海老名沾麵 (長沙灣)

朋友介紹長沙灣新開咗間沾麵嘅舖，相約朋友試下呢間，夜晚八點半左右去到時大約5-6人排緊隊，朋友又未到，於是玩住手機慢慢等，排咗一陣店員出來問每位食客幾多位，及派張單加支筆先寫單，
等埋朋友差唔多九點先入去，幾乎做咗當日最後嘅食客喇，其實張單選擇不多，三款麵我同朋友都選咗最基本嘅蝦汁醬油沾麵。

內部環境其實一眼睇晒，坐位大約十二個左右，三位師父就為食客煮麵等事宜，外面就一位店員負責客人其他需要，
我地落完單就再等，師父都會用個磅去磅下啲未煮嘅麵，等咗大約十分鐘，
就送上熱騰騰嘅沾麵，有碗麵、湯、同紫菜及脆嘅粒粒，
湯裡有叉燒同半熟蛋，

先將一注麵夾入濃湯裡浸一下，濃湯裡有櫻花蝦，蝦肉，筍條等等，沾上濃濃的湯就品嚐一下麵，鹹味剛剛好，再食半熟蛋味道也不俗，美中不足是湯汁偏油，咬一口叉燒
肥瘦適中，而且軟靭也剛好，肉味濃，個人覺得整個麵最好味就係依個叉燒，枱上有拌麵食嘅三種調味，分別有七味粉、芥辣檸檬汁、櫻花蝦醋，分別都試來拌麵一起食下，個人覺得七味粉普通，芥辣檸檬汁有驚喜，櫻花蝦醋也不錯的
可能覺得湯味已經夠濃，最後都係沾完濃湯就食，食完晒麵可以要求加湯落濃湯中開稀飲埋啲湯，喝了幾口感覺還是有點油膩，最後選擇放棄。
總括嚟講，湯味濃，麵也好食，叉燒一流，坐位比較狹窄，基本麵餐份量較少，要食得飽建議加麵底及其他配菜。

波記燒臘粉麵店 (西環)

其實幫襯過這店舖很多次，由舊舖食到現在新舖位，該是時候幫這店寫個食評吧！
平時想來吃燒味，午飯時間都會滿坐，由於工作繁忙晏咗食飯有時候也有好處就是可以食得舒適，去到舖頭都唔洗等位，直接搵個位就坐下來，本來想叫個叉鵝髀飯，但鵝賣晒，只好換成叉鴨髀飯多色！
舖面面積不大，落咗單食乜就可看到斬燒味嘅師父即刻手起刀落，一分鐘唔洗就送上叉鴨髀飯，無論食燒鵝或鴨，酸梅醬是不可少的，於是要侍應拿個酸梅醬，食一口燒鴨髀，此間無論燒鵝燒鴨都是高水準的，鴨皮充滿油甘香，薄薄一層皮下脂肪，而肉有汁又入味，叉燒肥瘦適中，很有蜜汁味，少少燶邊，上佳叉燒就是這樣，白飯粒粒分明不會糊，可能我喜歡硬飯吧，很合我個人口味！
除咗燒鵝、鴨、叉燒，之前有吃過切雞、油雞、燒肉等等，所有燒味都是佳作，一直也保持到水準，以後還是會繼續光臨的心水食肆！

吉豚屋吉列豬扒專門店 (元朗)

又到醫肚時間，心裡一閃吉列豬扒。
想食吉列豬扒又想便宜實惠，個人首選吉豚屋，貪他品質好價錢又合理。
去到元朗此分店，雖然已經過咗正常午飯時間（大約下午3-4點），但門口等候人數也不算少，還是馬上拎籌等等吧！
等候約十分鐘左右就有位安排，打開餐牌其實心裡已經有預定想食吉列蝦同豬扒，都唔洗諗咁多，馬上找侍應落單。
等咗約十分鐘，吉列炸蝦豬扒定食來了！
吉列豬扒入口鬆脆，豬扒唔會靭，麵包糠亦唔會油膩，配上豬扒醬汁少少酸甜味道，好吃到不能停下來，吉列蝦都很大隻，同樣麵包糠炸得鬆脆酥香，配以沙律醬及檸檬汁同吃簡直完美，當然墊底的椰菜絲配上一點麻醬吃也有去油膩感之效，白飯是珍珠米也是絕配啦！還有喝一口足料嘅味噌湯，內有豬肉片、紅蘿蔔等等。
滿足又簡單的一餐，還會再來幫襯的！

Tom Bar & Grill (沙田)

工作關係，要到科學園附近，上午做完嘢已經１２點左右，於是同同事到科學園順便食完個午餐先返公司繼續工作

可能係１２點左右已經到尚算早，只有幾檯有客人，位置基本上任我們挑選，坐近門口位置可以看到吐露港對出風景，這種才算是心曠神怡

打開餐牌，價錢是偏貴的，但這樣的地理環境卻是合理

同事選擇了炒飯，而我選海南雞飯

落單不久就有餐湯法包送上，湯是南瓜湯喝下去味道不錯，充滿南瓜香味

湯喝一大半海南雞飯就送上，當然快快喝完湯馬上品嚐海南雞，先吃一口雞油飯，入口不算油，有黃薑味，再吃一件雞，雞很滑很嫩，非常對味，配上薑蓉和酸辣汁，很快就ＫＯ了整碟飯，餐飲選了熱檸茶作為一餐的總結

心燒食堂 (銅鑼灣)

一班好朋友聚聚, 朋友提議試呢間日本串燒店, 當天中午book位, 5位食晚上7:30, 廢話不多講, 馬上寫食評:鵝肝多士, 鵝肝很香很脆配上多士吸收肝油精華, 全晚最好味的一道, 只是怕膽固醇的我淺淺嚐炸雞, 炸得香酥內軟, 還配上有芥辣味道的甜酸醬, 份外惹味

牛肉餅, 配上日式炸豬扒醬, 牛肉香口, 份量也是滿足雞腎, 感覺一般普通豚肉棒, 肉質很嫩滑, 也是推介燒蠔, 有少少腥, 失分之作心燒一口蝦, 蝦肉彈又鮮, 味道不俗黑松露炒飯, 米粒分明, 松露味道不算突出, 但味道尚可燒白鱔, 外香脆內juicy, 值得推介給唔介意食慣細刺魚的朋友炒雜菌, 水準正常, 味道也是不錯的墨魚餅, 夠厚, 外面炸得很香酥, 內裡墨魚很彈牙, 強烈推薦炸脆皮芝士蛋糕, 炸的甜品, 入口很特別, 有芝士濃香炸一口心太軟, 這個比芝士蛋糕更好味, 入口先是脆, 再來的濃濃的朱古力醬溶入口中

總結食物多是水準之作, 環境良好, 燈光昏暗浪漫, 侍應服務細心