訓到下午茶時間先起身去食碗雲吞, 我先發現原來價值$19的淨雲吞係有成7粒雲吞咁多架! 好抵食呀!雲吞入面D蝦好爽口, 我最鍾意

而一樣價錢的雲吞麵都有成5-6粒雲吞。

仲叫咗個油菜, 咦, 係咪菜芯當造, 好甜好好食, 連平時唔中意食菜芯的我都成碟清哂。

好滿足的一餐!

除咗set menu外, 原來所有在a-la-carte menu內o既嘢食都可以+$20轉餐架!

湯: 我以為會係蘑菇湯(因為次次在Cafe Eos餐湯都係蘑菇湯, 而個waitress又冇問我), 點知唻到o既係粟米忌廉湯, 好淡, 落咗好多胡椒粉都冇味

蒜蓉包: 脆但唔夠熱, 冇乜蒜蓉牛油味

乾蕃茄煙鴨胸欖油天使麵: 唔錯唔錯不過都係淡咗D, 但食咗成碟都唔見有乾蕃茄呀? 只有車厘茄...

Americana pizza: 一上枱已經即刻食, 唔記得影相, 熱辣辣好吸引, 批底又薄又脆, 不過又咸咗少少...

咖啡: 一般貨色, 冇乜特別

凍檸茶: 斟得太滿同太多冰了, 我要飲了好多啖「苦」茶先可以加到糖水同埋篤檸檬時唔會飛D冰出唻。

PS 通風不良, 好似食完韓燒咁返屋企...

食咗晏冇耐又口痕, 去到成間舖都FULL哂, 在門口等咗一陣先有位, 食咗凍豆腐花同鍋貼:

可能供不應求, 豆腐花只是微涼, 質地較結實, 一早落定的糖水甜度啱啱好, 清清甜甜

鍋貼皮脆但略硬, 反而供應的醋o既味道怪怪地味?

ps 呢間嘢真係歷史悠久, 我見到佢掛晌牆o既xx登記證, 上面個電話係5位數

今日又落雨, 大家都唔想行咁遠, 於是又去咗四季的快餐部。

本來平時我只會叫魚生飯, 但上次見個同事食咗個薄燒牛肉飯好似好好味咁, 今日想試下。

有6舊牛肉卷, 睇落好少, 但食落都幾滯~味道都唔錯啦, 牛肉有少少靱, 薄燒牛肉飯跟餐(炒椰菜同麵豉湯)+$12, 我覺得女仔食的話, 可以不要餐, 份量太大了, 反正佢哋都有茶提供, 慳返$12。

游水前先唻飲茶, 入酒樓前有個保安問我攞南華會的會員証, 我以為佢Scan一下就得啦, 點知要登記一大輪, 我見佢又填名又剩, 飲茶啫, 咁麻煩架, 好彩唔係叫我填啫! 唔怪得咁少枱客啦!

叫咗好多點心, 全部的水準都不俗, 最有印象係蝦餃, 入面d蝦好爽, 好味! 仲有流沙奶皇包都好食!

我仲特登揀坐喺窗邊, 可以俯瞰泳池, 見到藍色o既泳池, 食得零舍開心!

難得銅鑼灣可以搵到個咁寧靜o既地方飲茶, 見佢d小菜都唔係貴, 下次夜晚再唻試下先~

其實新和富朝早係有荼餐廳式的早餐, 但我住在附近都冇試過, 今朝被Honey拉咗落去食早餐

我冇叫到餐, 淨係叫咗個沙爹牛肉麵, 想轉出前一丁, 點知亞姐話冇出前一丁喎! 咁好啦...沙爹牛肉都煮得幾好食o既, 但個麵真係唔得...

星期五晚世貿間間都排長龍, 得呢間唔洗點等。等了5分鐘左右已經有枱了。

鎮江肴肉:　見到個樣已經好想食, 嗰d好似啫喱的膠質(高湯) 不會太腍, 加埋醋食好開胃
南京鹽水鴨: 咦, 乜呢個係冷盤唻架咩? 雪到硬哂o既? 食第一件時覺得咸咗少少, 但之後越食越想食!
小籠包: 一貫水準, 皮薄多汁
菜肉雲吞拉麵: 湯同麵都淡茂茂, 麵又唔覺特別有手拉的煙靱口感, 但菜肉雲吞就好味!

但係, 間舖實在太嘈啦, 而且枱與枱之間太近, 嘈到街市咁! 嘈到我哋都聽唔到對方講嘢!

本來想食韓國燒烤, 但full哂, 諗住試下呢間啦, 上到去, 星期日晚黃金晚飯時間只得4,5枱客, d裝修又樣衰...又唔想掉頭走咁衰, 唯有坐低啦..

但係, 食咗成餐都冇一樣嘢可以令我有深刻印象...只可以話以量取勝囉!

只可以講佢哋d服務算係咁啦, 頻頻加茶收碟, 又冇漏單, 而且上菜極快!

不過咁o既價錢, 我應該都不會再幫襯啦!

亞豬生日, 我哋一行6人中午去六角食飯同佢慶祝

我叫咗特上魚生飯定食, 前菜唔係太好食, 同埋點解個麵豉湯一粒豆腐都冇架..

D魚生都幾新鮮, 我見同事叫咗鰻魚飯同燒牛肉飯都好似好好味咁!

最後的菠蘿雪糕都好好味呀!

要去Great買D嘢, 所以買埋Lunch返公司食

食咗我最鍾意的BC Burger, 加咗煙肉的Burger零舍好味 (超肥)!

不過薯條都係「淡茂茂」, 不過佢哋都會自動波放埋包盬落個袋

佢哋個餐真係好大份, 好彩我一早叫佢哋將個包切開咗兩邊, 食咗一半已飽, 冇浪費食物