年初四去到旺角Moko，選擇幫襯未試過的段純貞。必須講服務麻麻！唔知係咪新年開工，侍應心情唔好？入座時見有兩張枱，一張近侍應櫃枱，另一張比較入面——行到入面，一位比較年長，穿淺色制服的女士（可能係高級經理）連呼三聲" Hello Hello Hello"叫我哋出返去，話入面留咗畀員工用膳。但之後果張枱又畀咗另一位客人喎？ 聽到隔離枱有得QR code落單，不過我哋係冇code嘅👍 食物質素OK，面條份量偏少，但因為本身細食所以可以接受；半筋半肉各有兩塊，牛筋和肉都炆得夠稔；至於湯底也不錯，頗重藥材味道，少少辣算醒神~但都因為多藥材，重口味，所以比較口渴。

復活節假期的下午4點去到尖沙咀，難得杏甜品唔需要排隊，就入咗去~試咗輕食套餐set B+抹茶杏仁奶凍吸吸。 輕食套餐set B包一份飲品、三文治、輕營甜品，賣$58算抵食呢！今次叫的係杏咖啡、和風雞肉三文治、杏仁奶凍。前兩者味道不錯，咖啡適合鍾意飲淡啡味的人，有少少苦澀加上濃香杏仁味；三文治夾有生菜和番茄，還有一抹厚厚的雞肉沙津，用上竹炭麵包都好特別。唯獨杏仁奶凍冇乜杏味，似係一杯白色魚膠粉啫喱，可以不試。 至於杏仁奶凍吸吸，其實即杏仁豆腐飲品，相對set B的奶凍反而杏香四溢，而且定價$38有咁大杯，都好抵飲。

喺大圍嚟講，紅茶算係環境好，味道尚算穩定的茶餐廳。點解話味道尚算穩定，係因為剛開幕時佢奶茶難飲、沙嗲牛面又有燶味…但近來水準算唔錯，雖然杯奶茶仍未比得上同區太興（以連鎖店嚟計）。 紅茶下午茶非常抵食，份量多，而且好味。已經試咗幾次燒味飯，叉燒都好稔，而且比大圍普遍下午茶燒味飯都足料。吉列豬排烏冬都唔錯，豬排係新鮮熱辣上枱，炸粉薄，豬肉有𡁻口。另外推薦出爐酥皮蛋撻，雖然7蚊個唔算平，但幾好味，經常一出爐就賣晒

近年都會約定朋友食一餐大閘蟹，今年揀咗之前未食過嘅譽宴，算係咁多年來最好的一餐 每位$428另收加一，其實同坊間酒樓差唔多價錢，但質素的確唔錯。而且餸菜逐道奉上，除臨尾趕收工就一次過上晒薑茶、炒飯同甜品…但至少比以前去其他地方食大閘蟹餐時，未食完一碟已經上緊下一碟來得好。 食物方面，蟹粉小籠包皮薄有湯汁；花雕鮑魚可以唔駛沾芥末，已經非常夠味，鮑魚又唔韌；大閘蟹雖然得一隻（坊間通常3隻）但質素唔錯算多膏；蟹粉翅湯係全餐最出色的一味菜，食到蟹肉碎同翅絲，足料好味；稍嫌失色係乳鴿，外皮太鹹了。 此餐另大方地附有一壺400ml花雕酒，配搭話梅一齊飲，相當特別。

一直知道快樂蜂深受歡迎，但分店太少，一直都冇抽時間試。直到早前心血來潮想食炸雞，去另一間炸雞快餐連鎖店時…哇，竟然連又柴又冇肉嘅排骨位都拎出嚟奉客，真係忍唔住食另一間好過。 今次試的tea set包一杯汽水、炸雞脾、忌廉湯粉，只係$25。雞肉的確嫩滑多汁，雖然炸雞皮偏冧，但整體都好味過某連鎖店。點雞肉的汁，淡口冇特別味道。忌廉湯粉份量不多，但味道算OK。另外叫咗一件$9呑拿魚卷，脆身，但肉醬感覺太溶。

