港人嘅喜好之一，就係埋堆試新嘢，又點會放過遠道而來7月新開大名鼎鼎嘅Lady M呢？

星期三嘅下午三點，Harbour City boutique 外已呈現三排的蛇餅狀。既然本次之行嘅主要目的就係呢度，唯有加入蛇餅。蛇餅移動速度非常之慢，某位女士移動到準備進入蛇餅第一排時，感恩地同蛇餅外的家人說：“我估再多半個鐘應該得了！” ...

沒有影蛇餅的相。希望下次嚟時情況會有改善。

當手中書已睇完過半，亦差不多輪候到我了。排後面嘅一位太太不滿地向家人說：“你睇，嗰個用手揸住頭髮嘅女仔，由我開始排隊嗰陣佢就已經坐咗喺度，好耐喇！佢（店鋪）應該規定每張枱嘅用餐時間嘛！”。

我諗Lady M老闆聽到會哭笑不得。呢度嘅理念就係’there is always time to pause for tea and cake‘。嘆茶點，又豈能快？你等係你心甘情願。港人什麼時候才能學會欣賞慢生活？

唔多講了。終於坐低。我不是綠茶控，就試原味吧。Signature造型，大家都不會陌生。與這些杯杯碟碟一齊呈現，甚為精緻，人亦霎時好似變得優雅。蛋糕做得確係用心，數一數，真係有成10幾20層呢。每一層都有忌廉，香滑而不太甜，令你不自覺食多幾啖。

只可惜一塊蛋糕份量太少，很快便享用完。食完蛋糕一邊飲茶一邊觀察。由於現時店鋪還是試業階段，每人最多買3件cake。很多亞太們堂食完都會外賣兩件cake返去俾家人，很忙碌地在折蛋糕盒呢。

或許，這就是名牌的效力。埋單一件cake + 一杯茶$120。$120 & 100分鐘的等待，這份luxury享受來之不易。想要encore都不太容易呢~

自從港鐵通去堅尼地城，就一直想開發呢一帶嘅美食。今日，就從久聞的波記開始吧。

位置好易搵。喺香港大學站B1出口，搭個斜到向後望都有啲心驚膽戰嘅扶手電梯上地面，轉左，過對面馬路就到。

之前聽唔少食家講燒鵝髀限量供應，所以今日特登早咗嚟。未夠12點，已經有幾枱客，但未full。姐姐招呼我坐低，態度好好。唔洗睇菜牌，直接order燒鵝髀河，斬。1分鐘，熱辣辣嘅大鵝髀就上枱喇！凈係睇個賣相，就已經令人食指大動。大大隻，油令令，更加唔洗講擺落口嗰份滿嘴油香。

我唔客氣喇！

店內沒有華麗的裝潢，沒有大肆的宣傳。呢度只係一間普普通通嘅燒臘店，專心做燒味。

其實食燒鵝，何需執著入深井？

溏心蛋就食得多，溏心蛋糕？

坐落大坑嘅新朋友。初次接觸，上網一查，不得了，原來喺香港已有近10間鋪，自己真係後知後覺。

咁一定要試下了。

又見忌廉哥。近期見到三哥米線請忌廉哥去佢新開嘅鋪做店長。睇嚟呢期忌廉哥很忙，好多通告。第一次食，梗要試原味。蛋糕店姐姐交代，等約10分鐘就食得。唔知係米我timing control得唔好，切嗰陣個賣相已經唔多討好。食落係蜂蜜蛋糕，一個唔會太甜，有流心嘅蜂蜜蛋糕。除此之外，我品嘗唔到其他特別嘅味道，或者其他食家口中的柔情蜜意。

可能都是timing的錯，遲一分鐘，美味不再；早一分鐘，美味卻又未能完全釋放。

總算是試過了。

見有「鯰魚煲加一蚊送龍蝦」嘅promotion，就去試喇。

位置喺天樂大廈一樓，呢度本身應該係寫字樓，宜家改咗做餐廳，所以地方唔算大。可能我哋去得早，上到去時得幾張枱有客，唔洗等即刻有得食。

兩個人食唔到好多嘢，order咗個煲，再加支椰青水，就係咁上下了。曾經見有食家推介過幾味小食，還是留待下次光臨再試吧。成個煲好靠個汁，食慣清淡嘅朋友未必會鐘意。其實呢個係類似現時開到周街都係嘅雞煲，不過內容就豐富好多，有好多食材可以揀，仲配有大量蔬菜。啲蔬菜吸曬啲醬汁同肉味，仲好味過啲肉！

