經過uluru好多次，次次都俾佢嘅門面吸引住，見佢ig話呢排出咗最近社交平台好hit嘅2D蛋糕，就約朋友去試下～

夜晚6點嚟到，大部分booking都未出現，店員好好俾我地行咗餐廳一圈，揀自己最鍾意而又冇俾人hold枱嘅座位，我地揀嘅corner牆上畫有花園，好chill~ 其他地方亦有書櫃等嘅插畫～

主菜有唔少選擇，可以加錢配套餐，嚟打卡cafe我地揀嘅都係穩陣之選pasta risotto，水準合乎預期，甚至carbonara比想像中好食，醬汁非常creamy，意粉亦都al dente

套餐包沙律餐湯同飲品，餐湯唔係開粉而係自家製嘅蔬菜蓉湯，有誠意🫡麵包條亦都幾鬆脆，green tea latte有驚喜，有大眼仔拉花，口感順滑冇粉末，飲到最底都係好味嘅～～

嚟得呢度緊係要食埋甜品，新出嘅甜品入面我地試咗富士山同2D蛋糕，富士山係抹茶tiramisu口感比較似奶凍，賣相出色；2D蛋糕係士多啤梨蛋糕，有好多士多啤梨，忌廉幼滑水準有驚喜。

值得一讚呢度所有店員嘅服務態度都非常好，由帶位到落單再見到佢地幫其他客人影相都係非常友善，樓上cafe少見咁高質👍🏻👍🏻👍🏻

對e-max嘅印象都係有展覽有show睇，平時冇活動就好少去，原來佢逢星期二睇戲有平，今晚就去睇戲加食飯。 我地都鍾意食潮州菜，今晚就揀咗3樓嘅新潮樓，店舖面積好大，店員招呼好好，可以手機落單，部分菜式例如滷水雙拼/三拼就可以叫店員幫手落單，凍烏頭都係～ 滷水我地揀咗鵝片同墨魚雙拼，片得幾薄，一啲都唔韌，滷水汁都好香，有大量花生好正～ 薑汁方魚炒芥蘭嘅薑味恰到好處，方魚有鹹香，芥蘭爽脆，簡單一碟菜都做得好有水準。 鍾意方魚嘅我地叫埋個方魚肉碎粥，一樣超好食，啖啖足料，粥底米粒分明👍🏻👍🏻 凍烏頭好抵食，估唔到$168有咁大條，起骨出色，近魚尾位近乎無骨，普寧豆醬好香濃。 甜品雖然選擇唔多但非常好食，福果芋泥啲芋蓉超幼滑，食到好飽都忍唔住清晒🫣

