Bubbles Dream Cafe (尖沙咀)

聽男友推介bubble dream cafe食物水準唔錯, 終於抽空過尖沙咀一試.

首先地點唔算起眼(對我來講), 位於商場地面, 但非面向大街,唔刻意找都未必會路過. 餐廳環境尚算寬,氣氛浪漫, 有我最愛既絲絨sofa, 襯上浪漫"海膽"形波波吊燈, 唔錯

食物都係西餐為主, 當晚有二人餐menu都只係$2XX, 選擇豐富,頭盤,湯,主菜及甜品都包哂, 不作他想了.

二人餐包括: 蕃茄忌廉湯(是日餐湯), 煙三文魚salad,2份主菜分別係羊架及黑椒海鮮意粉. 蕃茄忌廉湯都係第一次飲, 一般人會用蕃茄於羅宋湯/雜菜湯上, 因為帶酸,原來用於忌廉湯上一樣美味,仲少左份油膩感,幾好! 沙律好少會出錯, 在此讚一下三文魚份量唔少, 夠大方. 主菜之一:羊架, 肉質比想像中淋,亦冇幾成熟之分, 有感overcook左了, 各人口味問題, 唔習慣太淋既羊架, 但調味係合格既. 另一主菜-黑椒海鮮炒扁意粉就非常讚! 意粉有咬口, 黑椒粒令意粉帶些少辣, 增添惹味;海鮮亦滿意, 蝦很爽口,配料亦算多, 令我食完一柱又一柱

甜品選左綠茶芝士餅及cream puff,但已經太飽了, 只食左幾口就食唔落了, 男友代為食, 見佢食得滋味,應該感到滿意.

合理既價格+美味既食物+老闆熱情既招待+舒適既環境, 下次或會帶三五知己再來!

廁所略遠,要到商場地庫盡頭,略為不便!

無敵家 (上環)

一向喜愛日本食物，拉麵係其一，食過好多係日本打嚮名氣再來港開店既日本拉麵，各有所長，而這間無敵家不止拉麵，忍唔住要評一評！

２人於７點左右入座，立即有位了，我們由餐前小食至雪糕都唔放過。以下係所點食物：　

芥末磯貝漬－即係ｗａｓａｂｉ醬配螺肉薄片，個ｗａｓａｂｉ醬完全冇攻鼻感，只有香味，螺肉片有哎口，好清新好特別既前菜，唔太好辣既我非常欣賞

溏心蛋－蛋黃大隻，流心蛋黃入口濃郁，正！

牛油果軟殼蟹沙津卷－軟殼蟹好脆，比想像中大隻，正呀！牛油果份量都唔少，個菜好ｆｒｅｓｈ，如果個汁係芝麻汁會更開心，哩個係醋汁。

雞肉軟骨棒－支棒肉幾厚，冇好大粒骨碎，雞肉有鮮味。最緊要係個汁，已加左蛋黃，自己拌勻後汁變得杰左，點上雞肉棒後，滋味大大提升！個汁似保ｘ爾差唔多杰，唔止鹹味，甜味，仲有雞味，食哂串雞棒都唔捨得放棄個汁。

雞皮蝦卷－雞皮燒得香脆乾身，蝦肉好爽，一咬之下，雙重口感，這個是經理推介既，因為雞皮有限，要有雞皮才可做，日日新鮮拆下雞皮，果然。。。。個蝦有雞皮既香，食後戀戀不捨，ａｆｔｅｒ　ｔａｓｔｅ悠長！

由於仲有個正既汁，我們點一客燒飯團來點埋佢。燒飯團偏細，圓古碌，外圍有紫菜包邊，一咬就甩。個飯團外脆內軟，有少少木魚香及芝麻，加埋個有雞味既汁，食到嘴ｌａｍ　ｌａｍ

