連續吃了兩個多月A餐, 今日轉轉口味, 試埋個D餐: 南冰魚柳拼雙蛋餐先說等候時間, 相比起A餐, 這次我等了約5分鐘, 起初我覺得太耐了, 但吃完後知道這5分鐘是大有原因的, 容後再表當靚女服務員把這份南冰魚柳拼雙蛋餐送到我面前時, 我第一個感覺是份量十足 (請看相片), 我之前在大X樂吃過同樣的餐, 但這裡的那塊魚柳足足比大X樂的大一倍咁滯我馬上切一小塊吃, 一擺入口, 嘩! 熱到吖! 應該是即叫即炸的, 比起一般連鎖式快餐店那些一早炸定, 然後放在個暖櫃裡保暖的出品完全是兩回事.那些快餐店出品由於已炸了很久, 所以放在暖櫃只可保存其熱度, 但成舊魚就軟哂. 相對而言, 這裡的炸魚真的外脆內軟, 拼炒蛋吃, 一流, 而且熱到飛起, 冇可能一放入口即刻可吞下, 所以奉勸趕時間或泊咗架車喺出面的人士就不要吃了我估計大家貨源應該差不多, 但烹調和處理手法, 就高下立見了. 因此, 要等成五分幾鐘至收到貨, 實在是有原因的繼上次A餐點數嬴翠X後, 這份定價為HK$27之D餐, 計埋味道, 價錢, 直接K.O 大X樂啦!

兩個月前偶然經過街口, 看見一間新開的茶餐廳, 名叫 紅磡冰室, 個名就夠剎食嘞, 夠膽用成個區來改名, 咁大口氣吓話! 好! 我就姑且入去試一試. 誰知不試尤自可, 一試竟上了癮這店地方不大, 五十個座位左右啦, 我是早上時段光顧的, 大約9時, 但門口已有幾個人在等位了. 我等了五分鐘就有位了看看Menu, 典型茶仔款式: A-F餐, 我點了A餐: 鮑魚絲火腿通粉, 煎雙蛋, 牛油方包, 熱飲出貨速度都算快, 只兩分鐘就把一碟鮑魚絲火腿通粉送到我面前, 先呷一口湯, 熱度適中, 味道很好, 而且似曾相識…… 對! 很像翠X 的味道, 好味!未吃完通粉, 煎雙蛋已經送到桌面, 這份煎雙蛋的水準超高, 蛋黃水旺旺, 蛋邊完全唔燶, 當下已搶先把它吃掉, 一流!那杯凍奶茶又是水準之上, 茶奶比例適中, 但由於我不嗜甜, 感覺甜了些, 所以之後我都order 少甜, 下次試埋佢地個咖啡先由於她們的蛋實在太出色了, 所以我再叫多份蛋牛治吃, 這份蛋牛治夠哂份量, 足有寸半厚, 雞蛋份量充足, 我估足有兩隻蛋份量, 跟咸牛肉混和一起, 又一水準之作, 我個人覺得好食過 澳X牛奶呢, 價錢亦不貴, 只$16一客總體來說, 我感覺到這間茶餐廳的老闆是很有誠意去攪好檔嘢的, 原因她收的價錢實在是相當合理的, 但卻俾足料你嘆, 就以那個早餐A餐為例, 份量和質量跟翠X的幾乎一樣, 但她們只賣$23 / 客, 比翠X平了足足 $8, 小數怕長計, 我未幫襯她們之前是翠X的Fans, 但這兩個月來我改為幫襯這間紅磡冰室, 享受到同樣質素的早餐, 卻總共慳了四百多元 ($8 x 60 days), 所以我繼續幫襯至今呢然而, 她們亦可改善之處, 第一, 就是座位太密, 如座椅放鬆動些就可坐得舒服些. 其次, 就是那兩架電視機吊得太高了, 個頭要擔到好高才可看到, 尤甚朝早睇財經新聞時D 股價, 如掛低些就好了 

味皇……年多前幫襯過幾次, 貪其舖頭內有部大電視, 可一邊食, 一邊睇新聞; 當時食物水準一般, 沒甚麼特別深刻之印象.

