我地今次幾個女仔又係尖沙咀搵飯食，今次係食上海齋菜。功德林我好鐘意去，因為上海齋味道係比廣東齋係清d又少d油，我地叫左幾個招牌餸 – 豆腐餃子、混醬冷麵、冬瓜盅同埋一個冬菇毛豆素雞。

豆腐餃子主要就係食刀功啦，師傅可以將豆腐“片”到厚度適中，然後加入餡料，夾都有難度何況仲要去包! 冬瓜盅初初一上檯個陣有朋友話太清，食到瓜菜既菜青味，不過之後食埋其他餸就味道剛剛好，不過真係好大個盅，個部長又話每人兩／三碗就飲完，最後我地個個都飲左四碗以上！真係人多先好叫啦～冬菇毛豆素雞係一個上海家常餸，我好鐘意食素雞，有時煮湯麵／烏冬／炒麵，我都會加入去，最好就係用濃味既汁去煮，索晒味就好正架啦～

個添醬冷麵係一個好好玩既餸，你睇下，淨係醬都有咁多種　－　有麻醬、甜麵醬、花生碎、南乳醬、鎮江醋、辣椒油、醬瓜、芽菜絲同青椒絲，你可以每一撮都用唔同既組合去撈個麵、不知幾好玩。每次帶新朋友去功德林食飯我都會點呢個麵，有人生日又會點，次次大家都玩得好開心架～

今次係同男友去，因為佢都未去過，咁啱就到一齊再加上電視效應佢都想食，所以就黎左呢到食晏啦。我地叫左:

1) 吞拿魚腩 – 上次食中吞拿(無筋)，就真係無筋，入口溶化；今次呢個佢話有少筋，真係啵，不過入口即溶又唔影響既，好新鮮，好食~

2) 三文魚子兩件俾自己，兩件飛魚子俾男友 - 呢兩件都係我地各自既"飛佛"，所以無野會彈架。

3) 蟹棒 - 係男友既，佢唔知點解係勁鐘意食架。

4) 三交魚刺身 - 男友既至愛，不過佢話呢到唔夠【元神】，人地大件同厚身好多，呢到唔抵食。

5) 蟹子青瓜沙律 - 叫既原因係男友唔多鐘意食沙律，除左呢個。呢個都係一般啦，中規中距。

6) 炸蠔 - 佢係新鮮炸架，好熱辣，不過佢既蠔就唔係勁蠔味，所以麻麻地鐘意食蠔既人都可以試下。男友佢俾我訓練到可以食蠔味同海水味重既蠔，所以佢食左一隻就唔食啦。

7) 蛋燒 (熱食) - 去到邊都叫，每次叫都係覺得【一門】好食好多。

8) 天婦羅 – 超超超難食，個粉漿都唔係天婦羅漿，個漿又厚，真係唔掂!

9) 蟹肉魚子壽司 - 我男友一啖食左但係完全無俾comment。

10) 牡丹蝦壽司 - 我最近既至愛，上次食不知幾大隻，今次細隻左，不過一樣都係鮮甜爽脆。

11) 墨魚＆八爪魚壽司 - 唔知點解男友會叫，不過一樣啦，食完都係無乜comment。

12) 冷烏冬 - 叫既原因係朝早去左抽血又無食野，我驚我唔夠血糖會暈所以先叫架即，平日根本唔會食既。

基本上都係唔太差既一餐，不過食完既時候，有個waiter講開，如果訂位，最低消費係每位＄３００！嘩我呢餐兩個人都係食左＄２８０，要＄３００／位，真係好過去搶啵～男友即刻話車！＄３００我可以食得好好啦，唔駛係呢到食呀～

呢一晚睇完戲，就黎左係太古城附近既船塢里 (我地兩個當時都唔信船塢里會有食肆既!!!)食飯啦。
成條街仔只係得一間食肆，而且仲裝修得幾“骨子”下，由於都幾夜下，好多係黑板上面既野都賣晒，所以就叫左例湯 – 粉葛鯪魚湯、肉碎蠔仔豆腐煲同埋茄子炒牛柳。
同朋友傾下部戲，食物就好快送上黎啦，個湯係住家老火湯，好正~ 個蠔仔豆腐煲一打開d鑊氣就攻出黎，侍應都好細心即刻搬去隔鄰檯面等我地可以飲埋個湯先。個煲好足料架，所有材料都多，但係又唔肥膩，好夠熱。我覺得中菜係一定要夠熱係最低既要求，唔冷唔熱，溫溫吞吞咁就無意思啦。個茄子牛柳比想像中好，個茄子入晒味，牛柳夠鬆。雖然碟頭唔係太，不過都唔太差，我地叫左一個飯分都食唔晒d餸! 由於太夜，食唔到佢地d甜品，我會再黎再發掘下有咩新菜式既。

我好擔心介紹左就多人去，不過我又擔心佢開得咁偏無人去又會執，你地而家明我寫食評好多時都有既矛盾心情麻??!!!

