投openrice今年最佳餐廳嘅時候發現咗哩間餐廳嘅存在，又咁啱有事出觀塘，路過嘅時候就走入去食試吧。

睇過啲食評，有人話哩間嘅雞有時會烤得有啲乾的，所以我有考慮過食【巴東牛肉飯】架 但記得上次去荃灣嗰間好出名嘅【正宗山西刀削麵】，因為我個人唔係幾中意刀削麵嘅口感，反正嗰段時間我又經常喺嗰邊，所以食咗醉雞菜飯，結果大失所望。結果到宜家都仲未有機會返翻去，令我有多少耿耿於懷添 今次唔博喇，就要大受歡迎嘅【印尼黃錦飯】啦



先食右上角嘅豆。。。辣係第一感覺，醃辣咗嘅豆令旁邊嘅飯都變辣了 但其實並唔係太辣，辣得黎保仲留咗豆本身嘅清甜味，豆口感嫩嫩的～可能係因為廚師知道豆算偏辣，唔係個個人受得起，旁邊放咗兩片新鮮青瓜協調一下，非常唔錯 黃飯帶少份量嘅薑令到啲飯唔會有單調嘅感覺，亦唔會搶走其他餸嘅風頭，口感乾中帶軟，廚師深明此中之道啊 因為食咗啲辣野，所以我想試試左下角嘅瓜，連帶食咗啲椰絲。哩隻瓜感覺係節瓜，軟軟的，調味甜中帶鹹，但唔會過濃，感覺上就似祖母輩嘅出品，食得舒舒服服 椰絲係橙色的，味道同一般白色嘅椰絲唔一樣，稍為甜少少，感覺上就係白糖同黃糖之間嘅分別 但辣豆係辣的，同瓜嘅甜味完全唔同，就好似食緊兩道菜咁，令我有種怪怪地嘅感覺。但我唔知道正宗嘅【印尼黃錦飯】係點嘅，所以覺得怪歸怪，但不予置評 當然同時亦試埋旁邊嘅花生，甜甜的，係蜜糖花生，一粒粒嘅花生本身夠香，俾啲清甜嘅蜜糖粘住，整體嘅味道又香又甜 我唔知哩味花生係唔係自製的，但味道真係幾好 之後試嘅就係右下角嘅【巴東牛肉】了，之前喺灣仔【莎巴】食過，兩者感覺好唔同，【莎巴】嘅出品味道好濃，非常地濃，牛肉粗中帶軟，同油酥餅一齊食覺得好好味，但真係好濃，同濃過龍嘅感覺只差一線，好有個人風格 哩間嘅出品就完全唔一樣喇，牛肉嫩嫩的，煮得好入味，係甜中帶鹹的，感覺上係紅蘿蔔嘅甜，加上牛肉味，配合得認真地好，好舒服，平易近人得多 汁嘅份量亦俾得啱啱好，冇過多亦冇唔夠，有經驗 食完濃味嘅牛肉，就想試試隻蛋了。試過其他地方嘅滷蛋，唔係黃到爛，就係哩隻，一般睇到哩種白色都打定輸數。因為要保持到外黃內白嘅靚樣之後仲要入味係幾有難度的 我一啖搞掂佢。。。嗯。。。都幾好味啵 意想不到，滷味食落舒服，口感結實。白色的蛋白，淡黃色嘅蛋黃都咁夠味，真係有啲匪夷所思 最後要試嘅就係左上角嘅烤雞了，係一件雞胸肉，哩個部位嘛，烤得唔乾就收貨了，試啖，口感偏實，未算乾嘅程度～燒烤味的，味道中規中矩吧。 整體味道都幾好味，試下冇壞，但總覺得好似少咗種親切感，應該冇下次喇～

難得撞正朋友忠哥放假，我一家三口就入沙田探下佢吧。午飯時間，我地由瀝源行到去連城廣場，都唔覺得有咩特別想食，去到盡頭見到哩間食店，感覺上比較實惠，就入去試下吧～ 坐低安置好BB，就睇下有乜好食先。忠哥話想食【豬手飯】，老婆喺南非嘅時候食過幾次印度人煮嘅咖喱之後就中意咗哩味野了，加上食過 大快活 嘅出品，就成日想食了，就【咖喱雞飯】吧 我睇黎睇去都唔覺得有咩特別好食，就黎碟【牛脷飯配洋蔥汁】吧，除咗忠哥想飲奶茶外，我同老婆都想試試佢地個【例湯】～

