曾經呢度都幾好嘅，之前都嚟過好多次，但係唔知係咪已經唔同嘅老闆，無論服務質素同埋嘢食各方面都差咗好多，甚至有一種準備執笠嘅感覺。 首先啦， 佢話book咗枱就唔可以叫lunch必須散叫，但係睇返條款根本就冇寫。不過唔緊要，咁就話不如取消個Booking，然後佢話已經撳咗出席取消唔到，但係其實事發現佢係撳咗我哋缺席。如果驚OpenRice收佢錢嘅話，又唔想Booking叫lunch，其實可以直接取消個booking都冇問題㗎，點解要同個客人講已經撳咗出席？ 然後我哋話如果只能夠散叫嘅，咁我哋唔食啦，佢先話當我哋取消Booking可以叫lunch，不過好似上面咁講，其實佢最後都係撳咗我哋缺席。所以首先個感覺已經非常唔良好。 然後佢嗰個半自助餐，應該一早已經俾人食晒，佢一路都話會refill，去到最尾先另外整一碟暖嘅沙律。衛生考慮分開上，問題不大嘅，但係基本上都冇其他客人我唔明白點解要食完佢先上到個沙律，仲要係暖嘅。 然後講返個主食，認真我真係未識過咁樣嘅煎雞肉，真心差過連鎖炸雞店，嗰塊雞肉超薄，然後啲炸粉超多；另外朋友嘅三文魚都係自己睇圖啦，之前明明啲嘢食幾OK，但係真係唔知點解而家變咗咁嘅樣。 跟住我哋叫做薯角，最後嚟咗薯條，其實午餐時段都係得四台客，仲要有兩台已經係上完菜，真係唔明點解咁樣都可以錯。而且仲要等咗超過半個鐘頭先上主菜，差唔多走先上沙律，成件事真係好唔OK。 最後講吓個環境，本來聽日應該冇咩改變嘅，但係餐廳對面喺地盤，之前應該係冇開窗，所以都唔算太嘈。但係而家唔知點解開咗窗，結果成個環境完全變咗兩回事。 都係嗰句啦，曾經呢間餐廳真係幾OK啊，但係今次之後應該都冇下次。原本仲以為其他食評有問題，但係而家我諗佢應該真係可能轉左老闆…

同朋友想食日本嘢，咁就book咗呢間日式餐廳呀，但認真， 佢啲出品真係唔得。 呢個真係比較正常嘅，但係食落去冇咩鮮味，而且份量真係偏小。 嗰兩隻蠔呢，我唔知係咩原因佢要不停咁沖水，真係食得出完全係淡水，而且唔知係咪因為沖水太勁，之後基本上係完全冇味。然後海膽嘅份量有好細，紫菜係琳嘅，真係唔知點… 你話整體環境可以啦，日式茶餐廳嘅感覺，好處係可能冇乜人，所以都幾安靜，但係咁嘅價錢同感嘅食物質素真係唔值得，所以都應該唔會有第2次。

見到附近有新餐廳，就諗住去試吓啦 新張優惠七折係抵嘅，原本諗住食蛋包飯，結果個個都轉左食壽喜燒 啲嘢係OK嘅，可能加埋七折，感覺就更加好。迷你打邊爐就真係冇咩好講㗎啦，所有嘢都正正常常，不過我覺得佢啲蔬菜可能煮咗一陣先上菜會好啲，點個lunch hour靠佢呢過火真係需要啲時間。 唔知道係咪新開咗嘅關係， lunch hour時間都冇咩人，傾吓計個環境係OK嘅。不過睇住先拎呢個壽喜燒嗰陣就真係有啲危險，一手攞住個熱辣辣嘅火鍋，另外一隻手攞住燃燒緊嘅爐…坐喺隔離都有啲驚。 但總體來講OK嘅，可以再食😂

