民豐粉麵行 (荃灣)

上禮拜六去細舅父屋企食晚飯，就順便商量下禮拜日放假有冇咩地方想去想食啦，佢就突然提起話之前佢喺荃灣開工嘅時候有時候會黎哩間買野食的，我之前成日經過哩條街，都完全唔知哩間鋪，今日又放工經過，就加入人龍啦~







條龍排咩嘅呢。。。到我喇，哦，原來係賣【韭菜豬肉餅】的，就要兩個吧，啊，可能我講得唔係咁清楚，阿姐聽錯咗，俾咗一個我，10蚊再見了 openrice嘅食友話哩個餅好好食的，仲有一個話係神級的。。。呵呵。。。就試下啦，咬啖先。。。再咬。。。嗯。。。其實好一般姐，以一個皮黎講算唔錯了，薄薄的，但塊皮同餡之間就緊咗啲喇，少少虛位都冇，口感就實咗啲囉，見到有人攞九龍城【清真牛肉館】嘅牛肉餅黎同哩間嘅比較真係有見地，【清真館】牛肉餅嘅口感就冇哩間咁實喇，唔駛好似佢咁多汁，但哩塊餅就真係乾咗啲囉，如果可以加少少汁，或者加少少雞蛋，又或者加啲軟硬度啱啱好嘅粉絲，口感就好得多了，以一塊餅黎講，宜家就差好多喇。。。 好彩買咗一個姐，俾少10蚊






然後就再排另外一條隊，哩條應該係排茶果同糯米糍等等的，茶果留返下次，我今日唔想食咁多，就要花生糯米糍啦，4蚊再見喇~ 試試先，咬咬。。。哩啲先係糯米糍嘛，仲記得長洲嗰邊嘅糯米糍，塊皮薄到好似冇咁，睇下我post嘅第二張相，塊皮幾有質感，咬落去，嗯。。。厚度啱啱好，好糯嘅感覺~ 中意佢嘅口感 試試啲餡。。。好多餡，好夠料，見到就開心，花生幾香的，甜味我就覺得啱啱好喇，甜得黎唔會膩，食得好滿意，不過近年啲人食野講健康，某程度對某啲人黎講件糯米糍就可能太甜喇，不過真係幾好食，想整得俾哩間好食啲都唔易，何況不過係賣4蚊一個~ 下次再返黎睇下仲有冇好野可以買啦~

金井自助壽司刺身專門店 (荃灣)

昨日同表弟表妹走咗去食自助火鍋，已經有肥硬嘅心理準備，今日走去磅下。。。居然重咗兩公斤，人到中年，哩兩公斤真係令我感到壓力添 要減肥喇，今日收工，喺荃灣，就準備返屋企之前買''少少''野食就算啦，就喺入地鐵站之前見到一個''奇景''。。。一間廉價壽司店開喺另一間連鎖廉價壽司店【真鮮】隔離wo，【真鮮】賣開3蚊一件係人都知道，哩間喺正隔離嘅就買4蚊一件，真係勇喇~（睇返資料，原來哩間店已經喺哩個位開咗一段時間，【真鮮】後來先喺佢隔離開的。。。都幾冇品，擺到明想逼走人），為咗支持小店，我就決定走入哩間貴隔離1蚊嘅店喇~


行入去，右邊就係擺壽司嘅櫃，左邊就係小食店式，俾客人擺食物企喺度食野嘅貼牆長置檯了。。。睇下有咩食先。。。手卷，日式沙律，冷麵等等等等最常見嘅日式快餐食物。。。唔想食太多（其實我黎地鐵站之前已經忍唔住喺其他地方隨便買咗少少野食架喇）



我嘅目標就係細細件嘅壽司了，店員見我唔知點算咁，就好醒目咁話我知，左邊有夾壽司用嘅夾，同放壽司用嘅盒仔，嘩，冇記錯【真鮮】冇夾，係要用手攞的，都幾貼心啵~ 我就攞咗個可以最多放4件嘅細盒先，食咩好呢。。。明太子隔離好似冇賣嘅，要一件。。。然後哩件唔記得叫咩魚嘅隔離都冇，要一件。。。哩件酸嘅魚隔離亦冇，黎一件。。。最後一件嘛，就要哩件隔離有買，味道都幾ok嘅哩件啦（我居然唔記得哩件咁普片嘅壽司名）


