去食個lunch，入到去得一枱客（全程都係得3枱），生意有「幾好」你都知啦🙄 坐低，午餐選擇幾多，價錢亦合理， 叫咗個腩肉蒸陳村粉，配湯，小食，點心， 先嚟個湯同小食，味道唔錯 再等咗陣，上埋主食同點心， 戲肉嚟了… 我叫嘅係陳村粉，嚟到嘅卻是蒸飯， 我同姐姐講話叫咗陳村粉，佢愕然咗一下，然後同我講「無陳村粉」 🔥都嚟！ 我話「無嘅話你做乜唔一早同我講」 好明顯係想用佢啲低下手段焗我食碟飯， 就算真係無陳村粉，你都應該蒸之前問下我要唔要飯先，係米？！ 之後姐姐反應仲好笑，佢話「張單唔係我落嘅！你做乜攞我嚟出氣！」跟住同我吵！ 好笑，我連你哋咩樣都唔會認得到，我攞你出氣做乜嘢jeh？你會唔會太高估你自己？ 宜家個問題係，你哋有人落錯單，上錯嘢，唔認不單止，仲要焗個客硬食！！！ 之後有另一個姐姐出嚟話係自己落錯，話可以換畀我。即係認有陳村粉啦。 食餐飯都要咁勞氣，本身仲諗住叫多幾樣小食，不了。銅鑼灣大把選擇，無下次。 之後喺openrice亦見到其他苦主喺呢間店不愉快嘅經歷，因此我覺得我有責任寫返今次事件出嚟，等其他foodie有前車之鑑，慎入間店，避免中伏。

以前睇美食推介見過新南苑嘅介紹，對佢嘅雞煲心心念。今日終於有機會，但非常失望。 先講個雞煲，落油炸鬼的卻係幾特別。但個汁食唔出同出邊嗰啲有乜分別。而且煲嘢好乾，配菜亦唔多。成煲嘢我只能講非常普通。 再嚟海鮮打邊爐，海鮮尚算新鮮，但絕對不是靚嘢。鮑魚好細隻，同前兩日喺其他平價海鮮邊爐舖食嘅爭好遠。 其他火鍋配料，牛係幾好食，但只有一碟。其他任食配料選擇非常少，連最cheap嘅美國肥牛都無。啲貨亦都是普通貨。 飲品方面多韓國飲品，有啲自家製涼茶。都算OK豐富。 間嘢最難頂嘅係服務。肆應基本上嚟講都係無禮貌的。上菜亂咁擺，唔會理你生定熟。中途有位阿叔上菜時，一手丢開我擺喺枱面包濕紙巾，仲話「拎開呢啲無謂嘢」。我當場O嗮嘴。本來任食選擇都唔多，第二次落單叫咗四樣嘢，只有響鈴同蟹柳嚟咗，豬腩同番茄就無嚟。今時今日仲耍埋啲舊式昆客手法，真係好out兼令人反感。 埋單每人$248。個價錢去某心火鍋可以食得好過佢幾條街。 極度失望。返嚟即刻將呢間嘢從收藏列表tick除，忘記它吧。

間嘢好低調，如果唔係見到E App做promote都唔覺有間咁嘅嘢。 Order咗兩個牛蛋包飯，一個流心一個regular。睇之前嘅評論，想像中嘅流心係溏心蛋爆漿嗰隻，點知上到嚟係類似炒滑蛋嗰隻。有少少失望，畢竟流心要加$22。 整體嚟講味道幾天然，唔會太鹹或者重味精味。自家製幾溫馨嘅感覺。中午好少人，肆應都叫做有禮貌，正正常常。 今次有半價優惠，埋單每人約$100，都算性價比正常。但如果正價嚟食會覺得有啲貴。

朋友話間嘢好食，咁一行多人就嚟試下啦。早到咗，第一次嚟，同門口資客傾咗幾句，了解下間嘢咩玩法。當時姐姐都幾有心機解答我問題，第一印象不錯。跟住入座食嘢，超多嘢食，啲海鮮都新鮮。成個過程都覺得幾開心。雖然有時叫肆應要叫幾次先有人覆，但你畀$200呢個價錢，都明嘅。
好喇，到最後煮粥，一位金髮女肆應過嚟幫我哋煮。我見佢撈嗮啲嘢上嚟，第一次食嘅我好奇問咗句點解要咁做，金髮好「掘」咁話「公司要求咁做，我都係跟公司指引，你可要求唔撈，咁你撈定唔撈？！」個語氣非常串，好似有種「講咁多嘢嘥我時間」嘅感覺。我費事同佢吵，忍住話咁你照做。我哋有兩兜粥，一兜要芫西一兜唔要。佢做完要芫西嗰兜，就叫我哋換另一煲出嚟畀佢整。咁我多口提醒句「呢兜係無元西嘅wor」，金髮即刻語氣好差咁隊我「咁你唔攞嗰煲出嚟我點整啊！」我終於忍唔住，大聲少少回佢一句「整啦」，佢即刻丟低啲嘢，話「我搵其他人幫你」。就算第二位同事嚟到，亦無話唔好意思，一開始仲要話「邊位同事？我睇唔到wor」。其實成件事好細，但成餐飯好哋哋，係都要臨尾香，真係多得呢位金髮同事。相信如果佢繼續喺度，只會有更多類似事件發生。亦多得呢位同事，我係一定唔會再返去佐敦店食啦，真係唔該嗮！