今晚, 忽然想食海南雞飯, 第一時間諗起味皇那份無骨海南雞飯, 所以馬上撘了三十大元的士去位於尖沙咀漆咸道哪家分店

當時大約晚上十一點, 店內祇得兩台客. 我坐在電視機前哪張台, 不用看餐牌便立即點了一客無骨海南雞飯套餐

不消三分鐘, 服務員把整客套餐送上, 內含無骨海南雞一碟, 雞油飯一碗, 油菜一碟, 例水一碗, 加上凍奶茶一杯 (凍飲加$4)

先說碟雞, 賣相勉強合格, 但一入口, 已明顯吃出是雪藏雞貨色, 沒法子, 要吃新鮮雞, 唯有返大陸; 不是他的錯

到碗油飯嘞, 四個字, “不知所謂”! 話明油飯, 但成碗飯乾爭爭 (你睇張相吖,雖則開住閃光燈來影, 但 D飯粒完全冇反光, 可想而知有幾乾), 而且又凍又硬, 好似隔夜冷飯咁, 完全FEEL 唔到有雞油味!

碗飯咁乾, 諗住飲啖湯濕吓個咀, 再食過吖, 點知碗湯仲不堪, 仲凍過碗飯, 而且淡而無味, 都唔知前前後後溝水翻滾過幾多次! 五個字, “ 更不知所謂”!

油菜份量就夠, 但D生菜淥得太耐了

凍奶茶, 一般茶仔水準, 但凍飲加四蚊就貴咗D

Overall 來講, 埋單$66 食D咁嘅嘢, 完全不合格 !!

數年前已聽聞紅磡都會海逸酒店 Promenade 西餐廳之自助餐質素奇高, 所有特別提早兩個星期訂座, 慕名一試其美食; 誰知不試由自可, 一試把幾火.

以下簡述我們一家四口, 合共花費 HK$1,900 所享受到之美食和服務:

1. SAHIMI:
我們大約晚上七時到達, 攞位後, 我馬上第一時間飛撲去魚生檔; 當時大概有七至八人在排隊 (我其實相當討厭要排隊攞嘢食, 個感覺很差,個個揸住隻碟, 排哂隊等配給咁, 就好似二三十年代, 在三角碼頭D搬運工人午飯時間, 排隊輪候午餐咁. 大佬呀! 呢度係廿一世紀的五星級酒店呀! 唔係三角碼頭呀!)

排了五六分鐘終於輪到我了, 魚生師傅問我要乜, 我說要三文魚,和墨魚, 當下他分配了各3片給我, 經我哀求之下, 再施捨多3片我. 拿拿臨返回座位食. 一擺入口, 嘩! D肉梅嘅, 仲衰過喺大陸食嗰D. 味道唔掂, 賣相如何呀? 不說了, 自然睇相啦!

2. 清蒸海上鮮
一出來五分鐘唔使, 成條海上鮮冇咗! 等了十多分鐘, 才見第二條游過來. 當下馬上拿著大匙更挖一兩忽試試, 嘩! 嗰條所謂海上鮮, 我覺得D肉好似潮州打冷嗰條大眼雞! 都唔知條魚係蒸出來還是煲出來的?!

3. 燒味
水準一般

4. 串燒 + PIZZA
唉! 唔識講, 睇相啦

5.長腳蟹
肉質一般, 但我就食唔出這裡的長腳蟹和潮州凍蟹有咩分別囉!

6.天婦羅
如果你沒有在日式炸物專門店食過正宗之TEMPURA, 哪麼你就或者會接受到這裡的所謂TEMPURA

7.其他
質素如何, 大家睇相啦:

8.甜品
全場最精彩的一道, 尤其雪糕, 我至Like 的 HAAGEN DAZZ , 仲係流心嗰隻

服務方面, 雖則個個侍應及經理都好落力和有禮貌, 但明顯人手不足, 吃完一 round, 等了十多二十分鐘也沒有人來收碟, 高峄時, 我試試過3隻碟疊住來食!

總括而言, 以每位約HK$500的價錢, 8個字: “名過其實, 物非所值” 下次一定不會再幫襯!