早排同事話
老細帶佢去食咗間隱世食肆
講到有幾神乎其技，
味道又有幾出色！

問佢喺邊？
答案係 「天馬苑」
I beg your pardon 
「天馬苑」
哦……

當晚…
我地大家，在獅頭山下天馬苑」
就試一試呢間「文苑」

必叫【乳豬】
就喺你面前肢解，
皮脆！好味！
但冇驚喜！

「叉燒」
可能我偏愛肥叉燶邊
佢唔夠肥亦唔夠燶
不過味道都OK！

「經典白切雞」
我一邊食 一邊搵佢有幾經典
搵唔到 但味道都算唔錯

居然有「釀苦瓜」同「蝦子柚皮」
兩個都算功夫菜
係滿意嘅

炒飯OK
懷舊甜品拼盤
有噱頭 冇驚喜

總結成件事
如果唔係期望咁高
其實係好味嘅

不過價錢就…
位位六百幾
真係驚 多過喜

好日都唔去吓中環，
一場嚟到，梗係要搵食，
行行吓…【蛇王芬】！！！
真係聞名不如入去食！

望望食午餐餐牌……
蛇羹+糯米飯 $ 178
燉湯+雙拼飯 $150
我地兩女一男，女生又扮細食
咁就各叫一份，另加多個蛇羹，
雙拼飯就梗係臘腸同潤腸……

蛇羹？相對其他地方，係好少少嘅
燉湯？相對其他地方，係好少少嘅
糯米飯？相對其他地方，係好少少嘅
臘腸同潤腸？相對其他地方，係好少少嘅

至於價錢？
相對其他地方，又真係貴好多喎！

芬姐！
好難有下次喎……

先解釋一吓，愛上…係上網個上！
上咗OpenRice咁多年，
一向都冇乜留意當中嘅優惠！
直至，
早排朋友話book咗【帝京軒】，
問我食唔食？
梗係食！

7個人，一坐低就點咗隻「北京填鴨」，
朋友話訂咝隻「少爺手撕雞」
又雞又鴨，不如一人一隻「焗蟹蓋」
再叫個「咕嚕肉」
加埋個「東坡肉」吖笨！
臨尾叫埋個「啫啫芥爛」
咁就真係飽到上天花板！

道道菜都唔錯！
服務又好！
仲想點！

臨埋單，
睇睇個銀包，得五百零蚊，
酒店喎！又雞又填鴨喎！
又焗蟹蓋喎！
八成唔夠俾啦！

最後朋友埋完單，
位位 420！
吓！咁抵？

佢話經OpenRice訂位有八折！
有啲咁嘅事？點解我唔知嘅？
朋友講咗五個字…
「因為你背囉」

以後搵飯食，點會唔愛上OpenRice？

莊子【庖丁解牛】頭三句係咁…
「吾生也有涯 而知也無涯
以有涯隨無涯 殆已！」
講白D就係
條命有限，而知識係無限，
夾硬一追再追？ 死得！

食完【禾牛薈】，
令我對人生有所頓悟！

入到嚟環境唔錯，
招呼又算周到，
叫完鍋底同配料，
重點梗係叫牛！
問部長有咩推介，
佢話「封門柳」同「牛頸脊」，
咁就每款嚟一碟啦！
唔爭在叫埋「牛柳粒」吖笨！

一上枱，朋友話好精緻呀！
有個招牌仔，
仲寫埋要灼幾多秒，
好細心呀！

結果呢？
牛味中上！
有咬口得嚟又唔韌！
仲想點？

朋友一邊咬住肥牛邊話，
有間鐵板燒仲堅！
A5和牛，一人都係千五蚊咁上下……

「吾生也有涯 而知也無涯
以有涯隨無涯  死得！」

本篇不適合怕黑怕鬼人士觀看，
敬請留意……

某一日，一位富貴朋友約食飯，
仲訂埋【彤福軒】？！
仲話佢請添！
咁都唔去，真係冇天理兼會俾雷劈！

當晚一入到去，
已經Feel到有D似曾相識嘅靈異感覺……
中得嚟又好西…西得嚟又好貴…
無敵維港景…味道冇驚喜…
埋單仲會嚇餐死！

OMG！咪即係【六公館】？

即時好似撞邪咁，
平行時空，將兩間互相比拼……

環境：兩間都係黑媽媽鬼咁有情調咁，不過【彤福軒】略勝一籌！
服務：兩間嘅侍應都係鬼咁好笑容，但【彤福軒】自然好多，羸成個身位！
食物：兩間嘅餸菜，都係鬼咁好睇得嚟又唔特別好食，各有春秋！
價錢：兩間都鬼咁貴，但【彤福軒】更上一層樓！

