家還是留家，疫情下，防疫要做到足，但總有身痕時候，對於Cova係情有獨鍾，特別係東薈城店，所以清大假都會去食個lunch！
放假唔好同人爭lunch time時間，已經大約點半先去食，但都係滿座，好彩仲有一張檯，隨後walk in顧客就要等一等喇。
呢到D set lunch 由百幾至二百幾不等，其實以百幾蚊個lunch黎講，有湯/沙律、麵包、頭盆、主食及茶，另外加錢可以食埋甜品！真係唔算貴。
今次點左個蟹肉牛油果意粉及露筍意大利飯！
呢到首先個麵包籃有三款麵包及餅乾，熱辣辣時真係好脆口，配上牛油，唔使點餐湯都已經滿足，有時佢地仲會問要唔要refill，想要的，不妨直說唔好客氣
餐湯夠creamy，再食埋帶咸香parma ham同清甜哈密瓜，其實都少少飽！
主食的蟹肉意粉唔好睇佢細細碟咁，但佢本身好多蟹肉夠creamy，配上軟硬度適中意粉，又講句，好味
入到黎食飯你係冇辦法抗拒加錢食甜品，口里說飽，但那邊又搵侍應落單⋯⋯加甜品，對於係tiramisu忠粉的我，每次都食佢先滿足! 滑
餐茶主張飲佢地signature chocolate，香濃，我覺得好飲過咖啡！
遠遠都要走到去東薈呢間cova，因為佢地服務真係好好，特別叫ANN的staff，每次見到佢都係好開心咁招呼你，樂意同佢傾下計，今次佢仲講左我地食雪糕！果個開心果味雪糕，原來又係勁好味，食落去好有過年食緊開心果味道，一流！
雖然呢到遠，但食得開心，好樂意再去幫趁

欽記粉麵 (大埔)

欽記
由細食到大，由大埔臨時街市食到新街市
例牌鴛鴦加底厚皮！
講事實，疫情前曾經係好串唔做外賣、唔做過檯，所以我好一大段時間冇食過，加上星期日又休息，幾乎絕緣！
但疫情加上街市裝修半年後，已經可以有返外賣同過檯，所以有機會就好把握
我鍾意佢鴛鴦係用旦麵，唔係生麵，加埋魚旦夠爽口，最正佢係用有骨炸魚皮，食到一碗滿意魚旦粉，樂上半天