之前嚟過一次，係朋友仔幾年前幫我做生日。當時得兩個人食，印象中啲嘢好大碟。

尋晚OT，收工約埋同事嚟呢度慰勞吓。

booked咗九點，八點九到未有枱，當時門口都如常堆滿人。九點正再問，個hostess就話有，入到去見啱啱舖好枱未擺餐具，可能係諗住擺好至叫我哋啩。

個人幾鍾意呢度環景，人多得嚟又唔算太嘈。坐低有人斟水，麵包有軟有硬，不過食完冇refill，我哋亦都冇問。

點咗白酒汁蜆、caesar salad、千層麵、classic pizza同rosemary羊架，原本仲叫咗個chicken parmesan，但係個waiter話份量都差唔多架喇，所以建議我哋唔好要住。

蜆唔錯，冇沙，個汁好好味（想加個白飯…）。

沙律唔得，啲菜食落一啲都唔爽。

lasagna好好味，個蕃茄汁加埋肉醬好濃好香。

pizza巨，四方型切十二塊。正宗嘅薄餅底，好食過太多花巧嘅新嘢。食剩三塊要打包。

羊架就同事嫌七成略生，不過我覺得可以。食落唔膻，三堆薯蓉加埋鮮蕃茄粒，好正。

飽都要食多個tiramisu。略濕，都係fat angelo's嗰啲好食好多。

服務只能夠講係合格。樣樣都做足，但冇乜心。近期喺outback、king ludwig beerhall得到嘅服務就真係值得佢哋學習，同樣係做咁多嘢，但係有笑容同埋令人覺得舒服、友善，食都食得開心啲啦。

擺到明係美式意大利餐，亦都唔係要搞高檔，不過意大利人精神就係要食得熱鬧同盡情。要格調高檔，食物正宗，咪鬼嚟呢度。

上晝蛇王，十一點起身，返工途中嚟食返個brunch先。

天氣熱，剩係叫咗碗菜肉雲吞同凍豆漿。近年啲豆漿冇細個飲嗰陣嗰啲咁凍，比起公和嗰啲亦輸晒豆味。

阿姐俾咗菜肉雲吞麵，有四粒雲吞，唔知剩雲吞會唔會多啲嘅呢。啲麵都唔差，幼麵冇一般上海麵咁粗同食到成口粉咁。雲吞皮略薄，好快散晒。

咁嘅價錢，食味道加感情加風味，真係抵到爛。

上星期六攞咗假，起身都十一點咁滯，見早早哋同Jo去幫襯好耐冇去過嘅好旺角，因為平時乜時間行過都係咁多人。

老實講我諗好多人都係貪佢冇裝修過，如果裝修咗可能仲冇咁多人嚟食，最後落得同危湛記同一下場…

食咗一碗出名炸醬麵，一碗蠔豉瘦肉粥同一碗淨雲吞。個炸醬個人覺得過甜，不過啲麵好正。粥普通，雲吞細細隻，餡料比例均勻，好食過大埔平記九十幾條街。

不過其實價錢都幾貴，碗粥都要廿七蚊，喺茶餐廳成個餐都食到。

呢條街上樓cafe多到數唔晒，但係講環境，可以比得上佢嘅應該係零。

上星期六去完好旺角食brunch之後熱熱哋想搵嘢飲，見仲早於是上咗呢度坐，果然都未係太多人。

叫咗一杯woodstock vacation，係芒果沙冰加cream加少少芒果肉，都幾好飲。

Jo叫咗一杯latte，貪上面有woodstock個樣。據講唔難飲。

另外叫多個waffle當甜品食。一碟四件，係Snoopy、Charlie Brown、Lucy Van Pelt同Woodstock造型。

廿幾卅蚊杯嘢飲值唔值就見仁見智啦，不過部份錢其實去咗環境度。乾淨企理，又唔算嘈（可能當時少細路），又可以影相，又有書睇。城市人可以喺星期六上午悠閒咁喺度坐返一粒鐘，咪當奢侈囉。

唯一一樣我覺得唔多妥係全場得兩個男服務員做嘢，收錢落order又係佢哋，傳菜執嘢又係佢哋。尖沙咀嗰度就疊馬好多喇。

前晚收工冇飯開，去咗買碗三鮮水餃返屋企食。其實佢啲餃層皮較厚，但亦因為咁所以比較實淨唔易散，我嗱嗱聲沖個涼再食都冇淋晒。啲料十分豐富，冬菇同菜同肉比例恰當，食落感覺良好。

今次俾返個笑臉佢。

天時暑熱走入去食個sunday brunch。豆漿比較淡同唔夠豆味，栥飯入面條油條咬唔開咁滯，油豆腐粉絲好足料，三舊釀咗菜肉嘅油豆腐同兩舊同樣饀嘅蛋角，仲好多梅菜。

