一直都有食開九龍城的金寶, 洗衣街都有去, 但朗豪坊還是頭一趟去食

朗豪坊的分店跟另外的金寶又不一樣, 開在foodcourt入面, 主打越式湯粉, 但都有飯供應! 呢度比洗衣街更旺, 可能係個場本身旺啦, 氣氛好熱鬧, 加上燈箱, 水牌的裝飾好young同colourful, 比另外的金寶更吸引!

今日去食, 試左個牛柳紅飯同個拚盆, 兩者都唔錯, 尤其個牛柳紅飯, 加上了黑椒粒同調味過的牛柳味好好食, 而茄汁味飯都可口, 青木瓜絲的木瓜好似太熟, 變成了橙色, 但依然有爽口的感覺, 酸汁的味道恰到好處, 造就了一碟美食的誕生!

拚盆係一個大什會, 最喜愛係個蒸粉包, 餡做得好, 而且粉皮好薄又滑, 食家們不二之選 中間碗牛肉碎就咸得滯, 加了生菜食都太咸

金寶的食物很少讓我好失望, 而家多了一個選擇可以去, 但始終都係相當懷念個出色的冬蔭功呢

夜晚的一餐係食潮州湯粉

行完黃埔之後, 去到銅鑼灣買衫, 都唔知做セ鬼空氣咁差, 抖氣都抖唔到, 影響埋食慾, 只係想食碗粉就當晚餐

吃的, 是一碗紫菜太子墨墨丸雙拚河粉, 太子墨即係八爪魚仔, 日式的八爪魚改成潮州式的處理, 一點都不討好, 因為日本的做法係醃製, 當然野味, 太子墨本身無セ味, 就咁白灼點會好食? 好彩墨魚丸夠彈牙, 又夠味, 挽回不少分數!

湯底夠味, 紫菜幾好味, 唔腥!

下次再食, 只會食墨丸, 唔要太子墨了!

今日下晝去黃埔行吉之島買傢具, 星期日又差不多出糧, 條街真係好多人, 鬼咁熱鬧!

食午餐選擇去八八八拉麵食, 差唔多八成滿, 坐低之後, 從餐牌揀左個豬骨湯牛油粟米拉麵嚟食!

拉麵放到面前, 見一大塊牛油放在一邊, 浸落個湯入面再搞云, 牛油開始溶, 碗麵都因為咁而充滿牛油味, 的確係幾香, 不過味道實在比較咸, 食左兩啖已經係咁飲水, 頂唔順.....

塊义燒味道幾好, 可惜湯底係令人超頸渴的湯, 完全破壞我的食慾..

睇完戲之後, 同朋友諗去邊食飯好, 最初我提議去金寶, 不過朋友想去老趙食, 於是坐的士落佐敦去了

今趟只係我第一次來, 不過聽朋友講老趙的食物都好好食, 咁就要試吓喇 我自己食一碗生牛肉河, 噯 真係好好味呢, 湯底好正宗呢, 有白蘿蔔兩大件, 加上香濃的牛肉味, 這碗生牛肉粉水準很高, 同金寶最大的分別係, 佢因為落左白蘿蔔, 所以味道比較甜, 廿六蚊一碗, 更加抵食

椒鹽軟殼蟹係十分野味之菜式, 我地三個人食一碟, 可能因為太好食, 所以居然好似唔夠咁 仲有個蟹餅都係做得好出色的食物!

今日到此一吃, 令我食越南餐又多個好去處了, 好開心!

今日行過蘇格蘭薯堡, 買了一盒芝士磨菇薯條食, 但係唔好食

薯條唔脆, 無薯仔味, 食到一口粉... 點解會咁... 芝士磨菇其實無幾多磨菇可以俾我食到, 同埋個汁似比較杰的白汁湯多過似芝士醬, 唔好食..

