友人係常客，所以極力推介今次飯局黎呢度。友人已訂位，七點半到達，被安排坐戶外位置。
適逢當晚有涼意，確係幾舒服
既然朋友有preference，就由佢點菜。(因戶外位置燈光偏暗，相片不夠清晰)蟹肉沙律：蟹肉混合沙律醬，再係上面鋪上黑色蟹籽，配法國麵包。蟹肉鮮甜，冇雪味，夾住蟹籽爽爽o既口感，不錯。配上脆脆的法國麵包亦不賴。黑松露雜菌酥皮卷：上檯時黑松露香氣撲鼻，雜菌份量足夠。一客四條，但每人食一條已經開始有d膩。Four Cheese Pizza: 芝士味濃，但餅底稍嫌唔夠脆。

兩個人三個dish，加一杯白酒，約400蚊，價錢合理。

星期六四點幾去完上海街，行過見到，即比蕃茄湯底吸引 ，決定tea一tea。朋友有點抗拒，但我堅持。蛋牛治：朋友坐下突然想食蛋，點左呢個。普普通通，稍嫌牛肉偏少。檸檬蜜糖脆脆：包都算軟熟帶少少脆，稍嫌檸檬蜜糖偏少。蕃茄豬扒一丁：呢度選擇好多。最後揀左蕃茄湯底豬扒一丁。蕃茄湯底味濃，唔水汪汪。豬扒冇骨碎上，肉薄身唔鞋，好味。

小檔，價錢大眾化，埋單$76，會再來。

好耐之前喜歡黎呢度食任食火鍋，一來食物質素ok，二來價錢正常，三來就腳。但自從年幾前食物質素下降就冇再黎。

早兩日同朋友係灣仔六點幾做完野，行過挑起條筋，就入去食多次。

一入門口，經理好殷勤，侍應手腳快，我地坐樓下圓檯。正當猶豫緊點咩湯底o既時候，經理推介"麻辣雞煲"，話廚師整得唔錯。先食雞煲，再打邊爐，最重要係經理話唔駛加錢，包埋係任食入面。友人見隔離檯點左，所以決定一試。麻辣雞煲：我地點左少辣。經理確實冇介紹錯，雞煲惹味，不太鹹，而且辣味適中，雞肉唔鞋。連平時比較咀刁o既友人都讚，仲話下一次可以挑選中辣。 生牛肉刺身：2-4人送一份。友人讚牛肉味濃。火鍋配料：以呢個價錢黎講，選擇都ok，又包o野飲。如果對肥牛有要求o既人，可能就要加錢點o靚d o既。

兩個人埋單$296。
收費應該係每人$148任食，難道冇加一亦冇加湯底同茶芥醬料錢？確係抵食

好鍾意黎呢度，因為有戶外位置，同知己吹下風、飲下酒、傾下計又過左一個愉快既晚上。另一個原因就係呢度可以係隔離同集團既西班牙餐廳同泰菜餐廳點野食。

星期四晚去，只有四張檯，比平時好full既情況差好遠。當晚點左泰菜。馬拉盞通菜：第一碟黎。馬拉盞偏鹹，空口食得多會受不了。冬蔭公炒飯：好少冬蔭公味，只得輕微既辣，麻麻地，蝦有4隻。魷魚鬚：魷魚鬚lum lum地，配果個汁好惹味，但較辣。

成日晚飯時間行過都好多人，想食都冇得食。諗住去APM睇戲，預早兩日打去訂檯已經話冇位，要walk in。當日六點三去到，walk in有位，但要七點半交檯，冇所謂，反正我同朋友睇七點半。

呢度環境唔錯，裝修幾靚，燈光暗。可能係happy hour時間，好多人，感覺有d嘈。加上我地被安排既檯同隔離檯距離好近(只有側身過既空間)，傾計唔方便。我點既係Hoegaarden，用左另一隻牌子既杯上，可能太多人happy hour，用哂d杯
麵包條有d硬，咬左一啖冇再食。小食併盤：天婦羅蝦、炸洋蔥圈、燒豬肋骨、雞翼和豬肉腸。款式多，二人份量。天婦羅蝦同洋蔥圈麻麻，粉漿厚同唔脆。豬肉腸正正常常，冇咩特別。燒豬肋骨少肉偏lum，燒得入味。最好既係雞翼，脆皮。牛柳香草意粉：上檯時有香味，食落唔錯，意粉唔會太lum，又唔太油；牛肉口感唔錯又有牛味。Parma Ham Pizza：黎到既時候冇即刻食，正在應付緊碟意粉。可能係凍左既關係，餅底變得lum左少少，唔夠脆。Parma Ham普通。反而伴面既薯絲好有驚喜，脆卜卜又唔油。

兩個人食哂都幾飽
呢度價錢都幾貴，差不多六百蚊埋單

早幾年去大阪旅行食過白桃之後，就已經愛上，仲買左成箱搬返黎。
香港大型日式超市都有得賣，但價錢貴好多，唔捨得買 行過Italian Tomato見到有白桃蛋糕系列，心思思買左一塊。雖然都要幾十蚊一塊，但止下渴都好。

