嚟得韓國街都諗住食韓國嘢，點知未諗定食邊間嘅時候見到花月宮嘅宣傳易拉架，見個商場又好新淨企理，就上去試試。 叫咗個沙爹湯底，味道好香但唔會好杰好膩，用嚟打邊爐唔錯。 大部分餐廳都用咗手機落單，呢度都唔例外，一落完單食物勁快到。 蔬菜叫咗萵筍同埋皇帝菜，鍾意呢度嘅皇帝菜味道唔太重比較易入口，厚片萵筍好淋身。 牛肉有兩款選擇，我地揀咗牛小排，油脂分佈都平均，掛喺個木架度賣相討好。 響鈴係即炸嘅，食得出每層腐皮都炸得好脆，輕輕烚幾下又有沙爹香又保留到酥脆口感。 最出色係個烏冬，非常煙韌，店家仲備有一個烚麵嘅小筲箕，烚完烏冬輕鬆撈得返上嚟👍🏻 打邊爐唔少得嗌啲凍飲解辣，嗌咗一樽青梅竹馬，味道似蘋果汁，有啲爆珠喺底幾得意，$68一樽都夠兩人飲足成餐飯。

早幾日喺港鐵月台見到廣告，先知道渝味曉宇改咗名做方叔叔，店名大眾化咗，好在食物質素依然keep到，我最鍾意嘅燕餃同小酥肉仲係好好食～ 最鍾意呢道有得揀半份，就算兩個人嚟食都可以嗌多幾款，鴛鴦麻辣鍋一邊係可選辣度嘅重慶麻辣湯底，另一邊自選湯底選擇都多，想清清地可以學我揀菇菌鍋，想養顏飲濃郁湯頭嘅不妨試下佢地新推出嘅花膠雞～ 餐廳茶水包咗蕎麥茶，麥香突出，想再解辣啲就可以叫杯特飲，洛神花香橙特飲唔太甜亦有消滯效果。 改名後最大轉變係佢嘅紅糖糍粑變咗爆漿版，紅糖漿包咗喺糍粑入面，但都唔會過甜，仲冇咁易變乾變硬添～ 另外值得一讚係改名後好似連服務質素都一併提升，店員好殷勤幫每枱介紹、執枱同調較火力，整體感覺舒適～

同事介紹呢間位於上環文娛中心附近嘅fine dining餐廳，主打A5和牛西日料理，同朋友book咗枱去試試～

餐牌分set同a la carte，一場嚟到直接叫set試試佢嘅招牌菜式。

先上桌嘅係自家漬前菜，青瓜微辣爽脆，雖然係前菜，但作為每道菜中間kill time嘅小食都好唔錯～

下一道菜係caviar wagyu tataki，廚師用上法國Kaviari Kristal魚子醬，味道清新，半熟A5和牛薄片係肉眼嘅位置，以大根沙律代替壽司飯，以壽司嘅賣相呈現嶄新嘅味覺體驗～

跟住係塩漬蝦夷鮑魚配高湯凍，高湯凍入口之後慢慢融化，配合爽口鮑魚清淡好食，正好平衡返上一道菜～

之後呢道菜西日fusion嘅成分更高，唔係常見嘅日式泡芙而係Yorkshire Pudding，內餡係香濃幼滑嘅明太子mousse，加埋新鮮三文魚子，用手食更加滿足～

食主菜之前嚟個湯品，面頭鋪滿本枯節，係魚味非常濃郁嘅木魚絲，粟米忌廉湯濃到好似吉士醬，非常好飲～

重頭戲就係燒A5日本和牛喇，每人有5塊份量唔少，和牛後腰肉嘅位置軟腍度適中，外皮香脆，油脂豐富但冇一絲嘅膩感，點埋自家生曬牡蠣醬，蠔嘅鮮味加埋和牛嘅肉香真係perfect match~

