昨日清明假期仍要開工, 好彩有人接收工兼陪食晚飯 , 本打算encore豚王, 但男友偏愛中菜, 最後選擇了[中國食送]

店好細,得6張臺,有少少逼,好彩有位又唔使搭臺.晚市有套餐, 2人餐有湯有2主菜,另加送一碟炒菜,白飯及糖水, 2人套價只係$208,不作他想了.
主菜選舉好廣,由肉類,海鮮,煲仔菜都可以揀, 如唔想配白飯又可加$10-$40改炒飯, 好好想想後決定:

是日例湯: 清保涼煲雞 <--冇味精靚湯,有家既感覺,正!

前菜四選一,我揀左椒鹽豆腐, 炸得外脆內軟, 好香口, 食唔停

主菜: 1) 煎銀雪魚 2) 龍井蝦仁
前者係半煎炸, 比較油膩,我原以為只略為煎香, 炸就油膩感重左, 幸魚肉唔"鞋",汁亦濃,ok啦;
龍井蝦仁大大隻,且好鮮味,係用新鮮蝦既, 好感動!可惜龍井太少了, 冇乜茶味, 俾d草菇搶左茶味.此仍龍井蝦仁而非草菇蝦仁, 要注意了!

炒清菜: 西蘭花 <----幾香,菜仲帶有些少甜味.

白飯改了瑤柱蛋白炒飯+($10),炒得超香,蛋白唔會老,飯算乾身, 仲有蔬菜粒及瑤柱絲, 平時只食一碗仔飯既我都添左一次.

糖水: 紫米露/木瓜雪耳, 我地都揀紫米露, 甜度好適中, 紫米有咬口, 好好味,自己只食左半碗,因為太飽了, 其他菜都要打包取走!

掛住食冇影相, 可惜, 唯有翌日即俾個讚此店,以免忘記了.

埋單連茶錢加一,2人共$240,如此質素以晚市計已非常低食!服務態度亦良好!(要彈係茶冇味囉~),anyway會想去試其他小菜既功力^^

經常出入APM,總係見哩間餐廳人頭湧湧, 決定一試,不過冇訂位要等好耐!

我們被安排坐餐廳外圍, 但餐廳內部似乎更靚,失望!等左咁耐有得坐都算了~
一坐低即刻點菜.食德國餐好多人會叫豬手, 不過我唔太喜歡食, 我男友一個人又冇可能食得哂,所以放棄,改點豬肉腸,另叫一碗海鮮清湯, 鮮蝦酥盒,煙三文魚薄餅,葡汁雞扒飯等共5個 食送, 好誇張!

先講個湯, 清甜有鮮味, 有1隻蝦及蜆, 飲完唔覺膩,GOOD.

海鮮酥盒好香,主要有鮮蝦及帶子,酥盒外脆內軟, 有少少汁, 味唔會好咸,好好食!

煙三文魚薄餅好多cheese,三文魚大大片,最驚喜係個餅底,超脆口,好似食餅乾咁.

豬肉腸同葡汁雞扒焗飯差唔多時間上臺, 前者越食越咸,後者汁濃,雞扒肉厚,皮有少少焦,肉保持嫩滑, 想食多d,只係太飽了,選擇打包薄餅及肉腸算了.

2人共花$420,食品水準有80分以上, 上菜算快, 只係等位時間真係耐左些少.最唔明白外圍有2張高臺及高椅(冇椅背), 可坐6人, 但冇人執臺,難度見住咁多人等位都唔用埋哩張臺?如食客普遍唔願坐就不如換左佢啦, 可做多d生意吖嘛!

去旅行前同男友搵食, 係廟街出站. 因為我拖住個中size行李篋,所以逼既餐廳/大排檔一定唔會考慮,我男友帶左我去一間蚊形既酒店開餐,原來就係[紅茶館].

餐廳就係地面o個層, 有2部LCD電視,仲有VIP房(min charge HKD$1000),我們當然冇揀VIP房啦,就係近窗位置坐下.
晚餐menu有幾個選擇,包前菜／湯／主菜／飲品。我們好快決定到了：

沙律我另外單點多個鴨胸沙律，因誤會了選左湯就冇沙律，湯係一般忌廉湯，冇乜特別就唔提了。主菜我點了燒豬仔骨（因正值皮膚皮敏感不宜海鮮），我男友揀左紅酒燴羊膝。我既燒豬仔骨醬汁惹味，豬仔骨唔會太老，份量for女士亦恰當。反而個紅酒燴羊膝水準就較差，羊膝又乾又鞋口，似係焗得太耐了，我男人食都搖哂頭，我建議佢同侍應反影ｏ下（話哂都叫酒店），侍應禮貌地話可更換過甚至另點其他主菜，最後我男友改點焗海鮮飯。

