和洋水產惠比壽 (赤柱)

時常都會在赤柱出沒既我,一見到有新食肆就一定會出現, 今次終於見到有間規模大D既日本料理店出現, 我當然即刻飛奔黎試下啦~係美利樓下, 轉左出去後面, 出面又唔見有大既招牌同BANNER, 明顯比較輸蝕, 如果唔係一早上網搵左, 真係唔發覺有間舖係呢樹....所以當我行到入去, 午餐時間都只係得一檯客, 都有少少驚, 唔知得唔得架~

午餐餐牌全部都係SET, 種類唔算多, 唔知係唔係因為新開張既關係呢, 希望佢運作上軌道之後, 內容可以豐富一D.......

我叫左一個吞拿魚SET, 因為午餐餐牌既主要魚生都係吞拿魚, 我當時估1) 老闆對吞拿魚好有研究; 2) 同吞拿魚批發商好熟......前菜係WASABI 魷魚, 但係唔知點解個味道同其他食肆既有D唔同, 同埋咸左少少,  所以我食左兩啖就冇食啦~  (跟住我就有D擔心之後黎既..........)之後成個SET就送上黎, 可以見到仲有個沙律, 個湯係一個好足料既味噌湯, 有蘿蔔之外仲有少少肉, 所以比一般既仲甜D右邊既吞拿魚同魚腩, 左邊係鐵火光。右邊個4件完全無筋, 不過唔知咩原因, 我覺得魚生, 唔係應該係雪櫃拎出黎切架咩?! 點解我呢堆吞拿魚都係暖既?! 

整體壽司感覺鬆散, 師傅手勢麻麻, 我用筷子一夾就已經散開。好有進步空間, 希望老闆/管理層多多改善~

梨花園韓國料理 (上環)

由公司搬入上環, 周遭朋友已經話我知呢到逢星期四午餐係有人蔘雞套餐, HK$92一個, 非常抵食。但係就係因為呢個人蔘雞就令到餐廳勁多人, 所以一係就早一星期黎訂位, 如果想WALK-IN黎食, 都真係好難~

我地呢日係WALK-IN, 不過當然唔係1點個轉啦, 為左要食到我地12點就黎食啦, 12:05到, 都要等左15-20分鐘先可以入座, 咁你就知幾多人真係會為左佢而黎食呢!

咁早黎又有位當然即刻ORDER啦, 前菜好快就即刻上黎啦, 紅紅綠綠咁, 又吸引, 又開胃~係等既時間周圍望下, 其實差唔多檯檯都係叫人蔘雞, 不過我側邊個檯全檯都係韓國女士既就唔係啦, 好多都係食粉絲, 仲有海鮮煎餅, 等等, 可以參考, 下次黎個陣就試~

十幾廿分鐘之後就有得食啦, 勁熱, 一鍋入面有一隻雞, 一枝人蔘, 大量既糯米, 紅棗, 個份量真係夠晒, 男仔黎食絕對飽肚~我地2個女仔一人一鍋, 講真, 真係有D似同佢博鬥咁, 個湯好濃味, 我最鐘意就係枝蔘同糯米,  好有蔘味而雞肉就好嫩, 食完成個人都暖晒!

The Cottage Cafe & Pub (上環)

因為公司係附近, 因為同事從外地返黎, 所以我地又一齊出黎食晏。呢日因為係農曆新年之後, 大家都唔想再食中餐, 所以一致鎖定食西餐, 老闆話呢間聽朋友講左幾次, 應該都唔錯, 所以我地就黎左呢到啦~

3個人黎食都要擾攘左5分鐘, 佢係出面開一將檯俾我地, 我地分別叫左"Burger with fries", "Meatball Spaghetti", 周埋"Masala Chicken"

先黎左個湯, 應該係Green Bean Soup, 夠熱, 好味~ 之後好快個意粉就上左檯, , 大家睇相都見到賣相不錯, 我都以為應該好味。因為呢個係同事叫既, 所以我都冇理。其後, 漢堡包同MASALA CHICKEN都分別上檯, 大家都餓, 當然即刻齊齊開動。