之前喺度食過一次，亦都試過大坑小川屋嘅出品，印象中味道OK，今日中午走嚟食個午餐。點知畀肆應激到一肚氣！！！ 話說間嘢午市本來就無乜人，我一點多啲上到去都係得三枱客。入到去肆應隨手點咗我去角落一張枱。因為個位好暗，我坐咗去隔離張枱，即兩張二人枱中間。肆應見到，態度非常惡劣地「勒令」我坐去對面兩張四人枱中間嘅一張二人枱。嗰兩張四人枱當時係坐滿的，我見好逼，就話唔想再逼入去。肆應好唔高興，幾乎係「鬧」咁制，堅持要我坐去嗰個位！仲口口聲聲話我呢張枱要留返有四人客嚟嗰陣拼枱wor！呢位阿姐真係好想像，人都唔多個，仲喺度想像四人枱滿座！ 結果我當然係即刻走。之後仲聽到肆應喺背後大聲鬧我「痴線」。講真，銅鑼灣大把嘢食，少你一間又如何？你繼續咁嘅態度趕客啦。早唔望你趕走嗮啲客折埋失業添啊！ 真心希望間嘢嘅老闆可以見到呢段嘢，好好整頓下服務，整頓下啲趕客嘅員工。

期待咗呢間舖好耐，都預咗佢會比大陸貴，所以都照去試。 中午時段嚟，原本以為會好似大陸咁排長龍，早早book咗枱。點知嚟到竟然見坐唔滿。當下已經諗係米有啲伏伏哋... 先講佢個環境。裝修得唔錯，好過大陸啲串串舖好多。不過佢個設計係有問題：間舖中間有一棟矮牆將舖分成兩個區域，我哋坐喺靠門口（lift）呢邊。串串擺喺入邊（靠窗）。兩個區域只可以喺矮牆嘅兩邊通過，中間係行唔到嘅。即係話我哋要去攞串串一定要經過收銀枱，而收銀枱通常有好多人逼喺度稱串串啊，畀錢啊之類（而且唔知點解佢哋服務員好鍾意聚集喺收銀附近）。每次行過都好似喺樓下行緊街咁，非常唔方便，尤其係當你捧住一盤嘢嗰陣。 再講佢啲服務。內地嘅餐廳，除咗海底撈，你都唔會expect佢啲服務好得去邊。雖然係咁，都唔代表你啲服務員可以喺度行行企企，見你唔到，加嘢漏單。我哋都唔知係咪唔好彩，樣樣試齊。 跟住就食嘢啦。叫咗菇菌鴛鴦。辣嗰邊都幾油幾辣，係幾正宗，而且辣鍋越煮越辣。菇菌嗰邊就一般，正常。原本我哋想食啲串串又叫啲打邊爐嘅嘢，點知個服務員自己無落單都唔知。鑑於時間關係，唯有齋食串串。招牌小郡肝係幾好味，爽滑。香菜牛肉同包住舊辣椒嗰隻牛肉都幾好。其他就一般般啦。 食完稱簽。75/100g。平時都無乜概念，點知我哋兩個人齋串串就食咗$450！再加埋湯底，茶水，調味料，計計埋要$75x！八折咗都要實收$605！哇！真心接受唔到lor。呢個價錢，都夠三個人喺海底撈食個lunch啦，何況我哋兩個女仔都未係食得飽。 總結嚟講，咁嘅價錢同服務，真係未必會再嚟。

新開的店舖，細細間但幾好feel，裝修同菜牌都幾有心思。唔似傳統韓式餐廳，你喺度搵唔到泡菜炸🐔韓燒，反而有特別的韓式燒餅同Pizza。食物多數不辣，結合西式手法，出嚟嘅效果幾特別。我哋得兩個人，叫咗個芝士pizza，韓式魚蛋再加兩罐韓式飲品。已經非常足夠。pizza嘅cheese落得非常足，拉絲效果盡現，好滿足！韓式魚蛋嘅湯做得幾好，鮮味不搶喉。下次可叫多啲朋友嚟試多幾樣餸。 招牌熔岩芝士pizza 韓式魚蛋 韓式飲品

