在openrice上想叫荃灣站附近的台式奶茶自取，看到這間有個鳳梨酥系列，試一試叫了一杯黑金奶茶鳳梨酥。 細看可能是剛開店，店內還挺乾淨的。等了幾分鐘就做好了。 外表非常討好！底層黑糖珍珠，再佈上幼滑的奶茶沙冰，幼細的鳳梨酥餅碎，再一層既奶茶沙冰及餅碎。 奶茶沙冰茶味剛好，不會太甜及太少茶味，黑糖珍珠又軟又有咬口，加上餅碎，口感及味道都不錯。但略嫌欠缺鳳梨的味道，及餅碎過了15分鐘變軟後口感不及剛上時。 整體還是不錯的，下次再試其他茶。

聽友人說朗豪坊開了一間精品蛋糕店，為滿記甜品另一分支，開業期間不時推出新產品，而且坐位寛敞舒適，因此找了個空檔到來。半自助式的餐廳，入門口直直走到蛋糕櫃前，款式林羅滿目，價錢由＄2X到＄40附近，飲品另點，沒有套餐。選了個自已比較喜歡的綠茶白朱古力慕絲蛋糕，先付款取號碼牌就自已找個位置坐。門面雖小，但內裡原來有3﹣4張大長枱適合三五知已擁有自已的空間，亦有多張2／4人枱約可容納20人，蛋糕店而言是非常大。蛋糕既外表就好似女士既帽一樣，仲有珍珠圍邊咁，好靚。
面有一塊軟身既白朱古力加上銀薄點綴，簡單又高貴。切開，明顯見到外層綠色一粒粒蓋著整個蛋糕的東西，這些都是綠茶味的白朱古力，所以帶少少硬同甜味，但係綠茶味都好突出，可以中和唔少甜味，成個蛋糕我最鍾意呢個部份。
裡面先係一層綠茶慕絲，再一層白朱古力慕絲，而底層是簡單的海棉蛋糕。兩層慕絲入口順滑，綠茶味跟白朱古力味很到位，不過不會太甜太膩；底層的海棉蛋糕反而太乾身，為整個蛋糕最格格不入的地方。

食完成個餅，老闆娘走過來問意見，非常有禮及用心。希望來緊會有更多款式推出：）

喺旺角行人街行得耐，想搵間cafe靜靜地坐下，呢度附近有既大概係朗豪坊既100bites同其他茶坊，家樂既18grams，新開懷舊風既starbucks，同埋荷里活中心既pacific coffee。連鎖店式既咖啡店，勝在坐得舒服，周圍都有一間；而近年亦推出不少層出不窮的新咖啡及新甜品小吃，就來到最就腳既pacific點了個金寶批。這個批必須烘熱才吃，面層既肉桂金寶鹹中帶甜，金寶有點像曲奇餅碎，外脆內軟，加上少少既肉桂味，確實唔錯，但若不烘熱就一定沒有這個口感。批中的蘋果泥偏甜，底層批底是最不討好，太薄太濕，不夠鬆脆。

但是這裡的環境確實唔錯，可能沒有太多人知道這裡有一間店，所以約二十多個座位只有4﹣5人。

自從旺角開左18grams，很自然想嘆好咖啡時就會走到這裡，再加上有all-day breakfast，唔想出去中上環既時候實在係太方便了！磨菇。蕃茄。炒蛋。茄汁豆。拼多士
望落去份量都唔少，而且每款配料都有幾多。
磨菇味好香，沒有草腥味，仲有少少牛油香味；炒蛋都頗滑，而且份量都唔少；多士烘得好脆，不過無味既；煎過既蕃茄仔幾甜。來到呢度當然要叫埋杯意式咖啡，是日點左skimmed cappuccino，奶泡打發時可能比較高溫，雖然氣泡都細密，但係放左一陣之後某些大既氣泡升到上面，令面層既拉花有少少走形。不過味道方面，水準仍保持，咖啡帶一點甘香，口感尚算細滑。放鬆心情來這裡飲一杯，消磨時間確實不錯。