今次係叫左一個『御膳』套餐，即係有齊晒佢地出名既食物 – 刺身、天扶良同壽司，我仲叫左一樣好得意既野，你睇落去就知架啦。

先黎左個柚子醋沙律，新鮮、開胃，好似係要準備定食好野既心情。茶碗蒸係滑到豆腐一樣，不過而家好多食肆都可以掌握到做法，係要咁先合格既。小小既一碟煮物，但係其實好多時都用左最多時間去烹調，你地又知唔知?

我期待既三樣食物一次過上晒黎，賣相精緻，先試左刺食先，由淡到濃，樣樣都好新鮮、鮮甜。尤其是個吞拿魚係近年好多食肆都忽略既食物，但係佢都係無筋既，正!

天扶良係正既，尤其是係食完之後張吸油紙係唔多油，表現出師傅好功架而且個恆溫鍋真係發揮作用，令到食物係炸既過程都無吸左好多油，食得好放心。

壽司每次如果你係食御膳個套餐，我都係覺得失色既。太卷係散既，另外有一件壽司既魚係腥既，唔知係唔係由一位師傅仔做所以唔合格呢??? 希望佢有改善啦。

我叫左咩野咁特別??? 我叫左隻【炸蛋】呀~~~~ 係將一隻蛋打開，當然唔可以留到蛋白啦! 將少少蛋白同黃即刻入炸漿包住然後入爐炸。用高溫炸出黎，你一定以為個黃係熟晒呢~~ 錯啦，上到檯個黃仲係溏心架，真係高難度動作，好勁呀~~~~

因為未食早餐既關係，今次我食左好大碗麵呀。每個人都係叫左一個套餐，朋友係食手打烏冬+魚生飯，而我就係食煎鵝肝+蕃茄雜菜湯麵。
可能係街坊生意啦，真係大件夾抵食。聽講以前係真係有好多日本食客架，不過而家反而係香港人黎食多，所以好多野食都港式化。

前菜係車厘茄，ok啦，無咩特別但都新鮮。朋友既手打鳥冬做得唔錯，夠彈牙。我個牛鵝肝煎左好耐呀，所以出黎煎到兩面都有少少膿，好甘香。個三文魚生飯既份量少少地，朋友都可以全部食晒架，我始終係三文魚子既忠實粉絲所以吸引唔到我啦。因為天氣都少少熱，所以好想食好多蕃茄，呢碗湯麵大到呢，湯汁充滿左蕃茄味，引唔住都要飲左幾啖，碗湯勝左菜多。

食得『小肥牛』多得滯都要發掘下d新地方先得，是晚同男友黎左呢間試新野。雖然話試新野，其實打邊爐食黎食去都係果d野即，都係叫左牛頸脊、滑牛、菜、蝦滑、螺片同象拔蚌、花膠、豬皮、鯇魚片等等。

作為一間以前係劈酒場 / 聯誼會而家改為打邊爐就真係唔算差架啦，不過佢可能唔多知道香港人打邊爐已經係非常咀刁，唔新鮮唔特別就真係好難企得住腳。基本既食材人人都可以係屋企食得到啦，點解要出黎食呢~ 呢間我估佢係抄小肥牛既，因為好多野都好類似，不過就貴過人地好多啦。偶然一次試新野就ok，但係唔會吸引到我去食第二次。

上星期三係HONEY既生日，阿少爺一早就講明唔好食得太貴，佢又唔多鐘意西菜 (佢係一個傳統既男人黎)，所以就選擇左去翰騰閣啦。

DBS近排出左好多飲食優惠，好似去翰騰閣就有套餐，都好抵死下架! 我地食左: 帶子沙律、燉湯、鮑汁花膠鵝掌、半隻龍蝦伊麵、百合炒甜豆同埋甜品係椰汁燉奶。我驚我honey 唔飽，所以再加一碟咕嚕肉，咁就一定夠食又開心啦。

個帶子沙律就無驚喜，不過Honey 鐘意食生果沙律佢就食得好開心。燉湯就勁啦，你都睇到個碗有幾大啦，而且仲有好多料添 – 竹笙、雞、肉、花膠、螺頭等等，一人一盅，飲完食埋湯渣真係飽左一半，但係一d味精都無架。個鵝掌就麻麻啦，最主要係個汁唔多好味，所以晒左d材料，可以整得入味好多架麻。龍蝦伊麵d龍蝦好好食架，主要係八成熟，所以一d都唔老，好食! 個菜同咕嚕肉都好味，有水準，咕嚕肉係用里脊做，所以啖啖肉，男士食就最啱啦!