打開盒已經聞到白桃既香味，其他桃確係冇得比。

蛋糕面頭係一層桃味o者喱，再下就係桃肉同幾層蛋糕。蛋糕中間夾住桃肉既mousse，非常好食。

下次再試其他特別系列o既蛋糕。

同阿亨一向都喜歡係MegaBox睇戲，貪容易買飛又距離公司唔遠。亦因為咁，好多時都係返商場食飯。舊年食過呢度個啤酒節套餐之後，對呢間餐廳有好深刻既印象，所以定時都會黎呢度幫襯  (落單前出示戲飛有折)。

早排係yxxxx! 又見到呢度有啤酒節套餐團購，仲多左個四人餐揀，二話不說，即刻買左張四人餐約阿亨同朋友啤一啤

揀左星期四晚去，七點半到，已經full左大半。好喜歡隻啤酒杯，有啤酒節貼紙，有feel。四人啤酒節套餐相當豐富，上檯果陣，大家都"嘩"左一聲。(我冇，因為我有睇過相)
食物包括四客是日餐湯、德國併盤(什錦香腸、燒豬手、燒無骨春雞、芝士忌廉焗薯、燒蔬菜)、當然仲有四枝啤酒。

是日餐湯：果晚係雜菜湯。湯夠熱，portion又大，味道唔錯。

什錦香腸：一共有五款腸，每條都燒到有grill紋，好吸引。當中有我喜愛既紐倫堡腸，正！

燒豬手：皮非常脆，一落刀切果下，好似切薯片。豬手唔乾身亦唔太鹹。

燒無骨春雞：無骨係一個賣點，實在食得好方便。平時比較少食春雞，呢度整既春雞，肉juicy又嫩，好食。一試愛上。

芝士忌廉焗薯：係potato gratin，薯仔切片加忌廉汁煮，再加芝士焗。薯仔索左忌廉汁，但唔會太腍，夾埋芝士食，非常好味！我地三下手勢已經食哂成兜，仲有d唔夠喉。

燒蔬菜：用串針串好黎燒，有蘆筍、洋蔥、甘筍仔、菠蘿、意大利瓜同三色椒，賣相好好。

呢個套餐確係好抵食，份量夠，四個人要食哂有d難度。

飲下酒傾下計，又食左個幾鐘，滿足

係APM附近做完野，黎呢度食lunch。

有Lunch Set，不過款式唔太岩食，決定散叫。雜菌Pizza：個人喜好薄批，貪佢脆。雜菌配蕃茄醬，再加芝士，味道唔會太濃。雜菌雞肉長通粉：忌廉汁香濃唔膩，唔錯。

呢個街市都幾多野食，今次朋友提議去漢記。
老實說，去得市政大樓，都唔會冀望有好舒適o既環境，但o野食搭夠，另一個好處就係抵食。

一行七人，七點半到達，剛好有最後一張大檯 (其實呢度唔多過十張檯)。食泰菜又係會花多眼亂，擾攘完一輪，終於點到菜。生蝦刺身：去泰國餐廳，如果有呢味菜供應，九成九會叫。呢度d蝦夠凍，又爽又鮮，配埋個汁，又辣又開胃。蝦餅：上檯時熱辣辣，蝦膠彈牙。鳳爪沙律：鳳爪同配菜比例恰當，不過個汁好辣 串燒：點左雞翼、腎、豬牛雞，蜜糖味好香。雞翼好味，腎就un左d，豬牛雞唔乾。豬頸肉生菜包：平時多數食肉碎，今次試下豬頸肉，有驚喜，食落去口感同肉碎好唔同，爽好多。不過呢味比沙律辣好多，個個食完個咀都紅哂  明爐鳥頭：煮魚個湯酸酸辣辣，好飲。黃咖喱豬肉：我地點左蒜蓉包配黎食。咖喱唔得，好水汪汪，同埋唔香，肉又索唔到咖喱味，好似兩件事咁。蒜蓉包比較硬，唔熱。海鮮炒芥蘭：其實我地係點馬拉盞通菜，唔知點解個姐姐可以聽到海鮮炒芥蘭。呢味菜普普通通。

之前坐車經過呢度，見門口幾靚，已經諗住搵機會黎試。
咁岩住西環o既朋友約食飯，好自然就揀左呢度。呢度環境唔錯，亦坐得幾舒服。我地被安排o既二人位比較近門口，每逢開門有人出入o既時候比較disturb，不過都無礙我同朋友吹水食飯o既雅興。點左杯virgin colada，麻麻地，稍嫌酒太多，有d苦。招牌白汁巨型蘑菇：一向都喜愛食菇類。白汁偏鹹且膩，只吃菇的話，有d受不了。但夾埋麵包一齊食就好好多，麵包索左白汁，正！不過食完呢味菜會飽左一半。西冷牛扒：朋友冇牛不歡。order rare，廚師確係grill到岩岩好，食落去好juicy，肉味夠。Margherita Pizza：正在構思點咩菜既時候，見到隔離檯有點pizza，又見到有個好大o既pizza爐，所以想試。薄批，好夠芝士，味香。甜品：應該係brownie，但我同友人已經食得好飽，所以食唔落。

呢度價錢中等，o野食亦唔錯，服務都ok。
如果下次有朋友聚會，我都會提議黎呢度，再試下其他o野。