在尖東尖沙咀附近，找一間可以輕鬆下既cafe似乎都唔係易事。Crema地點就腳，方便，而且店舖唔算細，就算坐得耐都唔會有阻住佢做生意既感覺，所以去開呢區都鐘意來呢度坐下，飲杯拉花拉得靚靚既cappuccino 不過早餐就一次都未食過，今日就得登早少少起身食返個靚早餐。

九點鐘來到，全店大約有十位客人用餐，唔算好多人。因為呢度係地面落一層，唯一淨係得一個角落有個天窗，所以二話不說就走左過去。侍應主動收拾枱上，遞上餐牌，很快就選定B3：磨菇芝士奄烈配茄汁豆及穀麥多士，另外加左＄8飲意式泡沬咖啡（仲可以轉脫脂奶）。等左大約5﹣10分鐘，早餐先上場。同相片差少少啫，不過都可以接受。先食個奄烈，切開明顯有唔少既芝士喺入面，磨菇切成片既，不過食落蛋唔香，多油；磨菇出左D水，影響芝士同埋蛋既質感；蛋同磨菇都無乜味，幸好有芝士既鹹味，整體只是麻麻，下次會選擇炒蛋就算。穀麥多士反而幾鐘意，輕微焗過既，仲有少少甜味，就算唔加牛油都OK。好喜歡呢度既拉花，每次見到都好開心，barista好有心思，唔忙既時候總會整唔同既拉花：）奶泡都幾綿密，但係唔算好厚實，所以飲左一半，個拉花都散散地，奶既比例比我偏好既多D，所以Crema既甘苦味唔太濃，不過質素都好過好多連鎖店！

埋單只係＄43！
有環境，有少許足夠既服務，有穩定既質素，不錯既開飯之選：）

久聞Chez Shibata蛋糕精緻又美味，不過店舖在圓方確實有點卻步。自上次到Clover食過美味既Mont Blanc，一直難忘，趁閒日休假，花點時間到這裡一趟！

呢度買蛋糕堂食會收10﹪，但係店內只有三張二人枱，所以都係外賣，搵個地方坐低慢慢嘆！外面有兩件細細既布朗尼，外頭少許乾身，裡面比較軟身，朱古力味唔會好濃。食完外面既裝飾，切開入面，層次都幾分明，先一層栗子蓉，香蒂莉忌廉，朱古力外層既蛋白餅同有少許焦糖既蛋白底。
栗子蓉好綿，帶少許酒味，加埋入面帶少甜既香蒂莉忌廉特別幼滑，最討好既係下面既蛋白餅，好似麥提莎裡面一樣，乾身，好脆，沾上旁邊的栗子蓉一齊食有D脆脆地既口感，不過都幾甜。細細個蛋糕，食完都滿足：）

YAHOO團購BABY BLUE既晚餐，只需要＄128就可以有個海鮮拼盤、湯、主菜、甜品及餐飲。呢度既質素一直都好好，所以二話不說就買左兩張，仲預早打來book定位！職員態度好好，即日仲有打來再confirm booking。兩個人可以試晒兩個主菜同甜品，餐湯有三個揀：周打蜆、羅宋同埋磨菇，我地就揀左後面兩種。點好餸，過左大約十分鐘就先上叮熱左既餐包配自家香蒜牛油。牛油真係好香，蒜蓉味非常濃郁；不過餐包唔夠鬆軟，比較乾同硬。

