晏晝早食飯，做完嘢有啲肚餓，於是特登搭車去網紅冰室 high 個 tea。 試咗佢哋嘅網紅黃金磚。超巨型，嚇親！呢個特色西多士好特別，餡料除咗有芝士同火腿外，仲夾咗好多豬肉鬆，炸好後面層淋咗好多蜜糖芥末醬，集甜、鹹、酸於一身。再加上西多士炸得好乾身，一啲都冇油淋淋，而且好軟熟唔熱氣，所以咁大件食哂都唔會膩。正！ 如果未試過味道咁複雜嘅西多士，一定要嚟試下！佢仲有白金磚架，下次試埋先。

呢個日式丼飯套餐好適合又為食又多心嘅吃貨！$168 +10% 有齊兩碗細丼飯、麵豉湯、漬蘿蔔、沙律同茶。細丼飯有好幾個不同款色可供選擇，有生有熟，一次過可以試勻兩款。 我叫咗照燒鰻魚丼同炙燒丼，天氣咁熱，都係食熟食穩陣啲。 雖然兩個丼飯話就話係細，但其實一啲都唔算細，仲勁多餸！鰻魚丼嘅鰻魚非常肥美，啲骨好柔軟，而照燒汁亦偏濃味，比其他店更甜一啲，仲有粒粒芝麻好咬口。至於炙燒丼就有仿蟹柳、三文魚同油甘魚各 2 條/片，魚肉都係 BB 仔手掌咁大片，一啲都唔欺場！魚肉炙燒嘅時間夠，基本有八、九成熟，好軟滑但又唔會過生或過熟。不過，啲 wasabi 就冇乜料到，一啲都唔攻鼻。嗱，真正嘅山葵我未食過，所以無從比較同評論。不過，怕 wasabi 攻鼻嘅人就唔使驚，我本身就唔怕嘅，所以直頭可以當抹茶雪糕咁食。🤣🤣

之前嚟過一次食船麵，嗰次望到餐牌有樣嘢好想食，但我唔記得咗係咩。今日嚟到想搵返嗰樣嘢，又好似唔見咗 …… 於是，我就叫咗呢個咖哩牛肉麵，配汪阿姐。侍應先拎咗碗橙色嘅好似甘筍湯嘅嘢嚟，我問佢係乜，佢竟然答係奶茶！🧐 說時遲那時快，咖哩麵來了！嘩，即刻飲啖咖哩湯試下先！嘩嘩嘩！！好香濃嘅香料味，仲有淡淡嘅椰汁味，一啲都唔辣，仲好鬼甜，好飲！再嚟夾箸麵，佢有兩款麵混合咗一齊，一款係幼麵，一款係炸過嘅粗麵。幼麵冇上次船麵咁一坨喺碗底，有改善！而粗麵輕輕炸過，好有油香，口感煙靭，但又同中式嘅伊麵唔同，夾埋一齊食有齊兩種口感，好特別。而牛肉就有超級多片，好厚切，牛肉味一般，好多筋。配料就有裝飾嘅芫荽、酸蘿蔔同洋蔥，芫荽新鮮，酸蘿蔔有驚喜，洋蔥超厚切，爽脆得嚟部份有少少生。成碗麵最正係個湯，一定要打包返去今晚撈湯飯食，下次食要轉配雞肉或豬肉試下。 碗奶茶未及趁熱飲就被碗麵吸引咗我嘅注意力，於是食完碗麵先去飲佢。奶茶已攤凍，呷一啖入口，好香茶味，茶味好清新，再呷一啖停留喺口腔嗒真啲，茶味清新得嚟只有少少澀，並無港式奶茶嗰種好厚重嘅奶味，飲完喉嚨好 fresh，唔會有層奶味漿住喺口。仲有，呢款係泰式奶茶，好似港式茶走咁係用煉奶底，所以係唔需要另外加糖的。如果有朋友唔飲甜，記得落單時同侍應講聲。 當食到七七八八，忽然望到隔離枱餐牌，咦？🤩 雪糕？！🤩🤩🤩 即刻柯打嚟試試先！ 叫咗泰式椰皇椰子雪糕。雪糕用半個椰皇去盛載，一共有兩球，食落有好香濃嘅椰子味，唔算好滑（其實咁先好，好滑嗰啲有機會係加咗好多添加劑去整嗰啲巿售現成嘅雪糕），但係香濃得嚟又唔似罐頭椰漿咁厚重，而係似新鮮椰肉打碎再加牛奶去整，椰子味濃得嚟係清新的，唔會漿住個口，而甜度亦適中，唔會好甜，剛剛好。Toppings 有烤到好香脆嘅花生，仲有甜甜地嘅粟米粒同幾片椰肉，花生香脆係非常重要，加分加分！食到最後，椰皇嘅椰肉都唔好嘥，慢慢刮埋出嚟食。椰皇肉好嫩，嫩得嚟又爽爽地口，唔會嫩到水咁，又唔會老到硬掘掘，好好食！

