嚟過好多次，感覺都係唔錯。不過最緊要係要有卡位，仲要唔係搭枱，如果唔係就乜都假。

尋晚辛苦完出諗住舒舒服服食返餐，見有卡位嗱嗱聲衝入去。

餐牌換咗，唔係以前張聖旨。呢份吸引好多，即刻食慾都大增。

叫咗碗豬大腸加福州丸雞湯髮絲麵、一份安格斯牛柳唔知乜鬼意大利湯意、一份田螺肉薯蓉，另外要咗一杯士多啤梨香蕉奶昔同一杯iced cap。

我幾鍾意啲炸豬大腸，雖然唔多肥。個湯意其實冇牛柳都夠食，好多鮮茄。薯蓉一向都好食，入面仲有煙肉碎添。

飲品味道就…

為咗食足全套慰勞自己，叫多個甜品。原本想叫心太軟但係佢哋個心太軟冇雪糕嘅，所以轉咗食草莓千層酥。好鬆脆，好多cream。

食完好滿足。順帶一提，我幾欣賞啲服務員，反應又快又勤力。幫襯過嘅人都知佢啲食品飲品名全部都十幾廿個字，落單個後生仔全部一字不漏背得出咁滯，每樣嘢我講兩三隻字佢就駁到落去，真係令我讚嘆不已。

尋晚行到身水身汗，急欲搵個地方舒舒服服咁坐低。行過呢度喺出面裝到入面有卡位，又見未食過，於是入去坐低。

門口個女仔唔知做乜，企咗喺度好似唔知我哋想入去咁，大約三秒左右至自己失笑讓開俾我哋入。

卡位幾舒服，不過另一邊嗰啲就差啲，我諗話食物中毒嗰個人係指嗰邊啲位窄，不過嗰啲唔係叫卡位。

叫咗一個咖哩吉列蠔同一個照燒銀鱈魚，另外叫咗一杯巨峰乳酸。兩個都係定食，啲前菜普普通通，都係啲沙律、海帶嗰類嘢。

吉列蠔四隻，好細，而且冇聽朋友仔話一早夾開，所以俾咖哩汁浸到有少少淋。由於熱氣揀咗甜，所以唔知辣嘅有幾辣。

銀鱈魚普通，自己都好易整到，而且略嫌細塊啲。

之後有雪糕，同花園餐廳食到嘅差唔多，係隻碗唔同。

巨峰甜到不行，想沖杯水落去溝返開。

店員都算勤快，但係俾人唔專業感覺，舖仔細細成班人自己大聲講大聲笑，得一個成熟少少嘅女店員表現得比較似樣。有個後生仔傳菜嗰陣就咁成碟掉喺枱，差啲以為自己爭佢錢。

其實質素喺旺角嚟講唔算差，而且裝修都算光鮮舒服。不過價錢唔係咁值，如果服務改善啲應該會更多人嚟。

星期六收工去expo，之前嚟呢度食返餐好嘅。

兩個人叫咗一碗坑腩河、一碗墨魚頭河同一碗剩牛肉餅。

坑腩週圍都有，呢度嗰啲都算好食。

墨魚頭就唔係度度有，而且唔知係咪呢排多墨魚，今次食落好似特別新鮮爽口咁。

牛肉餅可以話係呢度特色食品，又爽又好咬口，次次嚟都要整返碗。

兩個人食三碗嘢做lunch，好滿足。叫杯凍檸茶少甜，個夥記嗌入水吧：「爆檸少甜！」真係拗爆頭。

之前嚟食過一次，不過當時病病哋，都唔記得食過乜。

同同事屎忽痕再行過嚟食，廿八蚊個快餐我揀咗煎蛋免治牛，另一個同事原本揀焗豬扒飯不過太耐，後來都食埋免治牛算。份量夠晒，杯奶茶不過不失。

另一同事去揀三餸飯，水蛋佢話唔錯，肉餅佢話腥不過我試過應該係魷魚味啫。

見到有好多選擇，而且舖位又大，夥記都幾友善。呢頭冇乜好食，間唔中嚟食都好。

上星期六行完expo又行咗陣街，又熱又渴，上嚟坐低舒舒服服抖吓。

上次好好禮貌個Matthew唔見咗。

當時六點零，有卡位坐，正。原本諗住叫杯任飲ice tea，但係都成卅幾蚊，改變咗主意飲smoothie。揀咗一杯bango bash，係banana加mango，另一杯係唔知士多啤梨溝乜。前者較甜，後者少少酸味，好飲啲。

另外叫個至愛cheese fries食。今次落好多煙肉，撩一大pat ranch嚟食，真係味覺一大享受。

其實當時唔多肚餓，為咗食個包於是叫多個ribs and chicken combo。個人唔係咁鍾意食呢度啲ribs，不過除咗tony roma's我又真係冇乜邊度啲ribs食得滿意。塊雞胸啲汁少少辣，都以好食。