不過比較起上嚟，好似葵芳嗰間好食啲。而且廿二蚊碗油豆腐粉絲，都幾貴。

好搞笑，聽過好多人話呢度環境差。冇錯，呢度係要踎喺街邊食，而且長年咁多人，天時暑熱會好淒涼。要食得舒舒服服嘅話，奉勸唔好嚟。<br />
<br />
嚟親都係食豬扒包架喇，三點半有豬仔包出，排晒長龍。其實佢\塊豬扒好多地方都好食過佢\，不過個豬仔包就真係唔錯。值唔值得咁樣走嚟食，見仁見智啦。<br />
<br />
咖哩幾辣，未必人人啱食。<br />
<br />
個人覺得啲奶茶唔錯。<br />
<br />
大部份人都覺得呢度名過其實，其實係一廂情願啫，士多一間之嘛，有好嘢食又平，喺香港的話我都會成日幫襯。

想搵個坐得舒服嘅地方食飯，又想搵啲未食過嘅，於是搵咗呢度。睇過啲食評，見到讚嘅都寫得中肯啲，又諗住可以順便行吓好耐冇嚟過嘅赤柱，所以揀咗呢度。

七點去到，一行埋去經已有兩個人嚟招呼我哋，對名同帶我哋入去。入到去都唔係太多人，好彩睇咗食評booked嗰陣叫咗要卡位，真係好坐好多，如果坐兩人枱其實都幾細個位。如果天氣唔係熱，其實坐出出面應該都會幾好。店內裝修唔錯，最入面仲有張大枱可以坐八至十人左右，佈置到好似間大屋咁。下次可以約成班人去食，點影相點嘈都得。

匯豐咭有$299二人餐，不過冇豬手，於是要咗另一個$399。麵包好正，切開四份，外層脆入面又暖又軟熟，有香草芝士同牛肝醬點，我就比較鍾意前者。啲腸我就覺得一般，個沙律啲蕃茄好新鮮，隻火箭菜定唔知乜鬼就好澀。

主菜係豬手同龍脷柳。豬手層皮脆卜卜，waiter問使唔使切埋，因為想影相所以自己切，一切開層皮入面熱辣辣標晒煙。

龍脷柳就…可能平時屋企食得多，所以冇乜感覺…

另外仲有個pasta，細細哋清清哋，一般啦。食到呢度基本上全身啲血都去晒個胃度，加上飲咗杯waitress介紹嘅maisel's weisse，更加眼睏。

抖咗好耐至到甜品樹。五小份，啱啱好。由低食到高，第一碟係兩件好似muffin咁嘅嘢，鬆化好味；第二碟係kiwi醬喺面嘅奶凍，酸酸哋感覺良好；第三同第四碟係士多啤梨同咖啡慕司，我就覺得一般；最後係小cheese cake，非常rich，不過擺喺面嗰半粒士多啤梨就真係生到唔食得。

啲服務員好有禮貌，而且係個個都好態度，包括落單、執嘢、行過俾我哋截住影相嗰個都係。落單嗰個有介紹set同啤酒，執嘢嗰個我問佢好澀隻菜係乜佢真係走去問人轉頭返嚟話返我知，影相嗰個影完一張主動問需唔需要影多張（turned out第一張都並唔係影得差，唔係補飛）。我相信我兩個個樣點睇都唔似外國人，睇返食評亦都係讚多過彈，咁可能服務差係好個別侍應，又或者係好個別客人…

記得初初開嗰陣，呢度長期逼爆。除咗因為附近冇乜邊間好坐過佢之外，亦因為食物份量夠大，選擇夠多。

嗰陣通常係weekend起身去食brunch，食個唔知快餐定特餐就夠晒。個餐包括叉燒湯意、西多、磨菇炒蛋、大碌腸同餐飲。唔算好好食，但係卅零蚊一定飽。

唔知係咪多人食咗，而家個餐改咗，西多冇咗變牛角包，不過都暖笠笠好香牛油味。個炒蛋menu上面都係寫磨菇但係出到嚟變咗粟米。麵就多咗選擇，叫咗雞翼公仔麵，唔難食。

另外叫咗一碟豬仔柳沙律，豬柳成四大塊，沙律好大堆，入面有雜果有椰果有青瓜有薯仔有甘荀，唔係食肉獸的話都食得飽。

同區嚟講其實我覺得都唔錯，啲卡位好坐，同埋有啲俾人揭到殘晒嘅免費雜誌。裝修同服務唔叫好差，因為我當茶餐廳咁嚟，冇諗住有酒店裝修、扒房服務；真係成班阿姐圍晒喺水吧傾偈，不過啲通道又唔係闊，食飯嗰陣一個二個喺身邊行嚟行去咪仲煩。

朋友仔又入嚟接我收工。喺小雨天同呢間入面，佢揀咗呢間。

次次加油豆腐都係得兩舊唔夠喉，今次索性叫一碗油豆腐麵，有四舊。油豆腐釀咗梅菜同豬肉，我覺得好好食。

另外叫咗碗排骨麵，啲豬扒一般。

煎餃子一碟四舊，係韮菜豬肉。

凍豆漿，熱豆漿湯丸。後者可以叫唔甜，湯丸係花生餡。

埋單都係$61，飽到一上車就瞓著。