好喇，我決定同大家介紹下 #四川辣妹子 耀哥嘅隱世美食 （殊 🤫，餐牌冇架！）。 由於本人好鬼麻煩，鍾意食魚但又怕食魚皮，淨係鱔嘅皮先會食。所以，就諗到膽粗粗問下耀哥可唔可以整到水煮白鱔。 其實呢道水煮白鱔，係我舊年已經試過同耀哥落柯打，今次係第二次食。呢度一煲大約有一斤白鱔左右，件件粗身厚切，魚肉新鮮彈牙結實，鮮味十足，非常好食。配料有黑木耳、豆卜、秀珍菇、靈芝菇、洋蔥、芽菜，而香辛料就有辣椒、芫荽、芹菜同蒜頭，非常豐富，淨係食哂呢煲嘢，一個人已經飽到上心口！ 記得喇，想試嘅朋友一定一定一定要預早幾日前向耀哥落訂，否則係一定冇得食架！

呢間陝西小店想試好耐，一路驚會好辣唔敢嚟，但後來聽講其實辣度好大眾口味，於是今日就的起心肝嚟試下喇！ 叫咗套餐 B，揀咗炸醬 biang biang 麵 （biang 係普通話拼音，廣東話唔識讀，字典查唔到，反正我就叫佢 「柄柄麵」）、香辣海帶絲同酸梅湯。 同潮式雲吞麵舖嗰啲炸醬麵唔同，呢個炸醬 biang biang 麵係涼拌嘅，而且一啲都唔辣。炸醬嘅豬肉碎炸到乾哂，混合多種香料同醬料煮製而成，油香四溢，香濃惹味。而主食 biang biang 麵就係好厚好濶好長嘅手工拉麵，一碗麵只有大約 2-3 條麵，每條麵有成掌心咁濶，厚度則大約有 2 毫米。所以，麵質咬落去非常煙靭彈牙而且爽滑，嚼勁十足。而配料方面除咗有炸醬外，仲有爽脆嘅青瓜絲、腍腍地嘅甘筍、青豆粒同薯仔粒，夾埋一齊食豐富咗口感。 不過，食咗幾啖麵嫌唔夠刺激，於是夾咗幾粒旁邊香辣海帶絲中嘅指天椒粒嚟食，辣辣地，更過癮！食食下，不如就直情夾埋海帶絲一齊食。海帶絲酸酸辣辣又爽口，夾埋啲麵一齊食酸辣爽滑勁開胃！（唔食得辣嘅朋友請放心，小辣嚟咋！） 講埋酸梅湯，酸甜度好夠味，飲到底仲有啲沙沙嘅果蓉感覺，可見真材實料！

偶爾經過西環呢間冰室，望到門口個餐牌好似幾吸引，就入咗去試下。 叫咗是日午餐「芥末三文魚忌廉焗海鮮飯」，配汪阿姐，送例湯。 芥末同三文魚真係絕配！一啖飯放入口，一股清新而又有少少刺鼻嘅芥末味就湧上嚟，再加上少少忌廉輕輕中和咗，非常醒腦提神又開胃，好啱冇乜胃口嘅夏天食。而配料方面，除咗有好多三文魚粒外，仲有勁多款海鮮，包括蜆肉、魷魚粒、八爪魚仔、蝦仁、蟹柳，同手掌心咁大塊嘅鱈魚柳，真係未試過海鮮飯會有咁多款嘅海鮮！雖然啲海鮮預咗係急凍，但係鮮味嘅鮮味、彈牙嘅彈牙、爽口嘅爽口、軟滑嘅軟滑，絕對係急凍海鮮中嘅上品。 是日例湯係合掌瓜甘筍煲豬骨，啲瓜煲到好腍 ，飲落好濃甜，唔覺有味精或雞粉，都幾好飲。 汪阿姐不過不失，不贅。