當大家都好沉醉於自己個餐既時候, 同事已經停手, 我地都好詫異, 同事就"撩"俾我地睇, 所有肉丸原來都未煮熟, 咁我地就話不如同餐廳講啦, 同事就話已經冇胃口唔想食, 所以就冇同餐廳講。

至於我地既漢堡包同雞, 當然係好味啦.... 冇胃口既同事就KEEP住食薯條, 因為新鮮炸出黎, 梗係香口啦~至於我既MASALA CHICKEN, 好既係落足夠既香料, 所以又香又辣, 缺點當然就係份量太少啦, 如果可以再多D, 咁就好啦! 

希望只係大廚一時大意所以先冇整熟個肉丸, 亦都希望下次黎食唔會再出問題~ 

光 日本料理 (銅鑼灣)

呢日本來想去另一個地方食飯, 不過因為全條街既煤氣壞左, 所以就係銅鑼灣行左一個圈, 終於搵到一間唔需要等位 (都驚係唔好食), 但係原來又係一個正既地方!

叫左一個SET, 係有炸物同魚生飯, 咁就可以一次過試下魚生新唔新鮮, 天婦羅師傅手勢好唔好, 可唔可以列入為我的食堂~

前菜 - 係茶碗蒸+沙律 - 沙律比想像中份量好大, 所有蔬菜都好爽脆~ 茶碗蒸就算上檯之後十分鐘之後都非常之熱, 有菇, 有白果, 有我想食既料.....成個SET都等左廿分鐘, 不過等係有價值。一上到黎, 魚既顏色非常鮮艷, 三文魚籽夠大粒, 見到都覺得興奮, 胃口大開!  蝦夠大隻, 吞拿魚一D都無筋, 帶子鮮甜度高....

再講天婦羅, 雖然只係少少幾件, 不過絕對唔會胡混過去, 炸粉只係薄薄既一層, 炸得又唔油膩, 再加埋碗極整既魚生飯, 食完真係為自己加油~

權八居酒屋 (銅鑼灣)

日本菜我估係大家香港人既頭幾位菜式, 因為菜式既分門真係專門, 大家都為左煮好一類菜式而努力! 呢一家既串燒就係非常出名~

我呢次冇揀到串燒, 因為當日胃口麻麻, 所以保守地揀左我平日食開既......後悔架, 所以我一定會再黎一次食佢既串燒!因為單拖去食, 所以被安排到坐吧檯, 不過一D都唔悶架, 因為好近爐端燒, 睇住師傅係到不停手咁燒, 開始後悔唔揀串燒SET......一般前菜係香港大部份都係生菜沙律, 冇驚喜, 呢個蕃茄真係清甜, 連本身胃口唔多好既我都開胃返, 後面果個係煮左好耐既肉, 所以好入味同好"淋", 一D力都唔駛用就可以咬開~係到等食物黎既時候, 當然周圍八卦下啦, 真係各式各類既酒都有, 如果放工想搵個地方飲下野又食下串燒, 呢到真係一個好地方~呢個角度係唔係好清楚呢! 咁樣睇住黎整, 1)師傅真係好有信心唔怕你睇, 簡直就係做SHOW一樣! 好正, 唔怕油煙(不過其實D煙係唔會吹到出黎), 又想近睇既, 吧檯真係好正~呢個係其他客人叫既串燒SET, 係我下次去食又想叫既SET! 呢個係我既目標!至於我叫左既蕎麥麵天婦羅SET, 首先份量真係夠多, 一定飽肚, 天婦羅炸得非常好! 脆口之餘又唔會油, 墊住張紙係冇油既, 加上冷麵夠凍, 所以非常爽口~ 雖然話就話後悔無叫串燒, 不過食左呢個都令到我好滿足, 總括一句 "冇黎錯呀"!我好肯定, 有時間(由12月到而家5月都未抽到時間), 不過呢到係排係我要食既餐廳頭3位!