本來係食過返尋味, 喺五月尾同朋友食過生蠔覺得唔錯, 啲蠔唔腥兼有少少鮮甜, 正價二百零蚊可以食到生蠔, 真係算超值. 於是上星期六約埋屋企人一行八人再試, 點知全部中哂招.

果日冷氣明顯唔夠, 我哋第一次點嘅生蠔係浸哂喺冰水入面, 因為啲冰溶咗, 而啲冰又無保鮮紙隔住, 所以啲生蠔全部變哂落水蠔, 賣相已經唔好. 但心諗, 喺酒店果啲即開生蠔, 都係開完用水沖, 都係水滴滴, 應該唔怕, 加上第一次食咗無乜事; 雖然都有疴, 但係無肚痛, 以為係自己腸胃問題, 結果我帶頭照食. 我哋一行八人, 前後點咗大概五十至八十隻生蠔, 因為每次都嚟唔足數, 所以計唔到.

結果返屋企全部中哂招, 個個都疴, 有四個除咗疴仲發燒發冷, 懷疑係食物中毒, 搞到返唔到工. 但因為我哋分別住喺唔同嘅地方, 到今日傾開再去邊度食嘢, 講起至知咁大鑊. 於是我立即打電話搵餐廳經理, 想將問題反映, 希望佢哋留意改善. 點知職員話經理放假, 叫我改天再打去, 為免再有人中招, 於是電郵向食環署反映事件, 並寫呢個食評, 希望各位可以留意吓.

本來呢間嘢都食過幾次, 坐位好舒服, 空間好大. 雖然食物種類唔多, 但有我哋最鐘意嘅魚生同燒物, 已經值回票價, 加上待應都好有禮貌, 出嘢又快, 唔使一個鐘就已經食飽哂, 通常最後order都唔會再點嘢. 加上我哋一般都係八點後至入座, 完咗兩個鐘無客等, 待應都唔會趕我哋走, 我哋可以慢慢傾吓偈, 消化吓. 期間仲可以繼續攞飲品同甜品, 真係幾盞. 但係今次嘅經歷, 就將以前所有credit一Q清袋, 我諗我哋下次都唔會再去.

喜歡得閒搵團購美食，當然搵到平嘢之後，都會喺開飯網睇吓食評至扑鎚．一直都好奇怪係幾好嘅食肆都會有啲負面嘅食評，而且大多數都係一面倒的負面．為咗呢樣嘢，我都獻上我嘅第一次食評．．．

雖然團購話係五折，但實際上只係比原價平大概二十元，雖然係咁，我哋都覺得今次放題係物有所值，甚至係物超所值！

我哋一行七人訂嘅係九點半至十一點半時段，嚟嘅時候因為前一時段嘅人客未走，所以等咗一陣，大概係十分鐘左右啦．一坐低，當然第一件事就係點嘢食．之前已經諗好咗要點啲乜嘢，一次過點咗好多刺身，燒物，串燒同飲品．本來點菜單入面寫明要大概十五分鐘，點知唔使十分鐘啲嘢就陸續咁嚟．先上飲品，我哋都未分配好飲品，一大盆刺身已經送到，肥美嘅三文魚睇到已經好開心，好想食．仲有其他我哋以前未試過嘅白豕肉，白鳥貝同榮螺片．數量方面雖然無細心數過，但係一眼睇落去係有多無少．雖然部份刺身並唔係一流嘅級數，但係我哋都一致認為，單係呢幾盆刺身已經值回票價．

其他的燒物，串燒同火煱等都好有水準，上得亦快．只係需要一提的是原來點菜單入面寫的〔份〕，有時係等同〔件〕，有時則是按人頭計．例如係點了兩份金菇牛肉卷，只來了兩件．點了三份牛油帶子，來了一盤內有七粒的帶子．我哋面對呢啲問題，只會抱住一個心態係，唔夠咪點過囉，百零蚊嘅收費，仲想點．而且職員嘅態度好唔錯，有求必應，當然要求要合理啦．仲係有問有答，有啲唔識答嘅都會叫其他職員答我哋，絕對唔會面黑，我哋已經覺得好唔錯．

比較遜色嘅係芝士焗蠔，數量嚟足，但係蠔好瘦，起初仲意為喺人哋食完嘅生蠔再用嚟做梮蠔，但後來睇真之後至知道係蠔太瘦，成隻蠔売都只係芝士，喜歡食蠔嘅我有啲失望．全晚最美中不足嘅係燒羊架，就真係三催四請都未出嚟，專程嚟食燒羊架嘅我雖然已經好飽，但係都真係好想試吓呢度啲羊架嘅水準，所以都催咗幾次．直至最後一次，我問服務員係咪無羊架，如果係唔緊要，話我知無就得啦，唔使俾我等．服務員帶啲唔好意思咁回答話唔好意思，羊架係有嘅，我幫你追追．結果唔使五分鐘，兩件美味嘅羊架就出現喺我眼前．雖然好飽，但都覺得好好味，只係如果可以早啲嚟，就一定更好味．

雖然係有少少未盡善之處，但係諗到只係百幾蚊就有咁嘅服務同質數，即使唔係團購，幾時想起任食日本料理，呢間都係入選之列．