好，揀完，俾錢，店員問我堂食定攞走，我就下意識話攞走啦，咁佢就放咗一包仔醬油同wasabi落個盒入面俾我帶走了。。。

我本來就準備坐地鐵返屋企，真係唔想將啲壽司帶黎帶去了，就企喺附近路邊就搞掂佢地啦 開餐，就先食啱啱提起哩件先~ 嗯。。。冇乜味啵，真鮮嘅同款出品好似好食啲。。。。。。哩啲壽司嘅味道其實都差唔多，no hard feeling，不如等我簡單咁講下食完嘅感覺啦，哩啲壽司嘅正確名稱叫【握壽司】，握得時間太長壽司飯就會暖，太用力，飯就會太實，太細力就當然會鬆啦，哩幾件壽司就正係太實嘅代表作喇，實到吖，口感真係唔多好啊。。。溫度方面嘛。。。凍，係少少嘅冰凍，唔過分，但影響食慾。。。面對哩種又實又凍嘅壽司，我嘅決定係。。。。。。。咬耐啲囉，咬到散曬暖番啲先吞咪得囉 味道嘛，就一個淡字就夠形容曬4件壽司俾我嘅感覺喇，加醬油啦，唔好想太多喇~ 但老實講句，啲魚肉感覺上好似比隔離間連鎖店新鮮少少的，係一種感覺，大家都知道間連鎖店嘅食物質數其實幾ok的。不過冇所謂啦，試下嘛~ 食死一間咁生活咪好悶，係咪？

牛摩 (將軍澳)

禮拜日喇，朝早洗完晾完衫就出門口喇~ 今日約咗表弟表妹出去睇戲，感覺上佢地放假冇野搞一係喺屋企附近流連，再黎就已經習慣性去將軍澳了（記得上次同佢地睇戲都係去將軍澳）我又冇所謂wo，反正我好少去嗰邊，對我黎講幾新鮮吖 睇完戲大概一點了，我又冇食早餐，雖然話睇戲嘅時候食咗啲爆谷飲咗啲汽水，但係時候食午飯了，去邊度食好呢~ 哩邊對我黎講係個陌生嘅地方，咁就隨便搵啦，不知不覺就黎咗哩間【牛摩】火鍋店嘅門口了，自助火鍋wo，有人對哩間店幾有興趣，我就有啲猶疑喇，任食wo，我自己知自己事，一定會追飯食的（肉都一樣），又想食又怕肥，已經唔係18廿二了，點減呀，肥硬啦，哈哈~~~ 喺門口猶疑咗一陣，餓了，唔想周圍再搵了，問問門口侍應妹妹一啲資料後，就決定入去了

侍應妹妹帶咗我地入去最角落嘅位置坐底，地方幾乾淨吖，白色檯面上有兩個黑色電磁爐，間食店嘅大名清楚咁印（?）喺電磁爐上面，非常醒目，加上和風木板牆同造型獨特嘅吊燈，感覺幾舒服吖~








坐低後首先要決定嘅係食邊隻牛肉，經過商量之後就決定要最基本嘅任食【美國肥牛】吧 然後就要決定要咩湯底了，表妹想要【長崎豬骨濃湯】，表弟就對期間限定嘅【日式芝士咖喱湯底】有興趣，眼前有兩個電磁爐，我地3個人，就兩種各一啦，幾簡單





等湯底嘅同時間我地就已經急不及待咁出去攞配料喇，首先見到嘅係火鍋用烏冬同拉麵，分別裝咗喺啲細碟度，幾方便吖~ 值得一提嘅係哩個拉麵幾耐煮的，唔覺意煮耐咗口感都可以接受



再行過去就見到一堆配料喇，有幾種菜，有粉絲，蓮藕，芽菜，金針菇，幾款火鍋丸類，老實講選擇其實唔係好多，味道亦唔係好特別，值得一提嘅係有一隻火鍋丸入面有芋頭的，係比較特別嘅一種。