尾聲係銀鱈魚釜飯同水牛芝士紅豆燒餅，釜飯有香脆飯焦，高湯醬油調味適中，燒餅夾住北海道紅豆，餅皮鬆軟～

上yoga前想搵啲健康啲嘅嘢食，之前食開嗰間pokebowl執咗，苦惱緊食乜好嘅時候search到原來同一條街近文娛中心嗰邊開咗間新嘅pokebowl店，個名叫poking非常易記，水準亦都唔錯～ 店舖行木系簡約風格，光猛舒服。有高身吧枱亦有矮枱，矮枱啲櫈係木櫈仔，但坐得都算舒服～ 時間緊逼直接喺signature bowl揀一款，揀咗有三文魚刺身同埋柚子醬汁嘅sweet up your life，刺身新鮮，青瓜爽口，牛油果夠熟入口好creamy，芒果粒微甜，柚子汁好清新，加上揀埋沙律菜底整體感覺好健康，食完好滿足～

今晚嚟到Lab Eat Bistro食晚飯，之前幫襯過尖沙咀嘅lab eat，會係偏向fine dining路線，而油麻地嘅bistro就走工業風，樓高三層嘅店舖座位數量頗多，但平日夜晚都好快full house。

叫咗蟹肉沙律作為前菜，用蟹蓋盛載蟹肉絲擺盤有心思，沙律醬有加到蟹膏，啖啖都充滿蟹嘅鮮味。

主菜試咗牛板翼扒同埋黯然銷魂飯，牛扒有幾款唔同部位選擇，欣賞餐廳會喺餐牌加入每款扒嘅肉質同脂肪比例等描述，等客人容易啲挑選到心水嘅牛扒。我地叫咗三成熟，外皮香脆入面依然係嫩粉色，幾腍幾好食。sides方面我地叫咗個法式洋蔥薯角，焦糖化嘅洋蔥痴實晒落啲薯角度，每啖都食到洋蔥嘅甜味，好正～～

黯然銷魂飯個飯底係忌廉汁risotto，醬汁香濃，叉燒用鴨胸整好創新，咬落好爽口。

食肉又點少得點杯酒去配返呢？嗌扒餐係可以用優惠價錢配杯紅酒嘅，但因為我只鍾意飲白酒就單點咗杯chardonnay，好易入口又有葡萄香。

成餐飯最有驚喜係個拿破崙，內餡除咗超幼滑嘅吉士醬之外仲有香脆嘅糖蔥餅，糖蔥餅甚至比酥皮更脆，係意想不到咁夾，推介～～～

上次同朋友weekend嚟過vie won won，對佢嘅all day breakfast同意粉印象超好，今日放假就帶屋企人嚟試埋佢嘅weekday set lunch，真係又靚又好食～ 餐廳分兩層，地下連花園，下午2點有日光曬入嚟個vibe好正～ 今次安排坐上層嘅另一邊座位，有個幾靚嘅水吧，座位都唔算逼，二人枱餐廳亦好貼心準備大型置物籃。 屋企人唔食辣，今次就叫咗帶子菠菜risotto同埋香煎sea bass，set lunch嘅好處係包埋湯或沙律，包餐飲亦可以用$20折扣嗌餐牌嘅其他飲品。Earl Grey Tea大大壺都唔駛補錢，而flat white亦係中上水準，好過唔少咖啡店。 餐湯係蘑菇忌廉湯，食到粒粒蘑菇，味道香濃，容器精緻～ Risotto嘅帶子熟度啱啱好，飯粒煙韌醬汁creamy好食～sea bass煎得好香，薯蓉同配菜都好食，係會有啲細骨食嘅時候要小心啲。 我地加$38嗌埋個甜品，有兩款選擇我地揀咗鐵觀音芝士蛋糕，擺盤幾靚蛋糕口感幼滑，亦食到絲絲茶香。 係值得定期回訪嘅餐廳～

