可能近年食得魚蓉燒賣多對豬肉燒賣會期望大啲，之前見佢裝修緊已經想試，咁啱路過就試下。 購買時已告知製作中，要稍等幾分鐘，令我更為期待。 燒賣到手，有辣油，剛出爐理應好熱好熱，但…可能天氣涼咗。 燒賣皮厚，無肉味，冬菇味又唔強烈，豉油又帶唔起，成件事好特別，或者辣油太搶味。 總的來說，唔係我杯茶，百貨賣百客，總會遇上對的人。 最後想問下，$12/5粒同$20/8粒係咩計法？買多反而貴？

朋友推介，所以一行四人前往為家人慶生，先點熟成牛$3XX，價錢合理，再點特色豬拼牛，賣相亦都唔錯，同行有長者，所以點選人蔘雞，暖暖胃   一開始熟成牛、泡菜、調味料相繼擺滿桌，還贈送芝士蛋餅，蛋餅超級熱，味道可以，中間還有芝士粒，重點係免費的都唔係求其整。   跟住侍應開始幫忙放牛肉上爐，大家都期待一試，熟成牛明顯牛肉味濃，愛牛的必然滿意，然後其他菜亦陸續送上，當大家食得慶起時，爐火卻熄滅，慶幸侍應更換樽裝燃料都算快，與此同時，枱面有驚喜定驚嚇，膽細啲都頂唔順。   整體而言，食物價錢及質量是合理的，可惜環境衛生卻有待改善。

呢個食堂本來已經好神秘，係附近上班族先會識去搵食，入面的食肆選擇都算多種類，而車仔麵亦係附近少有的。 自從一次見人攞住一碗好有份量嘅麵行過，加上當日比較肚餓，所以就揀咗呢個米線，埋到去老闆會問辣菜分開定放埋一齊，心諗放埋一齊先食到原有嘅味道，一答放埋一齊嘅時候，老闆就給予一個識色嘅眼神作回應。 秘製豬扒米線 豬扒唔乾、又唔會無晒肉味，但又唔會誇到有肉汁，正常水準 米線份量足，有咬口唔會淋 主角秘製辣菜，唔會淨係辣，帶點麻、甜、爽，再加上大量（係大量）中芹，成件事簡直完美。 如果唔食辣、愛走青同怕油，就試其他

一間小店，由細舖開始幫襯到大舖，由立吞到雅座，其他食店可能已經加了幾倍價，或者偷工減料，難得係味道同份量都無變，要咩辣有咩辣，加醋又得，老闆又均真，未夠九點就賣晒云吞，老闆娘推介雜醬麵同肥腸麵，又同客人講肥腸其實唔肥，只係個名叫肥腸，都幾熱情，或者你必接受到，不過喺舖食真係另一風味。

提提想食云吞嘅朋友，早到早著，遲咗真係無。

星河係一間草根餐廳，之前試過午餐時間要排隊，同埋坐得較迫，所以今次特登提早六點就到，可以唔使排仲可以坐卡位。

對上一次試咗＄69嘅晚餐，佢個扒餐都水準唔錯，牛扒冇用野「乸」過，今次專程嚟試T骨扒，果然唔錯，先係足料羅宋湯加埋蒜蓉包，胃口細啲都即刻食飽，再嚟14安士T骨扒真係冇得頂，剛好七成熟，黑椒汁剛剛好唔太辣又夠香，薯條脆，唔覺唔覺成份食晒，再飲杯凍檸茶，已經好滿足，點知侍應姐姐要唔要食腐竹雞蛋糖水，當然唔會拒絕，食落好似屋企自家糖水好味。

香港已經好少有咁好咁有人情味的餐廳，難怪在坐都係街坊為主，個個同事老闆都有朋友講，好似屋企食家常便飯，排隊都冇計，所以如果要幫襯真係要揀啱時間。

睇過食評，見朋友亦試過，又見可以用OpenRice 訂位，所以就去試下，星期日怕多人，提前12:30用餐，去到得一枱客，諗住可能太早，隨意叫咗個松葉蟹同淺草海鮮丼，先講造型，係幾吸引，相機先食，睇到都覺得好食，但真係食落去又唔係咁特別，同真係有啲難度，要先夾起晒啲魚生，先可以慢慢食飯，某程度有啲難搞，本身啲魚生比較一般，唔好太大期望，難怪隔離枱位女士食咗一半就走人。

個蟹飯就真係得個樣，燒蟹蓋食唔出蟹味，淡得緊要，下層啲飯同樣淡口，蟹肉的醋亦未能帶出蟹味，整體來說期望過高，跟風去影相還可以。

另外，就係單手侍應，有位男侍應全程見佢左手插袋，唔知係咪造型，上菜、加茶、落單都係單手，除咗同女侍應玩，希望佢注意一下安全，始終飲食業都有好多熱嘅嘢。

公司附近新開食店，招牌仲貼住紅紙，所以開頭都唔知間鋪叫咩名！

今日食晏時間特登早啲去見識下，坐低見餐牌有鋪頭名「苡喬餐廳」唔太特別，英文名「EQ」就令人印象加深。

餐牌清楚到一睇就明有咩食，符合晒商品說明條例。

試咗腸仔肉醬意粉、咖哩雞扒烏冬同肉丸天使麵，先講餐湯羅宋湯，估唔到好足料，飲(食)完飽咗一半，烏冬先上，睇落無咩特別，有咖哩味，但雞扒就比附近餐廳大件，煎得好香；跟住肉丸天使麵，無諗過會有沙律菜同蕃薯片伴碟，成件事高貴咗，肉丸食落味唔濃有別一般餐廳，天使麵份量足，但略為'淋'咗啲；肉醬意粉出場，可能焗所以耐啲，同樣有律菜同蕃薯片伴碟，但重點係芝士，芝士同肉醬比列剛好，唔漏又唔會搶咗肉醬味，意粉仲唔係茶餐廳式發脹意粉，感覺好意式，係三款中最好食的，但肉醬好似加咗少少少少汁咁；最後飲凍檸賓超足料，飲到尾都唔好淡咗。

