PizzaExpress (尖沙咀)

因為朋友非常喜歡海景, 所以便選址這家餐廳並於一星期前訂座! (訂座是為了海景!!就當日所見, walk in都有位)

由於只有1.5 hours的時限, 我們都先快手點菜, 然後才慢慢欣賞海景

首先上菜既係麵包球 - 因為在openrice下載了coupon的關係, 免費的! 一碟共有9個小小的麵包球, 本身沒味道的, 要配上附上的醬料(蕃茄, 牛油, 香草olive oil), 而我個人就喜歡配較濃味的茄醬.

之後上既係北京填鴨pizza - 黎到見到, 好大個, size係大批size. 其實本身想要厚批, 可惜此款pizza只有簿批供應, 但因為好似幾特別, 最後都係選左依款! 味道其實唔錯, 大量既蔥加上填鴨醬再加鴨肉(大概每塊pizza上面都有一件鴨肉, 雖然我覺得少左d), 好似食緊北京填鴨咁, 只係個皮唔同左.

最後仲有芝士菠菜麵卷 - 一層厚厚ge 菠菜加上一層Lasagna, 再加一屠厚厚ge芝士,再一層Lasagna, 另外係旁邊加上大量既茄醬, 好味~! 最愛個層厚厚的芝士! 真係唔錯呢

總括黎講, 佢地d食物水準幾好~不過d野食全部都幾濃味(可惜我唔鐘意食沙律, 無叫), 我覺得依d地方人多share多d食物會好d, 可以叫返d淡味d既食物中和下(始終香港女仔好少全餐都咁heavy). 另外, 佢實佢地d份量都幾大, 唔算貴, 仲有海景睇. 滿意

金裝燉奶佬餐廳 (天水圍)

燉奶佬一值水準穩定(穩定地平平, 好少話中伏), 不時都會選佢開餐~ 不過今次選佢, 係因為佢早餐供應到11:30~食到我最鐘意既沙爹牛麵好老實~碗麵實在只屬過得去既水平, 雖然D湯同牛都算有沙爹味, 但絕對做唔出茶記應有水準~EVEN連個麵都係麻麻地~唯一可以讚既就係, 另外+既火腿(+$3)真係幾抵~幾大塊~
飲品就叫左熱鴛鴦~但都係麻麻地, 唔算香~又係過得去既水平

今餐算過得去既, 但唔算正~可能食依d都係要搵返傳統茶記先得

屯門咖喱屋 (屯門)

相約2位朋友在屯門相聚, 睇左一輪OPENRICE, 好快就選定依間印度餐廳作為聚會地點.

一坐底, 野食都未點, 店員即送上薯波(免費), 另外再加2碟唔同既醬汁~感覺好好呢!! (雖然唔算好好食, 但看在免費的份上...)

之後我同朋友(共3人) 點左一個2人餐另外加多個特色雞.

2人餐入面包左湯, 汽水, 雞塊(chicken tikka), 2個咖哩類主菜(我地選左羊[+$5]同牛利), 蒜茸椰菜, 另外包飯同烤餅

首先上既係雞湯同汽水, 只係一般雞湯~唔太特別~
之後就係各款主食:
咖哩羊/牛利 - 佢地d咖哩整得幾好, 配飯同烤餅都好正(順帶一提, 佢地d飯同包都烤餅都幾大份~夠晒3個人分, 讚!) d羊都幾有羊味~2樣水準都算唔錯
特色雞 - 從餐牌上既description得知, 佢地係主要用蕃茄煮~應該仲有其他香料~食落感覺幾特別~最重要係味道真係幾好~無叫錯
雞塊 - 就係一般炸雞, 幾惹味~但朋友覺得好鞋, 我覺得可以接受
蒜茸椰菜 - 好香蒜頭味~雖然油左d~但有時為左味道真係要取捨~

最後食左咁多野, 埋單都係~$200, 好抵~我地3個食到飽晒呢~依個價錢, 依個質數~絕對有下次!!

baby Mon cher (銅鑼灣)

咁岩屋企人路經附近, 順手之下, 就係依間最近先登陸香港既蛋糕店買左3件蛋糕回家一同品嘗.

3件蛋糕全部都係屋企人選, 包括有hello kitty牛奶慕絲, 心之蝶, 同布甸雜果講賣相真係幾好~整得好靚. 而味道方面~估唔到3件蛋糕雖然係唔同味, 但全部都好好食, 各有千秋!

首先食既係布甸雜果~舊布甸真係好好味, 如果佢有淨布甸賣, 我可能真係會買淨布甸!
第2件係hello kitty,  again, 個牛奶mousse好好味~好香奶味, 不過我覺得佢中間d士多啤梨果醬太重手, 蓋過左d蛋卷既味
其實食完頭2件, 我都唔覺得佢地d蛋卷真係好正, 只係食得出佢地d cream比一般地方好食(真係香滑d同埋新鮮d), 反而d topping就幾有驚喜
但食到最後一舊心之蝶, 我改觀~D士多啤利mousse配埋落舊蛋卷到好好食

我覺得佢地係整蛋糕卷方面真係幾成功, 賣相同味道都同時兼顧到~不過真係幾貴下(以上avg $45件)~應該暫時都唔會再食住~我諗食得太多都會無感覺~間唔中/有特別事先一次就好

簡品堂 (屯門)

晚飯後行經依間小店, 因為有買3送1優惠, 同朋友share買左2盒糯米糍返屋企做甜品. 一盒花生, 一盒豆沙.第一次試依間野既product, 都幾唔錯~味道雖然唔算特別好食, 但皮同餡既比例幾好~加上除返開1粒只係$3, 絕對收貨!