叫咗牛肉濃湯船麵（揀咗河粉，即金邊粉），嚟到大大碗，啲炸豬皮等等嘅配菜堆滿成隻碗，爭啲嚇親。 配料有： 肥牛片、牛丸、炸豬皮、九層塔、芽菜、通菜、葱。湯底果然夠濃，但又唔鹹，味道剛剛好，飲多兩啖都唔口渴，應該用咗超多牛骨同香料去熬製。肥牛唔太肥，仲好細心地切短咗方便進食，都有牛羶味。牛丸有牛味，彈牙，不過似溝咗豬肉。炸豬皮鬆脆。不過千祈唔好浸太耐，最好一上枱就馬上食哂佢先，否則浸耐咗會靭。九層塔毫不吝嗇地一大喳大大片，好香。芽菜同通菜都好爽脆，嗦嗦聲，增加唔少口感！仲有金邊粉有少少煙靭，可惜係似一早煮好放喺碗底，有客柯打先淋湯加配菜。啲粉一大陀咁，要用力攪開先夾到，呢樣係唯一嘅敗筆！ 仲有，加兩蚊有杯凍咖啡，超香濃嘅味道，最鍾意就係咁樣甘甘地。

第三次來為呢間餐廳寫食評，皆因佢值得我花時間去讚好！ 當日父親節，其實唔係嚟慶祝，只係夾啱大家嗰日先得閒。 由於而家有早鳥優惠，4:00-6:30，6:30 前離坐先有七折，所以坐低即叫嘢食。 椰子雞鍋： 侍應喺食客面前即倒兩個新鮮椰青水落去鍋中，滾起再落清遠雞件（半隻），然後冚蓋等 5 分鐘就食得。湯底未食就聞到好大陣椰子味，已經流口水啦！再嚟就先飲兩碗椰子雞湯先，嘩，甜到漏，非常清甜！湯底配菜仲有杞子、粟米、馬蹄同芫荽。 清遠雞： 只要跟足侍應教嘅煮法，就會好滑，一啲都唔嚡唔靭，脂肪又少。 青蘋果沙冰： 好香好清新嘅青蘋果味，初頭飲酸酸甜甜都幾開胃，但飲耐咗就有少少偏甜。 天下第一刀： 意思係劏豬時第一刀切落去起出嚟嗰塊肉。聽講由於切呢塊肉時隻豬仲未流出一滴血，所以，呢塊肉嘅肉味比較濃。果然，由於餐廳厚切，豬肉食落豬味濃，而且好腍滑，可以成塊放入口唔使分兩啖都唔會靭。仲有，$17x 超大碟，嚇親！ 溫體手切吊龍： 吊龍係牛嘅邊度我唔得閒查，但係牛味好濃，又好腍滑冇渣，就算冇乜脂肪都唔容易淥到嚡烚烚。 牛舌： 牛舌切嘅位就差啲，有部份黐住淋巴，又有啲筋位比較靭。味道有少少羶香，還好。 手打四寶丸： 由上至下分別係牛丸、墨魚丸、蝦丸同鯪魚丸。牛丸略腍身，有牛味。墨魚較削，但好多墨魚粒。蝦丸冇食，我敏感。鯪魚丸好鮮魚味，仲有淡淡嘅陳皮味，好香。以上嘅丸唔係超結實彈牙嗰種，代表係手工造，而唔係用機打，真材實料。 老干媽虎皮尖椒： 純粹畀個名吸引咗，以為會好辣，點知一啖咬落去就爆汁，超甜，一啲都唔辣，好似食水果咁，好味！ 椒鹽大鮑魚： 採用南非鮑魚，煮前先喺海鮮缸度撈上嚟，仲係一隻隻啜住哂，可見非常新鮮生猛。椒鹽唔鹹，夠哂惹味，鮑魚隻隻都手掌咁大，咬落腍滑爽彈，鮮味濃郁，正到暈！ 薑葱生蠔煲： 當日有美國桶蠔同台山桶蠔畀我哋揀，侍應話台山蠔當造，淨係呢幾日先有，貨量比較少。於是我哋就叫咗台山蠔試下。開頭侍應話一桶大約 6-7 隻，嘩，點知煲蠔夾極仲有，好似聚寶盆咁，最後數到有成 13 隻！每隻蠔大約手指公咁長，唔算好大隻。但係咬落去邊位好脆（應該係輕輕走過油），蠔身爽口彈牙，蠔味鮮香。而且，一啲都冇渣，未食過咁好食嘅蠔煲！仲要，蠔煲冇多餘嘅配菜充撐場面，只有薑、葱同蒜。

