好多年前食過The Grill Room，嗰陣仲係走樓上西餐廳格局，細細間但水準唔錯，之後都有去幫襯埋尖沙咀店，估唔到事隔幾年，銅鑼灣店搬咗去銅鑼灣廣場，面積大咗，裝修格調高咗好多，又有private room同大量私隱度高嘅半圓梳化，好適合三五知己聚會！ 點完餐侍應送上麵包籃，每人一個，配上幼滑牛油，麵包外脆內軟，再熱啲就仲正啲～ 嚟Grill Room食牛係必須的，試試網友推介嘅牛柳，medium rare熟度對辦，當然熱啲就更正，欣賞佢嘅配菜用心烹調，格紋雞脾菇燒得好香，烤南瓜片亦都軟糯好食～ 牛扒keep到水準之餘意粉好似進步咗，龍蝦尾扁意粉醬汁味道啱啱好，好creamy，龍蝦肉新鮮彈牙，份量仲唔細添！ 食到呢度其實都好飽但見佢咁好食就encore埋甜品，價錢略為進取但值回票價，的的骰骰嘅一件朱古力蛋糕底層用上榛子朱古力千層脆脆，唔算甜，配埋上面兩層幼滑mousse同埋伴碟嘅咖啡啫喱條，水準出色～ 已bookmark定下次同屋企人再去💓

二訪chutney，為嘅係佢嘅招牌butter chicken，當然華麗裝潢都係加分位，有邊個唔鍾意坐得舒舒服服，望住靚靚擺設食飯？🤪 Weekend嘅lunch menu有3個course，頭盤、主菜同甜品，主菜會配飯或者naan，成個menu肉類選擇比較多，但同樣有素食選擇～ 基本上我地都係跟晒侍應推介去揀，頭盤揀咗八爪魚同埋keema pav，前者夠腍之餘啲吸管位又有微微焦脆口感，後者係免治羊肉碎配牛油餐包，麵包外脆內軟，羊肉香料比例啱啱好，冚晒羶味又提升咗肉香😀😀😀 主菜係beef ribs同butter chicken，兩者配naan食都係一流，個人偏向稀身少少嘅butter chicken醬汁，至於naan就鍾意garlic naan濃郁嘅蒜香味～ 甜品款式會定期轉嘅，今日係斑蘭味嘅蛋糕，以印度甜品嚟講甜度可接受～

食開佳佳甜品都留意到隔離有間私隱屋高嘅鐵板燒餐廳，見佢啲套餐價錢都幾貼地，openrice又零負評，今晚就book枱試試～ 套餐價錢由$588起，我揀咗$788，貪佢有多個小食同鵝肝多士，仲有湯添～ 事實證明係值得試$788 set嘅，鵝肝多士竟然可以做到零油膩感，全靠入面嘅菠蘿醬同忌廉芝士，好似雪糕咁，同個脆脆多士好夾，鵝肝本身厚度適中有咬口🙌🏻 欣賞呢度嘅套餐唔係純廚師發辦，有得揀要咩海鮮同肉品，好似我唔食白鱔就可以揀扇貝同東星斑～東星斑煎到有微微焦脆感，好食～ 雞扒同樣煎得香脆，配上忌廉牛油醬好滿足～ 炒飯用蘭王蛋炒，蛋香比一般炒飯更突出 湯係豆乳面豉湯，冇平時嗰啲咁鹹，豆腐仲好認真切成花狀，又靚又增添口感～ 最後甜品揀咗豆腐雪糕，比起坊間嘅雪糕更黏，有啲土耳其雪糕嘅感覺，豆腐味都幾突出～

食過咁多間雞煲始終都係石門豐鍋最正，非常惹味，最鍾意佢嘅海量紫洋蔥，掛滿雞煲醬超好食～ 半隻份量兩個人食非常足夠，叫咗BB辣都好夠辣。 上桌一刻雞已炒熟，唔駛等即刻食得🙌🏻 醬料區執得企理，所有野都自助，想幾時再加配料都得 食完雞煲打埋個邊爐，揀咗手工餃拼盤，有魚皮餃、麻辣雲吞、韮菜餃等，款款都飽滿彈牙。 自家製響鈴夠脆唔太燶，好食🙌🏻 本地牛頸脊細份都唔少，肉味香濃唔韌。 蔬菜籃有唔少款式，用料新鮮。 食辣野免不了要杯野飲解辣，推介藍蝶雪梨，清清地唔甜，賣相仲好打卡able~

觀塘apm開咗cupping room, 呢間連鎖咖啡店嘅出品一向有保證，咖啡超香濃，今日經過發現佢同其他分店唔同，餐點係零零舍舍喺入面再間多間店中店，晚市有$198起嘅四道菜晚餐，選擇唔少仲包咗cupping room嘅飲品，超吸引～～～～～ 餐湯係羅宋湯，微辣兼有大量蔬菜粒，好開胃 頭盤有三款選擇，我地食咗羽衣甘藍沙律同埋焗田螺，沙律汁遮蓋到草青味唔錯，煙三文魚食落都幾新鮮；田螺有三隻，肉質爽口，配埋香草醬一齊焗好好食～ 主菜叫咗澳洲和牛同雞肉意粉，和牛預設五成熟，成品亦對辦，少見幫手切埋嘅扒有呢個質素，一啲都唔韌，薯條亦都非常香脆～ 雞肉意粉水準都唔錯，醬汁香濃，都有唔少雞肉汁，意粉質感al dente👍🏻

