Treehouse有多間分店，咁啱見到原來airside都有一間，成間舖頭採取自助形式，落單、斟水、執枱全部自己搞掂，有晒指示非常清晰。 第一次幫襯所以salad bowl同sourdough wrap各嗌一款，salad bowl賣相靚啲但個人鍾意sourdough wrap醬汁同菜嘅比例，推介要揀garlic hummus，如果係唔識揀要佢配好嗰啲都請search for呢個配料，真係超好食！！！ Signatured lemongrass tea無糖非常清新，lemonade都係唔錯嘅選擇，酸酸地好開胃。我地亦有叫個brownie share，vegan但口感唔比正常版本差，加上香濃朱古力味值得一試🙌🏻

叁不館賣舊香港情懷，但同時執得企理乾淨，湯底食材選擇都多，同埋佢個自家製葱頭油真係超香，加落個醬汁成件事昇華咗唔少，剩係為咗佢都要幫襯多幾次。 沙爹湯底依然咁出色，今次嗌埋個清淡嘅蕃茄湯平衡下 蝦膠油炸鬼有特色，牛肉夠腍蔬菜又夠新鮮 今次朋友建議嗌佢嘅手工餃，個饀味道有驚喜！ 響鈴即炸自然夠晒鬆脆，浸落沙爹湯不得了 呢度嘅野飲係幾解渴，唔會太甜，我地4個人嗌兩榨就啱啱好 推介港島區朋友去試下，去過一次就會keep住去🤣🤣🤣

朋友推介天后嘅叁不館，懷舊風格嘅邊爐店，入到去枱同枱之間擺得好闊落，地面乾淨唔痴笠笠，first impression好好～ 醬料選擇幾豐富，必揀自家製沙爹醬同葱頭油，加咗葱頭油個醬即刻香十倍！ 揀咗雙拼湯底，蕃茄清清地幾舒服，沙爹香濃但唔會過鹹。 手切牛頸脊爽滑好食，蔬菜都唔貴又新鮮，海鮮擺盤靚又冇沙，重點推介蝦膠油炸鬼，出面好少見，好有特色。 仲有必食嘅就係即炸響鈴喇，一啲都唔油，吸滿沙爹湯就更加好食。

平時好鍾意食泰菜，但就唔想去九龍城啲舊餐廳食，畢竟環境都好影響成個用餐體驗！今日揀咗新城市嘅Here Thai Market，停車場一上嚟就見到，而且裝修光猛又有熱帶風情，好鍾意～ 嘢飲唔會過甜，菊花冰有用個竹製嘅飲品套裝住好有心意，而椰青係冰鎮住咁上桌，涼浸浸超爽 食物方面船河嘅湯底會係比較舒服唔太鹹，炒闊河粉就相對惹味啲，個人鍾意炒河多啲🤣🤣 串燒豬頸肉個汁係重點，去除晒油膩感仲有魚露香茅嘅香味 芒果糯米飯煙韌好食，芒果量多又夠甜，推介～

之前嚟過Harlan’s參加朋友婚宴，已經對佢嘅無敵維港景心心眼，所以今次就自己訂枱同另一半嚟個fine dining~ 晚餐有四道菜同六道菜套餐選擇，後者前菜同主菜可以各揀多一款，一場嚟到我地就叫晒兩款套餐，咁就可以食晒成個餐牌嘅嘢食😍😍 餐包可refill，夠熱夠脆 頭盤藍龍蝦沙律加入話梅汁好開胃，香煎北海道配上脆西米夠特別，龍井煙燻鵝肝去晒啲油膩感同內臟腥味，就算平時唔太食鵝肝都覺得眼前一亮。 餐湯係牛肝菌湯，侍應會先送上裝有菇菌嘅湯碟，再倒入湯，湯打得好幼滑。 主菜紅蝦扁意粉醬汁香濃蝦肉鮮甜，西班牙黑毛豬腩入口即溶，配埋紫薯蓉平衡油感，牛腹扒肉香吸引但牛肝菌薯泥更有驚喜。 甜品賣相精緻，紅豆雪糕冰感較重，綠茶慕絲食落唔甜好啱女仔～

