呢句說話黎緊每次都會講架喇: 我唔係食家, 文筆唔好, 只係將自己覺得好唔好食既感覺寫出黎, 味道呢樣野好主觀, 喜好亦各人有各人既口味, 我係寫比自己睇, 你鍾意睇我會高興, 你唔同意亦無問題, 最後一句講哂: "好唔好食又睇落去"!
拉麵味道好唔好, 係好睇個人口味! 拉麵既粗幼、湯汁既濃度、配料如何...各人食落都有唔既感受, 所以好難一概而論好唔好食。所以呢一篇拉麵食記, 純粹個人觀感呢! 好唔好食? 又睇落去?
近年喺香港, 都試過廿零三十間打正旗號 sell 日本拉麵既食店, 因為呢幾年無寫 "好唔好食? 又睇落去?", 所以都無影食物相, 不過好味同唔好味既拉麵大致上都記得。黎緊我會為每次食既拉麵作一個連載, 名為 "好孩子香港日本拉麵道場小戰爭"! 個名夠哂低能! haha...而今次食既係...
好唔好食?又睇落去? 第337回: 香港日本拉麵道場小戰爭(4) 元朗半天遊第三間食店: 焰拉麵! 入元朗不就是為了見她?
地址: 元朗康景街1 號裕景坊20號祥發大廈地下
(以下圖片可以按圖放大作最佳輸出)
今 次入元朗難道不就是為了與她見面? "好唔好食又睇落去" 過往三百幾篇, 我無記錯應該係無寫過元朗既食店, 因為我真係好少入元朗。所以珍惜入元朗既短短幾個鐘, 盡量食多 d 出名好味既食店, 四點食"好到底", 五點食"勝利牛丸", 約左友人六點半去第三間目標食店, 見仲有時間, 於是五點半去"一人前"拉麵試下拉麵, 可惜到六點都未開 (食店營業時間寫五點半) , 想試都無時間喇!
六點半到"焰拉麵"! 友人剛剛好到! 時間早, 人唔多, 唔駛等位直入!
黎 元朗前, 我 call 元朗好友話會入元朗食野, 佢完全唔敢相信! 因為叫親我入去不下於五六次都唔去, 唔知係咪細個十二三歲時有陰影, 我無記錯搭巴士入去要搭好耐, 仲"搖"到嘔咁濟, 嗰陣時仲記得去左 d 農地...都好多年前喇...友人: "你真係入黎元朗, 我仍然唔敢相信!" 笑死了!
Anyways, 講番"焰拉麵"先, 其實元朗既拉麵店我有三間係有興趣, "焰拉麵" 係首選, "千里迢迢" 黎到希望唔好失望啦! 店內有五款拉麵, 亦有鐵板飯類同小食等, 以拉麵店黎講, 種類選擇好多下! 額外餐牌更有我最愛既つけ麺!
店員好清楚介紹同指示, 食客只需要圈自己按喜好圈上要點的菜即可。填完呢張紙我幾分鐘後改單都無問題, 因為加蛋 $10, 望真個 set combo 加 $20 有蛋有沙津有汽水有甜品, 好化算!
Set combo: 沙津
半熟蛋原隻上, 等麵上先拆開!
今次無揀つけ麵, 揀湯拉麵: 鮮焰; 友人則要赤焰。
木魚, 木耳, 竹荀, 蔥, 海苔齊哂腳! 快食!
食拉麵第一個動作: 先試壓匙後出現旋渦裡的湯! 我喜歡濃, 所以填紙時都選濃味, 豚骨味好搶, 個人口味傾向魚介味多一點, 我估計要求加重魚介醬油會適合自己多 D。
麵質我選正常軟硬度, 很好! 麵既粗幼度不幼不粗剛好! (經過幾篇拉麵食記, 下次我會量踱 mm)
叉燒我要比四星半!!! 好啱我口味! 皮一層肉一層脂肪一層後又層肉又一層脂肪, 大塊且厚, 你可以選擇細啖食或好似我一啖食, 肉很嫩不乾身亦新鮮! 我當時腦內不期然浮起: "入元朗不就是為了見她"呢句句子! 我估唔到元朗有拉麵做到呢個水準!
原隻咬下既半熟蛋亦唔係一般貨色! 我再去既時候會要求切一半連麵上! 拉麵碗上有隻切開既半熟蛋觀感上都係靚好多!
友人的赤焰! 之前我想去元朗另一間拉麵店"一人前"食, 原來友人試過, 佢覺得"焰拉麵"較好味!
小泡芙內裡甜 cream 為呢餐錦上添花。
因 為好耐無見友人, 所以傾左好耐, 店外雖然有人排隊等位中, 店員都無暗示或明示催促埋單。反而食一兩口麵既時候, 有問覺得味道如何, 雖然我忘記嗰位店員既容貌, 但好記得佢係帶有笑容同 helpful 既感覺傳遞過黎! 寫到呢度, 一定有人以為我係打手! 我話你知, 唔係! 店員既真誠度喺香港食店好易睇, 你下次留意下就知道咩叫有機械傳菜人, 佢地係無笑容個 tone 係交行貨, 點樣分辨好簡單, 你唔使望住個店員, 只需要聽佢講野, 一個人笑住講野同無笑講野好易分得出, 如果佢喺你唔望去之下都係有禮貌笑住講既, 佢係一個唔錯既 staff! 香港真係好少...
總結:
員 工服務, 拉麵質素及性價比都水準之上, 如果要挑剔既話, 係有點奇怪食物選擇太多, 以拉麵主打店黎講, 飯類也有八款, 作為以食拉麵為目的既食客去食拉麵, 好少會叫其他主菜, 我相信唔做飯類, 廚師可以集中拉麵既質素控制更好, 而且更可以省卻某 d 食材既成本。感覺到呢間店既誠意, 有機會我入元朗會再去試つけ麵。
環境:♥♥♥
衛生:♥♥♥
服務:♥♥♥♥♥
味道:♥♥♥♥
抵食:♥♥♥♥
推薦:♥♥♥♥♥
以上: 焰拉麵, 好好唔好食又睇落去, 好孩子香港日本拉麵道場小戰爭,元朗,拉麵, 日本菜, 食評, 食記,ラーメン,ramen, 好孩子,好孩子PHILIP, 食評