拉麵係店既主角，一人叫一碗試下：全麥粒粉掛麵係推介，掛面係有個汁俾你，麵係一注一注浸一浸個汁後食既，所以汁好濃。講下個麵，麵身好粗似烏冬，麥粒就係分佈係麵身上，有少少麥香，口感煙靭，個汁食到係有ｄ魚餚既，鹹左ｄｄ，但冇口渴感。另一款ｂａｓｉｃ既豬骨湯拉麵平ｄ，湯既色係奶白色，麵條直身，立即先飲個湯，ｕｍｍｍｍｍ～～～好清甜，唔止有豬骨既味，仲有ｄｄ蔬菜既甜味，最最低讚既係個湯唔油膩，好怕油膩感重既湯，絕大部份拉麵店既湯都有此問題，有油係香，但太多就唔能夠多飲了，此店既湯我飲左大半碗，好滿足。叉燒係拉麵既主角，一碗兩片，幾大片，一圈肉一圈肥膏，以為係一般既味道，　食落只有啖啖肉，油脂唔多，真係有食燒肉既口感。不過這因人而異，女士怕肥會喜歡這個質感，男士可能愛肥叉吧。

最後留肚食雪糕，此店有售日本來貨既鹽雪糕及柚子ｓｏｒｂｅｔ，鹽雪糕個色淡藍似海水色，好幼滑，但鹽味未見出色，奶味反而多。柚子ｓｏｒｂｅｔ好ｆｒｅｓｈ，水份極多，柚子味像真度好高，亦唔會好酸，我鍾意！為這個拉麵晚餐畫上完美句號

店子裝潢好有味道，抬頭一望見到有日式紙搖。廚房係半開放式，廚師們忙着整燒物，但冇酒煙攻出來，抽風系統做得好，食多幾串都樂意！

早前多食放題，食物小家，限時限刻，侍應態度也欠佳，我明白太忙了，客人狂加單真係做唔切，但食野係享受，食到似快餐咁有咩意思呢，質素都難保持。以後會選質素好既日本餐廳慢慢食，貴少少都ｏｋ。

二人消費約６百幾，值得既，而且地址近我，食過番尋味！

好多款ｓａｋａ未試，都係日本引入既，好酒既一定要試！

Harlan's (尖沙咀)

6月之星生日, 相約一班女友人共同慶祝, 由於我們人多勢眾, 餐廳安排左張大臺於中間, 未能近距離欣賞港島區既美景.

high tea tower送上, 每款有2件, cakes/scones/macoron/sandwich/puff 等等.

先講鹹點: honey roast ham w whole grain mustard and pickles on rye bread- 火腿冇蜜味喎,冇咩好講

smoke salmon roll and horseradish lemon creme fraiche- 三文魚籽鹹鮮味突出, 個卷軟熟, 但冇檸檬味.

bacon leek quiche and mini mushroom flatbread -哩個幾香菇味, ok.

chocolate walnuts scone, cotted cream and seasonal jam -scone可以啦, 但唔夠鬆,有dd硬. jam & cottrf cream都正常.

之後食甜點: blueberry meringues-白色棉花糖狀既野,一口咬下太過甜了, 似硬左再凝固既糖霜, dislike.

strawberry and chestnut puff-賣相討好, puff一般都係配cream 或雪糕,佢配上chestnut 醬, 口感特別

home made mable cheese cake -芝士味濃,cake好軟身, 太細件了,想多食幾口.

passion fruit mousse -酸酸地,初時以為係mango mousse,好在唔係.食過多款甜點後,這個balance番個味雷,幾開胃.

chocolate cognac truffles-對太heavy既朱古力短一向怕怕,這個係甜,但冇乜層次, 唔識欣賞.

mini sponge-太細件,食左都留唔住個味.

daily macaron-脆脆地, 我食既應該係杏仁味, 甜度僅次那個白色棉花糖.

茶方面揀左洋金菊花茶,茶味唔夠,但飲落都舒服既.

以每人百幾既價錢可有咁舒服既環境high tea係值得既, 又可以訂座(最討厭要企係大堂等位又收費唔平既酒店), 只係服務態度一般, 唔太主動加水,笑容都麻麻. 當日整天大雨露台關閉, 室內都有好多吉臺,既然唔太忙就好招呼d啦.我們一行8人冇放飛機之餘仲有留credit card no.作deposit架.

電話訂座都至少等3個月, 上到去又唔full, 下次可試下walk-in, 話唔定有位.