今日貢貢下走咗上般咸道覓食，點知想去嘅嗰間餐廳今日唔做午巿，於是喺附近搵咗另一間馬來亞餐廳。 坐低叫咗是日午餐 A：咖哩雞飯 + 羅宋湯 + 汪阿姐。 太肚餓喇，餐包等唔切畀部手機食先就畀我咬咗一啖。餐包屬室溫，軟熟，味道普通。 羅宋湯有椰菜、紅蘿蔔、薯仔、西芹，最驚喜嘅竟然有好多牛腩碎！湯嘅味道唔算好濃，但夠味，甜酸度平衡，唔辣，只有好輕微嘅㷫口。唔知係咪我少喺出面飲羅宋湯，今次真係第一次飲到有咁多牛肉碎，令碗湯增添咗口感同肉味。 輪到主菜，食咖哩雞前，我習慣先一羹咖哩汁入口。馬來咖哩汁比港式咖哩冇咁重香料味，同埋唔辣，又係只有少少㷫口，反而多咗好濃郁嘅椰汁味。口感滑得嚟，有啲沙沙嘅感覺。再嚟試配菜嘅薯仔。嘩！超級好食！又棉滑，又粉糯，仲索哂啲咖哩汁，兩舊真係唔夠喉。（OS：老闆！可唔可以畀多幾舊薯仔我呀？） 跟住食雞，雞有兩大件，當我準備切佢時，先發覺原來係雞背脊，把刀畀背骨頂住咗。雖然係雞背脊，但唔好以為冇肉，其實佢都可切到唔少肉出嚟。而用雞背脊，亦代表餐廳至少唔係用千年雪藏雞扒，而係用原隻冰鮮雞再斬件。講下件雞嘅味道，基本醃咗底味，再撈埋咖哩汁一齊煮。肉質唔似雞髀咁滑同彈牙，但又唔會好似雞胸咁嚡烚烚，佢係介乎兩者之間。可惜嘅係當日廚師唔小心煮過火了，有少少嚡，但可以接受。配埋咖哩汁，味道都 ok。 至於汪阿姐，香嘅，滑嘅，但唔落糖就苦咗少少，整體都 ok。

今日終於得閒去食酸菜魚。聞說楊老闆好鍾意食酸菜魚，所以對呢道菜嘅要求好高，咁就一於試下係咪真係可以媲美四川菜館啦！ 一嚟到二話不說即刻試啖湯先。嘩，鮮！酸味夠酸，辣味適中，鮮味突出，麻香四溢。再夾塊魚片試下，好爽，好彈牙，連魚皮都係爽彈的。而且，魚肉味極鮮甜，鮮到不得之了！仲有，魚片有好多片，又厚又大塊，足夠送哂一碗飯。問咗另一個老闆：「啲魚片係咪脆肉鯇嚟架？」佢竟然話：「係鯛魚嚟啊！」我：「下？咁揼本？？」😳 另外，豆卜吸哂湯汁，冇豆腥味，明顯係處理得好好先放落去。酸菜夠多又冇渣，食哂魚片後，淨返酸菜同湯底忍唔住要打包返去留返今晚泡飯食，正呀～ 套餐仲包餐飲同甜品，我要咗杯汪阿姐同熱燉蛋。汪阿姐入口非常超級無敵滑口，滑到一入口就直滑入喉嚨，啡味濃度適中，唔會話好濃。而燉蛋亦有驚喜，動 L 動 L 的震騰騰，滑得嚟唔係實的的好固體嗰種，而係有啲削削地，可以瀡入口嗰種。啱哂食飽飯唔係幾食得落甜品，但又想甜一甜口腔嘅人，食完都唔會滯。