歐陸海鮮拼盤上場！好豐富！五種海鮮最欣賞螺！我本身唔係太鐘意食，不過佢呢度個度真係好新鮮，又軟又煙刃，而且雪到凍凍地，正！蠔就細細隻，稍嫌大隻XD 不過都幾鮮！蝦、青口同埋蜆就一般般！不過都好新鮮！羅未湯，好似幾足料，不過唔夠味，濃多少少好D。主菜上場！有我至愛既香煎帶子配黑松露意大利飯同埋澳洲T骨牛扒。
先講意大利飯，帶子好大粒，生熟度剛剛好，帶少許鹹味；黑松露極濃，又有少少芝士同埋忌廉既甜味帶出左成個意大利飯既香味，D飯又煙煙刃刃，帶少少咬口，唔會太生，好味！
另外既T骨牛扒就稍為遜色，七成熟既牛扒，上到來差唔多八成半，最重要係仲有好多根，切又好難，食既時候又好難，大打折扣！雖然入面都仲有少許肉汁，但係真係無辦法食落口。。。最後，甜品！法式焦糖燉蛋同埋意大利芝士蛋糕！
燉蛋面既焦糖好脆，雖然燉蛋已經唔熱，但係內裹既質感好似吉士咁，濃郁又帶少少甜味，食多幾啖又唔會覺得佢好漏，正！
意大利蛋糕，無芝士味，太濕，唔好食。。。

不過若果一般出街食飯，呢個價錢確實好優惠，而且侍應不斷加水，態度一流，雖然係團購，都無話要等位或者較差既待遇！

Tea Time除左CAKE SET之外，呢度仲有YOGURT SET，不過就淨係Dessert Pot，另外跟泡沬咖啡就加＄7。Dessert pot既選擇唔多，得番最後一個蘋果焦糖乳酪，同埋叫左杯skim milk cappuccino。（＄36＋7＝43）超大杯既cappuccino，估唔到跟餐都咁大杯！面頭有幾塊細既燕麥紅莓曲奇，已經唔脆，不過中間既燕麥好香；曲奇底下有焦糖味既乳酪，超好味！估唔到焦糖同乳酪係咁夾！好滑，不過就甜左D，但係夾埋餅碎就剛剛好！食到最底層有少許蘋果醬墊底，但明顯加左好多糖，所以食左一半已經甜到頂唔順 ＝ ＝ 奶泡約有1cm高，但係比較粗糙同埋鬆散，不過底下既咖啡就好香，帶少許苦澀味，至少牛奶既比例還不錯！

坐左兩個幾鐘都唔full，即使係銅鑼灣心臟地帶，都可以咁容易搵到位！待應亦無因為坐得耐而有趕客既行動！一定ENCORE ：）

難得有人奉陪這個以甜品為著名的自助餐，即使早一小時也先致電保証不會期待落空！幸好閒日不會有太多客人，而且到場後發現安排了近窗邊的位置，感覺非常開揚及放鬆，非常適合嘆下午茶！

自助餐在餐廳的另一邊，位置不大，左邊為鹹點，右邊為甜點。先介紹左邊：第一區域就是這些法包，餡料包括碎蛋沙律、燒牛肉及牛柳，餡料跟包的比例差不多是一比一。燒牛肉很稔，配上適量的蔬菜，增加食物的水份，令口中有足夠的水份，帶一點點鹹味的餡料給予少許飽足感，味道因為沒有什麼醬料而沒有什麼特別。沙律為我的至愛。羅馬菜、火箭菜等的蔬菜伴在沙律盤中，汁料可以選擇凱撒或酸醋，配料有紫洋蔥、橄欖，另外還有煙三文魚。沙律菜都是非常新鮮爽口；紫洋蔥不會很辣，入口帶少許甜味，非常易入口；煙三文魚不會太鹹，但明顯在它上面的油份很重，口感是很順滑，但多食有點膩。汁料為健康想我選擇了酸醋，而且裡面有些碎酸瓜，少少已經可以拌很多菜一齊食都夠味！第二碟拎左多D鹹點，
英式鬆餅外層比較硬，但內裡很鬆軟，密度比較低，牛油味唔重，外脆內軟，配上自家製的牛油，可以改善太乾身的鬆餅，食完之後可以再即刻食第二啖！正！
甜酸蝦仁，D蝦好大隻同埋爽口，加上酸酸甜甜既汁好開胃。
蝦餃，皮薄唔算好薄，蝦好爽口，唔會有腥味，反而有少許甜味。
雞肉批，呢個唔係太好味，批雖然唔係好大，但切開佢只係得少許餡，有很多空位，而且沒有醬汁，所以只係乾掙掙，唔好食。呢度出名既迷你漢堡包，內面除左一層牛肉，仲有醃過既蕃茄同埋少許生菜絲，包面比較硬，但牛肉很JUICY！加埋蕃茄少許甜味，正！酒漬車厘子配鴨胸，車厘子好入味，只係帶少許酒既甜味，鴨胸味道很清淡，無乜香味，無乜特別。