先上檯嘅係【豬手飯】，賣相唔錯啵，豬手上有榨菜粒，唐生菜鋪底，旁邊有粒小番茄，青瓜片，仲有個醬汁添～加埋有一碗分量嘅油飯，感覺好豐富啊 試試啲豬手先～夾一件點下啲汁。。。其實味道唔差的，豬手本身嘅味比較寡，但連榨菜粒加醬汁一齊食，味道就合理得多，整體上就算係食得過了雖然有啲位唔係太易咬，但口感軟中有咬口，經濟飯餐，要求唔好太高，其實算係咁喇～（評分 : 6.5/10）

跟住就係老婆嘅心頭好咖喱雞配白飯了。但賣相唔係幾吸引啵，啲雞好似好細件咁，切成一粒粒容易入味嗎？ 分量感覺上亦唔夠多，聞落亦唔多香。。。試試味先。點講呢。。。。。。唔係話難食，但味道一啲都唔突出，細細件嘅雞，加上平平無奇嘅咖喱汁，可以話。。。冇風格囉，食飽個肚行出門口都唔記得自己食過啲乜嘅感覺囉。。。 整體黎講就係寡囉。。。冇乜好食囉。講真！不如【阿活咖喱飯】（評分 : 4.5/10）

最後上檯嘅係我隨便叫嘅【洋蔥汁牛脷飯】了，眼睇都唔差，3片正常size嘅牛脷上面淋上洋蔥汁，再搭些許大白菜，飯嘅份量都唔少，應該可以好好開飯喇呱。洋蔥汁係普通茶餐廳嘅正常味道，汁煮得啱啱好唔會過稀，調味亦正常好感動啊，終於食到啲冇投訴嘅味道了～～～（洋蔥汁都煮唔好嘅話仲學咩人開鋪呀）但份量就真係少咗啲喇，我正常咁食，食咗半碟飯，一件牛脷，同啲淡而無味嘅大白菜之後就冇曬汁喇，搞到最後要乾啃。。。 牛脷本身輕輕煎過，口感唔錯，但味道偏淡，可能煎嘅時候冇薄薄咁灑少少鹽呱，但冇煎乾，感覺上已經幾好了。但喺洋蔥汁唔夠多嘅情況下，原汁原味嘅煮法就會凸顯咗牛脷嘅特有``風味 '' 囉，所以我老婆試咗啲啲就放棄咗喇 啊，啲白飯口感正常，亦冇隔夜餿味，令我倍感安慰 （評分 : 7/10）

最後講下今日例湯【椰子雞湯】吧，雞湯味唔鮮亦唔甜，普普通通，味道正常，比上不足，比下有餘囉～例湯哩味野，差起上黎真係可以令你完全唔想飲加嘛 哩碗湯味道再一般呀，都仲有好幾片椰子可以咬下吖，幾真材實料呀 （評分 : 6.5/10） 食完就走人喇～但老老實實，連城廣場哩個位嘅租金應該唔低，以佢地咁嘅食物質素，哩間野究竟憑咩喺哩度立足架？？？ 真令人費解

齋腸。。。熱熱的，軟軟滑滑的腸粉一向係我老婆嘅心頭好，每次見到都想食 今日一家三口路過【南龍粥店】，老婆又想食了，因為BB都中意食佢食得慢又坐唔定，我就入去買份外賣吧～買完出黎交俾老婆，放好啲散紙，連個銀包都仲未擺返入袋，就已經聽到老婆嘅投訴聲了 有冇咁差呀 我黎試試。。。哦～明白了，煙煙韌韌粗礦嘅腸粉好有口感，非常真材實料～厚厚的，好濃嘅米香落足本 溫度屬微溫程度，將燙傷喉嚨嘅機會減到最低，非常貼心，俾BB食之前都唔使先吹凍了 淨係見到BB食到開開心心嘅表情都心滿意足啦～ 有啲想入返去擺低tips添 好！可以去評分了 。。。。。。

早上10點左右經過，未食早餐有啲餓添～就買啲飽定下肚吧。望下價錢。。。比一般麵包鋪貴少少，冇所謂啦，買完即走，趕時間，快！ 就黎【黑椒雞肉燒餅】【雞尾包】【菠蘿包】各一啦。