再過去就有兩個兩種飯可以選擇，一樣係白飯，另一樣係【和牛炒飯】，炒飯味道還可以，唔係話好特別，表弟話鹹咗啲，對我黎講就啱啱好，反正小弟食咗3小碗，我愛炒飯呢~ 哈哈 飯嘅旁邊仲放咗一兜咖喱汁，我攞咗啲黎撈飯食，味道冇乜特別，唔想花太多時間去寫了。。。轉角位就係調味料喇，辣椒，麻油，炸蒜，辣蘿蔔，葱花，香菜，醬油，柚子醋，擺得幾乾淨方便吖。。。



返到位牛肉同豬肉已經上咗檯了，都切得薄薄的，最適合就係俾啲好少落廚嘅年輕人煮架喇，想唔熟都難，味道就正常程度囉。。。

今次點嘅係肥牛，第一盆肉比較多，食落都好新鮮，哩個價錢黎講可以接受了，每次追加大概要等5分鐘左右吧，我地追加咗6盆吧，有時候都會有比較肥嘅情況發生嘅 就好似下面黎幾片咁~


雞肉係要另外叫的，唔知點解，不過就叫盆試試啦，雞嘅口感還可以，但老實講就真係食唔出咩雞味喇，但最近都好少食到真係有雞味嘅雞，好奇怪。。。


喺最角落嗰邊有乳酪雪糕，仲有幾樣脆脆脆粒配料可以自己放，味道一般啦，冇乜特別，不過我相信小朋友會幾中意。。。。另外啤酒，汽水，綠茶，紅茶，玄米茶等等等等當然亦係隨便你飲架啦~ 啊，我留意到角落有壽司嘅牌喺度，但冇見到有壽司，上openrice睇返發現晚飯時段先有得供應的。。。

埋單98加一，價錢合理啦，冇咩特別，又冇咩投訴嘅一餐，每人送優惠卷一張，下次送咩就自己睇吧，個字我唔識打

西貢咖啡餅店 (西貢)

每次入西貢經過哩間鋪都想停低買啲野食的，貴係貴咗啲，但真心覺得好食，今次又忍唔住排隊了。。。排到埋去，聽到排我前面嘅兩班人都買咗【菠蘿油】，次次食菠蘿包，今次就試試加塊牛油試下啦，再黎一件鮮奶撻吖~


俾錢，盛惠26蚊吖，菠蘿油15蚊，鮮奶撻就11。。。。。。



攞上手，唉。。。又唔熱了，唔係新鮮出爐嘅話，哩間啲野真係唔係咁熱的，今次我居然仲要菠蘿油添，真傻仔。。。攞起個包，輕輕咬咗包表面嘅糖皮。。。嗯。。。可能真係擺咗一陣，已經冇想象中嘅全面鬆脆了，感覺有啲粘牙feel，加上個包已經唔熱了，配埋夠凍嘅牛油，真係想講句。。。。我錯了。。。。。。好彩個包仲算軟，早知就唔叫佢加牛油好了。。。


食完個包，就連個牛奶撻都想一次過解決埋，咬下個酥皮，真係好酥啊，啲牛奶custard都好好味，甜味啱啱好，一啲都冇過火，我一路都對哩間嘅撻好有信心，都都係嗰句，凍咗喇！！！


真係唔係住西貢，要撞正佢地啱好出爐要好多好多運氣的


不過真心覺得個撻好好味

但我食完之後就發現咀角有啲因為熱氣而變紅了，真係要節制下了


最後一提，嗰邊有座位的，但如果單買包嘅話就唔好意思了，座位只提供俾叫埋野飲嘅客人的，單買包嘅請企街吧

清真牛肉館 (九龍城)

禮拜日，起得晚，出門口，已三點，想食野，九龍城，冇目標，隨便走，老字號，在眼前，耐冇黎，行入去，好多人，一個人，隨便坐，周圍望，新裝修，心打突，【最低消費】，【覺冷漠】，望菜單，牛肉餅，覺得貴，【咖喱飯】，【配羊肉】，快上菜，失親切，唔想等，飯上檯，分兩半，撈一起，覺一體，又方便，試一啖，有羊騷，算滿意，味微辣，大眾化，冇特別，冇驚喜，失興趣，多選擇，不值得，冇下次，食得快，付錢快，離開快，跑得快，老字號，不再見

平心而論，味道是不錯的