午巿去食，都係要嘟安心出行、量體温等正常動作。 門口一個比較高級的知客，會先問你食咩套餐。呢度午巿提供小鍋或打邊爐。如果你答食小鍋或丼飯，會被安排坐商場出面。由於出面太焗，同會有個大喇叭喺身邊，所以我哋要求換位。呢位高級知客答你：「商場有冷氣㗎啦！裡面只係畀打邊爐嘅人坐。」吓，我夠知商場有冷氣啦？知客待客態度惡劣，完全冇諗過幫手解決問題，只係想顧客越食越勞氣~臨走想拎走餐單望又唔畀，非常神奇的飲食體驗。

早前openrice發現尖沙咀富衛1881公館開了三間新餐廳，其實另兩間法菜和steak house都吸引，不過個人偏好中菜，一於試試「后園」。 點心方面，蟹肉南瓜餃真材實料，有飽滿的蟹絲，水晶皮很薄；素腸我都係被圖片吸引所以叫，綠色皮都係好薄（其實呢間餐廳所有外皮做得OK），甜鼓油好味；百利酒蛋撻幾重酒味，留意係咪各人都啱食，不過係幾得意的；蘋果叉燒酥係最平凡的一味，如果水果可以酸少少，應該可以更平衡到油膩感。 另外，荷葉飯足料，相信夠四人一人一大碗；甜品方面，豆腐凍、南瓜紫米奶凍，以前者比較出色，幾重豆腐甜味，後者比較普通啦。 裝修仿似傳統中式大宅，很雅緻；點心價錢跟連鎖茶樓差唔多，所以想靜靜哋食個午飯，呢邊絕對比隔離星光行更加值得。

食過兩次，今次第三次幫襯，都幾失望。餐廳似乎已經擴張，租埋隔離舖，不過質素下跌，冇得救。 星期日，排隊唔夠15分鐘已經可以入座，留意店員會呢個時候幫你落定oreder。我哋點左一個原味梳乎里、一個宇治抹茶梳乎里、一杯咖啡。 厲害了，我們甫一坐底1分鐘…你冇睇錯，係1分鐘。兩份梳乎里已經上枱。擺明整定都算，仲要唔熱。而家食快餐呀？杯咖啡反而要整呀，10分鐘先上枱。 尖沙咀好幾間pancake舖，香港人值得選擇更好。

半年前去長洲都幫襯過，不過假日去真係人山人海，而當時仲係立食。半年後去到，由於係夏天+平日，第一轉去到，噢，原來加左幾張木椅，但全部坐滿人，所以走去前面食多碗甜品先，再返轉頭睇。第二轉返嚟，人走晒，可以坐底食嘞。本身只諗住叫厚切墨魚，但老闆盛意拳拳拎住ipad介紹其他野食，最後叫埋炸日本蠔同冬瓜茶。

即炸關係，要稍等先有得食。墨肉厚身，只蘸少少粉便炸；其實我最鍾意係個檸檬皮沙律醬，食起上黎絕對唔油膩。另附幾粒提子和酸瓜，可以清清味蕾繼續食。另外係炸日本蠔，一碟六隻，老闆推介係靚日本貨，欣賞個沙律醬同墨魚唔同，呢款係芥末七味粉，有心思。其實我仲想食炸魚，但太飽驚食唔晒．

幫襯時剛好未有其他客人，所以同老細傾左好耐計哈哈。有睇openrice的話：多謝杯茶！係好味道既，加油！

周末旺角，條街人山人海，唯一朗豪坊頂樓幾層的食肆，可以講係一片淨土，所以一於去試試一間上次經過時，已經覺得佢sell「精米」好特別，可以一試的日式食店——丸十壽司日本食堂。大概係因為用米做賣點，餐牌的確好多米食：米漢堡、壽司、丼飯。咁，我就揀左最多飯量既丼啦！ 角切魚生飯方面，唔好睇碗仔細細，飯同魚生份量都幾多，加上魚油偏滯，亦可能係咁，所以佢地用左醋飯底。是日魚生，正在冇常見的三文魚，刺身粒粒都切得好厚身；上面仲有吞拿魚蓉，好少見角切飯都有，要加分呀！另外燒日本地雞飯，呢個用返白米飯，或許真係採用走地雞，雞皮底冇脂肪又燒得香脆，非常好味。

食完個飯太飽，本身想食甜品都食唔到。呢間絕對值得再試。