The Forest 一直都係我比較鍾意嘅商場，鬧市之中難得有個咁多植物嘅地方，仲有唔少高質店舖同餐廳！今日就試試外圍嘅牛丼專門店

有單點有定食，全部手機自助落單，比起連鎖牛丼快餐店chill得多

叫咗野菜燒牛肉丼定食，野菜有椰菜同芽菜，廚師加咗料酒去炒，比起坊間出品味道更特別；牛肉落足調味，送飯一流。珍珠米軟硬適中，大大碗一定夠飽～

值得一讚佢雖然已有海量炒野菜，但定食仍然跟一碗份量唔少嘅沙律，食牛丼都可以食得好高纖🤣🤣🤣🤣🤣

面豉湯鹹度適中，又有油豆腐絲，係呢餐飯嘅mvp👍🏻👍🏻

叫多支樽裝無糖烏龍茶飲，平衡返偏濃味嘅主食，啱啱好～～～

稻埕一聽個名就知道係台灣菜，但佢嘅菜式食材配搭幾有創意，加上喺賣相同擺盤上都好花心思，又有唔同cocktail，今晚約埋朋友一齊去試試～

先叫飲品，台灣鳳梨咁出名，我就叫咗杯「Pineapple Paradise」，以冧酒做底，味道有層次，冇藥水味，酒味唔會太重，用嚟做餐酒唔錯。

朋友叫咗最打卡嘅氣球小女孩，店員一送上呢杯cocktail 大家即刻自動自覺開手機拍片😂😂😂 氣球好得意，如果唔咁快篤爆佢就仲正～

前菜先叫個話梅小山藥開開胃，淮山切到細細粒，爽爽地幾好食～

重頭戲係佢嘅九孔鮑魚，我地都係衝住呢個而嚟，白滷水味道啱啱好，鮑魚大隻又唔韌，仲有塊索汁嘅、類似甜不辣嘅豆製品墊底，好正～

食完凍嘢就飲返個熱湯，有四個蛋白泡泡球嘅蟹肉脆米金湯玩味十足，我地四個人一人有一粒波波，一咬落去即刻融化，好得意～

主菜方面叫咗鹽酥波士頓龍蝦脆角豆金瓜、黑松露鮮白合花同埋鐵板香煎一口鵝肝牛小排，龍蝦係一口大細，有八粒好易分，啲蔬菜片全部烘到勁脆，調味出色；黒松露白合花味道似薯蓉，呢個乾燥天氣食白合止下咳就啱晒；鵝肝入口即溶，牛小排都唔韌，盤邊有半熟蛋好有韓式feel。

最後叫埋個八斗子炒飯，非常足料，加埋肉鬆甜甜地唔錯～

好多時coffeeshop都只係開到6點，難得espresso alchemy有晚市，仲要喺海港城咁就腳，今晚就試試佢嘅水準。 餐廳大部分都係open area座位，自己嚟嘅話坐對窗位就好chill喇 落單喺返舖頭入面，落完攞個號碼牌等店員送餐 叫咗一個意粉一個burger同一個french toast，男友唔飲咖啡所以剩係嗌咗一杯，點知嗌完佢話好好飲飲咗我半杯🥲🥲🥲 意粉係卡邦尼意粉，同出面嘅唔同佢啲煙肉係超厚切，好似食緊燒味嗰啲燒肉咁爽爽地幾得意 Burger揀咗菠蘿雞堡，加咗菠蘿開胃咗好多，都有唔少蔬菜夾喺入面。 French Toast比想像中出色，麵包好鬆軟，唔會好油膩，配海鹽焦糖醬好夾，加埋雲呢拿雪糕一冷一熱好好食～

今晚嚟到尖沙咀牛匠石燒用膳，見佢個盛合幾抵食，$468又有A4又有M9和牛，就試試佢嘅水準。 餐廳執得好光猛企理，亦有送餐機械人，非常先進🤣 呢度燒肉爐墊上牛油紙，再用牛脂開爐，燒到咁上下侍應會主動幫手換牛油紙，服務貼心。 估唔到日本餐廳有台式茶飲，水果茶夠天然清甜，芝士奶蓋四季春芝士層幼滑好味。 除咗牛匠極上盛合，主食叫咗溫泉蛋配飯素飯，飯素有櫻花蝦超級惹味。 呢晚又凍又落雨，燒緊肉嘅同時食住熱辣辣又煙韌嘅烏冬好滿足。 講返燒肉盛合，每塊肉都好好食，雖然當中只得兩款標明係和牛，但其他牛類其實肉質都非常嫩，入口即溶，好少喺非單點肉類食到呢個質素。 除咗牛之外盛合仲有鹿兒島無激素雞腿肉，標明無激素食得放心；西班牙黑豚油脂最豐富，加埋爽脆生菜一齊食啱啱好。 仲有飯後果，大滿足🤤🤤🤤🤤🤤

不停聽身邊嘅人推介火鍋隨意門，今晚終於就到時間去試，有得揀中式主題或者土耳其，土耳其光猛啲我地就揀咗土耳其喇～ 餐廳都真係用心佈置，有巨型熱氣球打卡牆，每張枱上面都有彩色土耳其燈，連醬料架嘅豉油都係用土耳其style嘅器皿裝住，好有心思～ 叫咗個蒜香卜卜蜆鍋，唔係炒嘅所以冇咁油，蜆好多食極都食唔晒，仲要隻隻鮮甜冇沙，剩係呢個鍋都值滿分。 火鍋配料方面叫咗四國牛肉拼盤、雙拼響鈴、羊肉片、蔬菜拼盤、手工蝦丸、黑松露蟹肉餃同埋炸芋頭，全部都好好食，重點推介牛肉、蔬菜拼盤同炸芋頭。 四國牛肉拼盤有日本A4和牛、本地牛頸脊、香草牛肉同埋花雕牛肉，和牛合符期望有入口即溶嘅感覺，香草牛個醃料幾有特色，而且肉都夠腍，有驚喜。 通常蔬菜拼盤都係餐牌有嘅菜揀幾樣就算，但呢度係樣樣都有啲，款式多達7-8樣，而且啲菜好爽甜，係其他邊爐店或者自己去街市買都買唔到嘅，估唔到連菜都成為到加分位😂😂😂 炸芋頭入面好粉外皮乾身唔油膩，烚一烚就已經好好食～ 值得一讚呢度嘅竹䉀茅根，容量有特色份量又多，同埋好清甜，難怪枱枱都嗌🤣

