無寫"好唔好食又睇落去" 至少三年喇! 先講少少野先! 一下子寫番都有 d 生手既感覺! 寫食記既過程雖然都幾用神同時間, 睇既朋友可能只係用五分幾鐘睇, 但係我由揀相, 到寫至整圖既時間, 平均都要半個鐘至幾個鐘不等, 不過過程好有趣! 以前寫過既食店, 無論食過 d 咩, 同邊個去, 當日發生既事, 都會輕易回憶番, 呢個就係寫食記既樂趣!
呢幾年無寫, 好多食過既食店同當日既人同事, 亦比寫食記既時候模糊。我知道有網友 (有發言又好, 陣係睇都好) 都幾鍾意睇 "好唔好食又睇落去", 我寫得開心有回憶, 網友睇得過癮有得著, 亦係我重新再寫既動力! "好唔好食又睇落去" 再開!!!
-----
呢句說話黎緊每次都會講架喇: 我唔係食家, 文筆唔好, 更加唔係打手, 只係將自己覺得好唔好食既感覺寫出黎, 味道呢樣野好主觀, 喜好亦各人有各人既口味, 我係寫比自己睇, 你鍾意睇我會高興, 你唔同意亦無問題, 最後一句講哂: "好唔好食又睇落去"!
好唔好食又睇落去第 330 回: 牛一極上和牛 SHABU SHABU 放題 日式放題任食牛有好幾間較出名既店, 近年我食過既有"牛陣"同"日牛", 呢間"牛一" Nobe One 都聽過唔少朋友推介, 聞說係一壽司集團的, 星期六無 book 枱情況下 walkin, 早早地六點九等十分鐘就可以就座! LUCKY 啦!
地址: 尖沙咀樂道32-34號1樓
間食店喺一樓, 等位喺地下, 入座之前已要揀定要邊款牛肉 set, 前台職員好急...好似催命符...好有壓力...ANYWAYS, 兩款食法, shabushabu 涮涮煱同 sukiyaki 壽喜燒都係按你揀咩 set 而計價錢:
分三種肉 set:
$138 美國牛肉, 豚肉
$168 極上美國牛肉, 豚肉
$288 特級日本和牛, 豚肉
$338 極上日本和牛, 豚肉
呢次我地揀 $338 極上日本和牛, 豚肉, 湯底揀干貝清湯。限時 90 分鐘。
上湯時間, 出去睇下有 d 咩野配菜? 菜, 丸, 麵, 飲品, 雪糕 yogurt 任拎!
雖然放題牛肉先係主角, 不過作為"孩子"既我, 亦拎幾粒丸幾條腸, 菜就一條都無拎, 番屋企先食啦! wakaka...
限時放題關係, 要注意時間, 因為店內 staff 都計得好緊, 坐低時已經聽到個 staff 對隔離枱食客話仲有十五分鐘, 哇...好大壓力啊! 真係食得好有壓力...wakaka...
由湯上枱至煲滾大約需時十多分鐘, 期間可以出去拎 d 配菜同飲品啦! 不過最緊要都係拎醬油, 黑蒜醬油, 柚子醬油, 原味醬油, 麻醬同辛辣醬油多款, 我 pick 四款點牛肉! 排好陣就開波!
第一碟牛上了! 近望一望也不錯啦
拖一拖至粉紅色 即上碟食,第一口 唔蘸醬油食! 試試原味, 我條脷唔係食神脷, 唔知係澳洲和牛定日本和牛, 不過和牛普遍都係肉味淡而肥脂多, 這塊肉嫩牛味不濃而肥。
食完呢碟, 之後繼續上牛,呢碟係第二碟,新鮮度不及第一碟,但肥脂很不錯!
跟住豚肉,其實幾好味,只係我係嚐牛多點! 之後發現牛肉供應速度不及我地食既速度, 所以只要牛肉一到, 就再 order 下一碟, 不過我地又未至於一次過 order 五六七碟咁癲既!
一口氣食得多牛肉好易滯, 要食下其他野! (謎之聲: 呢 d 都係肉啊! 唔係菜啊! 暈了!)
多口試下美國牛,肉味濃,同極上和牛差天共地,仲係咁大碟,瀨野...
一次過上,仲有一碟極上美國牛,同普通美國牛分別唔大......係肥 D D!
衝左一輪, 睇枱上左面由個煱抽出黎既油就知道戰況幾咁慘烈...宜家睇番個醬油陣十足打將一樣! WAKAKA...
最後十五分鐘被侍應提示要埋單找數。又一次感受壓力...食飯姐大佬...咁叫多最後一碟先, 哇! 最後既極上和牛變左打風和牛?!!
因為食得太多牛,要滑一滑甜一甜個胃, 整個雪糕埋尾先! 食飽飽最後埋單每人連加一係 $371。
總結:同類牛肉放題店牛陣同日牛, 我未試過食前兩店既最高價牛肉, 如果要連同牛一比較牛肉質素亦唔啱標準, 不過以其他食物同配套, 我會以日牛>牛一>牛陣黎排, 日牛一人一鍋我幾鍾意, 自己烚自己個鍋幾方便, 同埋 D 蟹腳幾好食。牛一就環境舒適 D。整體黎講呢個價錢性價比不高, 除非你係超大胃王, 一人可以鯨吞十碟以上極上和牛, 如果唔係, 呢三百幾元可以去淺嘗更好既牛肉呢!
環境:♥♥♥♥
衛生:♥♥♥♥
服務:♥♥♥
味道:♥♥♥
抵食:♥♥
推薦:♥♥
以上: 好唔好食又睇落去,好唔好食,又睇落去,日本菜,SHABU SHABU, SUKIYAKI,牛一,日牛,牛陣,食評,尖沙咀,打邊爐,好孩子,好孩子PHILIP,和牛,東京,涮涮煱
題外話/補充資料
由入門口, 坐低到食完, 因為食店 staff 多次提及"時間", 食既時候好有壓力, 其實店內只要每張枱整個計時器比客人睇就一目了然, 就唔需要 staff 提示。