呵呵，個燒餅造型唔錯～
鹹中帶甜黑椒味夠，又唔會太辣，ok啵～ 咬開可以清楚睇到一點點嘅黑椒同雞肉絲，食落似雞蓉，但依然食得出軟軟嘅雞絲，味道複雜，燒餅型嘅包口感到唔錯，唔乾，值得買黎玩下

菠蘿包就差咗啲喇，味道偏淡我唔批評，一黎我嘅味覺可能俾先食嘅黑椒包影響咗，二黎年輕一代講少鹽少糖講健康。但包嘅口感就真係差咗啲喇，同隔夜麵包差唔多吧 雞尾包就好少少，但都相差無幾，5蚊個架，俾啲質數好wo，要我幫手俾租都要我俾得心甘情願嘛。

朝早起身，望下窗外，當堂眼前一亮，之前一段時間都天陰陰的，今日居然有陽光wo，一於出去曬下太陽吧 好耐之前睇過蔡瀾嘅一個電視節目，知道上環有一間非常唔錯嘅粥店，老婆意思係想去啲好少去嘅地方，適逢其會，就一家三口一齊黎試試哩間【生記】嘅出品吧～ 去到上環，12點半午飯時間。。。又唔係喺哩頭返工，早唔到遲唔到，我地居然哩個時間到，排隊係無可避免架喇，就睇下要排幾耐囉 【生記】喺哩個角落係有3間鋪的，我地本來排喺粥品門口的，排咗陣有個員工同我地講隔離麵店門口冇咩人，排嗰邊啦，一樣架咋 好好好，我地就轉移陣地，走咗過去排喇，就排多5分鐘左右就可以入去喇～ 坐低後就即刻落單喇，我老婆中意食【魚腩粥】，就黎碗啦，再黎碟【炒米粉】吧。。。黎到咁遠，要多份【煎魚餅】吧。。。反正都係喇，俾埋碟【皮蛋】我 （食到差唔多，問咗老婆大人意見後，再補多碗【魚腐米線】，但一黎我俾碗米線嘅評語比較多，二黎屬於米線鋪嘅出品，所以都係喺米線嗰邊開多個食評吧）

先上檯嘅係炒米粉，調味適中，鹹度啱啱好亦平均，配料嘅肉絲應該有先炒過，所以碟米粉味道一啲都唔寡，口感係偏軟嗰種，唔係話好好味，但睇得出配料配搭方面有認真考慮過，紅蘿蔔絲，椰菜，青光菜，榨菜肉絲等等應該有都有了，每樣份量都唔太多，控制成本得黎，亦唔會顯得配料多過米粉，但就真係好碎囉，冇條長，食得唔係咁方便，嚴重影響咗口感
炒米粉食到差唔多就上【皮蛋】喇。老實講句，見到就唔開胃，中間蛋黃睇落感覺上霉霉地咁，試啖先。。。隱隱約約咁透出一股阿摩尼亞味 嗰種令人惡心嘅味道唔算好犀利，我相信如果切碎佢，掉落去煲粥應該冇特別問題嘅，但就唔適合就咁食或者做涼拌囉 皮蛋哩味野，真係要試清楚先決定好唔好攞出黎奉客呀！好難頂加嘛

跟住上嘅係煎魚餅（本來係有4片的，老婆手快，都未影相就冇咗兩片了，佢真的餓了，BB亦餓了） 哩份魚餅嘛，味道中規中矩，冇煎得太乾，保留咗魚本身嘅味道，但可能已經一早煎定，所以唔係好香，口感偏軟，生意好成咁，唔好太大期望

每次去西貢我老婆都好掛住【金山粥店】嘅出品，價錢便宜味道又好，魚腩新鮮又大大件，粥底雖然唔係非常香，但煲得都算綿，已經算係中上之作了 雖然我對粥冇乜情意結，但確實係有期待的 等咗咁耐，魚腩粥終於上檯了～試試先，粥底煲得算爛，但食落唔係好綿，米亦唔夠香wo。。。 魚腩份量都唔少，亦算新鮮，但煮得過火咗少少，影響咗整體口感，有種唔係咁好食嘅感覺。。。 得罪講句，味道其實唔差，但係真係冇乜特別，對唔住我俾出去嘅38蚊囉 最後總結，從【炒米粉】到【煎魚餅】到【魚腩粥】再到我後加嘅【魚腐米線】都俾咗我一個強烈感覺，食物配搭的確花過心思，有今時今日嘅名氣睇得出原因，但出名喇，生意好喇，就顧唔到品質喇。。。。。。算啦，走喇，埋單。

