見同事呢幾日愁雲慘霧，真係做同事都覺得不忍。前兩個星期六有節目都照同佢食餐晏，講吓心事先。去到波濤都唔多使等位，於是坐低諗住食餐勁嘅減一減壓。

等位嗰陣同事經已對個唔知炭燒豬仔骨定乜鬼非常屬意，於是揀咗個鴛鴦扒，另一同事同我都諗住要吉列黑豚沙律，再叫多個淡咖哩汁煙三文魚意粉。大家見情緒咁高漲，除咗改晒三個湯做酥皮海皇之外，仲要多一兜白汁蜆同一兜田螺薯蓉。

啲蜆好迷你，不過啲汁幾好味，真係想撈個白飯。鴛鴦扒係豬仔骨同牛扒，啲骨我覺得仲好食過outback嗰啲。

個沙律冇記憶中咁好食，最緊要係冇椰果。失敗。

意粉好遲至到，當時都經已飽飽哋。不過好彩得個碟大，入面啲「內涵」三個人每人幾啖分晒。個淡咖哩汁感覺上好似好油咁，同埋啲煙三文魚煙到爛咁滯。

啲份量比記憶中大，好彩個薯蓉漏咗單，如果唔係真係搞佢唔掂。凍咖啡依然唔錯，成餐飯都食得大家開開心心。埋單嗰陣見唔夠三舊水所以冇用到匯豐咭用咗compass，到張單再印返出嚟個細路女waitress至話道亨有折。咁啱我用嗰張啫（六份一機會），如果唔係真係蝕。

雖然實際上冇嘢幫到佢，不過都希望可以為同事略解鬱結啦。

上星期四同舊同事做壽，選址nara。坐低等人嗰陣叫咗杯honeymoon飲，望吓其他人叫嗰幾杯，都好似差唔多樣。

留起咗最後一份生蝦，想要多兜都冇。生蝦好新鮮，不過我就興趣唔大，反而個蝦頭啱我啲。

跟住嚟柚子沙律。原本我對柚子味麻麻哋，但係食落又唔澀，效果清新又出色。不過蝦就得四隻，結果我掛住分俾人，自己冇得食…

串燒要咗牛同雞（支竹籤上面有寫住架），而拼盤就有蔗蝦、蝦丸、蔗葉雞。

湯要咗兩款，一個係冬蔭公，一個係椰子雞湯。前者有大蝦有細蝦，湯味唔錯不過可能好多人覺得唔夠辣；後者我覺得鹹咗啲，但係其他人又話唔係。

菜方面揀咗泰式通菜，有麵豉。冇蝦醬炒咁濃味，但係都幾好食。

蜆肉意粉普通啲，我覺得冇乜味。

魚柳類似咕嚕肉，不過啲味道啱啱好，唔太酸又唔太甜。

食晒咁滯再加多個紅咖哩牛腩。牛腩咁晒淋，咖哩唔係太辣，搭多個薄餅（另外叫，十五蚊兩件碎上）真係fit到漏。

餐飯埋單$780，其實計返份量都算貴，可能因為南洋中心呢度都貴租。不過間舖都算裝修得幾令人坐得舒適，舖仔細細都唔覺逼；唔鍾意可以坐roadside，感覺可能更有風味。

尋日收工去大角咀搵食。行到去金船長見個筍位俾人reserved，於是冇入去幫襯。行多幾行見到間laksa，心諗冇乜幾何食東南亞嘢，於是入去試吓。

間舖入面啲位其實唔算好坐，不過夠晒光猛。兩個人都唔叫得幾多嘢食，叫咗一碗參巴喇沙，一客咖哩牛腩。牛腩有飯跟，我哋加多五蚊轉做麥餅。

喇沙普通，湯底味道唔濃，少少辣，好多雞絲（可以揀要海鮮）。個人都係覺得潮州粉麵第一，其次係越南牛河。

咖哩十分香，不過椰奶味都幾重；配飯或薄餅都係一流。啲餅牛油味好重，食落好香口。牛腩炆得好淋，個味亦都唔辣。

估唔到大角咀入面幾條街都咁多嘢揀。

上星期日嚟呢頭搵下午茶食，搵搵吓嚟到見到諗住舒舒服服坐低食吓嘢。

結果就係除咗個位好坐之外乜都冇。

下午茶都唔係平，叫咗個雞脾（真係寫住雞脾，唔係雞髀）薯條，朋友叫咗火腿通粉。

一等就半粒鐘，嚟到變咗雞翼薯條。薯條凍嘅。

地方大，得幾兜友落得切單又收唔切嘢。下午茶都做成咁，唔敢想像晚飯時段會點。

上兩個星期同事生日，聽佢講話未食過鹹豬手，所以同佢去咗尖東間king ludwig beerhall食。

嗰日熱到發瘟，雖然下晝有同事請食西瓜，到咗收工一離開個office即刻成個人又滾晒。原本訂八點半，餐廳有人打嚟話早咗八點就有位，仲好。原本聽到冇好似美利樓嗰邊啲卡位，有諗過轉架埗，不過入到去見到個位都算係靠邊，於是就坐低開餐。