首先定價就有啲唔理想，因為小弟太懶所以套餐就叫咗套餐， 但係應該分開會抵食啲，其實就係差$5 ，但係就少咗兩隻餃子。 然後講吓餃子先，諗住趁熱食所以食咗一隻先記得影相，首先佢個皮真係林到好似碌水餃咁，而且煎得有啲焦，餡料方面冇乜味道。 跟住到個拉麵，首先隻蛋就散嘅，然後啲面黐埋一舊，唔知係咪唔夠時間。嗰兩件叉燒死實，口感唔好，味道方面唔知道係咪因為比蝦味增影響，所以都係偏鹹。蝦味增係正常嘅， 號稱剩係得豬骨同埋水嘅湯頭都係感覺太鹹，唔知道係咪真係蝦味增影響啦，成碗麵最好嘅可能係粟米，甜甜地嘅🫠 本來見到自己撳機落order有啲日本嘅感覺，加上喺附近返工咁耐都未試過，期待值太高，所以同現實反差有啲太大，但總體嚟講都係劣評。

唔知兩年係咪真係好興用研究所呢個名，反正我係比呢個名同埋OpenRice嘅相吸引啲所以先過嚟試吓，都係講咗結論先，唔得。 環境服務可以嘅，價錢都係正常價錢嚟嘅，但係啲嘢食真係仲喺度研究緊，可能真係我唔識欣賞啦。 首先係朋友叫既號稱冇味精嘅生安格斯牛肉金邊粉，首先我唔知點解佢話冇味精，但係都落咁多鹽，因為呢個湯都真係幾鹹。然後朋友想轉河粉，然後店員同佢講其實佢哋啲金邊粉就係河粉… 我嗰個係青咖喱雞配珍珠米，首先珍珠米就唔好諗住係日式嘅珍珠米，感覺似一般嘅白飯，但係比較圓潤一啲，然後咖喱雞係用煎過嘅雞去做嘅，個情況就好似將燒雞放入咖喱汁裏面，係一個嘗試嚟嘅，不過我覺得應該係研究失敗。 然後馬拉盞通菜完全食唔到馬拉盞，不過呢個應該都算係小事。枱面有支黃色嘅水，店員冇講過係乜嘢嚟嘅，應該係香茅水之類，都係果句啦，係好嘅嘗試，但係成件事都幾唔夾。 最後呢度叫東南亞料理研究所，首先佢應該真係仲喺度研究緊；其次日本、韓國同印度幾時變咗係東南亞，中？然後餐具用咗韓國同埋其他地方嘅餐具，音樂應該係歐美同埋南美嘅歌曲。成件事好似將所有嘢炒埋一大碟咁嘅樣，但係每一樣嘢都做得有好大嘅改進空間，結果最後唔知佢想點。可能佢嘅甜品會好啲嘅，但係去到呢度真係冇乜興趣繼續嘗試落去。

本來叫外賣都係諗住隨便食一餐嘅啫，但係見到個面之後真係不得不這兩句。 呢張相係發現兩個面度變咗一個餅，反轉咗個面影 即係而家好多都係做定先，等啲人六點之後我直接買返去食嘅，但係我喺OpenRice App嗰度點外賣自取，真係唔係好預期個面係咁嘅樣…呢個麵我相信都做咗好一段時間，根本係完全分唔開，嘅歌我真係唔知自己食緊啲乜嘢… 講埋其他嘢食啦，唔係好差嘅，好似自己買點心放入微波爐咁上下啦，整體來講自己去買點心放喺微波爐再煮個公仔麵可能個感覺仲好啲，可能堂食好啲掛？