最近成日都天陰陰咁，好耐冇見過太陽了，難得一見，就出黎曬下啦 聽聞【生記】嘅魚湯係上環一絕，早就想黎試下喇，就今日啦～ 中午12點幾，午飯時間。。。。。。又唔係喺哩頭返工，我早唔黎遲唔黎，點解係哩個時間架 老婆話好肚餓啊。算，排隊。。。 其實我仲點咗其他野食的，但我後叫嘅【魚腐米線】俾我嘅印象太深刻喇，所以我特登開多個食評，去記錄今次嘅經歷
叫完，等咗5分鐘左右就上檯了～ 嗯。。。碗湯顏色怪怪地。。。。。。識煲魚湯嘅都知道，煲湯之前先煎煎條魚，放薑，條魚夠新鮮，碗湯就會呈現出一種好自然嘅，帶淡黃嘅奶白色，就算唔白都一定好飲（其實如果條魚新鮮，你冇揀啲古靈精怪嘅魚，唔係急凍魚，湯嘅顏色想唔白都難）但哩碗湯嘛。。。個顏色白得黎好唔自然，白色，但又有啲透明。。。。。。 我想咗一想，得出一個結論。。。如果唔係因為廚房加米線落魚湯度嘅時候完全冇隔走啲水，趕唔切咁就咁倒落去，咁就應該係啲湯溝咗水囉。。。。。。 如果係因為前者嘅原因，咁我嘅評語就係個做廚房嘅好唔專業，好好一鍋白白嘅靚湯都俾佢搞成咁，炒咗煮米線條友去啦！！！ 但如果係後者嘅原因。。。。。。人地鋪頭生意太好，魚湯準備唔夠，冇理由有生意都唔做架，咁有原則做咩，又唔可以當飯食，反正自己唔係第一個，亦唔會係最後一個，又有乜所謂wo～～～ 我冇興趣知係咩原因，所以我冇去問佢地，嗰刻我淨係想知道碗湯嘅味道如何，話唔定人地識變魔術呢～ 我飲咗一啖。。。。。。當然神跡並冇發生（咁嘅顏色都好飲我仲驚，都唔知佢地加咗啲乜落碗湯度，好彩一切正常）可以飲得出有淡淡嘅魚味，味道偏淡，落唔夠鹽（？），魚香味好淡，絕對唔難飲，但冇乜好飲囉。。。冇魚腥味係唯一優點 試試啲米線先。。。淡，好淡，米線本身淡好正常，罪在于湯，但啲米線淡得黎又煮淋咗wo 又淋又冇味點食呀！ 咁我當然蠢唔曬，我識加調味料嘅。。。。。。 唯一希望就放咗喺啲魚腐度，其實話就話叫魚腐，但睇落似煎炸過嘅鯪魚球，大大件，賣相都幾討好吖 試下味先。。。嗯，味道的確有啲似鯪魚球，入面有少少蔥，魚味幾足，味道對板，唔係話特別好食，但都算係食得過了 碗米線幾錢我已經記得唔係好清楚了，30幾蚊呱。。。反正以一份食物黎講，味道永遠佔一個非常重要嘅位置，碗野都唔好味，價錢幾便宜都冇用啦！ P.S. 非常遺憾，我叫咗嘅其他野食，味道都係偏向劣評的。。。。。。

成日話好少黎香港島哩邊，但機會總係接踵而來，今日又黎到灣仔喇，做完野又到午飯時間，我唔客氣了 再次喺附近，上次食過哩間嘅【巴東牛肉】，賣相係怪咗啲，但味道的確唔錯，就做返次回頭客啦 今日我嘅目標係【海南雞飯】～

上次黎【莎巴】係happy hour時段，望住菜譜，花多眼亂，樣樣都好好味咁，我用咗成個字先決定到食乜 今日黎到門口，見到set lunch有海南雞飯，真好彩，唔駛煩～ 我未到12點就入坐，入面唔係好多人，快快坐低落order先～【熱咖啡】一杯～