食完啲料之後如果唔夠喉，可以加湯淥其他嘢食。不過我哋食完呢煲已經好飽，無緣試佢嘅邊爐。

Like facebook或者follow wechat仲有甜品送：埋單再送$50 coupon，豪氣。

若然食雞煲已經食到好悶，可以嚟呢度試下，或者有驚喜呢。

終於有緣試到神乎其技嘅明記！

賣相乾乾淨淨，汁超好味，其實完全唔洗加什麼甜醬辣醬，凈係加少少wasabi，記住，係少少，就已經好好味！

追加再追加，唔小心埋單盛惠60蚊。終於明白點解朋友可以喺呢度“日食牛雜過百蚊”了

大師嚟港開店已一年有多，網上評價都系half half。是日就嚟一試究竟。

已訂位，早到咗15分鐘，伺應還是很有原則又禮貌哋叫我哋等到預定嘅時間，原因係目前張枱仲未ready。6點半準時入座，伺應帶我哋上樓，一上到去就見到full場，大師果然係大師呀。嚟之前參考過好多食家嘅意見，都算係有備而來，好快就落咗單。試過以上幾款，覺得嚟呢到一定要揀啱食物。唔怪得大家啲評價half half 啦。 個人覺得凍肉同啤酒值得推薦。其他嘅就要親自試過先知啦~

九龍城泰菜林立，各有千秋。之前聽過同心的介紹，以正宗及平價聞名。在選擇困難症發作的今日，決定一試。

二人食，不能試到很多道餸。Order咗 青木瓜檬沙律，椰青冬陰功湯，沙爹 同埋 泰式炒通菜。喺香港食到的泰菜，通常不是太淡，就是已經本地化。同心的菜餸則夠酸夠辣，果然夠Thai。重口味人士應該會鍾意。

如果你想平平哋又食得正宗，不妨嚟試下。

每次經過一蘭都望「龍」興嘆，終於喺佢到港9個月後鼓氣勇氣一試排隊。是日人品唔錯，等咗半個鐘入座。被員工引至指定卡位，坐低便有自己的一片小天地。廚房同waiter工作間設於店鋪中間，卡位環繞而設，客人與waiter間用竹簾間開，啲嘢未上前個廉係半拉起狀，上菜後便全部放落，客人有需要可以摁鐘叫waiter，全程都見唔到waiter個樣。呢個設計同「拖也哥」嘅工作場地有異曲同工之妙呢😁講返食物，面同湯係做得出色，面拉得幼細程度適中，爽口唔黏；湯雖然無魂拉麵聞落咁香，但入口好濃豬骨味，質地亦唔似豚王咁「結」，保溫處理到位，食面全程都可以keep住溫度，最贊嘅係食完後成晚都唔覺頸渴，證明佢真係落足料做足功夫！另一方面，叉燒則太削，但好在肥瘦相宜，唔似豚王嘅咁嚡(雖然大舊)；溏心蛋未夠「溏心」；面嘅份量太少，晚餐還可勉強，lunch就一定要加底。佢最犀利就係可以將加麵底包裝成博多文化，marketing嘅嘢，見仁見智啦。總體嚟講完全俾佢啖湯吸引，會喺無咁繁忙嘅時段嚟再食。

穿過一片杜琪峰式警匪片嘅經典街景，走入一棟殘舊嘅工廠大廈，搭上一部「迷離夜」式嘅電梯，發現工廈內的一片天地！要提早兩個月Book先食到。其貌不揚，裝修一般，食物就真心唔錯。激贊杏汁白肺湯同冰醉瀨尿蝦！肺處理得好乾淨，湯煲到好香濃，一人得一碗，好矜貴😁 瀨尿蝦勁大隻！啖啖肉，連蝦鉗都好好肉！肉身爽，羔香，淡淡酒香，食完呢兩隻已經好滿足😍其他小菜亦都不俗。蝦醬骨好入味，上檯時已聞到好香，不過略嫌咸，適宜送酒。三寶嘅炸大腸皮脆；鹹魚肉餅同蝦醬骨嘅炮製方法應該類似，都係好入味；招牌叉燒，煮到收汁而成，非碳烤類。呢度碟頭大，仲有好多菜式好想試但都無肚載，多啲朋友一齊share就可以試多幾碟餸喇。發現我哋隔離張大檯嘅朋友好醒，佢哋原本應該係唔識嘅，可能透過網絡約埋一齊嚟呢度「拼檯」。亦都只有有咁上下實力嘅餐廳先可以令人諗到如此辦法。

想食坤記，就要做好「即使有訂位都要排」嘅準備。在熱s辣辣嘅初夏，在無乜人打煲，加埋我哋有訂位，再加埋我哋早到，而最重要係我哋RP好咁多因素drive下，是日僅僅等咗十零分鐘就入座！✌️坤記嘅精髓在於火候，無論煎，焗，煮都掌握得恰到好處。炭爐煲仔飯是招牌，米嘅生熟度做到啱啱好，食落口感唔會霖唔會硬，不得不佩服廚的功力。臘腸是必點，肥瘦相宜得嚟又不會太咸。煲仔飯嘅另一靈魂是豉油，坤記當然有它的獨門秘方。豉油是特製的，結結哋，望落有啲似新加坡豉油，好香好夠味。食時應該先將飯刮起，再一邊淋豉油一邊攪勻，而唔係好似傳統食法咁將豉油由側邊淋落，結果令到側邊啲米霖曬，影響口感。可能個煲事先搽咗油，飯焦仲好容易刮落，喜食飯焦的你一定不能錯過。相比起紹華，坤記用普通米都可以做到殿堂級嘅出品，實至名歸，沒有之一。