至於個麵包，唔使講梗係幾熱幾冇胃口都食晒啦。

尋晚開夜會，六點幾出嚟諗住去小雨天，行行吓改變主意嚟咗呢度。

兩個人叫咗一碗油豆腐麵同一碗雲吞麵撈亂食。同事試話我推介嘅油豆腐之後都話正。

另外叫咗一碟鴨舌拼腎，有豆腐墊底。夠淋，但係我唔係咁鍾意隻滷水味。

原本想食豆腐花同豆漿湯丸，但係太熱太飽，乜都冇食。天氣太悶熱，週圍都係小強，同事驚驚。

同事介紹嚟呢度食，老實講都唔易搵，因為條條街都咁上下，唔係嚟開大角咀都幾惡搵。食過一次就認住轉角有間屈人寺囉。

去到七點都未到，而且同事話呢度午市同下午茶最勁，晚市其實唔係咁旺，所以入到去加埋我哋都係四、五枱，其中一枱係一對外籍男女添。

三個人去食，叫咗兩個當晚嘅餐，一個係燒排骨配意粉，另一個係肉眼扒配薯菜。另外叫多個芝士漢堡，同埋個waiter推介嘅田螺，同埋一個煙三文魚凱撒沙律。

湯普通，一個係唔知乜西西里魚湯，一個係忌廉。一般餐廳飲到嗰啲，不過器皿靚，同埋係蒜茸包。

沙律新鮮，三文魚亦可以，起碼食落唔覺霉。

田螺又係好似san francisco嗰隻兜咁，六個窿兜住啲田螺，冇薯蓉嘅。合格，不過好多地方都做到咁嘅味道。佢係俾麵包點牛油食呢樣唔係間間餐廳有。

個人最欣賞係個漢堡，塊肉七成啱啱好，又肥又厚，加埋啲melted cheese，一咬落去成口都係幸福感覺。啲薯條亦炸得唔錯，仲有佢見我哋shared嚟食，主動提出可以切開個包俾我哋。

燒排骨個人覺得略乾少少。

肉眼叫七成但係同之前某食評所講一樣，第一啖還可以，食落都係硬少少。個汁調得唔錯。

甜品叫咗一個薑汁味梳乎里，夠晒大件鬆軟，食落亦唔係空心得啖風嗰啲；一個心太軟，朱古力軟心熱辣辣加舊凍冰冰又唔硬嘅雲哩嗱雪糕正到痺；同一個tiramisu，呢樣就覺得失色少少。

有好多嘢飲揀，但係其實餐加錢飲都好似唔係好抵，最後都係飲返檸水同咖啡。

簽咭嗰陣自己倒瀉杯水淋濕晒啲錢，相信係老闆嘅男子走埋嚟話換過啲乾銀紙俾我。真係有心。仲有我覺得餐廳入面播啲音樂非常唔錯，間唔中有reggae，聽住食嘢都食得輕鬆啲。咁嘅地區搵到咁嘅餐廳，真係開心大發現。

佛誕行街行到呢頭，見早早哋於是入去呢度食。當時六點幾，大把位揀，坐咗埋角落頭卡位。個卡位兩個人坐就唔錯，如果四個就真係逼唔落。

兩個人食，叫咗一碗排骨菜飯，一碗滋味雞定唔知乜味雞菜飯，同一碟椒鹽豆腐粒。塊排骨意外地唔係炸到吉列豬排咁嗰啲，肉厚多汁，都唔錯。雞有少少似鼓油雞，兩個都係跟個魚湯。我覺得如果唔係好大食，應該都夠。

星期六晚玩得夜，星期日起身又嚟搵brunch食。

兩個人先叫咗一碟豬皮豆腐同一碗擔擔麵走辣。麵質唔錯，麻醬味夠。豬皮實在滷得太好食，食完一碟叫多碟豬皮魚蛋。六蚊一碟兩味，街邊小販都做唔到呢個價。

加多兩杯豆漿，都係廿二蚊。原本想買多個饅頭返屋企做下午茶，不過見到有小強喺個架到爬過，眼不見為乾淨，咁眼見就梗係咪搞喇。

幾年前喺台北幫襯過一次，印象中都唔差。都唔知原來香港經已開咗咁多間。

上星期六收工嚟幫襯，一上扶手梯見到排晒長龍咁，真係誇張。食個包咋？同上年年尾去burger king有得揮。真係估唔到食快餐都要等位，仲快乜鬼嘢餐…

嚟到都要食架啦，條隊長得嚟都好快排到入去，因為啲哥哥仔都好快手。感覺上個個都好後生同有禮貌。不過我聽到排我前面嗰個問有冇照燒牛肉珍珠堡（因為海報上面冇），其中一個職員話得apm有，結果我去到cashier再問另一個職員，佢又話有。

除咗個珍珠堡我仲要咗cheese burger，兩個都係set A，即係加薯條同汽水。其中一個加一蚊加大汽水，另一個加五蚊轉抹茶牛奶。

珍珠堡還可以，不過啲飯唔夠燶，食落唔香。但味道唔錯。

cheese burger塊肉當然靚過麥當勞，汁亦唔錯，塊包都應該有煎過，但係塊芝士就令人失望啲，如果可以grill一grill溶少少咁就一流。

抹茶牛奶好味，唔使加糖都得，同喺日本買嚟飲嗰啲一樣味。

舖位唔得，如果係大間啲舖坐得舒服啲我會多啲幫襯。