經過今次靈異事件之後，
我得出嘅結論就係……

「有人請，我唔介意再去！」

未寫食評，例牌先睇睇其他食家評語…
嘩！
日本開到香港，米之蓮一星拉麵店！
嘩！
湯底層次鮮明，口感豐富！

但係，
點解我食唔出嘅……

我唯一 嘩 一聲嘅
就係埋單果一刻！

嘩！
百幾蚊一碗，
仲鬼咁少份量！

如果攞住呢百幾蚊，
去旺角 深水埗掃街，
嘩！咖哩魚旦呀！
嘩！燒賣加腸粉呀！
嘩！橙色豬生腸呀！
嘩！雞蛋仔呀……

應該滿足好多！

以下，係我寫呢篇食評之前嘅 心理掙扎…
內容非常沉悶，
唔想睇？
咪唔好睇囉！

我個心一路反反覆覆，
唔知應唔應該寫呢間「發記」嘅食評，
因為呢間舖頭細細，
喺新蒲崗工廠區，外貌又平平無奇
服務麻麻，落單又立立亂嘅食店，
居然D小炒有咁嘅質素，
居然價錢又咁平，
萬一我寫完食評之後，
多咗人去，以後訂唔到位咪捉蟲……

但諗深一層，我係唔係太自大呢？
我啲POST，嚟嚟去去都係得果小貓三四隻睇，
何來有咁大影響力！

再諗深多一層，
食到好食嘅嘢，上OpenRice推介，
係天公地道嘅事！

最後我決定，
放兩個我去到必叫嘅菜，
就係 蠔餅 同 豉油皇鵝腸
你覺得啱睇嘅，咪去試試囉……

文青朋友約食晏，
地點係佐敦Plato Café & Bistro， 嘩！PLATO 咪即係柏拉圖！？
梗係要去潮拜吓！

四條友，一人叫一個SET LUNCH，
再Share食，
諗住樣樣都試吓好唔好味！

居然有我最愛嘅Bagel，
仲夾住我最愛嘅燒鰻魚，
梗係要試！

朋友M話想食All Day Breakfast，
當然不妨一試！

朋友H見到有個喇沙海鮮意粉，
喇沙係著名男校，加意粉即係男校加女生！
點解唔試！

朋友C無肉不歡，
為咗滿足佢嘅「肉」望，
就叫咗個豬扒！

幾個餐味道都唔錯，
而最有驚喜嘅，
就係 喇沙海鮮意粉！
喇沙crossover意粉，
味道出奇地夾！
埋單原來仲有九折！

親愛的柏拉圖，
我發覺自己有少少鍾意你……

第一次去The CheeseCake Factory，
之前都有少少心理準備，
都應該似Dan Ryans TGI Friday呢類美國餐廳，
大大份，成班人開開心心食一餐嗰隻，
結果又係點呢……
係大大大份，食完頂到上心口，再消化唔切攪到胃下垂！

我地五個人，先叫幾個小食，
釀蘑菇、炸蟹餅、Nachos同唔知炸乜嘢
跟住加多份 五花腩小漢堡，
請留意…係小食同小漢堡，
但食完都已經飽飽地，
但冇理由咁樣衰，俾幾碟小食大到！
點都叫個Pasta先似樣！

朋友揀咗個 雞肉蝴蝶粉，
點知兜粉成個化寶盤咁大！
好似蝴蝶谷擺咗上枱咁！
食咗一半已經舉手投降，

又有朋友話，嚟到CheeseCake Factory，
冇理由唔食CheeseCake，
好！我就同你玩大去！

就係咁，個胃俾呢間工廠KO咗……

你問我食得開唔開心？
OK啦……
你問我好唔好味？
OK啦……

突然想食越南菜，朋友話不如去【越老】！
又玩食字，開頭真係唔係好明點解，
咁緊係上OpenRice睇睇，
哦！原來係社企「銀杏館」開嘅，終於明白晒！

一入到去，發現所有動作，都變成慢---動---作---
好有禮貌嘅長者侍應，慢慢帶我地入座，
跟住慢慢遞上餐牌，再慢慢Take Order…
咁我地都不甘後人，慢慢咁點咗
越式春卷
酸辣鳳爪
炸魷魚
串燒
大頭蝦 等等等等
不過…都唔算等好耐！

其實味味菜都不過不失，
唔可以話好好味，亦好似唔算好道地！
但成餐飯又感覺好有意思，
間唔中又有一兩位長者侍應，好幽雅咁行埋嚟同你傾幾句，
而更有意思嘅係，原來佢地每日都會派飯俾有需要嘅人士，
食客仲可以捐錢支持！

我一邊慢慢食，一邊望住啲長者，
一邊諗起莫文蔚首【慢慢喜歡係】
你話點會唔係  【越老】越可愛^^