熱辣辣嘅一杯咖啡，附上牛奶一小杯，黃糖一包～咖啡味道冇乜特別，但還算濃郁，亦冇奇怪嘅苦澀味，比一般貨色要好嘅出品除非你有特殊喜好，如果唔係牛奶就唔駛加喇。糖我就成包落喇，落完都唔係點甜

差唔多同時上檯嘅係【mussel 忌簾湯】一碗，湯味還算鮮，冇局部鹹，質感整體適中，味道中規中矩，一碗湯居然有成8粒左右嘅mussel，都幾慷慨，不過都唔係咩新鮮貨 湯夠熱，飲落都算舒服～

湯飲到差唔多，主菜【跟餐版海南雞飯】就上檯了 份量對我哩個大男人黎講係比較少的，先試試啲油飯。。。雞油味幾香，比尖沙咀【好時沙爹】嘅出品要黎得香，食落味道都唔錯，食到有少少薑，但感覺淡咗少少，不過哩個只係一時間嘅感覺，因為一碟飯嘅味道係要睇整體加嘛 當我夾一件雞同啲飯一齊食嘅時候，居然會俾到我一種完全唔一樣嘅感覺。淨係食雞嘅話會覺得幾有雞味（講緊肉連皮一齊食嘅情況下），雖然唔係件件都滑，但味道唔錯，不過感覺上好似唔多夠油香。。。但兩者配合一齊食嘅時候，雞嘅味道就彌補咗飯唔夠味嘅問題，而飯嘅油香同時令啲雞油香起黎，好！食得好舒服，上上之作 順帶一提，雞嘅味道同口感同【好時沙爹】嘅出品頗為相似，雞味一樣地足夠（總覺得近年啲雞冇咩雞味，同20幾年前街市貨差得遠，唔通係宜家啲雞食得藥多），一樣唔係件件滑，唔通係海南雞嘅特色？ 付上嘅薑蓉味道偏淡，但同雞飯一齊食嘅話，佢適當咁增加咗整體層次感嘅同時，又唔會影響咗本來食落好舒服嘅感覺，唔加可惜 值得一提嘅係甜辣醬，係甜中帶辣，味道調得啱啱好，完全唔會過甜或者過辣，又或者有甜辣不相容嘅奇怪感覺，口感清醇，食落非常舒服，係我食過最好嘅甜辣醬 唔知係自家出品定係買返黎嘅呢

雞飯食完之後，侍應收走空碟，set lunch嘅甜品就隨即奉上。（服務唔錯）今日嘅甜品係【椰汁糕配椰絲】，清甜嫩滑嘅椰汁糕，配上懷疑用黃糖處理過嘅椰絲（比一般食到嘅白色椰絲要甜少少，自家製造？？？），一清一稍為甜，一滑一粗，粗中帶幼，層次分明，又一誠意之作 埋單，盛惠75加一，83蚊～以哩個套餐嘅高水準黎講的確物有所值 但以好似我咁嘅男人黎講就只有6成飽了，食完總覺得差咗啲乜咁（可能飲返杯水之後感覺會好啲。。。。。。啊，佢地冇俾到水我），所以我行咗出門口之後，我就繼續搵食了

啱啱喺一間馬拉菜館食完午飯，但感覺上覺得唔多夠飽，行去地鐵站途中就俾路邊嘅一個number吸引住了。。。【$26】。。。係咩？究竟係咩？。。。【菠蘿雜扒意粉】。。。。。。



我冇睇錯亦冇打錯，係一間只有6個坐位嘅外賣店，真係26蚊一份意粉！感覺上好便宜啊！（但其實想清楚，都唔係話好便宜姐）午餐有6種菜色，以外賣店黎講午市選擇算唔少了既然我係因為意粉而留步嘅，就睇下意粉有咩選擇啦～兩種選擇，【肉醬意粉】【菠蘿雜扒意粉】，我就選擇後者啦

