由於平時比較忙，近年很少寫食評，但由於被標注為已訂位無出席的情況下，又一次要抽時間證明一下，從來訂位必定準時到的原則下發表一下🤭 先解釋一下，一坐低被要求取消訂位，因為我早咗到，但當時已給職員協助，很可惜職員也沒能將其取消，但真係有啲唔明點解要我取消訂位🤔 由於突然想打邊爐即日訂位得返晚上21:00，行完街早咗少少到，選擇了美國特級安格斯牛吃過飽餐，款款牛都唔錯，沙白大大隻新鮮飽滿好鮮甜，另外八爪魚滑都係好值得一試，服務態度好好，比之前荃灣好得多。

本來無咩時間寫食評，但這些店舖說我訂位缺席，就不能讓這些不實的就止過去，為証明3月23日為朋友慶祝生日的午餐餐桌顯示一下，請店主好好看清楚是否你店的菜式吧⋯⋯ 先不說回贈的積分我從不留意究竟有沒有入俾我，但坐咗幾個鐘都可以話你訂位缺席，真係無言😑 除老闆特別like，當天為這餐桌服務的職員禮貌差就不用多說。。。😡 點解會突然醒起望下才知道被缺席，皆因今天行過打算介紹俾朋友，誰不知才知道被缺席出席😡無言。。。 一樣還一樣。啲食品大部分係好食的，不過碟炒飯就。。。都唔啱我們大家食咁啦🤫

OCT 12,2009(MON) LUNCH $325
糖醋小排骨 $45
係一個冷盤小碟，這小碟好精緻，用上兩塊葉捲成像是手卷壽司一樣，內裡藏滿凍凍的小排骨，對我嚟講好有新鮮感！
糟溜魚片 $88
面層舖了數片魚肉片，下層用上大大塊的雲耳，黑白顏色對比分明！
魚肉略有少許魚鱗，魚肉味清淡，D汁就唔係幾啱口味，可能係雲耳嘅關係，有D酸酸地！鍾意食清淡的餸菜，還是一個不錯的選擇！
宋嫂魚羹 $25(1位) x2
見到個名覺得好得意，樣子有點兒像碗仔翅似的，但是配料就是用上切粒狀的，一粒粒的魚粒多的是，啖啖口感十足，帶著一絲絲清甜嘅魚香味，唔錯！
蟹粉小籠包 $45 (5件)
Size 唔算細，不能一口將整個放入口中享受喔！所以要先輕輕咬一口外皮，然後將肉汁吸入口中，才不讓肉汁流走，皮不太薄但亦不算厚，肉嫩汁多！
蘿蔔絲酥餅 (2件)
菜牌係無呢款食物，但又想食，試試問吧！又有喎，當然要一客喇！
一客只有兩件，外面的酥皮跟一般的無異，餡料加上一點點金華火腿粒，內裡汁略多且鹹，可能因為火腿粒的關係喇！溜溜地！
上海三絲春卷 $25
春卷外型扁扁的好趣緻，外皮脆卜卜，餡料好清淡，但太油，拎開碟上的吸油紙，碟底還是一碟油！
唔知點解嚟食午餐次次都好似好趕咁，可能因為服務員成日好急咁收嘢喇！換碟喇！拎嘢嚟咁喇！攪到氣氛好緊張！我都食得好緊張，hehe！

OCT 12,2009(MON) TEA

發現買一送一優惠咭又出場，專誠去買咗一張$10，限期內無限次使用，真係好抵呀！

出咗個朱古力批都未試過，買兩個返嚟同弟弟一齊試一試！

原來都幾大件喎！比一向都是選取長方形狀嘅批，造型改變為立體三角形，頗有新鮮感，唔錯！
批的外層脆脆地，朱古力漿由批內洋溢出來，熱辣辣甜絲絲，飽肚感十足！
一定要熱食呀！不過食時小心熱烘烘的朱古力漿流出來，熱到飛起！

OCT 7, 2009 (WED)
昨晚專登醃咗一大舊鹹瘦肉，諗住今晚煲瑤柱皮蛋鹹瘦肉粥，所以嚟買D油器返去送粥先！
炸油條 $5、牛脷鬚 $5 、蒸蘿蔔糕 $7、叉燒腸 $11
去到都成5點半，仲見到炸緊牛脷鬚，脹卜卜真係好得意，真係見到就想食喇！等一等買件新鮮出爐嗰啲先！甜甜地、脆脆地，真係好食到無比呀！
條油炸鬼雖然係喺個保暖櫃拎出嚟，但依然好熱好脆，真係唔少得佢喇！
睇吓睇吓，發現有蒸蘿蔔糕，咁就買一件食先，因為好少地方有得賣，件蘿蔔糕唔係好大件，不過用料好足，好多蘿蔔絲，真係好香蘿蔔味，唔會好多粉，真係食得好滋味呀！
叫咗一碟叉燒腸，個呀姐幫我包好哂所有嘢先話我知係即蒸嘅！而家同我去蒸，吓！咁就一早蒸咗先包其他嘢喇！等等等，都係去行一陣先返嚟拎，本來以為要俾錢先，不過呀姐話拎先嚟俾喇！又好似幾好喎！唔驚唔返嚟咩！HEHEHE！
碟叉燒腸非常多叉燒，啖啖均可以食到，不過D粉就略厚，但都唔算太厚la！
走時見到坐門口個客食緊一舊炸蘿蔔糕，成磚咁好吸引，有機會一定要試吓！
下次要試吓個咸煎餅 & 炸煎堆！