泰農菜館 (九龍城)

甚少搵食搵到九龍城, 去到一定要食泰國菜,夠集中又有名吖嘛 ,有朋友力讚另一間既, 但門外等位人數太多了, 肚子餓等唔切轉往對面睇睇,見到泰農都甚多飲食雜誌介紹過, 又只需等一張臺,就決定試哩間先!

兩個人至少安排張4人臺吧, 只俾張細臺我們?!!! 即係想點多幾樣都唔使啦? 可惡.結果菜上臺時真係逼到爆. 點:既菜有: 冬蔭功湯, 鐵板煎蠔餅, 柚子沙津,海鮮粥.

冬蔭功湯係食泰菜必叫既,湯上臺了,唔係好大碗,2個人都飲到2碗多dd. 聞落好香,辣椒油薄薄一層, 一舀下大大隻蝦, 見到都流口水, 仲有好多菇同香炓等, 酸辣度balance, 幾好!

鐵板煎蠔餅大大件, 不過好厚粉漿, 而且係炸唔係煎, 咬下都係粉漿, 蠔就細細粒, 好在鮮味搭夠. 個人好怕油膩既食物了, 食到3份一已停口. 朋友似乎幾欣賞,落力地清埋佢.

海鮮粥已冇咩印象了, 相片意外delete左. 記得個粥係一粒粒米可見既, 有咬口, 似湯飯.味唔太鹹, 有咩料都忘記了.

叫左埋單後,侍應送左2碗糖水黎,應該係椰汁西米露. 肚子再飽都食左幾啖, 椰汁香滑啦, 我滿意.埋單$29X, 又唔貴喎, 仲有7拆折coupon送,一個月內再返兜就低喇~(可惜最終都冇時間)

食物既份量,味道都係ok既, 可以再來, 但會叫多三五知己, 食多幾款及俾張大d既臺我們會好d囉!

環境會嘈d,一大班人吹水傾計ok既, 但有野傾就未必適合!

西貢越南餐廳 (赤柱)

有感好耐冇入過赤柱行了, 平日夜晚同男友興起就入去食個飯浪漫一下.

到步已經接近9pm, 廣場落車, 即箭步走向美利樓搵食. 未收既餐廳仍有4間左右, 又要坐得舒服又唔想太貴又唔想食西餐就只有saigon了.侍應見我地眼望望,就好有禮地邀請我地入內.餐廳有分室內室外, 當晚都比較熱, 揀左室內卡座.坐下不久即有一籃麵包送上, 另有一兜炸蝦片,正呀 menu好快就到手, 商量後點左以下食物:

越式柚子沙津, 火車頭湯檬, 咖哩海鮮窩

柚子沙津好fresh,係泰國街頭好易買到既橙肉柚子,好多水份, 唔會好酸,份量都幾多,加埋生菜同個汁, 香,酸,甜味都有, 食個不停!

越式火車頭湯檬即係牛既幾個部位都有, 如: 牛肉,牛胃,牛筋腩,仲有扎肉. 檬粉最緊要係個湯, 嚐一口~~~~um,香,鮮,甘, 幾好, 個湯算幾清,油份唔多, 多食都唔怕. 如果肉味再濃一d會更好!牛肉只屬正常, 冇驚喜亦冇出錯, 配料可加多點蔥花或香葉之類吊味,一定更香!

咖哩海鮮唔夠大兜, 海鮮都係蝦,魚, 青口之類及薯仔,但有部份薯仔仲生生地既 個咖啡哩汁少少杰, 唔會好辣, 只係汁多料少, 用來點麵包食可以食好多片了.這個dish我們唔太滿意.

另外,炸蝦片大大片唔油, 好好食, 仲有臺上籃麵包唔錯, 包幾軟熟, 有方,圓及長條形,食哂籃麵包後都無需加單了.

2人埋單4百幾,合理既. 可能我們冇點貴價海鮮/牛/羊扒之類, 因人而異.

環境華麗優雅, 座位寬敞, 氣氛寧靜浪漫,服務態度良好, 二人世界比一班人來合適

食煙既可揀室外, 不過太熱時就忍吓啦~