俾錢，然後等，影幾張相，話咁快就有得食。因為座位唔多，我都冇決定外賣好定係坐低食，但咁啱有客走，我就順勢坐低了。。。好彩有位咋，如果唔係都唔知點算 打開個膠蓋，一股熱氣衝上黎，熱辣辣，哎呦～ 揸住提供嘅軟軟嘅膠叉同膠羹，真係要小心翼翼。。。好小心咁用隻軟叉吉入塊豬扒度。。。吉得入 冇得切架喇，咬啦 豬扒軟軟的，當然唔會好厚，正常厚度，嗯。。。有用鹽醃過，但個醬汁味道唔夠出，影響咗整體味道，肉味一般。。。一塊豬扒軟當然係好，但又軟又冇乜肉味，唔通係用。。。。。處理過？？？ 算吧，快餐嘛，又唔係成日食，一餐半餐，冇所謂啦。。。 試試啲意粉先。。。軟。。。好軟。。。太軟，軟到爛嘅程度。。。味道。。。淡！好淡。。。淡而無味嘅程度 一定係煮意粉嘅時候冇落鹽同油 意粉加埋個醬汁。。。。。好難食 真係從未如此難食過呀！ 快啲食完就走啦！（阿婆話齋，粒粒皆辛苦呀，食得落就食啦，唔係差到難以接受就食埋佢啦） 醬汁配料有洋蔥，番茄，菠蘿。。。 雜扒有豬扒，煙肉，半條腸仔。。。 意粉，淡而無味，但好大份 講完！走！！！

上次食完碗馬蹄沙湯圓非常非常滿意，當然會再返黎啦～ 一坐低望下餐牌，向事頭打聽下有冇清心丸先。。。又冇貨。。。冇所謂，咪下次囉 睇咗一陣餐牌，都唔知食咩好，好彩冇咩客人，揀多陣，最後決定要碗【綠豆沙湯圓】啦～

即叫即到當然～兩樣都係事先準備好的。其實我都係實在想唔到食乜我先叫哩碗糖水，我知道馬蹄沙好食，但上次食過，想試其他野，坐到自己都唔耐煩就就咗佢了。一黎我對哩間鋪嘅出品有信心，二黎我覺得越簡單嘅野越考技術，哩間係老店，所以雖然我叫嘅糖水咁傳統，但其實我係滿心期待的～ 試試綠豆沙先，嗯，煲得夠爛，但依然保持原粒狀態，亦好香，甜味啱啱好，一啲都冇太甜，唔錯

湯圓係潮式嘅厚皮麻蓉湯圓，就好似潮洲男人咁，係有啲粗礦，但夠穩，有責任心。哩粒湯圓亦一樣，皮厚厚的夠穩夠實在，內裡嘅芝麻餡炒得夠香，但一啲都冇焦，味道唔錯，幾有意思的～但一般香港新一代都好似比較中意皮薄餡靚的 簡單得黎整體味道亦唔錯，但出得黎食野總係想食到啲特別啲嘅食物，下次再黎試試

我從南非返黎，老豆就去南非了，佢幾個朋友就黎同佢食返餐吧，老豆住喺彩德，有朋友要放工先得閒，夜晚9點，就去彩德唯一酒樓食返餐為佢送行吧。之前喺哩間飲過茶，但晚飯就真係第一次了，就試試啦～ 一班男人飲酒食飯，食飯係次要，傾計飲酒先係重點，7個人，就黎個一千三百蚊左右嘅套餐啦，再黎兩枝大啤，本來要藍妹，不過部長話藍妹啱啱先放入冰箱，唔夠凍，就飲另外一種啦，飲完都唔記得自己飲過邊隻



先黎碟【拼盤】，燒肉唔會過鹹，肥肉瘦肉比例合理，9點鐘都冇搭啲頭頭尾尾俾我地算係咁啦，就係皮唔係太脆囉。油雞亦夠嫩，味道適中，雞味印象中可以接受，起碼唔會覺得淡。燒鴨唔乾，亦唔太鹹（我地飲酒加嘛，就算真係有少少鹹都唔覺得有問題啦），當然唔可以同【清真惠記】嗰啲專賣鋪相提並論啦～白雲鳳爪亦夠肉地，食落唔會瘦蚊蚊的，味道就一般啦。海蜇亦差唔多，口感正常，但感覺上覺得淡咗些少，但喺合理範圍之內囉，算係咁啦～ 哩盆左拼右拼拼盤個碟都俾啲餸裝滿了，算有誠意了