邊食邊等既過程中, 我們聽到3次"叮"一聲,應該係廚房分3次唔同時間去焗個飯,我男友未食已感製作認真.上臺了,焗海解飯好香,飯係炒飯底,面層海鮮唔會焗得太熟而乾身,口感適中,海鮮大慨有蝦,青口,墨魚仔,帶子粒等,飯好香,冇焦,夠乾身,有d蒲汁,男友食得津津有味, 幾近食哂整個飯

我們個餐冇包甜品,埋單時侍應突然問我們是否趕時間?原來佢為個羊膝出錯而送我們兩客心太軟作補償(嘩!!!太開心了)心太軟重朱古力味, 外屠圓餅尚暖的,好海棉既質感,一匙落下真係不得了,溫暖既朱古力傾潟出來, 好濃好香甜, 怕肥既我都不捨放棄,一口接一口食得非常滋味! 這個甜品可算是這餐飯的完美結局, 亦對哩間酒店加分不少.估唔到一間蚊型酒店都咁好service,抵讚!

友人知我喜歡食小籠包, 就帶我試一間樓上小店名"祥記'.當日一行3人未有訂臺, 幸好時間尚早, 侍應都俾到張細臺我們.

小籠包係必點項目, 其次點了魚肉餃,玫瑰雞,素鵝,雞絲粉皮.

素鵝我以為係"林"既,此店係脆既, 幾好.
雞絲粉皮合格啦,個粉皮好闊下.
玫瑰雞幾入味,亦係我食得最多既一碟,可能之前病了要戒食雞,剛痊癒便狂食.不過真係做得好,雞滑而有雞味,汁濃,食到唔停得口
鮮魚餃幾清新,冇魚腥味及魚骨碎,應該混左粉,對唔太食魚既我已經滿意.
重點小籠包,有少少失望.個皮唔夠薄,肉汁也不多, 唔係我期望既水準, 只值50分

其他菜色尚可,應該會再幫襯既

[

行過荷李活道,都被這餐廳的招牌吸引住, 重點係中環區$148既晚餐已包3個course仲有酒飲,點都要試一次,終於有機會了.

頭盤:湯及salad無乜特別, 我要salad,份量適中, 菜也新鮮.友人既南瓜湯幾濃.

主菜:我點香煎工文魚扒配薯菜, 友人點黑椒雞扒. 三文魚扒大大件, 煎得香又滑,冇腥味, 冇骨, 食得好滋味!反而友人的雞扒相對較失色了.

甜品: 似蜂蜜蛋糕既cake一塊,冇乜特別,難食囉,不過食得太飽,只係試左幾口就放棄.

值得一讚服務生主動為我們加酒,講明唔使額外收費.對食飯喜歡飲兩杯既我,係好欣賞既!唯一美中不足係同場有一臺外籍客人比較嘈, 餐廳又細所以好影響其他人.

每月一次fine dining,適逢有朋友生日,我們選了la maison(免開瓶費係其中一個原因)

餐廳氣氛唔錯,有情調, 又唔使好formal dress up,服務員都係港人,唔使講英文,感覺親切.
我們一行8人,有人遲到,服務員好helpful地問大家是否需要焗d麵包食住先,very good!麵包係即叫即焗既,又熱又軟,備有3款醬, 唔錯!

大家一致決定點3個course:頭盤,主菜,甜品.

chopstick:我既選擇係:
appetizer:mushroom duo(stuffed w cream sauce, parma ham & caviar)$88
main course: kurobuta pork w apple sauce (黑毛豬扒)$290,
dessert: apple pie w vanilla ice-cream$48

蘑菇前菜幾特別, 6隻蘑菇上分別有巴馬火腿及魚子醬,伴以忌簾汁, 魚子醬味唔夠,巴馬火腿搶味一點.

主菜我幾乎想選皇帝蝦,基於自攜紅酒,又有朋友願意同我share佢既皇帝蝦,最後選黑毛豬扒.黑毛豬size算大,分一部份俾朋友都夠食反而友人既皇帝蝦聲稱有3隻,但size令人失望! 肉質方面, 豬扒厚身及juicy.唔錯,如果可以煎得再香d更好.伴以蘋果汁嘛, 我唔係太食得到.....

甜品我選自製apple pie伴vanilla ice-cream,蘋果批夠熱,批身幾脆, 果肉香,唔錯!雪糕冇乜特別,係嫌細左少少.

我們當日有朋友生日, 佢份甜品有特別加祝賀字. 另外我們自攜5支酒,服務員不時為大家添酒/水,非常周到,而且慳唔少,大家都好盡興!
我會再來, 亦會推薦俾朋友.