由於天氣太熱，所以只係叫咗好少嘢食。除咗農夫麵包同豬手之外，求其揀咗一隻燒嘅豬肉腸食。最緊要係杯maisel's weisse。救返我條老命。

唔係飲過好多隻德國啤，上次homeboy叫去beirfest都冇去到。不過呢一隻真係唔錯，入口好滑，又唔係太淡，配埋啲豬手同腸一路食一路飲，真係炎夏一大樂事。

麵包好食，外脆內軟。同事同我一樣，食完牛肝醬同香草芝士之後都話比較鍾意後者。而家呢個包喺我排行榜上僅次於outback黑糖包。

豬手皮脆肉嫰，不過啲豬皮食落真係好鬼滯。

呢度個waiter問都冇問就切埋上枱，唔似美利樓嗰邊會問一問你使唔使切埋。咁都唔係問題，最弊係幫人切嗰個唔係好掂，隔離枱上嗰陣個waiter失手舊骨跌咗落地。佢執返問人哋介唔介意，咁嗰三個中女見其實都切晒啲肉出嚟，就話唔緊要，個waiter就將舊骨連埋上枱…

腸就普通啦。開頭以為燒會香啲，食落都係咁上下。下次試吓烚嘅先。

通常而家食親西餐我都會叫個沙律，吸收吓fiber，不過上次喺美利樓嗰間食過個沙律，啲唔知火箭草定乜鬼苦到死，所以今次都冇叫到。都係caesar salad啱我食啲。

雖然唔係太就腳，感覺上亦冇美利樓店咁好坐。但好啤好食物好環境，下次唔係開飯行開呢頭都可以入嚟飲返兩杯。

喺新都會食完晏，買個蛋糕返office慰勞各位。

去到見到半磅蛋糕$67，一磅就百零。意大利芝士如常最早賣晒，諗住買個榛子慕思。

呢個時候有個熟女企喺display櫃前叫個狀似暑期工嘅店員將一個一磅蛋糕雪入雪櫃。喺店員行緊去雪櫃途中有人喺工場送餅嚟，咁個店員就應咗送餅工人幾句。熟女啤住店員：「妳擺咗個蛋糕入雪櫃先啦！」

店員唯唯諾諾，將蛋糕放入雪櫃。跟住佢一路應付送餅工人一路攞第個蛋糕諗住擺入display櫃replace之前個熟女買咗嗰個，個熟女見佢手腳慢，又加多句：「我諗妳都係擺咗個蛋糕入去先啦！」跟住一臉不滿咁揚長而去。

開頭仲以為熟女係佢老闆，問起原來只不過係幫襯咗一個蛋糕，要求人哋雪起五點鐘返嚟攞。店員表現出高度耐性，甚堪嘉許。

跟住我見到送嚟啲餅入面有盆係芒果朱古力，個賣相好似唔錯，於是改變主意。店員有禮貌咁表示要點數先，然後好快手點咗之後包好俾我。

一百幾十買個蛋糕，使乜咁惡吖。對人好啲，人哋手腳都快啲。而且，人格係自己嘅。

個蛋糕係芒果面上加多粒草莓，芝士蛋糕加朱古力，餅底鬆化，成個食落個combination唔錯。價錢平過美心，質素差唔過佢。

星期六喺豪雨之中嚟到，兩個人叫咗一碗牛筋牛肉麵、一碟腐皮蚵卷、一個餐包括涼拌茄子、一碗椒鹽雞球拌麵同飲品。

牛筋牛肉麵個湯好味，牛肉又腍又入味，好快食晒成碗。

拌麵好似港式撈麵咁，有碗湯俾。都幾好味。

茄子有四小件，味道唔錯。可能我自己鍾意食腐皮卷之類嘅食物，所以覺得個蚵卷都唔錯。

杏仁奶茶同珍珠奶茶都合格，珍珠煙韌好味，仲好過好多煙漬癌。

店員態度依然係咁好，係呢間舖最吸引人地方。

對我嚟講，bi唔bistro我都只會視為食早餐同下午茶地方，正餐就真係唔會諗住嚟食。

星期六蛇咗王，成十一點咁滯嚟呢度食返個悠閒早餐。窗口位其實都唔係好坐，因為窗門出面其實唔好睇，街景都唔多望得到咁滯。張櫈我又唔覺特別硬，可能自己冇諗過入到嚟係好似pacific coffee咁坐梳化。

兩個早餐，其中芝士火腿蛋法包冇晒，改為雞柳唔知乜鬼番茄湯長通粉，另一個係有牛角酥、煎蛋、豬柳同腸。煎蛋太熟，牛角酥唔香，同埋感覺上啲嘢食唔熱。

飲品唔錯，挽回分數。一杯熱vanilla好香，另一杯cookie n cream十分creamy好味。

不過咁嘅環境咁嘅收費，隻水杯都係有啲類似朱古力漬。睇返食評原來係常事。

service我覺得唔係差，可能因為當時唔多人。不過咁嘅價錢，如果係坐得逼嗰啲位就真係一啲都唔值。

由於近排多咗出街食，幫襯咗呢度兩次。

個人鍾意佢個沙薑雞飯，卅幾蚊有飯有雞有湯有菜有嘢飲，都算幾抵，而且隻雞都唔差。

另外啲湯飯都幾大碗幾足料，不過要成卅蚊。

座位都擺得闊落，呢頭嚟講算係幾四正。

去黃埔買完嘢搵地方開飯，隔離椰林閣五十幾蚊個餐，諗住去呢間會平啲，一坐低至發現最平一碟飯都廿九蚊。

入到去冇乜冷氣。

叫咗個生炒雞絲飯，好淡。

另外一個時菜雞球飯個汁好似啫喱咁。

呢頭咁多食肆，應該唔會再嚟呢度。