【炸子雞】幾乎係同拼盤一起上的，飲酒食飯嘛，就係要飲得高興食得開心，哩類頭盆類食物當然係一齊上先食得過癮啦，抵贊！炸子雞炸得外脆內嫩唔乾，有雞味同時唔過鹹，亦唔太油，中上之作 當然亦唔排除係被現場良好氣氛影響食慾啦

食完頭盆有野落肚之後就黎飲湯喇，今日嘅湯係【高湯翅】，咁當然係一般嘅酒樓翅啦，味道正常冇特別，ok啦，唯一問題係。。。。醋呢？胡椒粉呢？一班人食飯飲酒，影相本來已經怪怪地，又飲又食又傾計就懶得再去問人攞了 何況味道又可以接受。

再黎就係哩碟【奶油蝦伊麵】喇，先講啲奶油，味道稍微係有啲淡的，又唔係自己一個人食，好似冇咩原因令我試完覺得唔夠好之後去加鹽囉 但口感就非常好喇，唔太稀亦唔太稠，再加上口感唔太爛嘅伊麵，哩碟餸嘅質量算幾好架喇，味道濃少少會更好囉～

跟住上嘅就係過年嘅傳統菜色【發財蠔士】了，醬汁調味一啲都唔太鹹，令髮菜味道良好。蠔士嘅大細可以接受，口味能保持傳統，調味適中唔會掩蓋蠔士本身嘅味道。藏底嘅菜能保持口感唔會過軟。成道菜嘅味道都歸功于醬汁嘅調味，傳統嘅哩道菜的確令人食得舒服啊（咁多年，食過咁多次哩味餸，過淡嘅少見，過鹹嘅，見過太多了。喺控制成本嘅情況下，食咗嘅幾隻蠔士邊位嘅口感整體黎講都係喺可以接受嘅水平）

哩味【蟹肉西蘭花】調味偏淡（當然唔排除我嗰事已經俾酒精影響咗口味啦），但感覺上真材實料，西蘭花食落亦新鮮，軟硬度亦適中，煮得唔會太軟或者太硬，酒樓食飯，最緊要舒服，睇落舒服

【生菜冬菇螺片】亦係經常見到嘅菜色，螺片切得都幾大片，冬菇亦唔細粒，醬汁同之前嘅發財好事味道差唔多（食過年菜其實幾厭的，每年食嘅野差唔多，味道亦相差無幾），煮得夠軟，底嘅生菜依然保持口感，食落冇咩挑剔點就夠了。

然後上檯嘅就係蒸魚了，我食得魚少，肉質有咬口，應該係一條班吧，感覺上蒸得唔老（食到最後時段了，食到差唔多，當然亦飲得差唔多啦其實我都唔係好多姐，只係食到差唔多，亦差唔多飽，感覺就唔會咁敏銳架喇）可以話覺得味道還可以，唔覺得特別新鮮，魚嘅味道亦唔覺得特別好味，反正感覺ok啦 下一樣呢？感覺上差左少少野，有人提起，係咪應該仲有碟炒飯嘅呢？好幾個人都有感嘅感覺。。。我睇下張菜單。。。冇喇。。。水果呢？。。。冇啵。。。時間已經唔早，我地亦都唔想重新再叫又要再等了。。。。。。但係點解酒樓唔喺份菜單上加碟炒飯呢，成本唔係好高，但係就令成圍菜完整好多了，水果亦一樣。。。就算都冇呀，都可以喺最後一味餸上檯嘅時候提醒一下嘛，宜家就食到兩頭唔到岸囉。。。 雖然話整體味道係唔差的，但上酒樓食飯嘛，一向都係食感覺的，食得開心，飲得開心，聊得開心先係重點，宜家完成度差咗啲，就令我地食得唔夠痛快囉。咁當然我地冇喺事前發現哩圍菜缺乏啲咩而事先加餸，我地都有問題，但我覺得對方都應該體貼啲囉所以如果仲有下一次嘅話，點餸嘅時候就要留意喇（當然今日點餸嘅唔係我啦） 仲有嘅係今餐冇用咗咩貴價嘅食材，一圍菜7個人食（啤酒另計），平均每個人要俾兩百蚊，以街坊就樓黎講貴咗啲囉，仲要食完有遺憾咁離開（冇炒飯同水果）。。。