嚟到佐敦呢間地中海菜餐廳，見到有唔少西班牙菜options，除咗最signature嘅seafood paella仲有好多tapas揀～ 餐廳位於廟街牌坊隔離嘅商廈，店舖面積唔算大但窗邊做晒bar枱，望住街景食好chill~ 即使地處廟街但侍應對上菜次序都好講究，先上tapas等我地食完再上paella，魷魚炸漿非常酥脆，prawn w/ garlic and curry個辣度都幾刺激，非常惹味。 重頭戲paella之前睇相已覺非常對辦，paella就係要超多醬汁先好食，飯粒啱啱好熟中心位置有啲咬口，海鮮鮮甜，海鮮自帶嘅海水fuse埋落個汁度，加埋侍應特意叫我地保留嘅garlic mayonnaise (alioli)係西班牙嘅感覺呀～～～～ 甜品方面一於spanish style到尾叫個churros，份量的骰做飯後甜品啱晒，唔算太甜，杯底有杰撻撻嘅朱古力醬，用嚟點churros 100分😋

海港城內有唔少高質餐廳，今次食嘅Da Fillippo Tratorria 喺Cheesecake Factory嗰邊，食完順手嘟埋港鐵特惠站👍🏻 食意大利菜食手工意粉係必須嘅，另外我地再side back咗個吞拿魚醬牛肉同埋煎三文魚扒。 夜晚盡量唔飲咖啡，嗌咗杯light d嘅鮮菠蘿汁，好清甜冇額外加糖，仲好開胃。 吞拿魚醬牛肉醬汁好幼滑，牛肉都好嫩，係幾高質嘅頭盤。 近乎枱枱都有嗌嘅龍蝦波浪意粉真係對得住個價錢，波浪意粉掛到好多醬汁，龍蝦肉非常新鮮。 蜆肉意粉蒜油味突出，linguine煮到al dente，口感合符期望。 三文魚扒好有驚喜，魚皮煎到超脆似薯片口感又冇平時炸魚皮嘅粉漿味，魚肉透住淡淡粉紅色超嫩滑，必試！ 最後叫個creme brulee作結，都係有水準嘅出品。

哈豆係台灣人主理嘅台灣菜，開店多年水準一直都保持得好穩定，加上店員都係台灣人，服務非常貼心，態度比一般台式餐廳友善。哈豆喺觀塘兩座工廈都有分店，今次幫襯嘅係喺富利工廈嘅二店。 牆上繪有台灣景點嘅壁畫，亦有店主嘅攝影作品，經典台劇嘅黑板畫等，連餐牌都有校園風嘅相片，有濃濃嘅台灣味。 今晚嗌咗紅燒牛肉麵同鮮梅佐豬扒魯肉飯，前者牛肉軟稔，湯頭清淡，不過不失；驚喜嘅係後者，鮮梅醬食得出天然味道，用嚟點炸嘢即時冇咁熱氣，豬扒酥脆內裡juicy，半肥瘦嘅滷肉亦比同區名店出色。 鹽酥雞都係食親台灣嘢必嗌嘅，呢度嘅鹽酥雞水準中上，外皮夠脆，九層塔香味再出啲就更好 每枱必點嘅黑冰河畔溫泉目測起碼25cm高，最上層係雪糕，黑糖冰上有加咗花生碎嘅奶蓋，同黑糖冰好夾，挫冰固然比雪花冰粗粒但哈豆嘅挫冰係食落幾舒服唔會有咬冰粒嘅感覺，而且甜度適中，不過兩個人食就有啲吃力，希望會有迷你版😂