加價唔緊要，但加咗價仲要減料就真係難以接受 見之前啲食評話「料多」、「扎肉厚切」，menu 幅相仲有四粒牛丸，五塊扎肉，鋪滿成碗粉，我明白圖片只供參考，但點都諗唔到今晚食呢碗只係得幾片勁薄嘅生牛肉，兩塊「薄切」扎肉，一舊細細舊嘅牛腩，唯一合乎期望嘅係兩粒牛丸（之前啲食評係三粒） 味道正常，說不上很出色，如果啲料嘅份量足返啲都可以考慮再幫襯 另外有唔少人推介嘅「越式三色冰」，淡而無味，真心唔明點解咁多好評🤔

幾個月前見到商場內掛咗個新招牌，寫住「匯景點心燒味館」，心諗難得藍田有點心店，一解疫情下少去飲茶少食點心之愁！ 開張無耐就幫襯咗幾次，幾次都係食晚餐，好鍾意佢啲點心同燒腩仔，例如係黑金流沙包、黑松露蝦餃，難得蝦餃同燒賣可以雙拼；燒腩仔都好味，兩個人叫半斤剛好 點知，最近再去幫襯時發現晚市竟然唔再賣點心得返燒味同小菜，而且燒腩仔亦無得叫半斤，最少都要叫「例牌」（比半斤大份） 原本係一間不錯的點心店，點解晚市要自降身價，同其他茶餐廳一樣只賣小菜呢？可惜可惜

台灣夜市令人食過翻尋味，但呢間「夜市」就一食不回頭... 叫咗夜市常吃嘅鹽酥雞同麵線，鹽酥雞不過不失，炸粉頗多，炸得好的便皮脆肉嫩，但亦有不少只有粉；麵線就更加平平無奇，勝在有蠔仔，但整體而言無咩味 另外仲嗌咗糖心蛋及茉香奶茶，糖心蛋不是糖心的，明顯是overcooked，雖然上面粒核桃為它挽回一點分數，但我本是衝著這在餐牌上看起來很好味的糖心蛋而來的，未免有點失望....而少甜奶茶則變無甜，只有極淡的茶味 埋單每人近$160，真係唔太值....

今日晏晝幫襯，點咗肉鬆脆多、粢飯及豆漿，等咗近廿分鐘，見隔離枱遲過我地點，但兩碗麵都已經到咗，咪追吓單，點知真係漏咗單

其實漏單事小，但態度事大。因為有啲趕時間，我就話可唔可以快少少。點知個侍應大叔竟然好粗魯咁話「食野係要等㗎啦，唔等得嘅唔該...」（指住門口）

甩單嘅餐廳見得多，但甩單仲要態度咁囂張嘅真係第一次見！平心而論，食物係好食，特別係肉鬆脆多士，但惡劣嘅態度已足以令人失去品嚐食物嘅興致。可惜！

餐廳前身是於迅達大廈的「八月天」，還記得第一次幫襯是因為那被某食評稱為「可能是全港最好味的奶茶」吸引而來的

除了那沒有令我失望的奶茶外，另一俘虜我味蕾的絕對是坊間平民餐廳少見的「法式油封鴨腿」～五十幾蚊可以享受外脆內軟又多汁的鴨腿，配上口感不俗的黃薑飯，成功吸引非在附近返工的我一再光臨！

約了朋友在這裡食tea,本來只打算飲杯野嗌少少野食,但見到一碟肉醬意粉都過二百蚊時,唯有轉食"較抵食"的tea buffet...

食物款式唔少,冷盤只係揀左煙三文魚及煙三文魚多士,味道不錯,不會過鹹

睇其他食評話有魚生,但今日就唔見有,只係有少少壽司。不過見到飯的比例很大,不想太飽肚,只係試左卷物,還可以吧,不太特別

今日有唔少包點選擇,比較吸引嘅係葡撻,拎左一舊,好味!焗得啱啱好,好香酥油味,值得一試~

炸香蕉只係一般,芝士焗薯皮係自己加肉醬,所以保持香脆,唔會未食就淋晒,讚!熱盤試左咖哩羊腩,韓式海鮮薄餅及法式煎三文魚扒,前二者不過不失,但三文魚扒真係好好味!!好鍾意內裡煎至半生熟的口感,非常滑嫰,會令人想再添食!另外炸帶子亦不錯,配上紫菜、沙律汁及照燒汁令平常的小食變得吸引~

今日甜品選擇唔多,推介芒果酥皮拿破崙,芒果香甜又軟熟,酥皮亦香脆,入口可以聽到酥皮破裂的聲音,一流! 不過今日服務就真係好一般,無主動俾水,紙巾亦欠奉,最重要係無提過有餐茶,後來睇返其他人嘅食評先知有餐茶,傷心.....

