一行6人提前做冬，6點開餐，限90分鐘。 食物水準無驚喜，因食過幾次，反而有點下降普寧炸豆腐無味，淡淡淡。鹵水拼盤啲豆腐，咸咸咸。其他就一般般但服務就真係垃圾到無輪每次見有客，個個胖經理就不停大大聲講，限時個半鐘，乜而家好多客咩？用餐時，我隻手［浪］喺張吉櫈度，有個四眼阿叔無聲無息咁，忽然抽走我張櫈，令我呆一呆於是向胖經理投訴，點知佢就皮笑肉不笑咁‘‘多謝教導，我會同佢講架啦！’，令人驚訝可以假成咁。唔怪得啲人都上晒大陸，香港啲食店貴又難食仲要受氣，咁點解要幫襯？希望呢間早啲執成晚聽得最多係‘‘同佢講得個半鐘用餐’’賣單走人時，成間鋪得7成滿，貪心想做多幾輪，做到兩輪當你贏

同家人行完工展會，餓餓地，就喺銅鑼灣搵野食，見到有間維港冰室夠多人，伏極有限。入到去，職員幾有禮貌咁安排左細枱。睇左餐牌，揀左炸魚柳配薯角同星洲炒米，等左唔洗十分鐘就上菜，先上魚柳有驚喜，炸魚柳好大塊，薯角份量足，又有沙律菜，比好多餐廳好，食落知係即做，唔係做定嘅。轉頭上埋星米，呢個就唔合格，油多色差唔乾身，但配料足，味道唔得，食唔晒。呢度啲職員都有禮，唔會黑口黑面，加上食物水準可以，但中餐就要改進吓先得。總體西式餐有水準抵食，中餐就可以唔諗。

第一次幫襯，星期五怕人多，訂早場，1645上到話可開波。職員安排坐蝦缸邊，工作人員問黎過都？未，佢細心講點燒會安全啲，幾細心。入坐每人一串厚切鰻魚（好食）。 行個圈睇吓有咩食？有好多串燒串（無只食三兩串，味道還可），海鮮種類就不少，雖然都係冰鮮，但睇落唔錯，又有一啲小食，估唔到竟有街邊滷水尤魚豬利生肥，幾攪野但間野重點遊水大頭蝦，望吓個缸啲蝦都算大隻，落手捉幾隻試吓，燒好入口，多膏彈牙，蝦種問題，所以蝦味唔特別重。（燒左兩個幾鐘，唔見加個蝦，所以缸內剩抵啲蝦幾細隻）。再試幾重冰鮮，燒鮑魚生蠔黃魚，幾好，食左唔少蟹就差啲，唔彈霉霉地。要讚係職幾細，一見攞鮑魚，就過來幫剪開，話鮑魚內臟內自爆，所有幫剪開總括黎講，4舊可以燒150分鐘海鮮（冰鮮），算抵食。會再來

荔枝角做野，晚餐時間，無咩好揀，行過呢間咪入去試試。餐廳內環境不差，夠光夠大，幫我落單個阿叔態度唔錯，感覺不俗。點左個西冷扒及吉豬烏冬，上餐幾快。吉豬幾大塊，湯底偏甜，烏冬淋左啲。西冷上枱，size ok，切開約7成熟，唔太過火。食落牛味弱，多根，好一般，羅宋好咸。兩個餐只有一個可取，無乜梳打粉味。用餐感覺一般。有偷望隔離枱啲中餐，碟頭幾大，唔知得唔得，下次行過，可以俾多次機會試試。

同個fd食生日午餐，因嗰陣未開放晚市堂食。準時於預定時間入位，眼見全場人數唔多（平日），安排窗口位，滿意 坐好全力開動點野食，點左成枱野，上枱速度快。第一輪啲牛幾好，牛脷，封門柳，牛板健，安格斯都唔錯但覺肉質有少少乾，可能人客唔多，肉放耐左啲。第一輪要讚牛脷，有咬口，有淡淡牛味，唔韌，封門柳牛板健都好味，最差係鴨血，似雞血，唔好味。但之後加點嘅野就唔多掂，品質下降，牛脷韌，無味最離譜係封門柳，色水暗紅，肉乾，無味唔通呢啲係放題通病? 飲品多選擇，最愛自家制飲品，尤其係洛神花，酸甜酸甜，好飲但....再攞話無晒！問會否refill？答案係NO其他飲品就滿滿，眼見全場只坐2，3成人，竟唔補！唔係掛。 呢間同旺角分店都食過，食完會想再食，但今次後就唔會等登黎食，除非無咩選擇，雖然訂位很難

