潮樓 (尖沙咀)

2月27號替朋友預祝生日,揀左這間潮樓,因為有靚景睇.

四個人點左冷盤2個,熱盤3個:有雞絲海浙,滷水鵝掌拼墨魚,西蘭花粉帶子,蟹粉炸呎花枝丸,鮑魚肉絲粥(一煱).全部分量都唔少.

個雞絲海浙一般,多水左d;滷水鵝掌拼墨魚幾好食,個滷水汁夠濃,又有麻油香;個西蘭花炒帶子好正,帶子大大粒又多,一上臺已經好香;蟹粉炸呎花枝丸好大粒(6粒)我好鍾意食香口野,花枝丸好鮮好彈牙,yummy!鮑魚肉絲粥一大煱每人可依2碗,個湯或好清甜,唔會好咸.不過我只食到一碗咋,因為已經好飽了.

朋友有order左一籠壽飽(蓮蓉)一籠有6隻,賣相吸引.其實我唔太好蓮蓉既,只淺嚐dd,不過個皮好軟熟,厚薄適中,裡面既蓮蓉都算多,朋友食得好滋味,話好滑喎.

是次飯聚大家都好滿意,而我係第一次幫襯潮樓既,原來你稻香集團其下既.全單冇加一,咁o岩manhattan卡有promotion,套餐7拆,散叫小菜都有88拆,埋單四百廿幾啦.3個人除開每人唔使$150.如除四仲唔使$104添.

環境當然靚啦,話哂係北京道一號.有梳化卡位或木圓臺木椅,如果想睇靚view要坐木椅了,不過木臺果邊空間不足,有椅背碰椅背既感覺.

尚館 (佐敦)

星期日晚,男友約好我撐臺腳,講明帶我食好野,十分期待

餐廳位處佐敦,以為係街坊小菜館,於廟街某一西餐廳前停低, 門口以深綠色及木色為主調另加大玻璃窗,感覺優雅(冇估到佐敦區有此類餐廳),至少餐飯坐得舒服.6:30pm晚市才剛開始,無需等位侍應禮貌地招乎就坐,menu亦隨即奉上.

男友二話不說俾我一個special menu,開估了,原來帶我來歎和牛 .有來自日本的佐賀牛,澳洲M5及美國肉眼和牛套餐.我們決定日本及澳洲都各點一份互相分享.

頭盤有焗蠔, 芒果蟹肉沙律,是日餐湯係南瓜粟米湯.蠔及沙律合格啦,蟹肉冇雪味.因為我唔食芒果,同侍應要求"走芒",好欣賞個廚肯為我多做功夫.(或者個沙律並非一早伴均的).是日餐湯並非極幼滑的質感,反而帶有細碎的粟米渣,加上南瓜香,好美妙,90分~

主角到了, 幾乎同時上卓.我的佐賀和牛屬5安士, 表面煎得焦香;男友的澳洲M5和牛有8安士,份量明顯適合男士胃口.一刀下,粉紅色的牛肉清楚可見一層脂肪一層肉,口感外脆內嫩,油花豐盛,肉吞下喉口腔內仍充滿油香,95分!真係好罪惡~~~男友切下小塊澳洲和牛俾我,肉質比較結實,牛肉味較佐賀牛濃,中間心仍保持粉嫩, 85分,very good!不過我仍然眷戀着自己的油花和牛,真係太美味了~

完美的一餐甚少得甜品呢?問侍應有何選擇? 答案竟然係:[廚師隨心製作, 個個唔同. ]咁有趣? 就靜心等待.數分鐘後,兩份甜品上卓,我的是凍紅酒雪梨; 男友的較別緻,一隻高身玻璃杯內盛着半透明jelly及一些生果肉,頂端有層蛋白mosses, 仲有粒龍珠果伴碟. 冷藏過的紅酒雪梨,酒浸至雪梨一半厚, 甚爽口, 只是紅酒未夠突出,50分!男友的jelly夠清新,可能之前的和牛有點膩,我較欣賞這個,70分.

一餐愉快的晚餐, 食物,環境及服務同樣重要.是晚和牛套餐$488起, 以價論價並不廉宜,但以貨論價可算合理,要知道高檔超市一塊靚牛也2-3百起,是晚所花的已物有所值, 若然位於中環, 定價必然更進取.對自己好些, 偶爾豪一次也應該, 下次一定另約識食之友同來 ,再嚐難忘的罪惡感!

不得不提所有侍應皆是比較年長的,餐廳亦分上下2層,感覺跟中環的銀杏館如出一切,忍不住問個究竟, 原來兩者的確有關連!除了兩者皆支持長者就業,大廚更曾任銀杏館,真有緣!

小澤日本料理 (中環)

同一位置, 一個月前仍是西式cafe,現已被新開的日本料理取代. 睇過食評後似乎一面倒的讚, 引得我要親臨一試龍與鳳!

1:40分,午餐之人流高峰期減退了, 未有訂座都立即有位,午餐menu唔多選擇, 我跟朋友也喜歡選最好的, 所以點了比較貴既魚生定食及壽司定食.