*menu有明例收費, 由餐湯/頭盤/主菜/甜品都有齊價目,每項均有5個以上既選擇.不設套餐,每人最低消費$340,加一另計.

聽過銀杏館哩個大名好耐,自己又住得近,但一直都冇去試既動力. 剛遇着朋友生日,對方又未有餐廳提議,就由我決定.

行到門外已有伯伯侍應為我們開門, 我們一早訂了座, 被安排坐餐廳尾二那臺, 所有臺都是排於一邊的,一眼望完只有5-6張臺,最盡那邊牆用了落地大鏡,圖令空間變大,不過幫助唔大(好在樓上仲有一層)

睇餐牌時大家都心大心細,另一位伯伯自動為我們提供意見. 除左有套餐外, 部份主菜加一百幾十就可享湯,salad及餐飲.好大彈性.點餐都花近10分鐘才可決定.

頭盤先上salad, 我選[法國野菇田螺批伴有機菜],友人選[法國慢溫紅酒啤梨釀煙三文魚], 先上三文魚salad, 因田螺批要較耐時間焗.煙三文魚幾算大片, 卷成玫瑰花狀,好romantic 味道少少咸,可接受.紅酒啤梨亦特別, 啤梨肉滲滿紅酒, 相信花了一定時間去煮,有一小部份啤梨用心形模具cut出, 只望也覺甜! 食到3份1田螺批上臺了, 酥皮盒以芝士蓋頂,內藏田螺肉,一切開,香噴噴 , 田螺林身,如果可以大隻少少就更好.菜亦好食,用醋汁更健康.

餐湯我選[自家製龍蝦湯], 見佢字側有個皇冠既標記代理餐廳推介,當然要試啦!友人選[鮮蠔清湯],少見西餐廳有, 我試飲一啖,蠔味鮮濃突出,唔錯!我的龍蝦湯味道超濃,剛入口時還可以, 飲至近8成時而抵受不住要放棄, 改食伴碟的小龍蝦.小龍蝦賣相靚,可惜並不可口, 咸咸怪怪, 當裝飾品算吧.

主菜一:[美國極黑豚鞍扒伴金蒜 ],三大塊黑豚扒份量十足, 賣相靚仔,食指大動! 黑豚肉上清楚可見網狀燒紋, 燒得較乾身, 如果可以juicy多點更理想.伴以深紫色蓄薯蓉, 味帶甜, 但我喜歡以薯蓉伴扒類多, 跟肉類最夾. 以紫蕃薯蓉伴扒類有d驚喜.

主菜二:[芝士焗龍蝦拼T-骨羊扒]個名可能有少少錯漏,因為冇印在餐牌上,而係寫於牆上小告示板上.羊都有T-骨,好好奇.羊肉一般, 未算食過最好的.仲有豬 or 雞肉腸?!! 唔夠熱,香味大減,要扣分. 芝士焗龍蝦本應唔錯的, 可惜放涼了, 朋友分了一半結我試,肉厚彈牙, 相信把握熱食之時間,味道更佳.

餐茶點了earl grey,伯伯推有效仲消滯,幾好的提議,放工後已經不欲飲咖啡了.

最後再點一客薑汁梳乎里甜品作蛋糕,份量唔多,大家都太飽了, 免強食了一點.梳乎里口感比太X館好, 入口不會似吃進一堆泡.薑汁味也明顯.但放耐了就收縮, 影相要快手.

整餐生日飯氣氛良好, 侍應主動有禮, 講解詳細(有個別長者較長氣),食物賣相跟味道也屬中上,仲有唱生日歌服務.到此慶祝還是很合適的選擇.我也期待下一次再光顧.

TIPS: 早3日前訂座有9折, 或者HSBC card有95折.

中環既日本料理眾多, 走中高檔路線既選擇亦唔少,今次揀左鮨雄.

日本菜不外乎魚生壽司天婦羅及燒物, 面對眾多選擇難以取捨,倒不如點個套餐.中價套餐包括前菜,4件厚切tuna sashimi, 炸蝦tempura , 迷你海鮮井, 蝦既茶碗蒸,4件壽司及甜品一客.

前菜幾精緻,都係d醱瓜/醃菜之類,仲有一小碗木魚絲配豆腐,味ok.

tuna sashimi我只食2片腩位,較深紅的2片讓俾朋友食,魚腩冇想像中多油份, 還好係厚切, 口感滿足.

tempura用一小籃送上, 份量唔多,有炸蝦,炸蕃薯,炸茄子,炸冬菇,炸青椒等等,炸漿唔算好厚, 但唔夠熱,味只屬可以.

