成日同人講，行街要好似旅行咁，旺角要當西門町咁行。不過次次行過呢間舖都好鬼多人排喺門口，所以咁耐都係入過去食一次。

多人排其中一個原因係入面其實唔係好多位。啲卡位好鬼窄，兩個瘦人平排坐都係啱啱好，多個袋都擺唔落，而且同坐對面嗰個好近。

叫咗一碗紅燒牛肉麵、一碗牛筋牛肉麵、一碟滷水拼盆、一杯朱古力雪香同一杯珍珠奶茶。牛肉同喺台灣食到嘅一樣，麵質亦唔錯，不過個湯就唔係咁吸引，連平時食麵至少飲一半湯嘅我都只係飲咗幾啖。拼盆有豬頸肉、蛋、大腸、腎同埋豆腐，用料唔錯但滷水好咸，浸得一陣經已食唔落。

反而珍珠好好食…

值得一提係店員態度非常友善同有禮貌，喺香港真係冇乜幾何見到。

喺度食咗幾年，雖然水準一時時唔同，但係都間唔中會返嚟幫襯吓佢。

今晚約咗舊同事食晚飯，卅幾度冇得打邊爐，於是嚟食米線。行到門口…差啲唔認得。

一排冇嚟原來裝修咗，成間大家樂咁，尤其啲有英文字嘅玻璃。叫咗碗過橋米線，同事叫咗碗麻辣米線配腐皮同金菇，另外要多一碟細蜜川雞。

過期米線其實冇幾年前我初初嚟咁好食，個湯都唔多同味。蜜川雞同蜜川骨可以話係呢度招牌菜之一，一早就應該出「細版」啦。

如果唔係左邊卡位，我未必會入去幫襯。

星期二難得自己喺屋企食lunch，落新園買個排骨麵同滷水拼盆返屋企送dvd。

雖然只係三分鐘路程，但係上到去打開啲麵經已好似煮淋咗個公仔麵咁。

滷水蛋好似霉咗咁，啲蛋白都鬆「泡泡」，見到都唔敢食…

下次都係食返水铰穩陣。

街坊舖，上次小型火災之後好快又變返咁多生意。

呢度啲嘢食變化少，又油膩，早餐尤其唔得，不過叫做就腳，贏咗地利。

上個星期四陪人哋阿嬤落嚟食咗個梅菜扣肉飯，非常正，燜得好腍好入味，話咁快冇胃口都成碟飯送晒。好多人會話肥得滯，咁扣肉就係咁架啦，要扣肉唔肥，不如要炸薯條唔熱氣吖笨。

好食到人哋阿嬤買多個外賣攞走。

附近冇乜好食，有次同四個同事搵食搵咗上嚟。

一上到嚟嚇親。由於有學生優惠，間舖九成以上都係學生，嘈到不堪。如果唔係見時間唔早去唔到第度食，一定唔會等。

食物選擇都算唔少，味道普通，份量足夠。唔算差但係留唔到深刻印象。

如果少啲細路，同埋啲位好坐啲，我諗我會嚟多啲嘅。可能冇諗過五十嵐會做到街坊舖咁啦。

為ikea同手塚治虫而嚟，意外發現呢度原來開咗一間。見隔離元氣成班超低能排到轉角，於是入咗呢度食。

Jo要咗一個芝士西蘭花焗薯，連caesar salad同一杯柚子乳酪飲品，另外加十蚊要多個酥皮蘑菇湯。我如常要咗一件燒牛肉牛油果麥包三文治。

個焗薯啲chedder稀同淡咗啲，caesar salad同三文治用料非常新鮮，最正係個酥皮，焗得啱啱好，個湯好味。

間舖啲服務員應該都係新人，不過態度都算合格。

以前喺山返工，間唔中會落山搵食，好多時都會嚟呢間，因為食過唔錯。

自從入屯門走咗轉之後，雖然而家喺葵興返工，但係都只係再嚟過一次。聽人講啲嘢渣咗，不過我上次食過都覺得唔差吖。

自己最鍾意食係個吉列豬柳沙律，如果唔係好肚餓，我覺得食晒成碟都夠。個豬柳（我都唔知同豬扒有乜分別…）炸得好脆好香口，食落唔乾，而沙律就冇乜特別，不過有我鍾意嘅椰果，食落多啲口感。