朋友推介呢間omakase，離Time Square唔遠，位置都幾方便。 師傅一人主理，環境雅緻，一共10個座位。 今晚師傅精選唔少春日食材，先上頭盤，黑豆嘅甜好襯托到其他食材嘅鮮味，烏魚子配蘿蔔呢個食法幾特別。 同其他omakase唔同，食完開胃前菜先飲碗大蜆湯，來自三重縣嘅蜆肉鮮甜無沙，師傅話個湯冇落一粒鹽但都好夠味。 刺身有真羽太、縞鰺、白蝦、赤貝、白見貝同埋水八爪魚二食，樣樣都好新鮮，最深刻係水八爪魚嘅爽脆吸管，配埋勁度十足嘅wasabi漬，非常好食👍🏻 炸沙甸魚魚苗作為間場小食幾有趣，脆到好似薯片咁～ 煮物有魚肉同大根，大根煮得好入味 海老真丈冇平時啲蝦丸咁熱氣，但食得出真材實料鮮蝦味 壽司有針魚、金目鯛、平貝、櫻鱒、池魚、關鯖、魷魚同拖羅等，最後亦有海膽手卷，當中關鯖最有驚喜，鮮甜嫩滑程度完全扭轉平時對鯖魚嘅印象。 麵豉湯唔會過鹹，亦有好多蔬菜。 甜品有士多啤梨同芒果芝士蛋糕，蛋糕唔甜，面層係芒果蓉好清新👍🏻 呢間omakase定價合理，師傅友善健談，係聚腳好地方～

嚟過flames幾次，貪呢度泊車方便，食滿$200已可泊2小時，同埋餐牌啲選擇真係幾啱食，次次唔重覆都仲有嘢想試🤣🤣 呢度嘅沙律冇得輸，沙律汁清新開胃，今次叫咗seared tuna呢款，吞拿魚份量多到係平時啲餐廳嘅double😂😂😂就算多啲人食都ok 小食雞翼非常香脆，好似加咗少量麵包糠去炸咁，好好食～ Pasta揀咗蟹肉penne，個蕃茄忌廉汁好creamy，長通粉軟硬度適中，掛汁力高。 同埋叫咗杯港式奶茶奶昔，有香濃茶味但下次可叫少甜～ 佢呢間仲有戶外用餐區，就算唔食飯嚟happy hour chill下都正～

唔知關唔關事，但窩子整窩夫真係有一手，非常鬆脆又有蛋香，今晚叫咗個手撕豬腩窩夫三文治，嚟到真係嚇親，超！大！碟！平時啲cafe只會俾一半份量，呢度無論窩夫定手撕豬嘅份量都超多😍😍😍 欣賞呢度嘅手撕豬非常juicy，加埋蕃茄一齊煮冇咁膩，配埋窩夫一齊食真係食唔停口 最近窩夫新推出咗款酥皮pizza，幾得意似係用春卷皮摺咗個碗咁，脆卜卜，我地叫咗大阪燒口味，亦都有濃香照燒汁同大量椰菜👍🏻 最後叫咗個拿破崙同杯mocha，mocha香濃拿破崙嘅custard cream亦都夠滑，不過食得落的話我會建議叫多份甜味窩夫，因為佢個窩夫實在太正了🥹🥹🥹🥹

食西餐好多時候小店會有更大驚喜，今日放工揸車嚟到Quayside食Mano，餐廳面積唔大但座位擺得好闊落，裝修亦都雅緻舒服。 今日專程嚟食佢嘅手工pizza，見有成10吋咁大我地就剩係再嗌多個沙律同tiramisu share 沙律揀咗burrata cheese蜜桃火箭菜沙律，cheese好creamy, 火箭菜嘅olive oil dressing好香，加埋酸酸地嘅車厘茄成個配搭無得輸～ 手工pizza我地揀咗carbonara口味，醬汁好食餅底又夠脆，驚喜位係每隻蛋都係流心，薄餅邊都非常煙韌。 Tiramisu嘅水準都唔錯，好creamy，手指餅夠濕潤但唔會去到水浸level🤣

Chatterbox分店越來越多，仲開咗間喺airside! 呢間分店開喺mtr層超方便，入面嘅座位都幾多幾闊落，裝修亦係一貫嘅南洋風情。 個人好鍾意佢個喇沙湯底，今日嗌咗雞肉喇沙米線，雞肉係海南雞嘅質地超嫩滑，仲有超索汁嘅豆卜，連炸魚片都好好食😆😆 海南雞飯當然係呢度名物，可以揀雞胸，啱晒女仔食，油飯夠熱好香，仲有碗湯跟埋。 夜晚出街食都係想嗌碟菜，冇諗過呢度嘅小棠菜炒得咁好食，好多蒜蓉每條都好爽脆，推介～