呢排少朋友生日，好耐冇食lifetastic蛋糕，心思思諗住去買返件食下，原來除咗蛋糕呢度仲有唔少前菜、主食等選擇，順手喺度食埋dinner🤣🤣 希慎店座位一半喺商場open area，靠近欄杆，感覺開揚。 叫咗一個沙律一個意粉，再加配餐湯。 胡麻汁牛油果豆腐沙律份量多味道較得唔錯，鍾意佢用上日本絹豆腐夠晒嫩滑。 意粉係明太子帶子三文魚子意粉，味道有驚喜，醬汁香濃意粉al dente，推介！ 主角西瓜蛋糕自然keep到水準，今次揀咗荔枝西瓜，比傳統款更清甜～

宴鐵板燒位處亨環24樓，可以高角度望到維港景致，今日約咗朋友嚟食lunch，全場包括vip房full晒，好在有訂枱🥲🥲 叫咗$448/位嘅lunch special menu，有齊刺身壽司同鐵板燒，好豐富～ 前菜有白栗米同磯煮鮑魚，鮑魚一啲都唔韌，粟米亦非常清甜。 刺身有八爪魚同埋厚切赤身，八爪魚肉爽脆，赤身甘香好食～ 壽司方面有油甘魚同地金目鯛，後者油脂更多配埋洋蔥漬，味道更有層次～ 嚟到鐵板燒環節，廚師先送上解膩漬物，苦瓜片微甘好好食 沙巴海蝦彈牙配埋濃郁蝦膏醬汁非常出色，帆立貝配上海藻汁相對清新。 鵝肝多士非常厚身，配上自家製藍莓醬幾特別。 牛有薄切同厚燒，薄切牛包滿香蔥比較清新，厚燒牛肉質嫩滑。 炒飯、面豉湯同炒菜都係水準之作，炒飯份量好多，女仔食唔晒😂😂😂

Espresso Alchemy喺太古坊開咗新店！餐廳命名Alchemy Origin，裝修靚咗好多好啱打卡，一直好期待到訪，終於等到暑假可以成行！ 糖廠街仲有工程進行，所以唔好聽google map講，一係就上天橋搵太古坊二座，一係就地鐵站過完馬路一直行右邊行到濱海街先轉入去🙆🏻‍♀️ 呢度嘅食物同飲品款式都好多選擇，咖啡固然係水準之上，今次嗌嘅earl grey chocolate同樣出色，朱古力味超濃郁～ 主食burger超大個，亦有香辣嘅薯角陪襯；carbonara夠晒creamy好滿足～ 到訪當日keto cake roll賣晒，但好好彩俾我地發掘到呢度嘅巨型loaf cake，我地揀嘅banana cake外表香脆內餡濕軟，推介大家一試！

作為vie won won 常客，最鍾意呢度環境靚食物質素高，難得係作為打卡餐廳咖啡超好飲，今日再同媽咪嚟食lunch~ Lunch set比假日單點更划算，餐飲可以加錢upgrade做餐牌內嘅任何飲品，flat white非常香濃，上次飲嘅dirty夠凍亦係出色之作。 Lunch包咗餐湯/沙律，蘑菇湯非常足料。 主菜揀咗雞胸沙律同豬鞍扒share，檸檬雞胸用咗泰式甜辣醬調味好惹味，沙律菜款式多亦加入柚子同蜜柑增加開胃感。 豬鞍扒肉質爽口，配菜豐富，南瓜蓉調味偏重同蘆筍甘筍等其他蔬菜一齊食味道啱啱好～ 甜品方面代名作固然係迷幻蘑菇，但今日嘅精選甜品水準同樣不俗，仲冇咁甜添～玄米菜戚風用上抹茶淋醬點綴，味道更有層次，而且口感鬆軟，食落罪惡感較低～

途經尖沙咀嘅小胖台灣便當，見佢裝修幾cute幾搶眼，我地又鍾意食台灣野就去試試。 餐廳分兩層，地下喺外賣機，上到一樓超闊落，梳化位多，比一般台式餐廳舒服。 叫咗兩個主食、兩個小食同兩杯飲品，出餐非常快，一喺收銀處落完單轉頭已有飲品，珍珠奶茶有甜度冰度選擇，我揀嘅係近期大熱嘅冷泡茶，茶味好出，啱晒食完炸物解膩。 主食叫咗一麵一飯，麵配嘅係鐵路炸豬扒，炸得幾鬆軟又入味；飯係三杯雞扒，加咗蜜糖所以甜味更突出。 小食水準好有驚喜，炸魷魚鬚用咗地瓜粉，好鬆脆，魷魚本身都唔韌；茄子好香濃，送飯就啱啱好。