今日有朋友食嘢，據聞呢間餐廳喺觀塘都幾出名，見到佢荃灣都開咗分店就過嚟試吓啦。 個肉丸我第一個感覺係IKEA肉丸，或者係對面馬莎嘅肉丸，符合預期水平嘅，但係就稍為乾咗少少，前菜小食來講我覺得OK嘅。 本來係想過嚟鋸扒嘅，但係見到有個豬鞍，突然間改變左主意，不過朋友叫咗嗰個西冷睇落去都係一般般。 後面仲有蕃茄，加埋成嘢嘅感覺真係好焗豬扒飯，總體嚟講係外面香，裏面爽口，但係有啲部位始終係太肥，所以食完之後感覺上都有啲滯。同埋佢個白飯都比較多，但係真係唔吸引。 最後都係OpenRice上面話可以用OpenRice Pay，但係店員都係話唔得…

是日大圍出發行山，見到網上話呢間Cafe幾出名，所以就順道試吓。 本來想叫軟殼蟹，但係覺得早餐有啲over，所以冇叫，不過現場見到其他人叫嘅弦樂鞋同網上嘅大細真係有啲出入😂 最後叫咗個黑松露雜菌，總體來講不過不失啦，如果專登過嚟食嘅就可能未必值得。隻蛋稍為炒得老咗，呢個配搭做出嚟亦都唔係好特顯到黑松露嘅香味，另外番薯條做得OK嘅。 嘢飲就不過不失啦，但係造型方面打卡可以。另外可能鋪面太細，相對來講會有啲嘈，同埋好多人，所以傾偈慢慢坐就唔係咁好理想，不過地面鋪都係預期之內嘅。 最後感覺上服務態度就認真麻麻，唔知道職員心情唔好定乜嘢，好似好唔耐煩咁嘅樣。最後OpenRice上面話佢收OpenRice App，但係職員話唔收…

是日約咗朋友過嚟而家試吓個威靈頓牛柳，其實對於呢道菜本來就唔會有太大期望，特別係呢個價位，即係如果有一般嘅水準其實已經好好；但係真係有啲令人失望。 首先入到餐廳嘅感覺OK嘅，但係上菜嘅速度真係有啲過分，10分鐘都未上到嘢飲，然後我個威靈頓等咗45分鐘，中間話個焗爐有問題叫我等多2分鐘，嗰陣我就係諗應該都唔知2分鐘嘅啦， 2分鐘都唔使同我講啦，果然結果係20分鐘左右😂 OK，希望慢工出細活啦，拎上嚟個賣相都OK嘅，但係一吉落去就知出事，我叫五成熟，張單都係寫五成熟，但係我諗應該都超過七成…然後把刀直頭切唔開，切到我手軟，最後要換過把刀。 簡單啲來講其實我就冇乜期望嘅，呢個價錢中午叫威靈頓牛柳都唔係想要求啲乜嘢，但係真係唔合格，啲肉切都切唔開，放落個口到更加難咬，我會用煲湯瘦肉去形容佢嘅口感。 但係，都有值得一讚嘅係職員好好禮貌，中午時分呢個環境到有八成滿，成個場得佢一個走來走去，服务都算係咁啦，最後要介紹吓個人覺得全場最好食嘅…因為等咗45分鐘所以職員送咗兩個雪糕俾我哋，全場真係最滿意杯雪糕，仲好飲過杯咖啡😂 最後咁講啦，我諗佢餐廳唔係唔得嘅，但係似乎唔係太適宜做呢一類型嘅菜式，朋友嗰件漢堡都係有啲over左，所以或者可以調整下菜式會比較好啲。

嗰日同朋友行山經過赤柱，咁就順手食少少嘢先再繼續行，見到一間好似之前未食過嘅就試吓。 因為我哋兩個都唔算好肚餓，所以就淨係叫咗個Pizza，好似係印度唔記得咗乜嘢Pizza。 整體感覺OK啦，不過放喺赤柱個感覺會再好啲，始終做遊客生意地方，呢個水準其實已經算唔錯。不過真係要趁熱食，稍為凍少少個餅底就開始硬，仲有係個醬汁稍為淡少少，同埋唔係好覺得有印度風味。仲有如果配料可以多少少會好啲，真係得幾舊細細地嘅肉，但係總體都可以嘅。