想搵個地方同媽咪慶祝生日，平時同老人家食飯多數食中菜，今次帶佢食西餐。呢間餐廳喺屋企附近，開咗冇幾耐，估唔到有驚喜喎！餐廳唔算好大，都坐得幾舒服，大部份嘢食都好味，價錢仲好抵添，性價比好高。 一坐低，侍應就送上一兜炸芋頭脆片，好薄好脆，鹹鹹地，超好味。藍青口份量好足，但唔夠鮮味。Beef burger百幾蚊，好抵食，薯條熱辣辣，脆卜卜。Carbonara意粉個樣麻麻哋，但味道十分好，媽咪最愛。個 Classic Shepherd’s Pie 估唔到咁大份，不過都幾heavy，食唔晒，打包返屋企再食。 中間仲發生咗一個小插曲，我細佬唔小心整跌咗杯酒，成杯倒瀉晒落地下，個侍應好快咁埋嚟抹乾淨個地，之後仲重新斟過一杯俾佢，超貼心服務，大讚。 最後甜品點咗朱古力心太軟，同埋橙酒班㦸，侍應喺你面前點火，好有儀式感。我同侍應講媽咪生日，叫佢幫我插支蠟燭，佢仲喺上面寫埋Happy birthday，原來個朱古力心太軟冇收我哋錢，話係請我媽咪食嘅，好開心，下次一定會再嚟。

平時唔太喜歡食拉麵, 因為覺得一般的豬骨湯拉麵個湯底好肥好油, 早排經過奧海城見到呢間新開的日本過江龍鹿兒島拉麵店係用雞湯做湯底, 個樣都幾吸引, 就入去試下啦. 我點咗一碗檸檬牛油雞白湯拉麵 ($98), 再加幾個小食同老公 share. 我都係第一次食拉麵加檸檬, 估唔到又幾夾喎, 酸酸地有陣陣清香的味道, 個雞湯底打到起泡, 好濃郁, 又滑溜, 兩片慢煮日本雞肉軟腍入味, 仲有成隻溏心蛋, 麵質彈牙, 好食! 另外幾個小食都有驚喜, 尤其是個雞皮餃子 ($48), 酥脆香口, 好特別. 日式香酥雞珍 ($58) 份量都幾多, 好爽口, 調味恰到好處, 一口接一口追住食. 月揚庵魚餅 ($48) 係鹿兒島名物, 我之前去鹿兒島旅行都有買返黎做手信, 一路食D回憶返晒黎, 攪到我好想即刻飛返轉添.

想試好耐，次次經過都要排隊，今日晏咗食 lunch，去到終於唔洗排隊，一個人坐低，睇 menu，叫咗碗砂鍋鮮牛肉粥，個侍應好識 upsell，每一個點粥嘅客人，個侍應都會問客人加唔加皮蛋，我加咗，另外想食埋魚蛋蘿蔔，我問個侍應可唔可以雙拼，佢話冇，要分開點，佢話份量唔多，可以叫幾款，我驚一個人食唔晒，只點咗蘿蔔，上枱時見到個份量，真係極細兜，得五小件蘿蔔，細碟都算啦，物價高漲，但一啲都唔好食，太淋 pat pat，輕輕一夾都爛晒，個牛肉粥更加係超級難食，又係好細碗，隻皮蛋幾靚，但係啲牛肉真係勁唔掂，「拿」到一啲味都冇，質地好似擦膠，完全冇牛肉味的，好似食橡根咁，冇下次。

見到網上咁多好評，同屋企人黎試下，但係食完之後有啲失望，啲芡汁太濃，全部嘢都好鹹。 飛天通菜 - 勁鹹，個蝦膏醬浸住晒啲通菜，要撈白飯一齊食先無咁鹹。 啫啫雞煲 - 份量好少，個汁杰撻撻咁，又係好鹹。 避風塘鮮魷 - 炸漿好厚粉，炸到過咗火，有少少燶味。 脆皮炸豬手 - 呢味最好食，起晒肉，砌得好靚，皮夠脆，切到一條條，方便食。 芝士琵琶豆腐 - 好創新嘅食法，但味道麻麻地，又係好鹹。 好爆場，晚上十點幾入座，限時90分鐘，有夜鳥優惠 88折，係幾抵食嘅。