嚟親都會飲凍咖啡。唔算靚啡但係起碼比茶餐廳嗰啲好。

見到早餐好多選擇，不過都好難就到時間嚟試。

大部份食肆都要過某個額至有得簽咭平，我又唔覺得有問題。老奉俾優先你咩。雖然價錢唔平，但係呢頭咁多人爭食，西餐嚟講呢間我覺得算食得過。起碼好過佢對面嗰間…

第一次嚟係同事介紹，當時係1999，間舖仲未裝修，亦都冇咁多人幫襯。

後來口碑好，愈嚟愈多客，做都做唔切。但係咁多年嚟價錢都好似冇乜加過，依然咁抵食。

以前嚟親都食芒果黑珍珠，近年同大部份人一樣，嚟親都係幻彩明珠，因為鍾意咗食大西米。有人話覺得冇咬口，但係大西米係咁，要煙靭的話我諗就叫第啲嘢喇。生果入貨入得唔錯，所以好少食到唔靚。

另外亦間唔中會食綠茶奶黃湯圓。層綠茶皮有少少澀，但係由於自己鍾意食奶黃，所以覺得個組合唔錯。

一年到晚都咁多人，如果元宵、情人節啲日子連外賣都要等幾個字。怕逼又要十零廿蚊有酒店或服侍嘅，勸你唔好嚟。

「易容高手」我就識，返工遇到好多，「易牙」真係唔知點解…

尋晚收工原本諗住去女人街搵嘢食，度度都爆晒棚。行行吓上咗嚟，見到萬人空巷等住入板前，好似唔使錢有米（壽司）派咁。行過見到呢度有張二人枱吉咗，嗱嗱聲走入去坐低。

佢中間張大枱好搞笑，正方形每邊可以坐三個人，遇著一對對人嚟食有時要分兩邊轉角坐。中間有個水缸浮住啲假花咁嘅擺設。靚唔靚就見仁見智，不過全店都叫做有裝修先。

叫咗一碗魷魚加拚貢丸羹麵、一碗大腸麵線、一碟滷水牛腱、一碟鹽酥雞。羹麵即係稠嘅湯麵，味道唔錯，啲魷魚仲好過我幾年前喺西門町食到嗰啲，起碼真係有魷魚。

大腸麵線味道近似台灣地道出品。

牛腱一啲都唔特別，卅幾蚊一啲都唔值。

鹽酥雞又淡啲粉又上得唔好，同台灣食到嘅相差甚遠。

見餐牌上嘅飲品選擇咁少，廿五蚊杯胚芽珍珠，寧願落樓下對面幫襯happy lemon。

其實嚟得呢類地方，都唔應該對食物有所要求，但求唔好食完即場獲利回吐就算。最主要，大家都係想搵個地方舒舒服服坐吓，唔使同人逼。

呢度有晒以上特色。

食物，真係唔好提，又貴又難食，整個三文治烘底都可以整到又淋又靭。飲品就冇乜特別，都係同一般樓上cafe嗰啲咁難飲。

服務…唔知點評，因為感受唔到有。打工打得好晦氣，見到佢哋真係好似返咗屋企咁。

環境就唔錯，夠晒闊落。不過近窗門位會好好多。梳化殘舊污糟，感覺唔好。要坐得舒服，都要地方乾淨吖。

不過同我一生人中去過最差嘅皆屋都仲有段好遠距離。呢度搵唔到皆屋咋，如果唔係我可以詳盡寫返嗰度個環境係點。