肉料理とワインCARVING (上環)

好耐都無過上環食嘢，上環比我既感覺係多cafe，今次黎到肉料理とワインCARVING，睇個名似係食肉為主，入到去之後我覺得係日本料理omakasa

自家漬前菜今次係辣青瓜，面頭帶少少白芝麻粒以增加香氣，青瓜爽口帶點微辣，用黎送酒應該一流

第一味係CAVIAR WAGYU TATAKI，半熟日本A5好薄同油脂豐富，加上紫菜同蘿白絲酸酸甜，有少少似壽司

第二味係塩漬原隻蝦夷鮑魚配高湯凍，都係凍盤， 鮑魚夠鮮同彈牙。高湯凍好有鰹魚香加上柚子皮澀澀地都幾fresh

第一次食約克郡布丁，我覺得好似puff 咁，微微牛油香，質地鬆軟又有彈性加上三文魚子既鹹鮮同明太子mousse，我好欣賞

本枯節味來粟米吉士湯，呢個超值得推介，粟米湯濃到似custard加上粒粒粟米，好想飲多幾碗

燒A5日本和牛（自家生曬蠣醬，時令日本蔬菜）
蠔汁唔會太濃味蓋過和牛香，和牛煎得超正，外皮香脆，鍾意食肉既朋友一定滿足

塩漬銀鱈魚釜飯
日式煲仔飯，飯焦係另外先整再煲飯， 銀鱈魚嫩滑但無咩味道，高湯醬油可以再多少少，底望落偏油但可以接受

炙燒水牛芝士紅豆燒餅
銅鑼燒整得夠正，十勝紅豆做餡好普遍但Mozzarella Cheese係第一次食，成件事食落無咁膩，overall 黎講成餐飯質素幾好👍🏻

麻甩系(花甲粉) (荃灣)

麻甩系主要係做外賣，裝修好得意有好多彩色燈泡，位置近荃灣廣場，主力賣花甲粉但有唔少既小食同埋飯類

第一次食花甲粉最簡單快捷就揀招牌花甲粉！入面有花甲、娃娃菜、芽菜、豆卜、金菇，湯底好濃蒜香味，清清地又可以飲下D湯。

另外叫左韓式泡菜豚肉年糕夠辣同有唔少既豚肉不過我自己就覺得肥左少少但幾鐘意有爽口既椰菜，年糕似上海果款比較煙韌，雞鎚好香口夠味有少少似土匪雞翼既味

Espresso Alchemy (荃灣)

荃灣愈黎愈多cafe，Espresso Alchemy係荃灣如心廣場一期，開左好有段時間
，有落地大玻璃窗夠光猛又夠chill仲有卡位可以揀。

平日有 Lunch Set 可以擇，主餐有配咖啡一杯或者加少少錢轉其他野飲

今次整下新野炸魚系列，“炸魚漢堡伴自家製椰菜沙律”，兩塊魚柳炸得酥脆而且熱辣辣，burger 有生菜同蕃茄令到成個包無咁膩再加上那酸甜的椰菜沙律，一個人食都幾飽下

另外，炸魚薯仔南瓜沙律，薯仔唔會太淋不過就覺得醬比較多、南瓜比較少但味道好好

Matcha latte 味道不錯反而iced milk chocolate 比較多奶，朱古力味淡左D

P.S 咖啡值得一試，輕食唔錯

十和田總本店 (尖沙咀)

十和田唔係第一次食，再食係因為性價比高，呢到嘅壽司飯係醬油漬，唔係平時既白醋飯。

超特選壽司拼盤 ($318)，壽司拼盤會跟茶碗蒸同味噌湯。茶碗蒸夠熱同質感滑，入面有粒銀杏但少少苦，穴子壽司超級長但肉質幼嫩只不過醬汁太濃味～
.
吞拿魚壽司拼盤($328)有赤身壽司、吞拿魚腩壽司同大吞拿魚腩壽司，油脂豐富，簡直係一大享受～ 另外6件拖蘿蓉小卷都好香口好好食～
.
驚唔飽既話仲可以有烏冬同丼叫，2個人食拼盤份量都夠，要講一樣野就係張枱太細放左2 碟拼盤都無曬位

鬼金棒 (銅鑼灣)

鬼金棒裝修正如其名掛住好多鬼面具，另外用QR code電話點餐又可以減少人手同面對面接觸，今次叫左沾麵同增量叉燒x2辣麻味噌拉麵試下，落單時可以調節辣度同麻度。
食拉麵真係好難唔加味玉，我諗呢間拉麵店好難會唔滿足肉食控因為有得order超大嘅增量叉燒，比平時食開嘅叉燒厚身，一層層既五花肉夾埋軟熟嘅一層又層瘦同肥嘅肉，肥美香口又入味。沾麵可以吸哂啲湯汁，油脂味濃郁不過個湯有啲唔夠熱，面頭辣椒粉反而加重左個苦味～