香港老飯店 (尖沙咀)

係上海菜之中，香港老飯店係永遠都可以保持到水準，無論幾時去食，都可以食到美味既上海菜。今次去食，又可以食到我最想食既：薰蛋、鹽水鴨、賽螃蟹、蒸素餃、百頁紅燒肉同埋炸銀絲卷。

我到而家都未食到有一家既薰蛋係好食得過呢家，好多都係無煙薰既味道，淨係糖心蛋，呢家真係有架！鹽水鴨係好少人去食，因為唔多出色麻，不過天氣熱又無胃口既話，呢個比起粉皮係仲好食ｄ架，起碼你唔會覺得個油膩麻。

賽螃蟹係住家好少可以整到既，所以次次都會叫，係大家都好鐘意既菜式之一，呢家當然唔會令人失望啦！有紅燒肉就自然有野去送，廣東菜就一定要叫碗飯黎送，上海菜就一定係麵或者銀絲卷。紅燒肉係一個家庭必食既餸，超好味，ｄ百頁索晒味，真係好食，再加埋一個食極都唔厭既素餃，呢餐真係食得開心。

你地唔好睇呢D餸好似好common，到到都食到，最起碼我仲未整得到好似佢咁好食～你睇下我到而家都仲未寫過呢幾味餸既食譜，你就明點解我仲要出去食啦～

和幸小料理 (銅鑼灣)

好多朋友都係去和幸食烤肉，今次我同朋友去和幸食小料理（即係唔係烤肉囉～）！兩個人其實都唔係肚餓，所以都係叫左兩個套餐，大家一齊食，咁可以一齊試到兩個餐ｄ野食麻。

一個係６件壽司＋魚生飯＋湯＋沙律＋甜品；另外一款係蕎麥冷麵＋４件壽司＋甜品。ｄ壽司好甜好新鮮，尤其是係我呢排既牡丹蝦，真係好味，食極都唔厭！個冷麵彈牙同埋夠凍，呢樣好重要，如果唔凍既話就唔可以合格成為冷麵；太凍就凍親自己，一樣都唔合格即！魚生飯都得到朋友既喜愛而我依法係順既忠極粉絲，真係無咩野可以令我變心。

甜品係豆腐雪糕，我唔食凍野既都食左半杯，好野黎架！呢間既佈置同格局都好細心，連檯面既墊紙都係用日本和紙，而且佢都用好多半透既屏風，去隔開每張檯，令到每檯都有自己既空間！嫌唔夠空間？佢仲有ｄ係４個人既房仔都好唔錯架！

功德林上海素食 (尖沙咀)

我地今次幾個女仔又係尖沙咀搵飯食，今次係食上海齋菜。功德林我好鐘意去，因為上海齋味道係比廣東齋係清d又少d油，我地叫左幾個招牌餸 – 豆腐餃子、混醬冷麵、冬瓜盅同埋一個冬菇毛豆素雞。

豆腐餃子主要就係食刀功啦，師傅可以將豆腐“片”到厚度適中，然後加入餡料，夾都有難度何況仲要去包! 冬瓜盅初初一上檯個陣有朋友話太清，食到瓜菜既菜青味，不過之後食埋其他餸就味道剛剛好，不過真係好大個盅，個部長又話每人兩／三碗就飲完，最後我地個個都飲左四碗以上！真係人多先好叫啦～冬菇毛豆素雞係一個上海家常餸，我好鐘意食素雞，有時煮湯麵／烏冬／炒麵，我都會加入去，最好就係用濃味既汁去煮，索晒味就好正架啦～

個添醬冷麵係一個好好玩既餸，你睇下，淨係醬都有咁多種　－　有麻醬、甜麵醬、花生碎、南乳醬、鎮江醋、辣椒油、醬瓜、芽菜絲同青椒絲，你可以每一撮都用唔同既組合去撈個麵、不知幾好玩。每次帶新朋友去功德林食飯我都會點呢個麵，有人生日又會點，次次大家都玩得好開心架～

板長壽司 (銅鑼灣)

今次係同男友去，因為佢都未去過，咁啱就到一齊再加上電視效應佢都想食，所以就黎左呢到食晏啦。我地叫左:

1) 吞拿魚腩 – 上次食中吞拿(無筋)，就真係無筋，入口溶化；今次呢個佢話有少筋，真係啵，不過入口即溶又唔影響既，好新鮮，好食~

2) 三文魚子兩件俾自己，兩件飛魚子俾男友 - 呢兩件都係我地各自既"飛佛"，所以無野會彈架。

3) 蟹棒 - 係男友既，佢唔知點解係勁鐘意食架。

4) 三交魚刺身 - 男友既至愛，不過佢話呢到唔夠【元神】，人地大件同厚身好多，呢到唔抵食。

5) 蟹子青瓜沙律 - 叫既原因係男友唔多鐘意食沙律，除左呢個。呢個都係一般啦，中規中距。

6) 炸蠔 - 佢係新鮮炸架，好熱辣，不過佢既蠔就唔係勁蠔味，所以麻麻地鐘意食蠔既人都可以試下。男友佢俾我訓練到可以食蠔味同海水味重既蠔，所以佢食左一隻就唔食啦。

7) 蛋燒 (熱食) - 去到邊都叫，每次叫都係覺得【一門】好食好多。

8) 天婦羅 – 超超超難食，個粉漿都唔係天婦羅漿，個漿又厚，真係唔掂!

9) 蟹肉魚子壽司 - 我男友一啖食左但係完全無俾comment。

10) 牡丹蝦壽司 - 我最近既至愛，上次食不知幾大隻，今次細隻左，不過一樣都係鮮甜爽脆。

11) 墨魚＆八爪魚壽司 - 唔知點解男友會叫，不過一樣啦，食完都係無乜comment。

12) 冷烏冬 - 叫既原因係朝早去左抽血又無食野，我驚我唔夠血糖會暈所以先叫架即，平日根本唔會食既。

基本上都係唔太差既一餐，不過食完既時候，有個waiter講開，如果訂位，最低消費係每位＄３００！嘩我呢餐兩個人都係食左＄２８０，要＄３００／位，真係好過去搶啵～男友即刻話車！＄３００我可以食得好好啦，唔駛係呢到食呀～

囍點住家菜 (鰂魚涌)

呢一晚睇完戲，就黎左係太古城附近既船塢里 (我地兩個當時都唔信船塢里會有食肆既!!!)食飯啦。
成條街仔只係得一間食肆，而且仲裝修得幾“骨子”下，由於都幾夜下，好多係黑板上面既野都賣晒，所以就叫左例湯 – 粉葛鯪魚湯、肉碎蠔仔豆腐煲同埋茄子炒牛柳。
同朋友傾下部戲，食物就好快送上黎啦，個湯係住家老火湯，好正~ 個蠔仔豆腐煲一打開d鑊氣就攻出黎，侍應都好細心即刻搬去隔鄰檯面等我地可以飲埋個湯先。個煲好足料架，所有材料都多，但係又唔肥膩，好夠熱。我覺得中菜係一定要夠熱係最低既要求，唔冷唔熱，溫溫吞吞咁就無意思啦。個茄子牛柳比想像中好，個茄子入晒味，牛柳夠鬆。雖然碟頭唔係太，不過都唔太差，我地叫左一個飯分都食唔晒d餸! 由於太夜，食唔到佢地d甜品，我會再黎再發掘下有咩新菜式既。

我好擔心介紹左就多人去，不過我又擔心佢開得咁偏無人去又會執，你地而家明我寫食評好多時都有既矛盾心情麻??!!!