提早兩日打嚟訂位，姐姐話可以訂，但嚟到如果full jor都要等一等，即係訂咗可能都要等一張枱。體諒佢係小店，算啦，應承咗。

是日嚟到，係好多人，場面混亂。我主動行入鋪頭，同收銀姐姐話訂咗枱，佢忙住收錢，一開始叫我等等，但佢收咗幾張單都仲未理我。我主動再提佢，佢態度好惡劣咁話「過咗時間wor，你要重新等。」「即係話當walk-in啊？」「係啊！等10張枱！」

我聽到即時扯火，咁訂咗枱同無訂有咩分別？如果你係唔接受訂位，又唔早講？！家陣扮有得訂嚟到又話你過咗鐘係咩玩法！

雖然呢間嘢係出名，我都一定唔會去，亦會叫朋友都唔好去。香港地大把好嘢食，唔需要嚟呢度乞食！想嚟嘅朋友請三思！

大坑向嚟潮嘢多，今次就有呢間“盡食”雪糕店。

所謂"盡食“，就係唔單止雪糕食得，連個杯同紙都可以食埋，夠曬環保。

新店開張，自然招人氣。第一次夜晚7點拜訪，店鋪已經落閘。第二次學精了，先打電話去鋪頭，確認有貨先過嚟。作為飯後甜品，唔想太漏，揀咗藍色嘅（好似係乳酪）雪糕。造型非常可愛，尤其係粒大大嘅棉花糖，相機已經迫不及待要食先! 雪糕奶味唔算濃郁，少少酸酸哋，質地較稀，好容易溶，一定要快食。店鋪提供可以食及唔可以食嘅杯同紙，落單時告知店員即可。既然呢度嘅招牌就係可以食嘅杯同紙，梗係揀可食喇。可食杯係曲奇餅，紙係米紙。食咗幾啖，就發現個曲奇杯係一個錯誤嘅選擇。甜，過甜，完全蓋過其他一切味道。本來雪糕嘅味道就清淡，搭上呢個一味甜嘅曲奇杯，正所謂”妹仔大過主人婆“。如此甜膩嘅曲奇杯，食過幾啖之後便慘遭丟棄。同時發現垃圾桶內同樣有其他未食完嘅曲奇杯...

甜品是art，睇得出店主深諳此道。甜品嘅本質係食物，如何做到味道，賣相同創意之間嘅平衡，that's the question.

如今的東大街，食肆林立。今次過嚟嘅主要目標喺近期被推介嘅小食 - 無骨雞翼。但雞翼不能當正餐，所以要搵間餐廳正正經經食個飯先。

本來想去粥棧小廚，無奈佢生意太好，full book。見太爺雞仲未係好多人，遂坐低。

舊式酒樓風格。雖然我哋坐低時全場仲有一半位吉住，姐姐都係好有禮貌咁安排我哋同另外兩位客人搭枱，笑盈盈地解釋話“禮拜五晚，體諒下”。

對面搭枱嘅兩位客人似乎頗熟路，一坐低就即刻order半隻太爺雞。我哋亦效仿。傳統中式酒樓嘅份量通常比較大，我哋二人亦唔敢叫太多，驚會浪費，半隻太爺雞 + 一碟蒸勝瓜，搞掂。太爺雞嘅賣相都唔錯。醬汁應該係自己調製嘅，味道特別，仲食到陣陣陳皮香。其實齋醬汁已夠，薑蔥完全係多餘。

至於喺香港食到嘅雞，你不能要求太多。

蒸勝瓜賣相同我想象中有出入。呢度係將勝瓜切片，然後將所有材料 - 蝦米，粉絲，勝瓜撈埋一齊蒸。上碟時一片狼藉，所以無影佢張相，費事影響各位食家對呢道鎹嘅印象。勝在味道都OK。做法同味道都跟足傳統法則 - 多油先好味。

埋單後姐姐俾返找續。我照舊攞返所有嘅找續，諗住已經加一，無需再多俾服務費。姐姐似乎三番四次想收回找續皮夾，好在我手快。走出店鋪，先知原來間鋪係無收加一。唔怪得姐姐啱先不斷想收返啲散紙喇。既然係咁，我就俾低約10%嘅錢喺門口個tips箱。只是有點奇怪點解佢哋要咁做。

可能真係生意難做吧。傳統酒樓業喺香港日漸式微，鋪租貴，運營複雜，工作時間長，仲邊有人願意做？取而代之嘅係遍地開花嘅甜品鋪同雪糕店。

OK。今日，我都算支持咗一次傳統行業，心安。