鹹點真係唔多，甜品先係呢度既重點！有一整板既蜂蜜！好奢侈既感覺呀！不過因為動手有點難，所以無試到。三色MACARON同埋綠茶紅豆蛋糕。
三個顏色既馬卡龍，紅色﹣紅桑莓、綠色﹣綠茶、黃色﹣檸檬。馬卡龍很鬆化，杏仁餅面層很鬆，底層比硬厚同埋硬，整個餅都很甜，但幸好紅桑莓跟檸檬餡帶一點酸，所以不會死甜；綠茶本身的少許苦味也可以令它減少一點點糖份的存在感，但是。。。每個口味試一個就真的夠了。
綠茶紅豆蛋糕，綠茶味的海棉蛋糕非常乾身及鬆軟，綠茶味很香，配上紅豆忌廉可說是強烈的對比，但我會比較喜歡帶一點濕及煙UN像蛋捲的口感。各式各樣精美既MOUSSEE，但實在太甜了。。。蘋果批表面的蘋果很甜很脆很爽口，焗過之後仍可保持未焗之前的口感，一流！而且批底香脆，帶少許香甜的餡料，一流！新鮮焗製的窩夫！非常軟熟，而且有一點點煙UN，加上非常凍既朱古力雪糕，焗過香甜既杏仁片，一流配搭！
另外還有很多朱古力供應，提子乾白朱古力，大量既提子乾令本身好甜既白朱古力去掉多D既糖份；圓形既白朱古力內裡為白朱古力TRUFFLE餡，呢個食落真係頂唔順，超甜！死甜。。。牛奶朱古力同埋黑朱古力就好香濃同埋佢地配既係又香又脆杏仁同果仁，完全唔覺得佢好甜！正！生果選擇唔多，只有呢三種，不過佢地都好甜！食完咁多甜品，最後ENCORE左個沙律清清喉嚨！加埋杯咖啡！完美！：）

『不走不知，原來新城市有一間曲奇四重奏』這是朋友對我說的。這間曲奇四重奏開業至今大約已經半年有多了吧！位置在L1的Starbucks隔離，以前奇華餅家的位置。細小的一間，裝修利落，入門左邊是一整排供客人試食的曲奇餅，右邊就是收銀處。此時，職員姐姐在推薦客人先試一下各種味道，也會因應你個人的偏好推薦你幾個口味。看了一圈，試了白朱古力南瓜子曲奇，朱古力味道不濃，亦沒有明顯的朱古力粒，只有淡淡的朱古力香氣；相反，南瓜子份量十足，加上曲奇的牛油足夠，香脆鬆化，不像金罐牛油做的擠花餅，這種是比較硬的切曲奇。慶幸這個曲奇的牛油不會太重，吃完手中也不會有油或口中也不會太膩！姐姐再推薦我幾個類似的口味，但也是覺得這個最好XD買了一包＄62，份量都不少，約有三十片曲奇。因為手切既關係，內裡的曲奇有厚有薄，但個人喜歡厚一點有咬口！