OCT 6, 2009 (TUE) LUNCH
午餐
和風炒烏冬，羅宋湯或味噌湯，豆漿、汽水或茶/啡
和風炒烏冬 ~ 份量多足有一個拉麵碗咁大，料唔多，味道一般，只食到燒汁味，我覺得汁太多，食到尾有少少水浸的情況，唔夠乾身！
羅宋湯 ~ 我選了個羅宋湯，因為真係未試過喺度飲羅宋湯呀！有少少奇怪，日本料理有羅宋湯飲，所以一定要試，唔係有太大祈望，不過味道好好，酸酸地好開胃！好多蕃茄&薯仔椰菜呀咁，不過無肉，但真係唔錯！
支裝忌廉汽水 ~ 懷舊嘅汽水特別好飲！

OCT 4, 2009 (SUN) DINNER
細路仔好想食個扖餐，於是今日又嚟呢度食，不過除咗佢，我哋決定試吓D小菜！
鐵板美國西冷扖餐 $46 凍飲+$2
今晚個鐵板餐嚟得好遲，我哋都差唔多食飽先嚟！
還是好大份，不過不及上次咁好味，好似無咩味道咁，薯條都一樣好多好脆，意粉同樣大碟到得人驚，弟弟好努力都係食唔哂！
一大湯砵嘅湯，係佛手瓜煲雞腳，味道唔欣賞la！
小菜餐飯
椒鹽鮮魷 $42
第一碟上場就係佢，份量中等，味道唔錯，魷魚新鮮軟熟唔會太乾！
3餸套餐 $108
椒鹽肉排 ~ 份量亦屬中等，可能係因為我食得淡嘅關係，我覺得椒鹽味太鹹，但整體都係好味的！
西蘭花炒牛肉 ~ 都幾大碟，菜同牛肉都多，西蘭花有少微黃，加上乾蔥&金筍令顏色幾靚，味道唔錯！
梅菜扣肉 ~ 好大煲，份量十足，梅菜浸得唔夠鹹咗D，扣肉肥瘦適中，好入味！可能係梅菜&扣肉嘅關係，墊底嘅白菜仔太黃太油太腍，無人欣賞！
跟餐凍檸茶2杯 +$12
好大杯，不過唔夠味，淡咗D！
負責招待我哋個哥哥仔好落力，好有禮貌，真係服務一流！

第一次試榮華嘅冰皮月餅，覺得好掂！

因為中銀信用咭積分 +$50換購優惠，以往一直換開雙黃白蓮蓉，今年發覺原來有冰皮月餅喎！所以就換咗返嚟去做節俾大家試試食都好！

榮華雪彩繽紛冰皮月餅 ~
一盒9個共5款口味
放在正中的一個明月係 ~ 紅荳綠荳蛋黃蓉 （180g）
軟綿綿的綠荳蓉，配上蛋黃粒&原粒紅荳，三重口感，好滋味！

伴著4款迷你冰皮：【55g各兩個】
藍莓綠荳蓉 ~ 比利時之藍莓粒，矜貴優雅，甜而不溜！
芒果綠荳蓉 ~ 芒果肉清香，咬落啖啖鮮味，食落好清新嘅感覺！
士多啤梨綠荳蓉 ~ 士多啤梨味幽香，有少少果醬FEEL，滋味十足！
摩加咖啡朱古力白荳蓉 ~ 摩加咖啡配合藍山風味朱古力，香滑味濃，絕配口味！

估佢唔到的確唔錯，值得一試！

SEP 29, 2009 (TUE) DINNER
因為大家都唔肚餓，所以就等弟弟補習完先買外賣返嚟食喇！
焗豬扖飯 ~ 佢嘅焗豬扖飯真的好難食得到，因為成日都會賣哂！一係就要等好鬼耐，奇怪今晚成9點都仲有，於是大家都話食呢款！而家呢間D豬扖飯真係塊塊都份量十足呀！足有成個飯盒咁大塊，還有好多汁，好多蕃茄同配菜，好豐富！仲大盒過以前好多添！真的食得好飽呀！好好味！
但係真係太大盒，食唔哂呀！可惜可惜！

SEP 28, 2009 (MON) LUNCH
今日同樣叫咗我鍾意飲嘅龍井茶！
蘿蔔絲酥餅 ~ 外型跟一般的有所不同，十分討好，好特別嘅蘿蔔絲酥餅，熱辣辣，外皮脆卜卜，蘿蔔絲切得比較粗條，蘿蔔味濃郁，呢個係我覺得最好味嘅蘿蔔絲酥餅呀！
北菰雞飽仔 ~ 有人覺得好肚餓，要叫籠包先夠飽喎！哈哈！食包類當然係叫我最愛吃嘅雞飽仔喇，熱辣辣食最正！
馬拉糕 ~ 真係好耐無食過馬拉糕，仲係最舊式嗰種，真係好有懷舊FEEL呀！
羅漢上素腸 ~ 係即製腸粉，皮薄夠滑，材料清淡味道清新，不錯的選擇！
班腩&黃沙豬膶粥 ~ 係生滾粥，所以製作需時，配料繁多，而我哋各自選取一種自己最鍾意食的材料作配搭，一大煲嘅粥材料好豐富，魚腩頗多，味鮮甜！不過有少少魚鱗&魚骨，食時要小心！豬膶自覺唔太似係黃沙豬膶，仲覺得過咗火，唔係幾啱食！粥底尚算OK！
籠餃個名唔記得咗 ~ 餃皮好薄，真係好晶瑩剔透，外型似足鮮蝦粉果，餡料好豐滿，一啖成隻放入口，好有滿足感！
呢度真係冷氣十足，夠哂涼快，有少少凍凍地添！食完就嗱嗱聲走人lu！