再來一度茶碗蒸, 賣相幾靚, 夠熱,但唔算好特別.而且又係蝦,有d悶

另一熱食係迷你井, 有帶子,尤魚及三文魚, 飯軟硬適中, 淡淡滲出魚香,好味,我食光一個

之後上4件壽司, 開始飽了 只食下2件.而且冇驚喜可言

最後甜品方面,我唔太欣賞. 雪糕冇問題,係d雜果有問題.竟然用類似罐頭雜果來伴雪糕?!!!我最討厭黃色既桃粒, 見到都倒胃 其實一球正中日本雪糕可能更討好, 真係多鬼餘,立時down grade左此中高價餐廳!

晚市消費唔平, 以上套餐都$600位(一位起), 另外order左支180ml熱sake, 盛惠$260, 2人消費近$1600,以此價錢我期望食物水準更高. 未試過既可以一試,畢竟環境,服務都幾滿意.

工作地點近雲咸街,經常路過此餐廳(其實覺得只係一間多老外聚集既酒吧),冇想過入來食晚餐.多得友人安排及團購既帶hit了

團購既套餐已經set左,我其實唔清楚套餐包括什麼美食.落單後,侍應立即送上4杯大啤 由於大家都唔愛啤酒,但跟餐唔可以轉飲品,唯有另叫4杯soft drinks

salad係traditional cobb salad w / bacon & blue cheese,好fresh而有層次既salad,讚!

餐湯係cream of carrot w/ scallops salsa, 湯夠濃, 色似南瓜湯, 仲有帶子(但係碎)都ok啦.

main course: Grilled Lamb Chops w/ Mashed Potatoes,Green Peas,Pearl Onions n Rosemary Jus +Pan-Fried Fillet of Salmon w/ Spaghetti,Basil,Cherry Tomatoes, Parsley n Tomatoes Prawn Cream

Lamp Chops 有3件, 唔羶,汁調得唔錯,唔會搶左羊既肉味,very good!

Pan- Fried Salmon spaghetti-已經好少食熟既三文魚了, 大大件三文魚扒有少少"鞋口" ,可能食慣左sashimi了.但個蕃茄汁真係好好味,本人一各偏愛白汁, 蕃茄汁要調得濃度適中又唔太酸係要d技巧既,絕大部份茄汁味既菜我都唔喜歡,此店做得唔錯,胃口大開.意粉份量亦不少, 有咬口,2位女士share食都夠飽

甜品係chocolate brownies w/ Berries Compote n Strawberry Coulis, brownies幾甜下, 幸好配以帶酸既汁伴食,感覺冇咁滯.

當日4人order左2個餐share食, 仲係以團購價買既,但食品水準有驚喜,亦冇將貨就價, 低讚!(不過我唔知幾
錢一個set,因為係我既生日飯)

星期六約了數位同樣愛食的朋友見面,搵餐廳首選免開瓶費的,中上環也有很多選擇,最後鎖定此地.

星期六晚飯時段既蘭桂坊冇想過會咁少食客,此餐廳位處某雪糕店對面樓上,竟然得我們一臺客 我想他們要好好做下宣傳功夫了!7:35pm4位到齊可以落order了.

頭盤大家都叫不同既salad,有鵝肝,,煙三文魚,蟹肉及蜆肉拚蝦salad.賣相很好.鵝肝幾大片,煎得香脆(友人請我試少少 ) 我既煙三文魚合格,另外2款salad係清(蟹肉)及少少咸(蜆+蝦), 大家都滿意

之後上餐湯,得2款選擇: cream mushroom or carrot chicken ,cream mushroom好多菇蓉,好香濃,carrot chicken清湯相對失色了,仲有d似金X雜菜雞湯

main course: 2位點燒羊架伴薯蓉,1位點燒牛扒,1 位點香煎鱸魚,燒羊架我要求7成熟,有dd over cooked ,不過紅肉我唔喜歡太生,算佢過關.食羊最最最怕係有陣羶味,此羊架冇此問題,肉質尚可,調味合到好處,good job!另鱸魚也非常滑,半點腥味都冇,我試過其他更貴價餐廳既煎鱸魚,都冇做得咁美味,相信魚肉既分佔去85% , 另外靠手勢及調味了. 至於牛扒,分量大大件, 友人又慷慨分d俾我試, 肉質與味道也屬於合格吧,對牛扒本人一向興趣不大.見友人食得滋味,應該唔會差

最後甜品係cream brulee ,中規中矩,如果size大番些少就更滿足了!

品嚐美食係一種樂趣,有酒相伴更可提升胃口.我們帶左2支酒來開餐,一紅一白, 有食有講有笑之下,2支酒好快就報消了.哩餐除左用指定信用卡有9折外仲慳左酒錢,4人埋單共$1170 ,絕對合理

tips: 餐廳10點後轉open bar任飲,會播clubbing music及嘈一點,如想繼續傾計10點後自行轉地方!