總括嚟講係值得一試

星期六港島四圍遊，行到兩點幾就決定喺銅鑼灣食個下午茶先，點知處處人龍，想轉地點之際，有人提議去habitu睇睇，可能位處較靜，唔熟呢個商場真係未必會諗到，一去到就有位，接待的問飲嘢定食嘢？心想有分別？同行人士已馬上答兩樣都係！入座時話要個半鐘交枱，當然我哋覺得都無人到時先算！
開始點餐，第一時間吸引我哋嘅就係炸豬扒！無敵，肥瘦配合，脆到無朋友，有肉汁，仲要超大塊！正
咁多肉就點返個意式薄餅（無肉）中和下！
再嚟係嘢飲，本來想試個特別啲嘅什麼黑菘虂咖啡，可惜過咗供應期，所以試咗脆面焦糖咖啡同薑汁黑糖咖啡，仲有最普通的凍咖啡。
正體嚟講咖啡唔太特別，反而食物就好出色！
但想提醒員工嘅禮貌同服務態度，因為我哋點嘢飲時無留意餐牌上的供應期，俾落單的哥哥仔「jeep」咗一下，另外可能枱與枱之間較窄，每次隔離枱上菜我都會俾托盤擦一下肩，最後接近埋單時，被近距離收捨枱面的淺中！所以食物好都要有其他嘢配合！

有一段時間無去，今日心血來潮想食個港式鐵板，咁啱身處大角咀，自然就諗起由細到大食開嘅美而廉，睇睇手錶有擔心，六點幾可能要排隊，點知行到門口一個人都無，心裡一沉，係咪執咗？行到埋去，見到入面有幾位好似職員嘅人，見我哋唔敢入就示意可以入座，坐落見以往有跟餐嘅小食(帶子、腸仔等等)無咗，平時熟識嘅面孔唔見埋，換嚟嘅係連餐廳有咩食都唔知嘅叔叔，落單都搞咗一輪，跟住開始有其他客嚟，同樣感食客比職員熟識餐廳有咩食。無奈！
開始上菜，餐湯味有所不同，總覺有某啲味無咗，跟住鐵板到，一見啲汁就知出事！”杰”到流唔到落鐵板之餘，侍應叔叔仲就咁放低俾你自己淋汁，先唔講味道，我要嘅係T骨七成熟，嚟到變九成熟！已經覺得唔多掂，再加埋個糊汁，真係無晒胃口，但叫咗都要食！一切落去見佢熟到硬，再食落口，一啲黑椒味都無，又唔咸又唔甜咁，唔識形容！
到叫餐茶，要咗由細到大都覺得最抵嘅凍檸樂，點知等咗好耐，望向水吧位只見裝有檸檬同冰嘅杯同我一樣在呆等！我忍唔住同一個侍應講我嘅檸樂在水吧位等緊，佢才如夢初醒盤攞俾我！
結論係美而廉一向係旺角區長大嘅集體回憶，但眼見今日可能因為轉讓或其他原因，而令到質素急降，將大家嘅美好回憶摧毀，何不當日來個光榮結業，讓最美子的留俾大家！

星期六放下晝，所以走去公司附近新開，專賣點心的譚點

之前見總店都唔少好評，加上見佢有啲比較特別的點心，所以走去試試

可能新開加上星期六下午一點多，各區食客尚未趕到，店內仲有唔少位，去到仲有靠邊的梳化位！

裝修簡單得嚟暗藏特色，坐位上就有棧幾特別的走馬燈，又或者係風水原因餐具全黑色，飲茶都唔係好覺叫咗幾個點心，有傳統、有獨創的

蝦餃 ﹣ 皮晶瑩通透，唔會一夾就爛，水準之作，餡足料唔會太多，好食

鳳爪 ﹣ 一般，所用鳳爪比較細隻，唔夠淋

青芥脆蝦一口漢堡仔 ﹣ 真係好一口，脆，但青芥唔太明顯

星星脆魚腸 ﹣ 腸粉滑，炸魚脆可惜炸粉太厚，食落感覺好粉包粉

蜜糖黄芥辣魚腐 ﹣ 抵食，大大舊魚滑用腐板包住炸得脆，但魚肉無味，全靠醬汁，而醬汁又唔太配合，兼唔係想象咁好食，可以不試

蠔油鮮竹卷 ﹣ 麻麻，連普通酒樓都比佢好食

可能新開，所有員工都好新，對店舖食品、枱號都唔熟，總覺一班雜牌軍在亂打，死不了的在團團轉，一切都有待改善，以免令一眾趕來排隊的食客望