一行兩人食午餐，地方不大，一般韓式燒肉裝修。衛生麻麻，張櫈有油漬。坐位近窗，但見到幾油膩，唔敢靠太近，衛生情況要多多改善。 食物都係一般般，但上菜速度快，點完幾分鐘就上枱。第一輪牛舌好食，有咬口，有牛味，但encore就完全唔掂，韌過橡根。燒蠔size細隻，唔新鮮豬腩肉幾好，有油香，滋味，但唔敢食太多其他肉類都一般，沒特別好。韓式冷面要較凍先過癮，但呢度啲面只能叫涼面，唔夠凍，所以不合格。但要讚係職員，有禮貌，又會主動換鐵板。

有一斷時間無食日式放題，忽然想食，早兩日訂定位去食早場17:30只係$190+10%。
17:20到場已發現唔少人食緊，唔洗等安排入場，坐位有D迫，但可接受。
開波叫一輪魚生，壽司，燒物等。
上菜速度快，擺盤唔錯，份量合理。
食物質素唔差:
魚生: 質素幾好，夠大片，唔小家，味道算新鮮。 燒物: 銀雪魚好味，牛舌一般，但有牛味，叫左5串，只一串軟硬適中。 壽司: 總體可以。
天婦羅: 好食。 最估唔到有一樣中式野食--醉鮑魚，好好食，一定要食，食左好多隻。 還有呢度D飲品好多選擇，比其他放題多好多，茶啤酒汽水乜都有。 要讚呢度D侍應，收碟好快。態度唔差。 有時間會和家人再黎。

夜晚十點幾, 禮頓道冇咩好食,入去麥奀雲吞麵世家食碗面!
叫左傳統雲吞面，一杯豆漿。

好細碗，雲吞細細粒放在面底下，傳統，雲吞有蝦，咦，點解只有蝦沒食到豬肉，咁同佢地另一鮮蝦雲面有什麼分別？
但Ｄ蝦幾鮮有彈性，一定好過好多雲吞店，湯底甜好味但偏咸，面不錯夠硬身，但鹼水味太重。
三四啖食完，食左都唔覺飽，真係精品面食。

賣單＄４８，老實講貴左Ｄ，冇左香港地道平民小食既傳統！

好耐沒去九龍城, 今天去行街拍拖, 多左好多新樓, 不變是食店,舊式小店一樣多, 但我鍾意, 有香港味!
泰菜日本菜咩都有, 但天是去一間聽了很久,但從未去過的"清真牛肉館", 本來是去總店, 但太多人等位, 咁很去分店睇睇, 哈,不用等位,正!

店地方不小, 好像還有二樓, 舊式裝修, 但咁先好, 唔會因裝修靚而影響價錢和食物質素!
兩個人點左牛肉餅, 咖哩羊腩飯,牛肉水餃,炸銀絲卷。

先來咖哩羊腩飯，分碟上，好，咖哩微辣有香味，羊腩份量不少不太"蘇"，但我愛"蘇"！
但羊肉不夠"淋"，要用ｄ牙力！汁好正，我留來沾銀絲卷食！

牛肉餅上場，feel到熱氣，Ｄ人話好多汁要小心，細細啖咬落去，"嘩"好多汁好熱! 熱死我啦!
D汁由側面噴出，噴到隻手，６死我啦！　有牛肉味，汁濃，咸左少少，好食！

最後牛肉水餃，都有肉汁，不錯！

會再同家人來試其他食物！

是日跟同事聚會, 一行5人, book左位唔洗等!
開動引擎, 大點特點, 魚生走不了!
魚生上場, 造型不錯, 夠大堆頭!食落算新鮮, 夠大塊, 唔似旺角D放提咩都細細塊, 小家到死!
欣賞三文魚, 劍魚, 蝦!
前後追加3 round! 天婦羅熱辣辣唔錯, 用料不俗! 幾好味, 不過怕熱氣只追加一輪!
還點了很多食物, 一般般, 沒大驚喜。
一讚的是食品選擇幾多, 合適不同口味的人!
彈的是坐位幾迫, 位同位很近, 所以幾嘈下! 同埋部份侍應態度麻麻!(因餐中有來電, 太嘈走去未有人的位置,有一女侍應不停問我做咩? 當看見我在打電中, 竟拋出一句"車! 打電話咋話"! 態度差! 公司應對D侍應再教育!

埋單連加一, 每人$250, 不算貴!