魚生定食有牡丹蝦,三文魚,鮮帶子,吞拿魚,玉子等等. 魚生件均為厚切, 魚肉鮮.油花適中;吞拿魚是淺粉紅色的, 本人一向唔愛吞拿魚, 尤其是紅丹丹的那種,未食已感覺"鞋口",此吞拿應屬近魚腩位置, 未至於入口即溶,但口感軟滑,油脂較多, 魚味餘韻悠長,讚!
蝦,帶子亦冇失望,食得出的鮮,爽,甜, 再來一口日本珍珠米, 飯跟醋的比例非常恰當, 唔會太酸, 好! 連wasabi都係上等貨, 淺綠色鮮磨的wasabi溶食得出的鮮及微微攻鼻, 聽聞最天然的wasabi就是這樣.

套餐連麵豉湯及雪糕, 湯正常,冇咩特別, 雪糕我選了豆腐味, 豆味濃,甜度適中, 只是未算幼滑.如果再大球些少就perfect了.

日本料理該是這樣吧, 新鮮之食材, 師傅之手藝, 慢慢地享受........日本人的飲食文化該是如此吧, 食厭了放題式之日本餐, 那小家的份量, 欠佳的服務(太忙吧), 大大隻[珍惜食物,切勿浪費]的字報. 日本人絕對唔會是此等店之坐上客.

西貢越南餐廳 (赤柱)

有感好耐冇入過赤柱行了, 平日夜晚同男友興起就入去食個飯浪漫一下.

到步已經接近9pm, 廣場落車, 即箭步走向美利樓搵食. 未收既餐廳仍有4間左右, 又要坐得舒服又唔想太貴又唔想食西餐就只有saigon了.侍應見我地眼望望,就好有禮地邀請我地入內.餐廳有分室內室外, 當晚都比較熱, 揀左室內卡座.坐下不久即有一籃麵包送上, 另有一兜炸蝦片,正呀 menu好快就到手, 商量後點左以下食物:

越式柚子沙津, 火車頭湯檬, 咖哩海鮮窩

柚子沙津好fresh,係泰國街頭好易買到既橙肉柚子,好多水份, 唔會好酸,份量都幾多,加埋生菜同個汁, 香,酸,甜味都有, 食個不停!

越式火車頭湯檬即係牛既幾個部位都有, 如: 牛肉,牛胃,牛筋腩,仲有扎肉. 檬粉最緊要係個湯, 嚐一口~~~~um,香,鮮,甘, 幾好, 個湯算幾清,油份唔多, 多食都唔怕. 如果肉味再濃一d會更好!牛肉只屬正常, 冇驚喜亦冇出錯, 配料可加多點蔥花或香葉之類吊味,一定更香!

咖哩海鮮唔夠大兜, 海鮮都係蝦,魚, 青口之類及薯仔,但有部份薯仔仲生生地既 個咖啡哩汁少少杰, 唔會好辣, 只係汁多料少, 用來點麵包食可以食好多片了.這個dish我們唔太滿意.

另外,炸蝦片大大片唔油, 好好食, 仲有臺上籃麵包唔錯, 包幾軟熟, 有方,圓及長條形,食哂籃麵包後都無需加單了.

2人埋單4百幾,合理既. 可能我們冇點貴價海鮮/牛/羊扒之類, 因人而異.

環境華麗優雅, 座位寬敞, 氣氛寧靜浪漫,服務態度良好, 二人世界比一班人來合適

食煙既可揀室外, 不過太熱時就忍吓啦~

Pickled Pelican (中環)

工作地點近雲咸街,經常路過此餐廳(其實覺得只係一間多老外聚集既酒吧),冇想過入來食晚餐.多得友人安排及團購既帶hit了

團購既套餐已經set左,我其實唔清楚套餐包括什麼美食.落單後,侍應立即送上4杯大啤 由於大家都唔愛啤酒,但跟餐唔可以轉飲品,唯有另叫4杯soft drinks

salad係traditional cobb salad w / bacon & blue cheese,好fresh而有層次既salad,讚!

餐湯係cream of carrot w/ scallops salsa, 湯夠濃, 色似南瓜湯, 仲有帶子(但係碎)都ok啦.

main course: Grilled Lamb Chops w/ Mashed Potatoes,Green Peas,Pearl Onions n Rosemary Jus +Pan-Fried Fillet of Salmon w/ Spaghetti,Basil,Cherry Tomatoes, Parsley n Tomatoes Prawn Cream

Lamp Chops 有3件, 唔羶,汁調得唔錯,唔會搶左羊既肉味,very good!

Pan- Fried Salmon spaghetti-已經好少食熟既三文魚了, 大大件三文魚扒有少少"鞋口" ,可能食慣左sashimi了.但個蕃茄汁真係好好味,本人一各偏愛白汁, 蕃茄汁要調得濃度適中又唔太酸係要d技巧既,絕大部份茄汁味既菜我都唔喜歡,此店做得唔錯,胃口大開.意粉份量亦不少, 有咬口,2位女士share食都夠飽

甜品係chocolate brownies w/ Berries Compote n Strawberry Coulis, brownies幾甜下, 幸好配以帶酸既汁伴食,感覺冇咁滯.

當日4人order左2個餐share食, 仲係以團購價買既,但食品水準有驚喜,亦冇將貨就價, 低讚!(不過我唔知幾
錢一個set,因為係我既生日飯)