廿幾蚊一盒, 比較失望

我覺得意粉屋的出品一直比pizza hut 好些少, 今次特別介紹意粉屋的希臘神話pizza做下午茶俾大家

一個pizza切開四件, 直徑有八吋左右, 適合兩個人食, 材料有菠蘿, 煙肉, 火腿, pizza的餅皮好好味, 有麵包那種香味, 芝士份量好多, 上枱時候因為仲熱辣辣, 所以仲未凝固, 一口咬落去, 可以把芝士扯到成尺長, 哈, 好正

哈哈! 估唔到, 去食一間壽司店, 最好味係個牛奶布甸...

當然, 不是說壽司唔好食, 只係現在的板前, 已經沒什麼驚喜了, 沒有了往昔的新鮮感之餘, 以往的日本風味都減弱了.. 好像生蝦壽司, 那生蝦都沒了以往的鮮美, 就算是壽司飯都比之前退步了, 吃板前的壽司飯, 跟元氣的已經沒兩樣

除了壽司, 還吃了個韓式烏冬, 最主要是泡菜湯的味道, 但我在這裡, 寧願要一碗玉子烏冬了, 起碼是日式吧, 較貼題! 這碗烏冬都沒什麼特別可取之處, 更有點像即食麵的風格...

最好的是個牛奶布甸, 很滑, 很美味, 這種牛奶, 味道跟之前某明星甜品店的燉蛋白味道相似, 相信是同種類的東西, 但要是板前要用這個留住我, 相信都留不住吧

聽說九龍城有很多好的潮州打冷店, 因為很多潮州人都在九龍城扎根, 所以與朋友到這兒打冷去

記得之前到過街市對面的打冷店, 聞到很香的煎蠔餅味, 一早已經想食, 今次終於幫襯了, 煎蠔餅很脆, 很香, 蠔仔好大粒, 與之前的期望相若, 朋友一致讚好!

鹵水鵝片是豆腐墊底的, 無論豆腐, 鵝肉都很入味, 點辣椒白醋食滋味無窮! 除了這些, 還叫了咸菜魚, 鵝紅, 菜脯煎雞蛋, 都很野味, 不過這店最主要的特色是味道比較重, 比較咸一點, 只係食餸有點吃不消的感覺, 還好叫了碗潮州白粥食來中和一吓, 特別再叫老板水多一點, 她都樂意效勞! 老板給我的印象是很隨和, 對客人招呼頗周到呢!

食過這次, 相信之後的飯局, 都會再有機會來這裡, 因為味道不錯呢!

這個夜晚, 與好姊妹兩人一起晚膳, 談天說地, 來到了鈴木咖啡館

坐的是天幕露台的一張枱, 燈光較暗, 但談天訴心事卻很舒服, 雖然因為人多而有點嘈! 食物味道一般, 例如我吃的牛肉飯, 醬汁有點甜, 飯雖然在鍋入面看似焗過, 但不夠香口, 有點爛.. 朋友的芝士蟹肉焗飯都有同樣的程況

不過甜品都不算差, 像我們叫的當芒果遇上心太軟都不錯, 朱古力蛋糕味道可口, 而朱古力心都香滑

傾傾吓已經十點, 吃完甜品都各自歸家去, 想要好環境傾計, 下次都會再來, 不過可能係飲杯野, 特別從餐牌看到的榛子奶昔, 都想一試!

晏晝係去九龍城廣場shopping的日子, 順道在廣場入面的馥苑海鮮酒家食午飯飲茶

四個人的關係, 可以開懷大叫, 叫的當然係點心 咁多個點心, 我的至愛係馬拉糕! 馥苑既馬拉糕真係好好食, 切到細細件, 有好香既奶黃味, 而且仲好軟熟, 甜甜地好好味!

阿媽好鍾意食個咸菜豬手, 豬手切得細件, 易咬, 咸菜煲的湯底好夠味, 我都覺得唔錯! 另外因為佢既奶黃好似幾好味, 所以再加左個奶黃包食, 都係唔錯!

棉花雞夠味, 魚肚鮮甜, 雞件係用冰鮮雞, 所以雞味夠 至於個炒腸粉就比較乾少少, 我自己鍾意xo醬濕濕地嗰種會好食一d

侍應服務態度幾好一反應快, 坐得舒服, 環境唔錯, 不失為飲茶的一個好地方!