就算天氣幾熱都好，一年四季日日都可以打邊爐，最近去咗挑戰呢間在銅鑼灣新開的四川火鍋店。 開爐之前熱熱身，先來幾道四川小食，招牌辣子雞、雷椒皮蛋、夫妻肺片、紅油蒜泥白肉、四川臘腸… 是正宗川菜的味道。 人多可以開兩個爐，一辣一唔辣，今晚試咗四川麻辣鍋和椰子雞鍋。先來一個超級海鮮拼盆，有蟶子皇、鮑魚、海蝦，美侖美奐，震撼眼球。再來鱔片、手切牛肉、手打三寶丸… 令人目不暇給之際出現了一般火鍋店少有的熊本天草大王雞，塊塊手掌咁大的雞柳，可想而知呢隻大王雞的真身有多大，再來一碟鮮嫩滑溜雞頸肉，超有驚喜。 食得津津有味突然來了一道騰雲駕霧的「冰川鵝腸」，用冰彫成的冰壺盛載爽脆鵝腸，連本身平平無奇的薯仔和蒿筍都變得非同凡響，精細刀功堆砌成藝術品一樣！最后奉上的甜點紅糖流心糍粑令人留下甜蜜蜜的深刻印象。

呢度好近我公司，啲嘢又幾好食，所以老細成日都請我哋去呢度食 lunch。今日五個人叫咗好多嘢，食唔晒要打包。 我最鍾意食香口嘢，叫咗蝦多士同椒鹽白飯魚，蝦多士係幾好食的，夠脆，唔會油淋淋，不過成 $40 一件，我覺得都幾貴。佢啲蒸點心都好食，蝦餃燒賣大大粒，皮薄饀靚，啲蝦又新鮮，個黑松露帶子餃用料十足，配搭得宜，超讚。炒粉麵都好正，亁炒本地牛河好夠鑊氣，啲牛肉好腍好軟熟，懷舊肉絲炒麵啲麵脆卜卜，掂！奶黃煎堆仔圓轆轆，好飽滿，流心奶黃爆晒饀，外脆內軟。

中午同媽媽去食個 quick lunch，母親節正日中午 12:30 都唔洗等位可以直入，都心知不妙，伏味濃，我哋三個人，叫咗兩個午市套餐加一個小食。 海南雞飯配油飯 啲飯又乾又硬，唔熟，生米。 雞肉又係，好靱，鞋到不得了，好似食緊一舊擦子膠咁。 濕炒肉片河 啲河粉好似無炒過咁，一 pat pat，啲汁就咁淋上面，淡而無味。 炸大腸 炸得唔夠脆，好靱，咬唔開，上面灑咗大量唔知係胡椒粉定五香粉，見到都唔開胃。 連跟餐嗰杯青檸冰都好唔掂，得一片青檸，成杯都係無味架。

我本身唔太喜歡豬骨湯拉麵，一幻的蝦湯拉麵正合我口味，佢哋間唔中都會推出期間限定的特別口味，我每次都去捧場，今次銅鑼灣新店推出「海老· 牛乳蝦湯拉麵」堅好味，加入北海道牛乳令個湯底更香更滑，咁大隻蝦，煎到香噴噴，有點點焦香的味道，旁邊的南瓜蓉令成碗麵更加香甜，仲有嗰塊芝士脆片，真係好食到不得了，好佩服廚師的無限創意，完美的配搭，破格得黎不失美味，超讚👍 除咗招牌蝦湯拉麵，佢個蝦味飯糰同煎餃子都係必點的。銅鑼灣新店仲有個靚海景，坐喺窗邊位置仲可以見到好多肌肉猛男喺海濱公園跑步，額外的免費福利😂

每次來荃灣都要去呢度食返碗豬雜麵、炆豬手和豬膶腸，又平又好食。 呢度好多特別部位都有，必食豬黃喉、豬肺、豬粉腸、豬大腸，個白胡椒豬骨湯底好濃郁，夠辣又夠熱，每次都會飲晒啲湯。我通常會叫多一份淨豬手同老公 share 食，大大件，豬皮好彈牙，肉炆得好腍，要用手食慢慢嗒。 再加一碟豬膶腸，潮式腸粉唔係一碌碌而係一摺摺的，超滑溜，個豉油甜甜地，真係超好食。 間舖雖然細細哋，有卡位有梳化位，都坐得舒服，真係百吃不厭。

兩個人，叫咗一碗紅燒半肉半筋牛肉麵、一客口水雞拌麵、同埋胚芽珍珠奶茶。 牛肉麵有好多件牛肉，炆得都幾腍，但係我唔鍾意個湯底，太濃藥材味，而且係好濁嗰隻，我食咗兩啖就塞咗俾我老公食。 口水雞佢俾咗隻雞髀我，個樣都幾靚仔，食落都好滑，個拌麵上面放咗啲炸過嘅黃豆，脆卜卜，幾特別。 胚芽珍珠奶茶夠濃郁，好飲，不過我揀咗少甜都仲係好甜，如果可以俾客人揀二分糖就好喇。 服務都幾好，走嗰陣個個服務員都會同你講多謝，本來由入坐到離開都尚算滿意的，但走咗之後去附近行街，好快就開始覺得好口渴，我平時對味精唔算太敏感，但今次咁快有反應，即係都落得都幾重手下，要即刻去便利店買罐可樂飲，舒緩一下不適。唔會再去了。