之前嚟過三郎。燒肉，佢嘅燒肉真係無得輸，和牛油花分佈平均，入口即溶，今次見佢午市有鍋物套餐，同樣有靚牛食，就捉個朋友一齊去試。 今次嗌咗A5和牛&牛舌涮涮鍋御膳1人前，同埋棉花糖壽喜燒套餐，餐廳上菜速度好快，擺滿成張枱賣相超靚，即刻打個卡先～ A5和牛&牛舌涮涮鍋御膳用上昆布鰹魚湯底，湯底清甜，牛肉淥到緊緊熟再點芝麻醬超好食～除咗主角牛肉之外御膳仲包咗蒸蛋、烏冬、野菜同埋蕨餅，非常豐富～ 有別於坊間連鎖棉花糖壽喜燒店嘅做法，呢度會將棉花糖懸掛喺個鍋上面，用熱力令到棉花糖有落雨嘅效果，好靚～牛肉同樣出色，壽喜鍋湯汁濃稠用嚟烚牛肉掛汁力強味道香濃～

食慣港式、重慶式嗰啲重口味串燒，嚟到朋友介紹嘅Sakeh簡直係一個全新嘅境界，環境靚食材質素超高，重點係廚師只用超輕手嘅調味，帶出食材嘅原有味道同質感，呢啲真係對用料超有信心先做到👍🏻👍🏻👍🏻 餐廳喺天文台道最頂嘅酒店，環境舒適座位闊落，sake tasting店家推薦「作」呢款微碳酸感嘅直汲純米原酒，唔會有辣喉感覺，有淡淡酒香，送串燒一流。 當晚有個汁煮鮑魚嘅優惠，鮑魚又腍又入味，係個非常好嘅opening 呢晚都叫咗唔少串燒，仲有燒雞皮同芝士年糕，全部都好好食～燒雞皮難得毫無油膩感，係燒到一絲脂肪都冇但又唔會燶，盡見廚師把握火喉嘅功架，咬落去好似魚皮咁酥脆，未試過真係想像唔到雞皮都可以做到呢個口感。 芝士年糕都係燒出嚟嘅，口感軟糯，好有驚喜。 串燒嚟講MVP係豚肉荔枝卷、雞軟骨、厚切牛脷芯同羊架，牛脷芯係驚為天人地好食，成舊擺入口食到外邊脆身、中心軟腍爆汁嘅效果，冇得輸😍😍😍😍 其他幾款都係juicy之選👍🏻

作為ninetys常客，見佢喺K11開新分店當然要去試下，位處G/f中庭，非常易搵。 只可以話ninetys分店真係一間靚過一間，餐廳中間嘅大樹圓枱好eye catching。 叫咗兩個主菜，Fillet Pasta同Lobster Risotto。Fillet Pasta用咗Rigatoni，粗管通粉掛汁能力相當高，魚柳唔太鹹正常發揮，驚喜位係個忌廉，係酒樓蒸魚嘅薑葱味融入個忌廉，非常特別。 Lobster Risotto有半邊龍蝦，大小適中，易拆肉嘅；重點係個龍蝦汁risotto，醬汁味道非常出色，飯粒係barley rice，比正常飯粒煙韌又高纖，唔錯～ 咖啡喺眾多分店中算係中上水平，附送嘅杏仁冇漏氣夠晒脆👍🏻

香江花月三間分店嚟講銅鑼灣店應該係最大最奢華嘅一間，保留復古韻味嘅同時，成間餐廳都有大量自然採光，感覺光猛企理，枱與枱之間分隔得遠，私隱度滿分。 上次喺佐敦店試過佢嘅打卡類點心，水準非常高，今次就試試佢嘅傳統點心，水準拍得住其他高質嘅酒樓，欣賞呢度嘅出品唔會好油膩，連燒賣嘅外皮都特別清新🤣 雪山叉燒包非常酥化，一咬落去外層就會鬆開，好似食緊手工牛油曲奇咁～ 蛋白炸雀巢賣相主要靠個裝飾用鐵架但味道都唔錯，齋食脆脆口感又得，浸完湯當普通麵食亦ok~ 甜品要等耐少少但都係值得嘅～原個椰皇燉鮮奶，加咗蘆薈甜味清新，鮮奶好滑又夠熱，食完好滿足～