曾幾何時我係羽壽司ge 忠實fans,但經過今晚真係對佢徹底的失望!!!

先係一碟海膽軍艦壽司,menu 張相明明係海膽舖滿件壽司,我之前食過亦係咁,但今晚竟然無啦啦多左兩塊青瓜,佔左1/3 位置!!而剩返0個2/3 亦都只係得de 海膽碎,同張相絕對係差天共地! (可惜唔記得影相...)忍唔住問waiter,佢只係一句"menu 寫左相片只供參考" ok,fine,佢咁講我都無野好講!咁即係下次2/3 係青瓜得返1/3 係海膽都無得投訴啦!之後有碟香葱吞拿魚腩軍艦,估唔到呢碟仲得人驚!!de吞拿魚ge 色好似罐頭吞拿魚醬咁!!!! 忍唔住試左舊,de 味真係唔多對路,又再問waiter,今次問另一個,好彩呢個好de,肯同師傅講,結果終於換左一碟正常的...除左呢兩樣外,無論係炸蝦卷,又或炸軟殼蟹手卷,都係凍冰冰的.....失望透....唉~

兩個人想悠閒地食lunch,唔想同其他人迫,見到呢度有閣樓,感覺好似唔錯~~

去到發現唔太多人,閣樓仲要無人,結果我地兩個包左場~~

閣樓有兩張sofa,有少少board game,有de 書同雜誌,又有音樂,好好hae~美中不足係無窗景,感覺比較焗促.....講返野食,我地分別嗌左照燒牛柳配薯菜,以及吞拿魚焗飯~照燒牛柳一de 都唔韌,仲好入味,好好食~~雖然唔大塊,但加埋de 薯就啱啱好~de 炸薯亦有驚喜!炸到外脆內嫰,放耐左都仲脆脆地,一條都唔捨得剩....另外吞拿魚焗飯都好味,連我唔太喜歡吞拿魚的都覺得可以一試~~

如果中午要搵一個地方hae,呢度係唔錯ge 選擇~

因為0係網頁上見到呢個地方幾多野玩,所以帶左一班小朋友去,諗住睇羊仔,踩單車等。

先講食物,質素還可以,牛柳粒值得一讚,夠"淋"又幾入味,丸都算多款式,燒芝心丸好味~其他就一般水準啦,不過不失,多春魚夠大條,但有de 骨唔係好食得。

但設施方面就好有問題!先係無單車租,網頁上明明寫住有,但去到見到無開,問de 職員只答我"唔清楚,係另一個老細經營"!平日唔開可以理解,但星期六明知多客都唔開就難以明白,附近亦無其他單車舖,結果班小朋友無得踩單車...

除左無單車,亦無羊仔,只有兔仔幾隻...問佢地點解,又係只答我"唔清楚,係另一個老細經營"!! 網頁上說有士多啤梨園,去到又話咁熱係無士多啤梨(但網頁上無說明)...幸好,0係咩都無得玩ge 情況下被迫去左燒烤場後的一個石灘,風景一流,有好多海洋生物,啱晒小朋友~~

每位$80 還算可以,但網頁上無寫要開爐費$90,結果每人都要加多約$10,又係有少少被騙感覺...

一大班人去澳門玩,出發前當然要search 定有咩好食~0係openrice 見到呢間餐廳幾受歡迎,雖然之前未聽過,但都扑鎚lei 試一試

餐廳位於下環,老實說交通不算方便,搭的士時有司機仲話搬左去新口岸,好彩無信...

唔方便有唔方便的好,公眾假期都唔駛等位~~~

既然叫長城燒烤當然要試下de 燒物,今次試左碟燒風鱔、燒豬手、燒牛仔肉,另外仲有芝士薯蓉、黑椒牛仔絲炒麵、馬介休炒飯、魷魚鬚、炒生菜等~

燒風鱔:皮脆肉嫰又無骨
燒豬手:都幾大份,唔太醎幾好味
牛仔肉: 一致好評,燒得香又嫰滑
芝士薯蓉: 好香芝士味,有點焦好好食

其餘炒飯、炒麵等都不錯

埋單每人都係五十,抵食!