甜品就唔多吸引我啦，男主角就好俾面咩都食晒!最唔好既就係佢地上菜好快，食都未食得切，而且一餐飯竟然由點菜到埋單唔駛個半鐘，你趕收工即我唔趕啵~ 全餐都係HK$550，當然係我俾錢啦~

係中環食飯就真係無咩選擇，今次係食早lunch，所以同埋同事去左食芽莊，不過估唔到既係，就算12點出門口去食飯，芽莊入面依然係咁多人，想坐得舒服d都唔得。都係一檯人叫晒野食，而有人依然漏單，出去中環食又唔平，又逼又多人，真係唔化算。

我地一人叫左一個生牛肉河粉、柚子燒蝦沙律同埋軟殼蟹卷。我發覺佢個湯底又鹹左d啦! 之前佢都叫左ok既，不過今次之後就應該唔會去食啦~ 個柚子燒蝦沙律唔太差但亦無咩驚喜。個軟殼蟹卷就做得幾好，炸左上檯依然係脆既，不過就要好有耐性去等啦~

我最唔鐘意芽莊係無論幾時去都係一屋鬼佬同埋鬼咁逼，呢兩種感覺都令到我唔可以好舒舒服服咁享受個午餐。

睇左好多食評都話呢間好食，所以趁有一晚係附近都走去試左。呢間當然係佢地d裝修咁整齊啦，仲擺左個電視，你可以睇無線新聞，好鬼死地道添。

因為一個人可以叫既野食真係唔多，我只係叫左一個生牛肉河粉同埋越式炸春卷。其實叫個陣有d擔心架，因為我得半個鐘，我真係驚唔夠時間。好彩，雖然差不多坐滿晒成間舖，不過十分鐘到都到啦，放心晒。

一眼望落去，成碗都舖滿左九層塔，如果你唔鐘意個香味就真係唔好食，我個人就好鐘意，立刻就加入青檸汁同辣椒粒啦! 試下個湯先，之前有食評話個湯落味精，我都唔敢飲多，嘩! 真係好重味，注意唔係味精呀! 真係好濃味架而且個湯好熱，所以我件牛肉係上檯無幾耐就已經熟晒啦。由於我只係叫左普通既牛肉，就係普通囉，真係無咩特別，河粉都係滑既，又係無咩特別。

個春卷好食，係用米紙包，唔花巧，餡料係冬菇、肉碎同粉絲，包得好實，但炸得好鬆。食左芽莊你就會覺得呢間『it's nothing』，但係越南菜尤其是牛肉河粉本身就係一碗係越南街頭都可以食到既美食，既然本身係樸素既美少女，點解要幫佢添妝呢?

PS – 食完之後去睇戲，行去戲院個陣個口仲係碗湯既味，after taste非常強勁。睇完成場戲都唔覺得口渴，証明左個湯真係好濃不過係無味精既!

幾個女仔，好彩係放工之後去食! 經過一日辛勞之後就特別可以食得多野既。我唔理大家既反對，叫左一隻薰蛋、冷麵、醉雞、仲有一碟出晒名同攞左獎既鶴湖蟹影同埋甜品驢打滾。

個個又話唔食薰蛋，到隻蛋黎到咪一樣同我爭黎食!!! 不過隻蛋就真係唔及香港老飯店做得好啦，飲地薰得不知幾有味，呢隻蛋呢就完全咩味都無既。好彩跟住黎既餸都無令我地失望，個醉雞好滑又有酒味；個冷麵我以為會好寡，雖然佢有個麻醬，醋同辣油。睇到個辣油已經怕怕，原來佢一d都唔辣，係微辣即仲即刻吊起成個味!真係抵讚!

至於個鶴湖蟹影，叫個陣其實都唔知係咩黎既，不過得獎啵，點都要叫黎試下啦~ 原來個頂係蟹粉黎架，個侍應仲好叻，可能佢已經習慣左啦~ 一上檯佢就俾時間我地影左相先，之後先慢慢同我地分左佢! 一人食一個真係會飽架可能係d蟹粉既關係啦，真係值得食，佢做得好好~而且就算側邊拌碟既蟹仔，原來係用醋做出黎，可以拌埋d蟹粉一齊食，師傅真係明白食客既需要呀! 食左咁多肉，我地另外叫左個菜係咩菇都有既煲，一般地好。

甜品我地只係叫左爐打滾 – 係紅豆餡加糯米粉做成，出面加左花生粉，好香! 朋友因為帶左個得意電話出黎，攪到個部長都要黎睇下，不過都不忘招呼我地，唔錯架，下次或者黎食下麻辣火鍋都好啵~